جرت بسرعة حاولت ترفعا لكن هي زاتا حيلا برد ماقدرت تنهزا فبركت جمبها وشالتا حضنتا وبقت تبكي : أمييي مالك قومي حبيبتي علييك الله ماتزعلي، يااميييي قومي عليك الله أميي يلااا أصحيييي..
تاني حاولت تروق وجرت نفس وزفرت وحاولت تتصرف براحة، اتزكرت انو أمها فوقت نيڤين المرة الفاتت بالريحة فرقددتا في مكانا برااحة وجرت جري وهي بتتعتر جابت الريحة ومن كترة ماهي بترجف ماقادرة تفتح الغطا بسرعة فبكت وصرخت وهي بتقول : افتااااح انت كمان ماوقتك.
فتحتا ورشت في يدها وشوية شوية قربتا من أمها كذا مرة ففتحت عينا براحة ،شيرين بلهفة : حبيبتي انتي كويسة؟ أمي أمي قومي عليك الله ماتخوفيني عليكي قومي معاي يلا براحة أوصلك سريرك
رباب سندت نفسا وقعدت في الأرض وبتها ساعدتا وهي بتقول : أنا كويسة ماتشيلي هم أنا كويسة هديني
بس غصب عنها بكت، شيرين حضنتا شديد وهي لسة بتبكي لمن بتشهق ،شيرين قالت ليها : دموعك أغلى من أي شي في الدنيا ياأمي، المرا دي قالت كلام حقيقي وهو إننا فعلاً كبرنا وبقينا طولك يعني نحن زاتنا مسؤوليين منك ومن راحتك وسعادتك، إنتي مسنوده بينا ياأمي اطمني،أنا ضراكي ومابسمح لي زول ينزل دمعة منك تاني ياأمي يقولو قليله أدب يقولو مايقولو مابهمني تاني البهمني إنتي دي بس والله..
بكت هي زاتا معاها المرة دي وحضنتا أشد
رباب بتعب نفسي شديد: أنا وحييييدة ياشيرين ، براي في الدنيا دي، أخواني وأخواتي بعاد مني مافيهم حنية و إحساس السند، يمكن عشان ماشقيقتم، أبوي عرس أمي في أمهم وأمي ماتت وأنا صغيرة بس واعية وخلتني وراها ، رباني أبوي وتعب فيني، ولمن حس بقرب الأجل قال أخير يعرس لي ويسترني في بيت راجل عشان مااتشحطط وسط أخواني، بس ربك أراد لي كده فرجعت ليهم تاني بس وانتو في يدي.. تعبت ياشيرين خلاااااااص، صدقيني أنا مادايرة شي في الدنيا دي حاجة لي ولا يوم أنا دعيت لنفسي بي حاجة عشاني، كل دعاي ليكي انتي وأختك وبس ولي أمي وأبوي بالرحمة.. ومع ذلك الدنيا كلها جاية علي، كل زول عايز يشوف وجعي وألمي، كل زول بشمت في وجعي وبفرحو لي شقاي، هم ماحاسين بنفسهم بعملو في شنو، ماعارفين أنا بموت كم مرة وقت أسمع كلامهم الجارح.. وحتى بعد بعدتا منهم يقومو الغربا كمان يتدرعوني ويأذوني في روحي وفي جناي.. شيرين أنا ضعيييفة ماتشوفيني بحاول اتقاوى دايماً ، ولا يوم كان عندي صاحبة ولا حبيبة ولاقريبة افضفض ليها أوجاعي
شيرين مسحت دموعا ومسكت أمها براحة سندتا قومتا وهي بتقول : كدي قومي معاي ارقدي في سريرك أول شي وارتاحي
وصلتا سريرا ورقدتا براحة وقالت بعد باستا في راسا : أمي أنا صاحبتك وكبيرتك زي مابتقولي لي إنتي بتي كبيرتي.. أنا صاحبتك وسندك وكتفك، ماتكتمي في نفسك زعل بعد اليوم، كفاية حبك ورعايتك وخوفك علينا ده بستحق نموت عشانك موت..
