يطفش زي زمان!!
اتذكرت اخوي زمان طفش بي سبب...إنو كان داير بت عمي ولمن العرس قرب عمي اتشاكل مع أبوي وبي سبب الشكلة العرس ما تم واخوي زعل وطفش...مايكون عمل نفس عملتو! لا اخوي بقي عاقل ما زي زمان....مابيعمل كدا...قلت لي خالتي مش هو جاك امبارح...قالت لي: لا ما جاني أصلاً...قلت ليها: كيف عرفتو طفش...قالت لي: أمك ضربت لي وقالت دايرة محمد قلت ليها بس هو ما معاي...ومن هنا بقينا نفتش فيهو ما خلينا مكان ما فتشنا بس ما لقيناهو...في الحظة دي أبوي جاء أمي قالت لي: اها ما لقيت ولدي...قال ليها: ما لقيت فتشت اي مكان بس مافي .. أمي هنا بكت زيادة وأنا زاتي بقيت ابكي.... أبوي نهرنا قال لينا البكاء مابفيد نحنا لازم نضرب للشرطة...خالتي قالت لي: كلامك صاح أضرب مستني شنو... أبوي طلع التلفون داير يضرب كدا محمد جاء داخل...كلنا انصدمنا من جيتو أمي قامت من الأرض جرت حضنتو وبقت تبكي... أبوي كان شايل التلفون ومخلوع وهو بعاين لي محمد...بعد ما فاق من خلعتو جاهو...مندفع ضربو كف لمن محمد وقع في الأرض أمي قالت لي: لي يا أحمد عملت لي كدا الولد ماصدقنا لقينا دايرو يطفش تاني....قال ليها: ولدك ما راجل لو راجل مابيعمل عملتو دي ...محمد قام من الأرض وقال بي صوت واطي... أنا ما راجل... أبوي قالي: اي ما راجل عشان تعمل حركت الشفع دي وتطفش مننا....ماراجل عشان خليتني زي المجنون أسأل عنك في اي مكان...محمد قالي: أنت أبوي وأنا مابرد ليك احتراماً ليك بس كلمة ماراجل مافي زول يرضاها...أنا راجل يا أبوي ...وكان قصدك داير اطفش أنا ما مشيت مكان كنت في مسجد الحلة التانية...بقري في قران لمن في شي يضيق بي بمشي اقري قران ما كان قصدي اخوفكم نهايغي أنا آسف...قال كلامو ده ودخل على اوضتو...خليتهم واقفين ومشيت لي محمد كان قاعد في السرير وخاتي يدو في راسو...قعت جنبو...ماقلت شي بس كنت بعاين ليهو...هو طوالي خت راسو في رجولي...بقيت امسح في شعرو..مافي زول اتكلم كنا ساكتين...ربع ساعة ونحنا في الطريقة لحدي ماهو بادر بي الكلام
=ماقادر
_قصدك شنو يا محمد
=ماقادر استحمل واعمل نفسي ما متألم واكون عادي أنا ما داير اظلم عبير معاي مابقدر اعرسها
_وده الكنت دايرك تعملو صدقني يا محمد أنا ح أقيف معاك حتى لو كلهم كانو ضدك
قام من رجلي وسكت مسافة وقال:
=ح اتكلم معاهم في الموضوع ده واليحصل يحصل...
قال كدا وطلع... وأنا طلعت وراهو ..كانت أمي وخالتي قاعدين بتونسوا ويضحكوا أخوي قال بدون مقدمات خلت ضحكتهم تختفي
=أنا داير القي العرس ده
أمي وقفت من الخلعة وقالت لي: أنت مجنون؟! ده كلام شنو البتقول فيهو ده... أنت جنيت بعد ما عملنا التجهيزات دي كلها...قال ليها: يا أمي أنا قدر ماحاولت اتقبلها ماقدرت فأحسن اخليها من هسي بدل تتعب معاي...قالت ليهو: ياولد أحسن ليك تسكت ومشي الأمور على خير ما تنسي الخطوبة عملت فينا شنو لي هسي ما سلمنا من كلام الناس...
