المسا لما رجعت شيرين البيت لقت رباب ونيڤين ظابطين شاي اللبن واللقيمات بصوص الشوكولاتة طوالي قعدت ودخلت قطعة في خشمها وقالت وهي لسة بتلوك فيها: أممممممم! تسلم يد العمل التحفة ديي، وبعدين بتبالغو تقولو نمشي العقد وتزيدونا كيلوغرامات بالطريقة دي؟ اللبس ماحايظبط علي تاني
نيڤين ضاحكة : وهو ال حايعبرك ولا حايشوفك منو أكلي أكلي
رباب : لااااا والله أنا بناتي ظاهرااات زي عين الشمس ما شاء الله الله يغطيكم من العين بالذات شيرينة قلبي دي
طوالي شيرين حضنتا شديييد ونيڤين قالت ليها بالهمس : برضوو ما بعبروك هههههه
رباب قالت :طبعاً عشان خاطر تظهرو في أحسن حال قدام أبوكم وأهل أبوكم اشتريت ليكم فساتين تححححفة كل واحدة بي لونا البتحبو
شيرين: لي كلفتي روحك ياأمي تلقي حسي الأسعار نار
نيڤين: أيوة صح ماكنا محتاجين ممكن نلبس اي شي
رباب : لااااا طبعاً ضروري تلبسو جديد وحاجة فخمة، هناك حاتشوفو قرايب أبوكم لأول مرة وحاتكونو محط أنظارهم أكيد وهم بكونو عايزين يشوفو بناتو لي عادل ولا شنووو؟
شيرين: أم المفهومية ياربابة
نيڤين بدعابة حضنت أمها وقالت: ربابة ربة البيتِ تصب الخل في الزيتِ؟
شيرين ضاحكة : لها عشرُ دجاجاتٍ وديك حسن الصوتِ هههههه
وبقو يضحكو كلهم... بالجد رباب إنسانة حكيمة ورقيقة الشعور، عمرها ماعلمت بناتا الكراهية لي أبوهم ولا لي عمتهم وحبوبتهم وباقي الأعمام كانت دائماً بتبرر إنو قسمتهم إنقطعت ،بالرغم من القهر والحزن الشايلاهو جواها سنين طويلة....
بالليل قعدو البنات يقيسو في فساتين أمهم الاشترتهم ونيڤين شكت لي شيرين عن إنو أسعد همشا ومارد عليها وده مضايقا، شيرين قالت : تلقيهو أمو قاعدة جمبو أصلو بخاف منها ههههه..
نيڤين ماقدرت تضحك معاها وذاد همها، أسعد ممكن كل مرة يهمشا معنى كده لو أمو موجودة، آخرتا شيرين أشغلتا عشان ماتفكر أكتر وتحزن فنست أسعد ونست تلفونا في غمرة الأحداث.. رجع بالليل إتصل عليها بعد وصل أهلو لكن لقاها مابترد عليهو وإستاء فكرها بتتسد حقها يعني.. نامت هي وساهر هو بفكر في أحداث اليوم كلو، كان محتاج يتكلم مع نيڤين بصورة ملحة عشان محتاج لصوتا شدييد وحنيتا البدوب الهموم ولو قدر الجبال، وفي نفس الوقت خايف عليها من الجاي قدام بس ما لقى مرادو وماردت..
____----_____----____---___
صباحآ في بيت أسرة غسان....
صاحي نشيط وطالع يشرب الشاي مع أمو، صبح عليها وسأل عن أبوه وين
أمو وكانت مشهورة في أسرتهم بي ماما سعاد مرة ليها شنة ورنة وحضور كبير في المجتمعات الكبير والصغير بوقرها وبحترمها، صبحت عليهو بالدعوات الصالحات وكبت ليهو الشاي وردت على سؤالو وقالت : مرق من شوية مستعجل حتى الشاي شالو معاهو في كبايتو أم أضان
