نجمة نجمتي ( جمان فريد) منقولة

الجزء التاسع عشر

لا إله إلا الله وحده لا شريك له له الملك وله الحمد وهو على كل شيء قدير ❤

صلو علي رسول لله
#نجمه_نجمتي

#جمان_فريد

الجزء التاسع عشر🥀

مجرد مانطق عمر جملة بنتي ..ضغطت ع زر الإنذار لإستدعاء أمن المستشفى اللي جي بأقصى سرعه طلع عمر من المستشفى بعد ماأتهماته بالتهجم عليها..صارت دوشه واتصل عمر بعبدالله اللي جي وحل الإشكاليه وخدي عمه معاه ...
للاهم مع نور مروح بيهم تاكسي..
نور: ماما حتحكيلي كل شي ياماما..
للاهم تبكي: ارجوك ارحميني يابنتي راني مهدوده ..
نور وجعتها أمها حضنتها: سوري ماما خلاص معاش نبي نعرف شي المهم انتي تكوني كويسه
للاهم حضنت بنتها وهي تبكي...
....
معقول!!
عمر بألم: انا لتوا مش مصدق ياعبدالله...
عبدالله بدهشه: ولا الأفلام ياعم..
عمر ضحك بتهكم ...
عبدالله: باه وشن حدير توا...
عمر شبحله : بنتي حترجع لحضن باتها...
عبدالله: اما حضن هضا اللي سيبها في وقت اللي كانت فيه بأمس الحاجه ليه وخلاها ..تربي امها وتتعب عليها ويعلم الله شن مر عليها وانت تجي تاخدها ع الجاهز!!
عمر تنهد وغمض عيونه وفتحهم بألم وقعد ساكت..
عبدالله : خل جدي يشد صحته ونديرولها حل ياسيدي ماتكدرش روحك..
عمر شبحله وابتسم: نعترف ان سعد في كل شي احسن منا حتى في تربيته لعياله..
ابتسم عبدالله بمجامله وولع السياره وتوجه بعمه للفندق اللي قاعدين فيه...
اليوم اللي بعده سافرت للاهم لأمريكا هي وبنتها لإنها أساسا كملت مدة قعادها في بريطانيا..وعمر سأل عنها وقالوله رجعت للبلاد المقيمه فيها وحاول يجمع عنها معلومات أكثر من هكي بس مالقاش...
***
ناض من ع صفرة الفطور ...وتوجه للدار لقي حوايجه محددات واتيات ومنظفاته خداهم وخش دوش وطلع لبس حوايجه اللي كانوا معطرات ومبخرات..وجي طالع من الدار لقاها تنشف في الحوش...
شكري: كملي اللي في ايدك وتي روحك بنرفعك لحوش اهلي..
نجمه حطت السياقه ع جهة ولحقاته لدار النوم كان يلبس في شخشيره: علاش إن شاء الله خير..
شكري ناض ووقف ع المرايه: مافي شي غير من اليوم وبرا غادي واني طالع للخدمه بنحطك عندهم ..
نجمه ماتبيش لأنها عارفه خالتها شن حدير فيها: شن جد توا؟
شبحلها بحده: عاجباتك قعدتك بروحك هني ؟!
نجمه خافت: لامش هكي بس استغربت..
شكري : هيا وتي روحك اني نازل بعد 5دقايق تلحقيني وطلع من بحداها..
هي زفرت بقوة وقالت في نفسها "معليشي يانجمه يقولواديما أول سنه صعبه   "...لبست عبايتها وخمارها وخدت شنطتها وطلعت وسكرت الباب ونزلتله..ركبت السيارة وهو كيف نهي مكالمته ...
شكري وهو يولع في السياره: اسمعي...أمي اعتبريها أمك ردي بالك يجي نهار وتشكيلي منك..نعرفك بنت أصول يانجمه..
نجمه بتصنع الرضا: اطمن في عيوني لأنها أمك ❤..
شكري ضحك وتحرك بالسيارة....وقف كذا مرة خدي سبيزة وخضرا وخبزة ..وهكي لين وصل لحوش اهله نزلت نجمه ونزلت معاه الحاجات وكان بوه في سقيفه يلبس في كندرته بش بيطلع يسترزق..تلقى نجمه وهي خاشه وفي ايدها الحاجات نجمه حطت الحاجات وقامت خمارها وقربت ع عمها وباست ايده وراسه..
عادل بإبتسامه: تبوسي ع الكعبه يابنتي
نجمه بادلاته الإبتسامه : كيف حالك ياعمي ..
عادل : الحمد لله في نعمه..انتي كيف حالك وشن مدايره..
ع خشة شكري وفي ايده باقي الحاجات شبحتله وردت: الحمد لله في خيار الخير..
شكري: صباح الخير يابوي..
عادل : صباح الخير ياولدي..
ربيعه جتهم : سلمك جياب وعليك حجاب ياغالي ..سلم ولدي سلم ولدي..
شكري ضحك وباس ع راسها: صباحك عسل ياست الكل
ربيعه : صباحك مبروك وعدوك مهلوك ..وليدي خش افطر كان مافطرتش
نجمه شبحتلها " بنخليه يطلع من غير فطور !!"
شكري: لا صحيتي ياغاليه فاطر ...هي ماتبي شي
ربيعه : نبي سلامتك بس ..
شكري بإبتسامه : هي السلام عليكم..وطلع...
عادل : خشي بنيتي خشي..
خشت نجمه ولقت صفرة الفطور محطوطه في الصاله...
ربيعه مع راجلها في السقيفه..
عادل: رد بالك ع المراة وفكيها من شرك..
فنصت فيه ربيعه وشهقت بهمس: شري !!!
عادل : اني اللي نعرفك اخطيها احسنلك وفتح الباب وطلع..
قعدت لحقاته بعيونها لين طلع وسكر الباب رفعت حاجبها اليمين بتحدي"باهي يانجمه يابنت الكلب"..
خشت داخل مشت لدارها ...نجمه حولت عبايتها وعلقتها ع الشماعه ..ع طلعت ربيعه وكانت لابسه عبايه ووشاح
ربيعه بحده: ماشيه لجارة حماتي بنعزيها في وفاة ولد عم بوها ...بعد تغسلي ماعين الفطور قلبي الكوجينه ونظفي الثلاجه ورتبي الدولاب وامسحيه..وحطي الغدي ع النار..اليوم كسكسي وديري معاه طاجين جبن...وديري دورة ع الحوش...وجت طالعه...اه نسيت حمام الرجاله يبيله كده بالأشيدو راك تنسي اشيييدو...وتوجهت للباب وطلعت..
نجمه بصدمه" ياااارب صبرك ياااارب"...
وبدت مسكينه تدعك واضم وتنظف...وحطت الغدي ع النار ..وخدت الأشيدو وخشت بيه للحمام..قامت قفطانها وبدت تنظف وتكد ..بعد وقت طلعت من الحمام وهي مخنوقه من ريحة الأشيدو..وقفت شويه حدا روشن الكوجينه اللي يفتح ع برا...تنفست شويه ..حست بألم في أسفل ظهرها...وكانت جعانه لأنها ماتفطرش الصبح..فتحت التلاجه طلعت منها طن ..قرضت عليه طماطم وحطت هريسه وخلطتها ودارت نص ..وكيف كلت أول لقمه خشت شاديه...
شاديه بدهشه مصطنعه: صدق شكري لما قال عليك هايشه..
نجمه غصت بلقمتها...
شاديه : ههههههههه شكلك لامخليه لاأخضر لايابس قداش بيصرف شكري على ماكلتك..
نجمه : لو كنت هايشه ره بان عليا ..
شاديه التفتلها برفعة حاجب: تلقحي..
نجمه : لا بس رديت عليك لاأكثر..
شاديه قدمتلها وخدت من ايدها النص: خلي حدود بيناتنا ياسمحه راني حماتك..وكلت من النص ..مش باهي ليك تاكلي هلبه..انتي بالو ولو سمنتي حيولي منظرك زي البادي قارد ..وبعدين شكري يقعد يقارن بينك وبين البنت اللي كان يبيها..اللي تقول جايه من قعر أوروبا جسم وجمال وشقوريه..
نجمه بلعتها بغصة ومشت وقفت ع الطنجرة تشوف فيها ..اماشاديه فضحكت وطلعت من الكوجينه وهي تاكل في النص..
نجمه "تحملي يانجمه معليشي شاديه من يوم يومها هكي طنشيها وخلاص"..
***
قصدك نجمه سيبت القرايه وتزوجت!!
حنين تنهدت : ايه والمشكله مازالها سنه..
هناء صديقة نجمه وحنين: وخدت اللي تبيه..
حنين بإبتسامه متحسرة: ايه ..
هناء: حتندم..
حنين شبحتلها: علاش ماه حتى انتي درتي زيها سيبتي قرايتك وخديتي علي.."صاحبها"
هناء: ههههههههههه ماغباني ...
حنين ضحكت بإستغراب : خيرك..
هناء شبحتلها: ماسألتيش نفسك حنين شنو اللي جابني بعد3سنين للجامعه...!!
حنين بإنتباه: ايه صح كيف صار وخلاك تجي..
هناء شبحت القدام وبأبتسامه متهكمه: اطلقت!
حنين بصدمه: شنووو!!
هناء : هههههههههههه ضحكتيني كيف انصدمتي..ايه اطلقت من علي اللي درت ع خاطره حالات الله ولو ماخديتاش كنت  انتحرت...
حنين: فهميني كيف صار..؟
هناء تنهدت بقوة: طلع كلب مايستاهلش اللي درته ع خاطره تحملت هلبه في جرته ساعدته بكل ماعندي قعدت معاه ع المرة ولاريت معاه حلوة بلعت وغصيت ياما ..لعند ماجي نهار لقيته يخون فيا مع وحده من قريباته في دار نومي ع سريري..شنعت بيه وفضحته ..وجت ع راسي خداها ولوحني في حوش اهلي ..ولما طلبت الطلاق سكر راسه وماباش يطلق رفعت قضيه عليه..وقعدنا في سريب محاكم طويل ..دبرلي دبارة مسخه واتهمني فشرفي وجاب شهود زور شهدوا عليا اني كنت نطلع من وراه ونركب في السيارات..وللاسف المحكمه حكمت لصالحه وضاعوا عليا حقوقي وطلقني في نفس اللحظه ..وقعدت تبكي
حنين بغضب: والله قلتهالك من قبل هذا واحد مش مزبوط ياهناء لوحي عليك العفن لكن انتي كنتي مسكره راسك عليه..
هناء ببكي: معاش ينفع كلامك هذا توا خلاص اللي صار صار..تصدقي ياحنين انه بعد ماطلقني قعد يدوي بيا وين مايمشي هو وخواته وأمه ماخلوا ماقالوا عليا..وطبعا الناس ع المراة يصدقوا حتى لو ماشافوش بعيونهم...
حنين ودموعها ينزلوا : الله ينتقم منه ومنهم..واهلك كيف درتي معاهم..
هناء بضحكه هزوة من بين دموعها: لزوني طبعا ماه تحديتهم ع خاطره...
حنين بصدمه: وكيف درتي..
هناء : خالي الله يخلف عليه ويبارك في عمره وماله هوو مرته وبناته دخلني حوشه وتكفل بيا والحمد لله اللي يسكر باب ويفتح غيره عايشه في خيار خيري وبتشجيع من مرت خالي وبنات خالي وليت لقرايتي...
حنين ابتسمت بإرتياح : الحمد لله شكلهم ناس متحضرين  ويفهموا..
هناء : عيلة ملتزمه لكن مش بجهل ..ملتزمين بالدين ع علم ناس تقول ملايكه ياحنين...
حنين : سبحان ربي فعلا مايسكر باب إلا ليفتح غيره وأحسن منه...كله يتعوض اهم شي شدي قرايتك شهادتك الحاجه الوحيده اللي حتقعدلك لازوج ولااب ولاأخ..
هناء: صدقتي..
***
طاب الغدي ..طبست ع كوشه الغاز بطلع الطاجين منها لأنها طاب ظهرها زاد وجعها وبطنها في نفس الوقت طلعت الطاجين وحطاته ع الرخامه وغطتها..وطلعت من الكوجينه متوجهه للحمام جت عينها ع شاديه اللي كانت والعه التلفزيون ع الأغاني وتغني وترقص ..خشت للحمام وسكرت عليها..اضايقت لما لقت اللي خافت منه...كيف بدير مش واخده احتياطها ولأول مرة نجمه ماتكونش دقيقه في ضبط موعد حاجه تخصها"نجمه عندها ميزة انها انسانه تحب تلتزم بالوقت والمواعيد في كل شي في حياتها "..إلا هالمرة تلخبطتت عليها ..ممكن بسبب الزواج...
طلعت من الحمام وهي تفكر كيف دير..ع خشة شيماء للحوش ..
شيماء : نجمه عندنا ياهلا ..وسلمت عليها...ضيقت عيونها بإزدراء ..مدايره مهرجان كالعاده هالمطرشقه
نجمه ضحكت..
شيماء : ايه شن جوك شن دايره..
نجمه: الحمدلله ..وبإحراج..شيماء!!
شيماء بأستغراب: خيرك نجو...
نجمه: نبيك شويه داخل
شيماء: باه ..وخشت هي وياها الدار
***
من لما روحوا من بريطانيا بعمي وهو مش عاجبني
مياده: مرات قاعد مضايق ع باته ..
كاريمان: عمي حاله كويس يامياده ..يعني عوض توا مداير كيفه
مياده: بصراحه لا..بس انتي تعرفي ان عمر قلبه رهيف شوي مش كيف عوض وسعد..
كاريمان تنهدت: إن شاء الله يكون هك..
مياده: شن نور قاعده مسكرة راسها وماتبيش تزوج شاهين تو؟
كاريمان وهي تشرب في النسكافيه: اممم..هذي بالذات همها بروحها لاني عارفه نلقاها منها ولامن باتها ...
ميادة : سيورا ينحل كل شي ماتكدريش روحك
كاريمان : إن شاء الله..
***
روحت ربيعه ولقت الحوش زي الشمامه والغدي واتي ونجمه مقعمزة تهدرز مع شيماء..
ربيعه برفعه حاجب: نوضي شيماء سقي الغدي بوك ع خشة..ومشت..
ناضت نجمه معاها قعمزتها شيماء: والله مانك نايضه
نجمه: غير علاش حلفتي بس
شيماء بإبتسامه : قعمزي انتي مريضه...ومشت للكوجينه..
ربيعه طلعت من دارها: شاديه بري عاوني أختك..
طلعت شاديه تأفف ومشت للكوجينه..سمعت ربيعه صوت مفتاح الحوش توجهت طول للكوجينه خدت منها مفرش خطمت من قدام راجلها اللي كيف خش للحوش..لقي نجمه مقعمزة في الصاله وربيعه تفرش في مفرش الماكله قدامهاوشبح للكوجينه لقي بناته فيها..
عادل: كيف حالك يابنتي توا
نجمه بإبتسامه : الحمد لله..كيف حالك انت ياعمي
عادل: الحمد لله الحمدلله..
ربيعه: هيا بدل حوايجك بيحطوا الغدي ...
شويه وحطوا البنات سفرة الغدي وجي قعمز عادل وبدوا يتغدوا..كان يهدرز ع نجمه ويضحك معاها وشيماء معاهم
نجمه بدت تاكل بأريحيه وممكن هادي أول مرة تاكل فيها نجمه زين من لما تزوجت..كملوا غداهم وناضت نجمه بترفع الصفرة
ربيعه : قعمزي تو البنات يغسلوا الماعين..
عادل: ايه يابنتي قعمزي قعمزي..
قعمزت نجمه ..وقاموا البنات الصفرة والمفرش..
شاديه: مقعمزة زي اللا بنت بريكه..
شيماء: لما كنتي دايره فيها فيفي عبدو هيا اللي كانت اضم وتدعك واطيب مسكينه..
شقلبت عيونها شاديه وقعدت تكد بغل غلها...
مع المغرب روح شكري من الخدمه خش للحوش لقي امه دايره العاله ومقعمزين حداها نجمه وبوه وشيماء..
شكري: السلام عليكم
كلهم: وعليكم السلام..
شكري: هيا نجمه نوضي..
ربيعه: العفو قعمز حتى شويه
شكري: والله مافيها كيف ياأمي بنرقد وأني واقف..
عادل : نوضي بنتي نوضي..
ناضت نجمه تلبس في عبايتها..
شيماء: غدي شكري في الكوشه يانجمه..
نجمه هزت راسها بإيجاب..
شكري : شن غداكم..
ربيعه: طيبت كسيكسو زي العسل ومعاه طاجين جبن..
علامات الصدمه ع وجه نجمه وشيماء تجاهلتهم ربيعه وكملت تقول: عاد كسكسي أمك مافيش زيه
شكري بضحكه: أكيد
عادل: قصدك انتي اللي مطيبة ..اني والله مانحسابه إلا وحده من البنات ويخي قلت في عقلي نجمه..
ربيعه: لا ياسيدي مابينا نتعبوها...اللي مايقولاش قلبه مابنقولوله..
نجمه قريب تموت من تصرفات خالتها شبحت لشكري لقت ملامح الغضب ارتسمت ع وجهه ..خشت للكوجينه طلعت صونيه غداه من الكوشه وين جت طالعه لقاته يشبحلها في شبحه زي السم..تلفتهم :هي مالاتصبحوا ع خير..
نجمه: تصبحوا ع خير...ردوا عليهم...وهما طلعوا..
نجمه وشكري في السياره🚘
شكري بغضب: هذا غير وصيتك يانجمه..لكن اللي توصيه ماخير فيه
نجمه:أ.....
شكري: بالله اسكتي اسكتي ماعنديش خلوق للنقاش راسي مصدع وتاعب ره..وكملوا طريقهم وهما ساكتين وكالعاده نجمه كمدتها في قلبها💔
***
قايمها يابورفيق..
طارق بضحكه: تحسابني كيفك اللي وين مانجيك مبكبكه لين بطني اتبكبكت عجينه..
شاهين: عارفني تنبال..مرة تانيه وانت جاي جيب معاك ماتسمسم..
طارق بضحكه: لا وبخل أخرى..بدال ماتجيبلي انت من برا..
شاهين : مش باهي ليك الدلع يفسدك اكثر ماانت فاسد..
طارق ضربه ع ظهره..
شاهين: كح كح كح ..طلعت روحي طلع روحك
طارق ضحك..وسكتوا هما الزوز شويه وبعدين
شاهين: إلا بنسألك ياصاح..
طارق وهو ياكل فشوايه: أسأل..
شاهين: شن رايك في مروان***
طارق: الحق راجل كويس
شاهين: يعني لو يخطب منكم تعطوه
طارق: بصراحه نوافق وعيوني مغمضه..عليش..
شاهين: والله المده اللي فاتت حكا معاي في موضوع الزواج
طارق وهو ياكل : امممم
شاهين: يطلب فأختي غاده..
طارق من الصدمه بلع اللحمه دون مايمضغها غص قريب مات لولا شاهين واسعافاته الأوليه والعزقات اللي ردهوله ع ظهره😂
طارق وهو يشرب في ميه وعيونه مدمعات: مش عارف كيف هربت
شاهين: انت اللي تاكل كيف المفجوع تقول اللحم بيهرب من قدامك..
طارق يشرب في ميه وساكت..
شاهين: هههههههه عليك موته...بالله كيف توفى المرحوم..والله شن بنقولك غص بشوايه ..موت مفاجيع..
طارق بعد شيشة الميه وبضحكه: بتشرقني ياكلب..كله منك أصلا..
شاهين هز راسه بإيجاب: اها كلها حطوها في راسي..بلا العالم كله وراه شاهين..حتى الإحتباس الحراري اللي قالبين بيه الدنيا..دبالك تدويها لحد مش ناقص وجيج وشهرة..
طارق بضحكه: اسكت خلاص مكثر هرجتك..
***
مسح صونيته مسح وناض طول توجه لداره وخش لفراشه ورقد..اما هي فقعدت تغسل في الماعين ..بعد كملت قعمزت في الصاله وهي بتموت من المغص متكمكمه في بعضها وتتوجع بصمت ماتبيش تقلق راحته لأنه مروح تاعب!
نجمه من قوة الألم قعدت تبكي واذكرت امها"وينك ياأميمتي في ظرف زي هذا كنتي تباتي جنبي وماتخلي ماديريلي بش يهدا الوجع...آااه بنتك تتوجع ..وحيده وانتي عني بعيده ياإميمتي 💔"
حست روحها بترجع ناضت رجعت في سطل الكناسه ..بعدين مصمصت فمها ولفت الشكاره متاع الكناسه وطلعتها برا..وهذا كله بهدوء وحذر شديد بش ماتقلقش راحة البي.. 
  خدت تليفونها وولت اتكت في الصاله واتصلت بحنين طول...
حنين ناضت مفزوعه شافت الشاشه اتفاجئت وخافت ردت طول..
حنين بخوف: نجمه..
نجمه بألم: حنين ..
حنين بخوف شديد: نجمه خيرك..
نجمه بصوت متعب: ماتخافيش بس جتني **** ومش عارفه كيف نخفف الألم...قوليلي شن ندير..
حنين تنهدت براحه: عندك اعشاب في حوشك كمون ..فليه
نجمه: عندي كمون ...
حنين: حطي مية ع النار راجيها لين تغلي وبعدين حطي الكمون وخليه يغلي خمسة دقايق وطفي عليه واشربي ..
نجمه: صحيتي حنو وسامحيني فجعتك..
حنين بضحكه : بري طيري ترا...
نجمه ضحكت ..
حنين: ماتنسيش اطمنيني...
نجمه : حاضر...وسكرت منها ..ومشت دارت الكمون ..طاب صبت منه وخدت طاسه بإيد وايدها التانيه ع بطنها قعمزت قعدت تبرد فيه وبعدين شرباته ..شويه وحست الوجع خف..وبدت تستسلم للنوم ورقدت في مكانها..
حنين انشغلت عليها بتعاودلها معندهاش رصيد..
طلعت من دارها ومشت للمربوعه وين مايرقد يوسف خوها..تسحبت وخدت تليفونه وطلعت من حداه واتصلت بنجمه نادى نادى ومافيش رد..عاودت كذلك مافيش رد
حنين ابتسمت"شكلها رقدت"..ولت حنين للمربوعه حطت تليفون خوها في مكانه وطلعت...
☀️ تاني يوم مع الساعه 6 الصبح
أستقيظ شكري باشا من نومه ..دور ع نجمه مالقهاش ..ناض من مكانه وهو يتكسل طلع من الدار لقاها راقده في الصاله استغرب..لما قرب لقي تليفونها📱 محطوط ع الطاوله اللي جنبها...وزيه زي تفكير أغلب الرجاله في بلادنا الحبيبه شك فيها..راقده برا وحداها تليفونها شن معناها!!!اها ايه صح اكيد تخون فيك وتكلم في واحد تاني وانت راقد ع وذانك يامقرن..🐏
خدي التليفون ولقي فيه زوز مكالمات لم يرد عليها ومن رقم غريب..💥خلااااص هذا الدليل اللي يثبث صحة شكوكه..
ركب الدم لراسه ووصل لأقصى مراحل الغضب ..قعد يهز فيها بكل همجيه..
شكري بعصبيه: نوووووضي نججججمه ...
ناضت مخلوعه : خيرك شن في ..
حط التليفون في وجهها :رقم منو هذا...
نجمه يدوب تشبح فيه وبخوف: مانعععرفش والله مانععرف
جبدها من ذراعها ونوضها بعنف: علاااااش راقده هني وحداك تليفونك ياكللللبه ..
نجمه بخوف شديد: والله....مريضه..
شكري بنفاذ صبر : تو نعرف بروحي..
اتصل بالرقم...
يوسف خو حنين كان يصلي كمل صلاته رن تليفونه استغرب في الرقم ورد طول: آلو....
شكري سكر عليه وشبح لنجمه وعيونه نار تقدح شرار بكل قوته قوة الراجل...حطها كلها في ايده اللي نزلت ع وجه نجمه بكف خلاها اطيح في مكانها....
***
... شهقة قويه......
طارق :شاهين..كنك!!
شاهين ناض يجري للروشن فتحه وقعد يحاول ياخد نفس
طارق بخوف: شاهين شن جاااك
شاهين وهو داهش: صدري اطبق حاجه غمت عليا ياطارق وطلع راسه برا الروشن بش ياخد نفس...

....يتبع....
الفصول الاربعة