مرت السهرة بعدها عادية بدون صدامات بالرغم من إنو ماكانو منطرحين شديد، كان في طابع الرسمية في اللقاء، في آخر الليل ماصدقت يسرية خلصت وطلعو منهم ومشو يكملو سهرتهم في مكان تاني، وعكس ماكان متوقع عادل يسرية نهائي ماسألتو من الصورة ولا موقف اهلو الواضح منها بس فضل الموضوع في بالا وقلبتو في راسا كتير..
قعدو يتفاكرو في موضوع زواجهم وقررو يعجلو بالعرس في اقرب فرصة..
يسرية إنطبعت صورة رباب في زاكرتا ، وختتا مثال إنو عادل بايع وماباقي على شي حتى الجمال مابشفع عندو فقررت تعاملو بي فهم تاني، كان سر تعلقا بي عادل إنو لقت فيهو راجل مختلف ماعاملا زي ماكل الرجال الفي محيطا بعاملوها واللي هم دايماً دايرين منها حاجة وهي اصلاً بتاعة صحبة وقعدات وطلعات ومعارفا كتار من كل طبقات المجتمع ،أي نعم هي عايزة تشغلو وتنفعو بس هو ماطلب هي البادرت بل اصرت عليهو تساعدو، وبعد فترة تعارف قصيرة طلبا للزواج وقتها عرفت انو زول محترم وماعايز يصاحبا فقبلت تتزوجو... بس ياترى شنو نتيجة الزواج ده حتكون.....
عند بيت عادل قعدت الحاجة هاجر وبتها فدوى يتكلمو في مضمون الزيارة
فدوى بغيظ : فرق الثرا من الثريا
هاجر : قصدك شنو يعني
فدوى: مابتشبه رباب ابدااا ابداً
هاجر: يابت شن جاب لي جاب دايرة تقارني دي بي رباب؟ ماممكن طبعاً ولا ببقى الشي ده
فدوى : بس للأسف رباب قسمة وانقطعت البركة في بناتا الجابتهم نورت بيهم حياة ولدك
هاجر : عادل شي مضيعو غير ركوب الراس في اي شي ده ماف، لكن على كيفو المابسمع ياكل لمن يشبع
فدوى ضاحكة: غايتو ياامي شي بسري عني غير امثالك دي مافي
هاجر ضحكت وقالت ليها : انتي يالممسوخة البتمرقي الزول من كدرو وزعلو، راجلك مالو ماجا جاب العيال لي حسي ؟
فدوى : قالو ليهو دايرين يتفسحو لقوني مافي واتمنو فيهو منى الليلة هههههه، كلمتو اني بايتة معاك وقال لي كويس والعيال ببيتو معاهو
هاجر : سمح زين مافعلتي مااظني الليلة تغمد لي عين براي
فدوى : الله المستعان ياامي كل شي مقدر ومكتوب....
/////______/////_____/////
في بيت رباب أسعد جاهم زارهم بعد ضمن عمتو رجعت المرة دي، لماقعدو بعد السلامات رباب قالت: كيف ابوك وامك عاملين شنو واخوانك
أسعد: كويسين الحمد لله، طولتي الغيبة علينا ياعمتي المرة دي وحتى شيري ونوڤا خلونا
شيرين: لا والله بس بالجد مضغوطة الفترة دي مع الجامعة والجري والشلهتة مافي شي تاني يعني
