نجمة نجمتي ( جمان فريد) منقولة

مقدمة

#نجمه_نجمتي

#جمان_فريد

المقدمه🌸

هالمرة القصه رح نسلط فيها الضوء ع وضع المرأة في مجتمعنا ...ع القوارير اللي وصى الرسول بالرفق بيها..لكن مجتمعنا المسلم المحافظ مايعرفش غير يكسرها..
بسبب البيئه اللي حني عايشين فيها هلبه نساء عاشوا دور الإنهزاميه والضعف والإستسلام لتفكير هالمجتمع ...لذلك أكثرهم فضلوا التنازل عن كرامتهم بش يهربوا من نظرة مجتمعنا المريض....
حنبدا قصة وحده منهم...حنوري بيها صورة لطبيعه حياة المرأة في هالمجتمع ..
نجمه ...بنت لعائله مكونه من أب وأم وزوز خوت شباب
الكبير انور مواليد 77 متزوج وعنده زوز صغار بنت وولد وزوجته عبير..
تجي بعده نجمه مواليد 85 طالبه في كلية الإقتصاد تخصصها إدارة
الصغير علاء مواليد 88 طالب في الصيدله...
نجمه بنت بسيطه ..طيبه ..حلوة ..ليها صديقه من أيام الإبتدائي وأقرب من روحها حنين..حنين كانت طموحه هلبه تقرا في كليه الطب البشري ..
حنين عند نجمه في الكليه..
حنين: لما نقرا نقرا بحب بشغف منحسش القرايه هم ثقيل طموحي إن يكون قبل اسمي حرف"د" نشوف في هالحلم قدامي ونسعى بش نوصله ونلبس البالطو الأبيض..
نجمة : هههههههههه...حتى اني ياحنه طموحي نلبس أبيض بس مش بالطو فيلو وغمضت عيونها وحطت ايدها ع قلبها وننزف لكبيدتي ..
حنين بتهكم: غير يندري عليك قبل وانتي تحبي وتتعذبي في حبه بروحك لا وفوقها يحب وحده تانيه ..حولي هالوهم من راسك يانجمه..
نجمه شقلبت عيونها وغيرت الموضوع وناضت: هيا نوضي ناكلوا جعانه أني عازماتك..
ناضت حنين وفي نفسها"ربي يهديك يانجمه"
طبعا الشخص اللي تكلمت عليه حنين واللي نجمه تحبه من صغرها هو ولد خالتها شكري..
شكري مواليد 80 قري في الهندسه لكن ماكملش بسب ظروفه الماديه..وقعد يخدم أعمال حره مع عمه بعد دار اكثر من مشروع بروحه وفشل فيهم..كان وسيم هلبه بنات العيله بيهبلوا عليه ..مغرور ويحب نفسه لأبعد حد..ع علاقه ببنت من عائلة حالتهم الماديه فوق الريح ..هو تعرف عليها في كلية الهندسه حباته وهو في البدايه كان يبي يستفيد منها لكن بعدين حبها وعلاقتهم ليها 3سنين ...وطبعا هو مايعرفش بمشاعر نجمه اتجاهه..
ام نجمه وأم شكري خوات من الأب ..علاقتهم ببعض مش قويه بسبب عداوة أمهاتهم لبعض اللي كانوا ضراير..طبعا عندهم خاله تالته وهادي الكبيرة ..كانت طيبه هلبه ومتزوجه من راجل حالته الماديه مرتاحه وكان عقيم ..قعدت معاه لأنها تحبه وهو قدر تضحيتها وكان يحبها ويحترمها هلبه وكتب بإسمها كل مايملك..وهي كانت تعز نجمه وشكري هلبه وهما صغار خدتهم ربتهم 5سنين مع بعض ..نجمه كان عمرها 7سنين وقتها وشكري 11سنه..
وبعد كبروا معاش يشوفوا في بعض هلبه وكل حد لهي بحياته..لكن نجمه قعد شكري في قلبها وماتفكرش غير فيه..
☆☆☆
كالعاده هياجه وسفر ولاعليك ببات ولاام ولاعيله ..
: خلاص عاد شن صار كان عدى سافر وغير جوه كيفه كيف الشباب اللي في سنه
: عبدالله في سنه كان معاي كتف بكتف في الشغل لين توا نص مسؤولية الرزق عليه هو وحتى باتي فرحان بيه واجد ويمدح فيه
: باتي ..والله ماوقته بعد نروح نقمعز نسمعك من هنا لبكرا ...صاحبي يستنى فيا برا ..وباس راس أمه وباس راس بوه من بعيد لأنه كان والع ويفنص وطلع...
نقز فسيارته اللي كانت مفتوحه من فوق....
:عطاك الإذن
: بعد سمعت المحاضرة المعتاده ..خلينا من الشايب توا...مستعد للمغامرة الجديد اللي حنعيشها لكي
: هههههههههههه تي انا مسلم نفسي ليك ع اخر معاك للموت يابورفيق ....ضربوا كفوفهم ببعض ..وانطلق بأقصى سرعه
:وووووووووووووووووووووه
:ههههههههههه تي هاااادي راك تودرنا مازال نبي نعيش
زاد في السرعه
: شااااااااااهين يارااااااجل مش هكي!!
:هههههههههههههههههههههههههه
...
من اللهجه زبطوا وين صارت هالأحداث ..ايه في المنطقه الشرقيه ..."بنغازي"....
شاهين مواليد 87 شاب يحب الحياه بصايري وجوه فستري وعايش حياته بالطول والعرض لكن بعيد عن الحرام...
من عيله تلعب بالفلوس لعب ..
بوه سعد عنده شركات برا البلاد وداخلها وليه نفوذ في الدوله
امه ناديه محاميه...
خوه عبدالله مواليد 81متزوج وعنده ولد..شخصيته قويه وعاقل وطيب وكان فارض احترامه ع الكبير قبل الصغير في عيلتهم كلها هو وشاهين نار وبارود وديما يتحاشوا في بعض ..عبدالله مكانش راضي عن حياة شاهين اللي كانت تخلا من الجديه ...كان يبيه يكون معاه في كل شي ويساندوا بعض بش يوقفوا في وجه اعمامهم اللي كان همهم ثروة خوهم الكبير وحاطين عينهم عليها...
شاهين يجي بعد عبدالله بعده غاده مواليد 88 تقرا اقتصاد فارس مواليد 89طالب طب بعدهم سند يقرا شهاده ثانويه مواليد91....
شاهين كان يعشق بنت عمه نور هلبه وع علاقه ببعض نور وحيده أهلها وكانت شايفه روحها هلبه وأنانيه ..ماكانتش تحب شاهين قد ماكانت تحب اهتمامه بيها والصرف اللي يصرف فيه عليها ..برغم معارضة بوه لهالعلاقه ..لكن شاهين كاسح الراس ماحد يقدر يفرض عليه شي نهااائي...
****
القصه حتبدا من سنة 2008 إلى عند2017
أبطال روايه
نجمه.....شكري....شاهين ...نور....
حنين..علاء.....أمل
وباقي الأبطال حتعرفوهم خلال أحداث الروايه
...يتبع...
الفصول الاربعة