Non-Expired Love(မြင်းလှည်းသမားရဲ့ ခင်ပွန်းလေး - ဒုတိယတွဲ)[Completed]

Chapter 21_U

"ဒီနေ့ကတော့ တော်တော်များများသိကြတဲ့အတိုင်း မနေ့က A-connect ပေါ်မှာကျွန်တော့်ကို စွပ်စွဲထားတဲ့ ရင်သွေးအိမ်မူကြိုရဲ့ ကိစ္စပါပဲ"

ထိုစကားကိုပြောပြီးနောက် ဟန်လေး၏ နှုတ်ခမ်းဖူးဖူးလေးမှာ လှပစွာဖြင့် အထက်သို့ ကွေးတက်လို့သွားရတော့သည်။

ဟန်လေးတို့ ဖိတ်ကြားထားသည့် သတင်းထောက်များတော့ စိတ်ဝင်တစားဖြင့် ဟန်လေး၏ စကားများအား မှတ်တမ်းယူရန် အလေးအနက်ထား စောင့်ဆိုင်းလျက်ရှိ၏။

ထို့အတူ A-connect သုံးစွဲသူများအပြားကလည်း A-connect ပေါ်သို့ ဟန်လေးတို့ လွှင့်ထားသည့် တိုက်ရိုက် Live မှတစ်ဆင့် ယခု သတင်းစာရှင်းလင်းပွဲအား စိတ်ဝင်တစားဖြင့် စောင့်ကြည့်နေကြတော့၏။

မနက်မိုးလင်းကတည်းကပင် ဟန်လေးမှာ သူ၏ A-connect အကောင့်မှ ယနေ့ဘယ်အချိန်တွင် သတင်းစာရှင်းလင်းပွဲပြုလုပ်ပါပြီဖြစ်ကြောင်း တင်ထားခဲ့ပြီး A-connect ပေါ်မှ တစ်ဆင့် တိုက်ရိုက် Live လွှင့်မည်ဖြစ်ကြောင်းကိုပါ တစ်ပါတည်းအသိပေးခဲ့တာမို့ ယခု Live တွင် A-connect သုံးစွဲသူ အများအပြား ရောက်ရှိနေကြခြင်းဖြစ်သည်။

"လွန်ခဲ့တဲ့ လတွေမှာ ကျွန်တော်ရော ကျွန်တော့်ချစ်သူကောင်လေးပါ လူတစ်ချို့ရဲ့ နောက်ယောင်ခံလိုက်ခြင်းကို ခံခဲ့ရပါတယ် ... ဒီအကြောင်းကို စသိတာကလည်း ကျွန်တော့်အဒေါ်ရဲ့ အမျိုးသား ဦးမင်းသူရနဲ့ ကျွန်တော်ရဲ့ချစ်သူ ကိုစောသီဟမောင်တို့ ကျွန်တော့်လုံခြုံရေးအတွက် လွှတ်ထားပေးတဲ့ သက်တော်စောင့်တွေကနေတစ်ဆင့်သိခဲ့ရတာပါ"

ဟန်လေး၏စကားအဆုံး ဟန်လေးတို့ တိုက်ရိုက် လွှင့်ထားသည့် Live တွင် A-connect သုံးစွဲသူအချို့၏ Comment များရောက်ရှိလာတော့သည်။

A-connect သုံးစွဲသူ ၁ : "သူ့ချစ်သူက စောသီဟမောင်လို့ ပြောလိုက်တာလား ... ဟင် အဲ့တာ ငါသိတဲ့ စောသီဟမောင်တော့ မဟုတ်လောက်ပါဘူးနော် ... Remember လုပ်ငန်းစုကလေ"

A-connect သုံးစွဲသူ ၂ : "သူနောက်ယောင်လိုက်တာခံရတာနဲ့ ဒီကိစ္စနဲ့ ဘာဆိုင်လို့လဲ"

A-connect သုံးစွဲသူ ၃ : "အပေါ်က တစ်ယောက်ရေ ဆိုင်ချင်လည်းဆိုင်နေမှာပေါ့ မလောပါနဲ့"