كتبت العنوان...وقبلت علينا قالت : أنا ح ادرسكم فرنسي... المهم يعني الفرنسي ده ما صعب زي الانجليزي والجمل ما بتحمل أكتر من معنى... أنا الكلام ده بقولوا للبنات البعدين دايرن يدرسوا فرنسي وكدا...عبير رفعت يدها وقالت أنا نفسي اكون أستاذة بعد شفتكم إنتِ وأستاذة ياسمين قررت أكون زيكم...قالت ليها: المهم لازم تكون رغبتك إنتِ ما رغبتك زول تاني...والكلام ده ليكم كلكم عموماً كدا يلا نبدأ الدرس إنتوا متأخرين شديد عن المدارس الباقين
أمونة دراستنا في الحقيقة كنت خايفة منها تعمل لي زي أستاذة ياسمين بس بالعكس...هي كانت عادية معاي كأنها مايتعرفني رغم الزعل الظاهر في ملامحها...
بعد الحصة قالت اكتبوا لي الكلمات دي وتعالوا لي في المكتب عشان اصحح ليكم...قلنا ليها طيب
بعد مشت البنات كانوا بتكلموا عنها إنها زولة جميلة شديد وبتعرف تتدرس وكدا...
أنا قلت دي فرصتي عشان اقدر احكي ليها لي أخوي كان بأجل في الخطوبة ما بقدر أشوف اخوي منكسر كدا... وأنا ما أعمل شي حتى هي ظاهر عليها إنها متأثرة من الحصل...
انتظرت زمن الفطور بي فارق الصبر... لحدي ما الجرس ضرب طلعت طوالي سألت هي في ياتو مكتب وصفوا لي مشيت لقيتهم بفطروا
قلت إنتِ غبية يا صابرين تمشي ليها لي اصلاً في الوقت ده خليهم يفطروا ...رجعت الفصل...سامية جات قالت لي : ما دايرة تفطري....في الحقيقة ما عرفت أقول ليها شنو...ما كان عندي خيار إلا أمشي اشتري فطور...مشيت معاها اشتريت وقعدنا في مكان كدا
_هلا هلا شوفوا منو القاعد هنا
عاينت لي عبير وما أشتغلت بيها...بقيت أكل بس ..جات مسكت منى العيشة... سامية قالت ليها: دي شنو الحركات دي يا عبير ادي البت عيشتها....قالت ليها: ما سألتك انتِ أنا مع الحلوة دي.... قالت ليها: إنتِ بتعرفي صابرين دي بت منو لو بتعرفي ما اظن تعملي كدا ...ربعت يدينها وقالت بت منو وريني...قالت ليها بتعرفي أحمد الاخوك بشتغل معاهو عبير وشها جاب الوان ...سامية قالت ليها: يلا دي بتو...عبير ضحكت بي ضحكة مستفزة وقالت ما بقدر اصدق دي؟! لالا ما اظن
خليتها تضحك كدا وقمت منهم وسط منادات سامية لي دخلت الفصل طلعت كراسي ومشيت على المكتب قلت يكونوا انتهوا دخلت كدا لقيتها قاعدة مع ياسمين وآخر ضحك وونسى اترددت إنى ادخل ما عرفت أعمل شنو...دايرة أرجع قالت لي: دايرة شي يا طالبة...كنت مستغربة منها عاملة نفسها ما بتعرفني ..قلت ليها: اي دايرة اصحح.... ياسمين نهرتني وقالت: ما شايفانا بنتونس إنتِ بابت غبية ولاشنو ده وقت تجي فيهو عشان تصححي يلا اطلعي من هنا... عيوني اتملوا دموعي دايرة ارجع... أمونة قالت لي: صابرين ولي أول مرة قالت إسمي... ياسمين قالت ليها: بتعرفيها شي؟!!...ماردت عليها ...قالت لي: جببي كراسك...مشيت عليها بي حركات بطيئة كنت خايفة مديت ليها كراسي وهي صححت لي سريع حتى ما عاينت لي شلت الكراس وطلعت ..
