يوم كلو كنت ببكي
محمد لمن زهج مني قالي: ياخ البشوفك تبكي كدا بقول راجلها مات ..زول لا قدرك ولا شي انتِ بتبكي ليهو لي؟! مالك انتِ يا بت من متين كنتِ كدا؟!
انا مستغرب منك ومن البتعمل فيهو ده وزاتو أحسن يطلقك زول في الشدة ما كان معاك فايدتو شنو؟
امونة قالت لي: اسمعي كلام أخوك كلامو صاح
قلت ليهم ..بس...محمد قاطعني وقالي: بس شنو!!
يا بت إنتِ مالك الحاصل ليك شنو براك شفتي لمن جاء هنا كان بارد كيف كأنو ما عمل شي... أنا وريتك ح تطلقني منو بس لو دايراني أزعل منك أمشي ليهو تاني ما بدخل في مشاكلك لو شايفاني مطفل
قلت لي: ما كدا يا محمد بس يوسف كان مضغوط من خالتو سلوي كانت هايجة شديد ما عرف يعمل شنو وهو قالي: شهر بس ويرجعني
محمد ضحك فيني وقالي: بجد انتِ على نياتك يا صابرين...لو هو جد داير كدا ما كان طلقك قدام أبوي أو أقول مثل عليهم
كان خلاك معاي وقال لي امو طلقتها بدون
ما اهلنا يعرفو وده كمان بعيد عن إنو الكذب حرام يعني مع إنو كذاب ما بعرف يتصرف
لو هو بجد دايرك كان ضرب لي ووراني الحاصل ما كان فكر من راسو كدا ..
لمن قالي كدا بكيت ...قالي: ما تبكي...ما بهون على أشوف دموعك
قلت لي: أنا عملت ليهو شنو عشان يعمل فيني كدا...قالي: خلاص خلاص ما تبكي اي شي ولا دموعك وإن شاءالله الأمور كلها تتصلح تمام
هزيت لي راسي وأنا من جوة موجوعة... أمونة جابت الغداء قلت ليهم ما دايرة بس محمد ما خلاني في حالي وقالي: تاكلي فاهمة مافي شي اسمو ما دايرة...
اكلت بالغصب عشان ما أسمع منو محاضرات...
مرة اليوم واليوم التاني محمد كان ماشي لي شغلو الجديد بس عشان حالتي قعد معاي رغم إني قلت لي كويسة بس هو ما سمع كلامي
أمونة كانت بتحاول تطلعني من الأنا فيهو بس كنت كئيبة وبجاملها بس ...
مرة أسبوع وما كان في حس لي يوسف ولا جاء عشان يشوفني أنا كيف وبقيت كيف...في الاسبوع ده بقيت باهتة وقلبي اربع وعشرين ساعة واجعني...
محمد كان في الشغل وامونة في المطبخ... فجأة جاتني رسالة كان محتواها
"وأخيراً ظهر الحق والحمدلله والاتخلصنا منك...
ما عرفت هي من منو بس بتكون من ياسمين لكن قصدها شنو بالرسالة دي؟!
أمونة جات قعدت جنبي وقالت لي: الليلة نعمل شنو لي الغداء
قلت ليها اي شي...قالت لي: نفسي بس تقولي لي دايرة شنو عشان اعملو ليك
قلت ليها: هسي انا يا امونة شايفة مزاجي كويس عشان أفكر أنا دايرة أكل شنو؟.
