رباب طردت المرا وقفلت الباب وقعدت في اقرب كرسي وهي حيلا برد تماماً .. ماكانت مستوعبة الكلام القالتو ليها ده ، كتابة شنو دي يعني هي اطلقت واتشردت بسبب كتابة؟ سحر وشعوذة؟ بقت تردد استغفر الله العظيم استغفر الله العظيم، معقول في إنسان عاقل بدمر حياة زول بس عشان غيرة من لبس ولا من جيهة.. وهي كده دق الباب تاني فقامت اتكلت وسندت نفسا وقشقشت كم دمعة نزلو من المفاجأه، فتحت الباب لقتا جارتا ست البيت نفيسة أو زي مابنادوها نفوس ، سلمت عليها ودخلتا، نفوس زولة ظريفة ومجاملة دايماً فلما دخلت حست بي رباب ماتمام فقالت ليها : إنتي عاد يارباب ديمة عليك حزينة ومكسورة كده وماتمام ، فرفشي الدنيا دي فيها شنو حسي هديل بناتك شدو حيلم والله سلم في عمرهم تاني مالك؟ ارح انا جيت اناديك تجي تاكلي معاي فسيخ ظاااابط فريش فارماهو بي يدي جابتو لي حماتي ست الناس
رباب ابتسمت ابتسامة باهتة وقالت : فسيخ ؟ ياسلام والله الله يديها العافية ماقصرت فيك، بالهنا عليكم لكن انا فطرت الحمد لله
نفوس : لا لا ماف اي إعتراض الفسيخ ده محمدك لاازم تاكلي معاي، عارفاك براك وبناتك مرقو، ارح نضرب الفسيخ ونشرب لينا شاي تقيل بي مزاااج يازولة قومي
قامت رباب معاها تجاملا مع انها في هم مايعلم بيهو غير ربنا... وفي ظرف نص ساعة كانت رباب بتضحك من قلبها على جدعات نفوس البتقطع المصارين ضحك..
(زي ما الدنيا فيها ناساً بجيبو الهم فيها كمان ناس فرحة... ناساً بزيلو الهم ناساً بجبرو الخاطر المكسور)....
..
..
في الطريق قبل ما يطلعو على طريق المزرعة نيڤين قالت لي حسام : ممكن ياحسام اطلب منك طلب؟
حسام : طلب واحد بس؟ قولي اتنين تلاتة اربعة العايزاهو
نيڤين : لا بس هو طلب واحد، ممكن نزور أبوبكر في المستشفى نطمن عليهو؟ أنا مامشيت غير مرة وعايزة اطمن عليهو
شيرين : صح مالقينا اي طريقة نرجع نطلو تاني
قال ليهم طوالي : والله فكرة ،خلاص نغشاهو نشوفو وبعدها نمشي
حسام رجع بي طريق المستشفى بدون تأخير وفاتو طوالي..
هناك اتلاقو مع يسرية ووقفو يطمنو منها على الأخبار ، قالت ليهم : الحمدلله كويس ،زالت مرحلة الخطر بس باقي يفتح عيونو ويبرد قلبي
شيرين بأسف : الله يرد ليهو عافيتو إن شاء الله
نيڤين : بكور قوي أكيد حيخف ان شاء الله
يسرية : شكراً لجيتكم وسؤالكم عنو
حسام : أخونا وبتهمنا صحتو وعافيتو ترجع ليهو ،ربنا يطمنك عليهو يارب
يسرية : آميييين يارب العالمين
بعدها استأذنو وطلعو فاتو على مشوارهم.. الطريق كلو يتونسو عصافير الحب ونيڤين سارحة بعيد، موضوع بكور ده مضايقا جداً وخايفة عليهو ، كانت ما معاهم خالص قدر ما حاولو يشركوها في الكلام، لكن وهي قاعده سرحانه كده جاها تلفون لقتو من غسان، إترددت في الأول اذا ترد ولا لا لكن ردت في النهايه:الوووو!
