نجمة نجمتي ( جمان فريد) منقولة

السبعة والعشرين

توكلو علي لله
🤍🤍🤍🤍🤍🤍
#نجمه_نجمتي

#جمان_فريد

الجزء 27💓💓💓

💛واقفه ع نفس الشط ..غمضت عيونها وتسمع في سورة مريم بصوت بوها بس هالمرة كان بادي من آيه"وأذكر في الكتاب مريم اذ انتبذت من أهلها مكانا شرقيا"قعدت تسمع وتتخيل في معاناة السيده مريم اللي كانت في موقف صعب كيف عانت بروحها...وبرغم معرفتها بالله وان اللي يصير معاها أمر إلهي..لكنها قالت"ليتني مت قبل هذا وكنت نسيا منسيا"..لين وصل بوها في آيه" وكلي واشربي وقري عينا ولاتحزني قد جعل ربك تحتك سريا"..قعد بوها يكرر في هالآيه أكثر من مرة ..ابتسمت ..وقف الصوت..فتحت عيونها لقت ع الشط قارب حلو هلبه مزين وشكله مميز...جي في خاطرها تركبه...
"تبي تركبي"..
نجمه: ايه...
قدم الشاب اللي لابس ابيض ووصل في القارب..وقال
"تعالي"..مشتله ..ركب هو الأول وشد ايدها وركبها..وقعمزوا في القارب..
"وين تبي"
نجمه : نبي نشوف مابعد البحر شن في..
"حاضر"..
نجمه: نبي نشوف وجهك خاطري نشوفه..
الشاب كان مقعمز وعاطي بظهره وكيف جاي بيتلفت..هي فاقت...
نجمه فتحت عيونها لقت بنتها فوقها: هههههه هكي تضربي ماما كف..
بشرى: نودي ..ناكل ..
نجمه : ضربتيني ع خاطر هالدحره وقعدت تدغدغ فيها وبشرى تضحك بطلت  نجمه قعدت بشرى تخربش ع بطن امها بصوابعها زعميتها ادغدغ فيها ..نجمه قعدت تضحك..بعدين
حضنتها وباستها..وناضت من السرير وهي فحضنها ..ورفعتها للحمام غسلتلها وجهها ونجمه توضت..وطلعت ببشرى للكوجينه لقت امها نايضه ادير في الفطور..
نجمه: صباح الخير امي..
بريكه :صباح الخير بنيتي..شبحت لبشري...هي تعالي ياكركيبتي..بشرى جرت لجداها اللي قامتها وحضنتها..وشبحت لنجمه..كيف حالك اليوم
نجمه: الحمد لله..امي فطريها بنمشي نصلي..
بريكه : باه...مشت نجمه صلت...بعدين غيرت حوايجها وطلعت فطرت وتسقدت للجامعه وطول الطريق كانت تسمع في سورة مريم اللي حملتها من النت..لين وصلت للكليه..خشت وكانت تمشي بثقة واعتزاز..تلاقت هي وهناء خشوا حضروا المحاضرة ..وين جو طالعين تلاقت مع كمال بس ولاكأنه موجود وهي تصرفت ولاكأن في شي صار ابدا..
نجمه تعلمت تكون قويه وواثقه من نفسها ..الي جانب قرايتها كانت تاخد في كورس انجليزي وتخدم في شركه لكن مش دوام يومي..وقدرت توفق بيناتهم ..كل هذا خلاها تزيد ثقة بنفسها وخلاها تتجاوز آلامها والماضي..ومعاش في شي يقدر يكسرها...🌟💪
***
نحبك..
عبدالله بضحكه : باه..
احلام : هذا اللي ربي قدرك عليه..
عبدالله : هادي المرة 25 اللي تقولي فيها ليا..
احلام : ونقولها مية مرة رد عليا بنموت فيك كل مانقولها..
عبدالله بضحكه: حاضر...كلها يومين ويرتاح راسي..
احلام ضرباته ع كتفه:خزيه عليك..
عبدالله: هههههههههههه...هو كان يمشي فيها في الجنان...
وسامي كيف خش لحوشه وسأل عليه قالوله في الجنان..وهو جاي لقاهم يديروا في لقطة من العشق الممنوع 😁...تحشم وولا من وين ماجي..
سامي"عليك موقف £₩¥$...استغفر الله..ربي يهديك ياعبدالله ليش قايلي تعال الجنان كانك مش فاضي 😳"..وطلع برا الحوش...
احلام : اسمع نبيك تكون معايا لما نجيب اهو قتلك..
عبدالله يضحك وهز راسه بإيجاب: حاااضر..
"يابيييه"
عبدالله بعد عن احلام وحطها وراه: هااااه يارجب..
رجب: صاحب حضرتك الاستاز سامي وصل..
عبدالله: قوله جااااي ..
رجب: حاضر...ومشي رجب..
عبدالله : هي حبيتي نخليك تو.. باس راسهاومشي.. وهي قعدت تشبحله بحب لين اختفي من قدامها.."ربي مايحرمني منك"...
خلال اليومين اللي قبل ولادة أحلام...كانت التهديدات توصل بشكل يومي لعبدالله وهو مش مدور..القصة سياسيه بعض الشي ..عبدالله كانت عنده معلومات ع ناس بيسلمها لطرف معين ولما عرفوا الجماعه اللي معلومات كانت عليهم انهم عنده قعدوا يغروا فيه بمزايا حيكسبها لو ولا معاهم وسلمهم المعلومات..بس هو رفض بشكل قاطع..قعدوا يهددوا فيه لكن هو ماأهتمش ..في هاليومين سلم المعلومات للطرف اللي يبيها ..والجماعه هديكا سمعت وقرروا يصفوه🔫..
بعد يومين..
كيف درس سيارته لما رن تليفونه وكان المتصل خوه..رد
عبدالله: هاه يالجارح..
شاهين : هاا صنديد...تميت الموضوع كله ومروح لبنغازي توا.
عبدالله: عارفك قدها ياعضيدي..بديت نتنبل نتحرك من مكاني نتم أشغالي عبيت عليك ..حاس روحي بنسلمك كل شي وناخد راحه ابديه..
شاهين: هضا اللي كنت خايف منه..
عبدالله:ههههههههه..بنقولك ..عدي ع احمد في المدرسه روح بيه السواق انا باعته لمكان اليوم..واحلام اليوم موعدها شيلها للمستشفى..
شاهين:أي  اوامر تانيه يابيه..
عبدالله: هههههههههههه ..عدي يامعفن...
شاهين : هضا كله ومعفن!!تمون...تمون..
عبدالله بضحكه: غصبا عنك..شاااهين..
شاهين: هاه...
عبدالله وبنبرة مختلفه: عبيت عليك..
شاهين حس بقلبه انقبض لما سمع النبرة اللي قال بيها عبدالله كلمته الأخيره: اطمن...
عبدالله ابتسم بإرتياح: هي مانعطلكش..اوينا..
شاهين: سلام...وصكر..
نزل عبدالله من السياره رن تليفونه رد: هاه ياسمسم
سامي: فرحت اللي نسيتها شن خطرها عليك..
عبدالله بضحكه: قتها بالجو..هاا جاي..
سامي: في الطريق..
عبدالله : نرجى فيك...وصكر...
وهو متوجه لمكتبه ..خطمت سيارة..طلع منها واحد ملتم  وفي ايده كلاشن...ضربه 5طلقات...وهرب...
عبدالله وهو يطيح ع الأرض..جي بين عيونه مرته...وهي توصي فيه يحضر الولادة..بعدها ولده بعده أمه وخوته..واخر صورة جت بين عيونه بوه..طاح ع الأرض والروح بدت تطلع..قعد يتشهد بصعوبه ولما وصل في كلمة رسول الله ..طلعت الروح معاها ورجعت عندك باريها...
في هاللحظه وصل سامي..شاف الناس متجمعه..انتابه شعور شديد بالخوف...طلع من السيارة وخلا بابها مفتوح مشي..يجري ..ويدف كل من يجي قدامه..وقف بصدمه لما شاف عبد الله غارق بدمه...بسرعه..بكل ماعنده من قوه قامه بس ماقدرش لإن عبدالله رزين..
سامي وهو يبكي وبصوت عالي: سااااااعدووووني ياقبط..
جاه واحد يجري قامه معاه وحطه في السياره وطار يجري لأقرب مصحه او مستشفى تجي في طريقه..
...
اااااااااااااااااااااه..
منى : شوي شوي حبيبتي قريب نوصلوا...
ناديه في جنبها شادتها: خودي شهيق وزفير..
فارس كان يسوق وهو متوتر..لين وصل بيها للمصحه جابولها كرسي متحرك خشت ناديه قبلها ادور ع دكتورتها..
ومنى كانت تقعمز فيها ع الكرسي..
في الوقت نفسه..وصل سامي وقعد يعيط ويقول ...باريييلا جيبوا با رييييلا..خشوا يجروا بخوف جابوها..وطلعوا عبدالله وحطوه عليها..وهما يدخلوا فيه من جهة..
كانت منى ادخل في احلام من الجهة التانيه..
وصلت احلام لغرفة الولاده خششوها..داخل..
اما عبدالله فكان ميت لكن سامي قعد يعيط عليهم ويقول ديروله صدمات..
الدكاترة خافوا من سامي لأن منظره يبان مشراني هلبه..دخلو لعبدالله جهاز الصدمات..
وبدوا أول صدمه
....
احلام: اااااااااااااااااااااااااااااااااااااه..
....
الصدمه التانيه
....
احلام: اااااااااااااااااااااااااااااااااااه
....
الصدمه الثالته
...
احلام: هااااااااااااااااااااااااااااااااااا
...
الأخيره
💔 الخط المستقيم ماباش يتغير ابدا..
...
أحلام: ععععبد الللللللللللللللله..
صوت بكاء طفل صغير..
وصوت بكاء راجل كبير يعيط وينوح ع صديق عمره ورفيق دربه واكثر شخص وقف معاه في حياته..
مات عبدالله...في نفس اليوم اللي طلع ولده التاني للحياة...
الخبر سمع بيه فارس اول واحد لأنه كان في المصحه نفسها..جي يبكي لمنى وقاللها سمعتهم ناديه اللي طاحت من طولها ...
تعبا حوشهم بالناس..فتح الله اول ماسمع قعد يبكي وحبس روحه في داره طول وقعد يقرا في القرآن..
غاده..سند ..قريب هبلوا  ومش مصدقين..موت بوهم قاعد جرحه ماطابش بش ينفتح جرح جديد موت خوهم الكبير سندهم كبيرهم..اللي شافوا فيه بوهم بعد مامات...
💔💔💔💔💔💔💔💔
شاهين وصل للحوش مع أحمد كانوا يضحكوا ويبصروا وجوهم مليح في السيارة..لين وصلوا للحوش ..اللي لقوا بابه الخارجي مفتوح ع وسعه..والسيارات تخش..نزلوا وشاهين استرجع نفس الموقف متاع وفاة بوه..
احمد: عمي شن في..
شاهين بتوهان وخوف: مش عارف ياعمي..
خشوا الزوز وعيونهم ادور في المكان ..لين وصل داخل ..
جي قدامه سند..
احمد : عمي كنك تبكي..
سند جبد احمد وحضنه..
شاهين عيونه تعبوا دموع وخر بخطوات ثقيله للخلف: حتى انت ياعبدالله ....لف..وقعد يمشي بخطوات محبطه
سند: شاهين..ولاكانه يسمع في شي..
جو اعمامه نادوه ..ابراهيم قعد يشبحله وقاللهم خلوه..
كانوا الناس الموجودين يتفرجوا عليه..وغاده واقفه ع الروشن وتشبح في خوها وتبكي..وبنات عمامها جنبها..
ومنهم نور اللي اول ماشبحت شاهين يمشي هكي طلعت من الباب الخلفي بش تلحقه..