بعد الفطور كانت معانا حصة لي أستاذة ندي...بجد كانت طببة وبتفهم ولو سألتيها السؤال اكتر من مرة ما بتزهج... حسيت بالراحة معاها...هي سبحان الله دائماً بتمشي مع استاذه ياسمين ... الظاهر عليهم...صحبات شديد....كنت متكيفة لي حصتها... فجأة سمعت إسمي
_صابرين
عاينت على الأستاذة وأنا مخلوعة كيف عرفت إسمي؟! قلت ليها نعم...قالت لي: عندك اي سؤال....هزيت ليها راسي بي معنى لا ..قالت لي: طيب تمام أنا ما استاذتكم وبس أنا زي اختكم الكبيرة لو عندكم اي مشكلة أو أي شي تعالوا لي في المكتب عادي...قالت كلامها ده وهي موجهاهو للبنات كلهم بس كانت بتعين لي ..قلت ليها : طيب يا أستاذة...ابتسمت لي وطلعت...
بعد ما طلعت كنت بكتب في الكلمات الادتنا ليها في الصبورة
=شوفوا شوفوا...عاملة فيها مجتهدة البشوفها أول يوم جات فيهو ما بشوفها هسي
دي كانت صحبة مروة عاينت ليها بس وتاني تابعت كتابتي...قالت لي: ما تتعبي نفسك كدا الزيك ده ما عندهم شي للقراية... وبعدين ما اظن ح تتوظفي عشان لمن يجيك الجاك أول يوم داك برفضوك طوالي... البنات الكانوا وراي ضحكوا...
قلت ليها: ما تخافي على يا حبيبتي وما تشيلي همي شيلي همك إنتِ من ما شفتك حصل ما شفت ليك كراس طالع من شنتطتك علـ أقل أنا بحاول...
قامت من الكرسي وقالت : قصدك شنو يا بت إنتِ عارفة نفسك بتتكلمي مع منو أنا بت العمدة والمدرسة دي أبوي اتبرع بيها بي نص المبلغ....البت الجنبي قالت ليها: ما تكذبي يا عبير أبوك كاره التعليم حتى عشان تتعلمي إنتِ عمل فيك شنة ورنه دايرة تكذبي هسي
قالت ليها: اسمعي يا سامية... أوعك تاني تتكلمي معاي عشان ما تشوفي وشي التاني واخلي أبوي...يطلع أبوك من الأرض بتاعة الزراعة...بدل ما تحمدي ربك عشان لقيتي ناس يدوكم أكل...وابوك الكان بشحد في الناس لميناهو نحنا...جاية بي كل وقاحة تتكلمي معاي...قبل ما تتكلمي شوفي الفرق بيني وبينك... أبوك بشتغل عندنا وامك...خا***دمة
لمن قالت كدا البنات في الفصل كلهم ضحكوا.. وقالوا وريتيها يا عبير ... أما سامية عيونها اتملوا دموع وطلعت طوالي....
عاينت لي عبير وقلت ليها: بي لي حق تتكلمي معاها كدا إذا ربنا اداكم خيير وفير ده ما بيعني إنك تتكلمي معاها كدا ....قالت لي: وإنتِ بتطلعي شنو...شكلك وحدة زيها عشان كدا بتدافعي لينا
مارديت عليها وطلعت طوالي...طلعت عشان افتش سامية لقيتها قاعدة جنب المسطبة وبتبكي...مشيت قعدت جبنها وقلت ليها: معليش عشان سمعتي كلام بسم البدن بي سبب.... مسحت دموعها وقالت لي: ما تتأسفي أصلاً عبير لسانة كعب كدا... دائماً بتهيني ما أول مرة....سكت مسافة وقلت ليها: ما تهتمي بيها...علـ أقل أبوك باكلكم بالحلال وده أهم شي ابتسمت لي ومدت يدها وقالت أنا إسمي سامية إسماعيل وإنتِ....سلمت عليها وقلت صابرين أحمد...قالت لي بي خلعة ... احمد عبد الله!!!!! ولا واحد غيرو؟!....قلت ليها: اي هو زاتو...قالت لي: ما مصدقة ياخ إنتِ بتو!! أبوك ده اغني واحد في البلد وحتى اغني من ابو عبير...إنتِ كان بتو ...ممكن تمسحي بي كرامت عبير الارض... ابتسمت وقلت ليها: أنا ما زولة بتصاحب الناس بي الفوارق الاقتصادية....بالعكس ما بحب الحاجة دي كلنا سواسية والقروش ما أهم شي بعدين لمن نموت ح تفضل معانا الأعمال الصالحة ما القروش.... قالت لي: بجد المابعرفك بجهلك والله ياصابرين البشوفك أول مرة ما بقول إنتِ بالذكاء ده...قلت ليها: زي ما قلتي المابعرفك بجهلك....سكتت مسافة وقالت لي: طيب إذا إنتِ كويسة طيب اليوم ديك مالك؟!
