عارف نفسي غلطان عارف إني اتخليت عنها بي سهولة بس ما كان في يدي شي اعملو غير كدا ولا حتى فكرت في شي تاني... ما بنكر إني غلط لمن قلت لي أبوها إني طلقتها... ما كان عندي خيار تاني...
خليتها معاهم بس ما رجعت البيت كنت زعلان من الحصل ومضايق شديد أمي اتصلت على قالت لي: انت وين؟ قلت ليها ما بقدر اجي البيت هسي عشان كدا ما تقلقي على.. قالت لي:لي؟ في شنو؟ مش طلقتها خلاص
قلت ليها :عشان كدا ما جاي
قالت لي: يعني زعلان عشانها!! اسمع ياولدي أحسن تنساها عشان هي وجودها معانا ما بجيب إلا المشاكل...
قلت ليها : بحاول
مازدت حرف تاني وما كان عندي قدرة عشان اتكلم كنت مضايق شديد
بعد كم ساعة اتصل على محمد وكان هايج شديد وطلب مني اجيهو في البيت حقو وقال انوصابرين معاهو
مشيت ليهو وكان ظاهر مضايق.. ما عرفت اقول شنو غير كنت ساكت بس...
هو شاكلني ووراني يد صابرين اتخلعت وزعلت شديد
قلت لي ما كنت عارف ح يحصل كدا
هو شاكلني والحقيقة كلامو صاح عشان كدا ماحاولت اغالطو
لمن طلعت منو كنت زعلان ومضايق وما عارف اعمل شنو..
مارجعت البيت وأسبوع كامل كنت ساكن براي وكل يوم بكتئب أكثر في الإسبوع ده عرفت انا قدر شنو بحبها.. كنت زمان بنكر وبقول مستحيل أحب شافعة وحتى لمن اتزوجتها رضاء لي أمي بس لكن هي خلتني احبها.. دائماً بستغرب انا كيف أحب وحدة انا أكبر منها بي 13 بس حبيتها ما بنكر كدا وكان للعمر ما مقياس أصلًا ...حالتي ادهورت شديد وبقيت اتزهج واتشاكل...
أمي كل مرة تضرب لي عشان أجي بس أنا ما عندي نفس عشان أشوف واحد فيهم ما عارف أعمل شنو تفكيري جايط جايط شديد
ياسمين حالتها بقت كعبة أمي قالت لي من ما عرفت الخبر حالتها تحنن...
بعد العصر كنت شايل تلفوني وداخل الشات بتاع صابرين... تفكيري مزبزب بين أرسل ليها
ولالا بس فجأة جاتني رسالة من صابرين... ما صدقت رسلت لي بس انصدمت من كلامها وانصدمت اكثر لمن قالت لي أنو خطوبتي من أسرار بعد بكرة...كيف ده؟ والزاد اتستغرابي لمن قالت لي أنو أسرار رسلت ليها بس لي؟ لي عملت كدا...
كنت غضبان شديد ما عارف متين رجعت البيت بس كنت زي التور الهايج... وكمان لقيت خالي وأسرار قاعدين جيتهم وقلت ليهم... لي بتكذبوا كدا لي دايرين تدمروني متين انا قلت داير أسرار... خالي قالي: بتقول في شنو يا يوسف وده كلام شنو ده
قلت لي : بتك رسلت لي صابرين وقالت ليها خطوبتي انا ويوسف بعد بكرة...
أسرار كانت متوترة شديد خالي قال ليها الكلام ده صاح يا أسرار انتِ عملتي كدا... قالت لي: في الحقيقة يا أبوي اي.. وده كلو عشان صابرين سرقت مني يوسف وكلكم كنتوا عارفين أنو يوسف كان دايرني بس إنتِ يا خالتي جرحتي مشاعري ومشاعر يوسف عشان خاطر مريضة عندك وشوفي في النهاية حصل شنو
