وصلت رباب والبنات ووقفوا قدام بيت كبير من طابقين او في الحقيقه كانوا بيتين ملتصقين مبنيين بنفس الخرطه من طابقين.. باب الشارع كان عليه جرس اتقدمت شيرين وضربت على الجرس دقيقتين والباب انفتح وطل عليهم شاب اسمر اللون بملامح بشوشه.. شيرين اتراجعت بعد ما عاينت ليهو لثواني.. رباب اتقدمت وسلمت عليهو قالت: السلام عليكم
رد السلام بأدب وقال: وعليكم السلام والرحمه اتفضلو!
زح ليهم من الدرب فدخلو وكانت آخر واحده شيرين وشايله الشنطه وواضح تقيله فعرض عليها انه يشيلها ليها لحد جوه، عاينت ليهو مساااافة نظرة بلاهة كده وتاني سابتا ليهو ومشت بسرعه.. ابتسم وهو شايفا داخله بسرعة ماعايزة تقيف معاهو أكتر من كده..
دخلو الهول ونادو السلام عليكم أهل الدار، جاهم صوت رحمة من جوه بينادي اتفضلو لي جوا اتفضلو..
فجأه جات طالعة من جوه ماريا وهي بتقول مبتسمة: أهلاً يا خالتو رباب أهلاً يابنات اتفضلو اتفضلو
دخلو لي جوا سلمو على رحمة وعلى شيراز الكانت راقدة بفخامة على الفرش الغالي والعفش الأنيق
شيري ونوڤا قعدو جنب بعض ،نيڤين ميلت على اختها وقالت: زولتك من زمان بتحب الفشخره والبوبار يا دوب لقت ضالتا هههه بيت طابقين وفرش غالي.
شيرين براحه قالت: فشخره كذابه هي في النهايه قاعده في بيت نسابتا.
نيڤين ضاحكة : غايتو إنتي
شيراز قالت لشيرين: ازيك يا بت الاخبار شنو طولنا ما شفناك.
شيرين: والله الحمد لله تمام عايشين في الدنيا دي.
شيراز: وانت يا بت نيڤين اخبارك شنو مستعده للامتحانات؟ قربتو.
نيڤين : والله تمام الحمد لله اي قربت الامتحانات مستعده ان شاء الله.
وهم بتونسو كده جات نسيبه شيراز داخله : السلام عليكم. كيفكم ان شاء الله طيبين.
رحمة: اهلا يا حاجه سكينه اتفضلي
شيراز: خالتي سكينة. ديل خالتي وبناتا اتفضلي.
المرا دخلت سلمت على رباب وسلمت على البنات وقعدت.
اتونسو زمن طويل و رسلو شيرين المطبخ كذا مره مع ماريا عشان تاخذ على الجو.
شيراز في اخر السهره قالت لي حاجه سكينه: طبعا يا خالتي سكينة امي وماريا راجعين البيت، هتقعد معاي شيرين بنت خالتي رباب دي الفتره الجايه ان شاء الله.
المرا قلبت عيونا بنظره استغراب بس قالت ليها كويس والله شرفتي يا شيرين يا بتي.
رباب قالت: كتر خيرك يا حاجه شرف الله قدرك، نحنا نستأذن بعد ده يا جماعه، نيڤين عندها مدرسه الصباح.
