نجمة نجمتي ( جمان فريد) منقولة

الجزء ثاني عشر

#نجمه_نجمتي

#جمان_فريد

الجزء 12

خش للحوش وقربع بابه بقوة فجعت أمه وخواته خش لداره وسكر بابها بنفس الطريقه..وسط إستغراب ممزوج بخوف سيطر ع خواته وأمه...هو أول ماسكر الباب اتصل برقم محدد نادى مرة وفتح طول...
نجمه: هلا شيكو
شكري بعصبيه: انتي فتحتي مع امك او بوك موضوعنا؟!!
نجمه بخوف: لا والله لا
شكري: مالا بوك ع أي أساس جايني لمكان شغلي ويهدد فيا ويقولي اطول نجمه من السمي ولاطول نجمه بنتي ..
نجمه بصدمه: شنوووو
شكري : كل شي إلا كرامتي كرامتي إللي ياما بوك استمتع بإهانتها مش بوك بس بو أمل حتى هو وغيره وغيره ..تي والله لما نوريهم كلهم شكري عادل شن حيدير وكيف حيولي والله اللي داروه فيا حنرده اضعاف ...وصكر في وجهها...
نجمه من صدمتها قعدت حاطه التليفون ع وذنها ودموعها ينزلوا ومش مستوعبه اللي صار...
اماشكري فوصل لأقصى مراحل الغضب وهو يذكر الكلام اللي صار بينه وبين بو نجمه...
فلاش باك
شككككككري
شكري وهو يتفحص في تلاجه: نعم يااشرف ..
اشرف : تعالي ..شكري سيب اللي في ايده وجي جيهة اشرف وانصدم لما شاف موسى واقف جنبه ..
موسى وهو يأشر بصبعه: اطلعلي برا نبيك ..وطلع
شكري انحرج ع الآخر من أسلوب بو نجمه وطلع وراه..لقاه واقف حدا سيارته..
موسى وهو يأشر بسبابته ع شكري: انت أمتى تفهم وتتعلم معاش تشبح لفوق ..لازم تنكسر رقبتك بش تفهم!!
شكري بلع ريقه لكتم غضبه ومحاوله لبلع الإهانه: مافهمتش !
موسى : انت فاهم كويس ..اسمع ياولد بنتي اطلعها من راسك بنت (موسى****) مش حتكون لواحد زيك أنت الناس مقامات لهذا دور ع وحده من مقامك ...وحطها في راسك اطول نجمه من نجوم السمي ولااطول نجمه بنتي ..حط هالكلام هنايا ..وقعد يضرب بسبابته ع راس شكري..وركب سيارته ومشي ..وخلا شكري في حالة غضب وحقد لاتوصف..
***
وين تعلموا بيها انتم ديما ورا مصالحكم تجروا هنا وهنا ولاكإن عندكم بنت..
عمر: انت مش حتخاف ع بنتنا أكثر منا..
شاهين ابتسم بتهكم: صاح ..بأمارة لما خبرتكم بحالتها الساعه11الصبح جيتوا 5العصر..
كاريمان: لو سمحت شاهين مش وقت الكلام هضا..بنروحوا ببنتنا ومانبوش شوشرة ومشاكل قدام العالم ..
شاهين : هضا همك انتي العالم والناس ..
عمر: احترم نفسك والزم حدك..
شاهين هز راسه بإيجاب وابتسم بسخريه ووخر ..طلعت نور من غرفتها هي وكاليمرا ..وشاهين يشبحلها وقلبه يوجع فيه بقوة عليها ..طلعت وراء امها وبوها وهو وراهم ..
***
واقفه في الروشن وهي تهز في رجلها لتنبئ عن حالة غضب شديدة متملكتها شافت سيارته درست وهو نزل منها..تشبحله بنظرة حاقدة لين خش..ولفت بسرعه وطلعت من دارها وتلقاته وهو كيف خاش للحوش ..سكر الباب وشافها واقفه قدامه رفع حواجبه بإستغراب..
"انت شن تبي مني قول"
يشبحلها وابتسم بتهكم...
نجمه بغضب ممزوج بألم: عمري ماحسيت انك بوي ولاعمرك درت معاي اللي خلاني نحس جيهتك بهالشي..ديماتتعامل معاي كأني كائن غير مرغوب فيه بالنسبه ليك من لما كنت صغيره..كم مرة كسرت بخاطري لما نجي بنوري درجه مسكرتها في تطبيق ولاصحيفه ناجحه فيها بترتيب لدرجه مرة من فرحتي بالترتيب الأول في تاني ابتدائي جيتك نوضتك من النوم بنوريك صحيفتي نبيك تفرح معاي تذكر شن درتلي عطيتني كف لهاللحظه يرن في وذني لإن خربت عليك نومك..لما نمرض عمري ماريتك واقف ع راسي لاتعطي دوا لاتغير كمادة لاتقولي حتى لاباس....لاعمرك تكلمت معاي لاسألتني ع نفسي ع قرايتي ..همك كله اني نعيش تحت امرك ندير اللي تبيه كأني حاجه تملكها ماكأنيش بنتك..نذكر مرة سمعتك قلت لأمي ياريتها ماجت ولا جبتيها بنتك هم ع قلبي ..بنتك ديما تقوللها بنتك ولاعمرك قلت بنتي حتى بالغلط...عشت متحمله هذا كله ونقول معليشي والدين ومجبوره نتحمله..لكن لعند هني وخلاص..ماليكش أي حق تدخل في حياتي الخاصه في مستقبلي ..شكري اني حناخده حناخده تبي ولا ماتبيش حناخده لو هربت معاه..
صوت قوي دار صدى في المكان..صوت مؤلم..صفعه قويه نزلت ع خد نجمه خلاته بدمه ..
بريكه بغضب شديد: انتلفي لدارك ياقليله الأدب يامسخه
نجمه تشبح لأمها بصدمه وعيونها تعبوا دموع...
بريكه بصوت عالي فيه نبرة عياط: قلت انتللللللفي لداااارك..
نجمه بسرعه توجهت لدارها وايدها ع خدها ...
أما امها التفتت لموسى اللي كان مشخص عيونه للجهه اللي كانت واقفه فيها بنته وبعدين لف وفتح باب الحوش وطلع ...اما بريكه فكانت تفرك في ايدها اللي ضربت بيها نجمه وبدت تبكي وقعمزت في الصاله وحطت راسها بين ايديها وانهارت بالبكي ...
***
ماأصعبها من ليله فاتت ع نجمه ليله من أصعب الليالي أنبها ضميرها للكلام اللي قالته لبوها برغم كل شي يقعد بوها اللي عمرها ماتجرأت ترفع عيونها فيه وقفت هالمرة وحطت عينها فعينه وكبرت معاه في الكلام هلبه ..بس هي تحب شكري حب كبير هلبه وماصدقت إن القدر حيجمعهم مش مستعدة ضيعه بككل..أما شكري فكان راقد من كثر ماحرق اعصابه وانهمك في الخدمه بطريقه مبالغ فيها لين طاح جهده..
وبريكه كانت تشبح لمخده زوجها موسى اللي ماروحش للحوش بكل بعد اللي صار بينه وبين بنته..وكانت تبكي...
***
قلب قلب وين وين غايب عليا يومين
لو تغيب أكثر حبيبي تخاف اموت من الحنين
نور: هههههههههههه بعيد السو عليك..
شاهين بإبتسامه : وينك ياقلبي..معقوله لك يومين قافله فونك نطمن عليك من كاليمرا..نور كويس..نور حالو باهي..نور روح راقد...لاخذيت منها لاحق ولاباطل...
نور: هههههههههههههههههه..انا لمانمشي للمستشفى ناخد اليبرة نروح نرقد طول وكأن فيها منوم وانوض مهسهسه وماخاطري في شي...
شاهين تنهد: معلش ياقليبي هك الدوا وأثاره كلها ايام وتفتكي منه...نور قليبي قوليلي فيش خاطرك واني نلبي طوالي
نور بضحكه: ماخاطري في شي..
شاهين بمزح: نا خاطري الحق..
نور بضحكه استغراب: فشن خاطرك
شاهين ورافع حاجبه الإيسار : في حبيبه سمحه منك
نور بضحكه خجوله: تحششششم ياسخيف
شاهين: هههههههههههههه كنك بريئه نبيها ع خدي..
نور : هههههههههههه تافه والله...
شاهين بنبرة حب : التافه هذا همه يحقك ديما تضحكي حتى لو صارلك قراقوز...
نور سكتت وحست بتأنيب ضمير قوي جهة شاهين..
شاهين: عارفك ياعمري مضغوطه ونفسيتها تاعبه بسبب باتك وأمك ..
نور بخلعه: كيف..؟
شاهين تنهد: جبروك تخشي كليه ماتحبيهاش عشان تشدي مع باتك شغله ..كيف مايبوا يجبروني باتي وعبدالله..
نور تنفست بقوة: انت ماحد يقدر يجبرك انت راجل مش كيفي..
شاهين: انا راجلك وقوتك ودرعك لو تبيني ندوي لباتك في هالموضوع نسكر منك ونعديله دغري ومش حنطلع من حداه إلا هو مغير رايه..
نور غمضت عيونها بأسى: لالا ماتكلماش اصلا نا بديت نحب قرايتي في الإقتصاد وحاسه اني حنصفي بمعدل..
شاهين : نور متأكده..
نور ابتسمت: اها متأكده..طمن بالك..
شاهين ابتسم بإرتياح: باه قوليلي في شن خاطرك..
نور غمضت عين وفتحت عين بأبتسامه: اممم خاطري نكمل الرسمه متاعك..
شاهين : هههههههههه ووواووو لازم يعني
نور: هضا اللي فخاطري...
شاهين بحب: حاضر من عيوني يانور عيوني❤
نور بإبتسامه : تسلم..
***
اطيب في الغدي وقلبها واجعها وعقلها مع راجلها اللي ليه يومين غايب ع حوشه..سمعت الباب انفتح ..طلعت ولقاته هو ..روح ..بدون اراده منها مشت حضناته..هو قعد واقف ويحاول يحط ايده عليها مش قادر هو هكي قاسي وجاف ومايقدرش يكون غير هكي...وخرت ..
بريكه بضحكه وعيونها مدمعات: مدايرة رشده بالقديد تقول عسسسل..
موسى هز راسه بإيجاب: يعطيك الصحه ...بنتك وين
بريكه: قاعده في الجامعه ..
موسى : لما تجي قوليلها تجيني في الدار..
بريكه : موسى نجمه مش قاصده اللي قالته .....
موسى اشرلها بإيده تسكت سكتت وتوجه لداره..اما هي ولت للكوجينه بش تكمل باقي غداها وتفكر شن حيدير موسى مع نجمه..
....
من قهرتي قلت اللي قلته ياحنين..
حنين: به وشكري معاش كلمك ..
نجمه هزت راسها وبألم: لاهو كلمني ولاأني كلمته..نكلمه شن بنقوله..ودموعها نزلوا..
حنين: اشششش خلاص نجو..حقه بنقولك ع خبر حلو
نجمه مسحت دموعها: هاتي قولي فرحيني..
حنين: علاء كلمني أمس وقالي تموا امور مشروعهم وقريب يفتحوا محلهم..
نجمه: ريتي المعفن اللي من لما سافر حرام ماقال نكلم اختي ولانطمن عليها
حنين: فكينا من جو الحموات الحرف ترا
نجمه: حييي عليك غير توصلي هههههههههههه
حنين:هههههههههههههه..
***
وين شكري عادل..
اشرف : خير إن شاء الله في حاجه..
: قولي وينه بلاكترة أسئله..
أشرف بخوف: لحظه تو ناديه..شكرررري..
شكري جاه وهو يشبح للراجل بريبه: خيرك ياأشرف
اشرف وهو يشبح للراجل: الأخ يبيك..
شكري: تفضل..
: جيب العدة متاعك وتعالى معاي للسيارة..وطلع
شكري وهو مستغرب توجه للمكان اللي فيه العدة خداها وطلع ..لقي سيارة مرسيدس سودا كلكسله الراجل شكري توجه للسيارة وركب وهو متفاجئ وانطلقوا ..
**
تي كان نعرف نزغرط ره زغرطت
فارس بضحكه: صدقت كانت تستنى مني نا نكلمها
شاهين : باه وشنو ناوي تو..
فارس : بنفتح الموضوع مع أمي ..
شاهين: يعني حتخطب ..
فارس : اها..
شاهين ضرب ع كتف خوه بضحكه: ربي يكملك ع خير
فارس بإبتسامه : نا وأنت إن شاء الله...
غاده جتهم : فرحوني معاكم..
شاهين: نحلف عليك كنتي تصنتي..
غاده بصدمه : نا....
شاهين : لا "ناااااا" ويقلد في صوتها
غاده😑
فارس: ههههههههههه..تو نخبرك ياستي نا قررت نخش عش الزوجيه
غاده بفرحه : باالله !!
فارس : هههههههههه اها..
شاهين وهو يشبحلها بإزدراء مصطنع: غمي فمك وهو محلول كيف قراج حوازة جدي..
غادة : اسكت انت لو سمحت خليك ع جنب😒..ايه احكيلي فارس من هي وكيف تعرفتوا تقرا معاك ولا لا😄
جبدها شاهين ومن شعرها وهي كانت دايرته ذيل حصان: عدي ياعنز للمطبخ تعلميلك شي حاجه تلقيها في المستقبل..وانت تعال معاي نبيك في موضوع ..خدي فارس ومشي..
غادة: تافه خززززي😣
***
نجمه وهي مروحه من الكليه لمحت عامر قدام محله وطا عيونه وخش داخل هي تنهدت وكملت طريقها ووصلت للحوش وخشت..
عامر بألم: ياريتني ماسمعت كلامك وجيت
احمد : لازم تتأقلم وتكمل حياتك ماتوقفش الدنيا عند حد
عامر سكت وفي داخله نار والعه..
أول ماخشت نجمه مشت جهة الكوجينه تشبح لأمها اللي ليها يومين مقاطعتها التفتت أمها جت عينها في عين بنتها شبحتلها بحده وقالت: بدلي حوايجك وبري لبوك يبيك
نجمه بفرحه : روح
بريكه هزت راسها ايمين وايسار وابتسمت ..نجمه جتها تجري حضنتها وباستها من خدها وقالت : فرحانه ع خاطرك بس ..وطلعت من الكوجينه وتوجهت لدارها وخلت امها تضحك...
بدلت وتوضت وصلت..ومشت لبوها وقفت قدام باب الدار وهي محرجه ع الآخر وخايفه بعد تردد دام دقائق طقت ع الباب ...سمعته يقول من داخل"خشي"...
نجمه فتحت الباب وخشت وكانوا عيونها لوطا...
موسى وهو مقعمز ع الكرسي وفي ايده تليفونه ويشبحلها: قعمزي ...قعمزت نجمه مقابلاته وعيونها لوطا..
موسى: الولد هذا فتح موضوع زواج ..
نجمه بصوت يدوب طالع: إيه..
موسى: شن قالك بالزبط
نجمه: احمم ..قالي..هو مجرد ماينظم أموره حيجي يطلبني..
موسى: امتى بالزبط..
نجمه هزت راسها بالنفي: مش عارفه..
موسى سكت فترة بسيطه بعدين قال: اني سألت ع وضعه وواضح انه متحسن ..حنكون صريح لأول مرة مع حد أني الولد هذا لله فلله لاارتحتله ولاقبلته واني نظرتي في الناس عمرها ماخابت..لكن بعد تهديدات حضرتك انك ممكن تجيبيلي العار وتنزلي راسي في الوطا ..
نجمه:ء....
موسى : ماتقاطعنيش....اني حنوافق عليه لكن لازم تعرفي انك حتتحملي مسؤولية إختيارك ..مانعرفكش نهار تجي حرجانه او تشكي منه مش حنستقبلك في حوشي بكل ..انتي وقفتي في وجهي وتجاوزتي حدودك معاي ع خاطره يعني انتي واثقه انه يستاهل اللي درتيه لهذا لحوشي ماتفكريش ترجعي بعد تتزوجيه إلا لو ترملتي..
نجمه قامت راسها: صدقني شكري شخص كويس وهالمرة نظرتك مش فمحلها..
موسى ابتسم بتهكم "إن شاء الله تكون مش محلها": توا نوضي وقولي لأمك تجيبلي غداي هناي...
ناضت نجمه وهي فرحانه : حاضر ...كانت تبي تبوسه ع راسه بس في شي منعها طلعت من الدار وتوجهت لأمها حضنتها بكل قوة ..
نجمه بفرحه: وافق ياأمي قال باهي ع شكري..
ضحكت بريكه وضمتها : طيب فيك ياحنه...ضحكت نجمه وبعدت ع أمها وقالت: يبي غداه في داره ..وغمزتلها ..شكله مستاحش ..ضربتها أمها بالكاشيك..حستها نجمه ضحكت وطلعت من حدا أمها وخلتها تضحك ووجهها أحمر..
اتصلت بحنين وخبرتها وحنين فرحتلها هلبه ..حاولت تتصل بشكري بس ماقدرتش باقي اليوم قعدت شاده تليفونها وتستنى في اتصاله..ليل الليل وهي في دارها وتراجي امتى يحن قلبه ويكلمها..رن تليفونها طارت من فرحتها لما لقاته رقمه ردت طول...
نجمه بفرحه ولهفه: آاالو
شكري بضحكه: آلواات
نجمه: شكلك فرحان
شكري : حتى إنتي
نجمه ابتسمت: دووووم فرحتك يااارب..احكيلي شن مفرحك..
شكري : مش حتصدقي اللي صار معاي ..
نجمه بفضول شديد: احكي ..
شكري : هههههههه ...تصدقي اليوم مكيفات حوش مني ركبت
نجمه : منو؟؟
شكري: (**** *****)
نجمه متفاجئه: قول والله...
شكري : هو شخصيا كان حاضر وحتى صار بينا هدرزة وقلتله ع ملف الخدمه في الدولة وقالي اعتبر موضوعك تم..
نجمه: بجدياااات..
شكري : زي مانحكيلك..حسيتها فرصة عمر يانجمه
نجمه: وأقوى فرصه..ربي يفتحها فوجهك أكثر وأكثر ويسخرلك الأرض ومن عليها...
شكري تنهد: نبيه يسخرلي بوك بس ..
نجمه بضحكه: سخرهولك قبل لتدعي..
شكري بصدمه: شن قصدك؟
نجمه: صار بيني وبينه نقاش ع موضوعك ووافق في النهايه
شكري مش مستوعب وقعد ساكت..
نجمه: شيييكو..
شكري : نجمه تعالي غدوة لحوش خالتي
نجمه بضحكه : أكيد جايه غدوة خميس ..
شكري :ههههههههههههههههههههههه
نجمه بضحكه: خيرك تضحك
شكري : فرحان ...
نجمه : واني فرحانه لفرحتك..
شكري ابتسم وسكت
نجمه: آلوو شيكو
شكري: معااااك
نجمه"يااارب دووم"..
شكري : آااامييين
نجمه بخلعه: كيف سمعتني
شكري : قلبي سمعك
نجمه "ياااارب" وقعدت تمروح ع روحها..
شكري حس بخجلها وقعد يضحك..
***
تاني يوم
ناضت نجمه مشت للجامعه من غير نيه حضرت محاضراتها تستنى أمتى تروح لحوش خالتها بش تشوف حبيبها..وفات الوقت عليها بطيئ في طريقها لحوش خالتها وقفت ع محل الفيلوات وتتأمل في الفيلو"حنلبسك وحيتحقق أغلى حلم في حياتي" وكملت طريقها لحوش خالتها..خشت تشم في ريحة الوشق المخلطه بريحة البصله ..
نجمه: خووويله..خو....ماحستش إلا بإيد غمضتلها عيونها وكانت ريحتهم تهبل...
نجمه بصوت هامس: شييكو
حول ايده ولفها ليه: خالتي طالعه لجارتها عواطف شويه وجايه وقالتلي نوصيك ع غدي..
نجمه بخجل : باه ...اما هو فعيونه ع نقرت الزين اللي فذقنها حط ابهامه عليها وقعد شاد ذقنها وعيونه في عيونها...نجمه بدوخ رسمي ...هو ضحك وقال: كل شي ف وقته حلو...وبعد عليها ومشي للمطبخ وطلع البريوش من الحافظه ..
شكري وهو يشبح لنجمه اللي جامده في مكانها من الخجل: هههههههههه تعالي ديرلي نيسكافيه هيااا..
نجمه التفتت وابتسمت وخشت اديرله فيه..قعد يهدرز عليها وهي انفك عنها الخجل وقعدت تهدرز وتضحك معاه وماكانش في أسعد منها في هذيكا اللحظات...
لحظااات...هي السعاده في الحياة لحظااات ..من حلاوتها مانحسوش بيها كيف مرت..بس الحزن عكسها برغم انه ليه وقته ويعدي لكن مايعديش كلحظات ..بل كأيام وشهور وسنين وممكن عمر كامل...ماحدش عارف شن داسه الدنيا🍃
[[نمشي ع كف القدر وماندري ماهو المكتوب ]]
***
وووااووو شاهين خليك ثابت أرجوك
شاهين : هدددددد ...ككيف تبيني نقعد ثابت الجو شتا وع البحر زيادده هدددددد...❄❄❄
نور: ههههههههههه باه خلاص معاش مزال واجد..
شاهين : هرررررررر...امرررري لله
نور : ههههههههههه...وقعدت ترسم فيه وهو مسكين بيموت بالصقع بس ع خاطر عيون نور كل شي يهون ❤..وبعد طول انتظار....
نور : كملت..
شاهين : رووورووروووي..هددددد
نور: ههههههههههههههه..تعال شوف..
جاها شاهين وشاف الرسمه: نا نهبل هكي ..
نور: عجباتك..
شاهين :رسمتك أحلى من فيسي الحقيقي..دباالك توريها لحد من العيله يقعدوا يقارنوا بيناتنا..
نور: هههههههههههههه..ش حنوريها غير لإبراهيم...
شاهين لف ذراعه ع رقبتها...نور تعيط وتضحك..
شاهين: لمن حسك قتي..!!
نور : اااي ههههههههههه خلاص بندسها خلااااص..حضنها وباس راسها وبعدين بعد ..
شاهين لبس بالطوه : هيا لازم نروحوا جمدت وانتي قاعده مريضه ..
نور : تمام ..لفت اللوحه وقامها شاهين.. تليفونه رن وكان رقم مرت عمه كاريمان...
شاهين: نسيبتي العزيزة
نور:ههههههههه
شاهين رد: هاااه يامرات عمي..............ملامح الصدمه اللي بانت ع وجه شاهين خوفت نور...
شاهين: تمااام جايين..وصكر
نور بخوف: كنك شن قالت ماما..
شاهين: فيش شي حبيبتي هي تعالي معايا..مشوللسيارة حط شاهين اللوحه في الكوفني وركب بعد ركبت نور وانطلق لحوش عمه عمر بأقصى سرعه....

...يتبع.....
الفصول الاربعة