نجمة نجمتي ( جمان فريد) منقولة

الجزء السادس عشر

#نجمه_نجمتي

#جمان_فريد

الجزء السادس عشر

طلعت من الحوش وهي ع وشك الإنهيار ..ركبت سيارتها..ومشت..دموعها وحده ورا التانيه تنزل لغايه ماأنهارت بالبكي درست سيارتها ع تركينه وحطت راسها ع الستيرسو وبدت تبكي بالعبرة..
فلاش باك
كذابه انتم ماعندكمش عمات..
للاهم: مانستغربش فيك يابريكه طول عمرك كنتي الزوجه الخاضعه المطيعه ع كل حال..
موسى: اطلعي اقلبي وجهك لانعرفك ولاتعرفيني..
علاء ونجمه مصدومين ماسمعوش حتى بالغلط عنها ع بالهم انهم عندهم عمام بس ماعندهمش عمات...اما عبير فكان عاجبها الجو وكأنها تتفرج ع فيلم..
للاهم: هذا انت ومش حتتغير انسان جاف وقلبك قاسي بسببك انحرمت من عيلتي تغربت بروحي وتمرمدت وكإني مقطوعه من شجرة وماعندي حد..حتى عزي بوي الغالي ماقدرتش نخشله بسببك..ماكانتش تبي تبكي قدامها شاده روحها ع قد ماتقدر...ولتوا قاعد مستمر في ظلمك ..لكن والله فولا مرة وقفت تحسب عليك ديما واني ندعي من وسط قلبي ياموسى اللي درته فيا تلقاه في أعز ماتملك ..وجهت نظرها لنجمه...ولفت وطلعت من الحوش بسرعه...
...
علاء: معقول بعد هالعمر تطلع عندنا عمة وحني مانعرفوهاش
بريكه بغضب: وأنت صدقتها الكذابه هادي
عبير : كيف ياعمتي المراة جاية تتكلم بثقه وواضح انها تعرفكم..
نجمه : انت مش حاسه روحك مالكش لزمه بيناتنا بري اركبي لشقتك هادي مواضيع عائليه مالكش بيها دخل..
عبير ناضت وهي بتموت وماردتش بحرف ومشت لشقتها
بريكه: خيرك مع مرت خوك شن اللي قالبك عليها هالقلبه
نجمه: اني لاعمري طقتها ولاتقبلتها ونتعامل معاها من فوق نفسي ع خاطر انور لكن اللي زيها ماتمشيش معاهم المعامله الباهيه..
علاء: خلونا منها توا وفهموني المراة هادي من هي..
نجمه ناضت: واضح كذابه واشبح شن تبي فلوس ولاالله اعلم شنو عمري ماسمعت بسيرتها حتى من حناي الله يرحمها
بريكه: ايه اشبح من باعتها...
علاء شبح لأمه اللي كانوا الربكه والخوف مسيطرين عليها وناض: به به ...وتوجه لداره ..نجمه حتى هي ناضت لدارها..وقعدت بريكه تفكر شن اللي حيصير بعد رجعة للاهم وشن تبي جايه
بينما للاهم اليوم اللي بعده ع طول ولت لأمريكا وهي مكسورة اكثر من قبل توقعت لو في هالمشيه يتغير شي بس للأسف لقت روحها ممسوحه من سجل العيله حتى في ذاكرت صغار خوتها ولاكإنها انخلقت...
🍃فاتوا 40يوم تامات ع وفاة عم نجمه ...شكري كان مقعمز مع أمه في صالة حوشهم..
ربيعه: ره خسرنا وحجزنا وراح علينا هلبه يعوضنا الله..لكن انت ولدي دافع هذاك المبلغ في ايجار الشقه 3شهور القدام..
شكري: شن تبيني ندير..
ربيعه بخبث : لمها كيف ماتلمها وخلاص ..حني انديروا عرسنا هنايا وهي جيبها من حوش ماليها وتمت..
شكري قعد يفكر في كلام أمه هو فعلا كان متحسر ع فلوس اللي راحوا في ايجار الشقه ع الفاضي ..بس كلام امه خش راسه واقنعه ناض من بحداها واتصل بنجمه...
نجمه: آااالو ووينك ليك اسبوع ماأتصلتش..
شكري: الناس تقول كيف حالك
نجمه بإحراج: اسفه بس استاحشتك وكنت مشغوله عليك..كيف حالك..
شكري ابتسم: الحمد لله..انتي شن مدايره
نجمه: اهو حال النكد الحمد لله ع كل حال ...
شكري : نجمه اسمعيني...اني صرفت هلبه واني نوتي للعرس ومن بين ماصرفت ايجار الشقه اللي بالألوف تلاته شهور مقدم وبيريحوا عليا وانتي تعرفي اني نلقط في القرش ع قرش بش نشري حوش..
نجمه: باه
شكري: عمك توا مر ع وفاته 40يوم والحزن في الأصل تلاته ايام ..يعني من الأخير يانجمه لازم نتزوجوا..
نجمه بصدمه: مستحيل ...
شكري : وعلاش؟!
نجمه: كيف علاش !!شكري عمي ليه 40يوم متوفي وتبيني ندير عرس..
شكري بجديه وحده: نجمه لو تبيني وتهمك مصلحتي ماتفكريش في أي شي تاني جنبها..ع خاطرنا بش نكونوا مع بعض ضحي ..
نجمه بضيق شديد: بشنو نضحي..
شكري : يعني مش لازم منه العرس ..ندير اني عرس بسيط ونجي ناخدك من حوشكم ع الساكت وخلاص..
نجمه مش قادره تنطق كلامه صدمها ..سنين وهي تستنى في ففرحة عمرها وفي الأخير هكي يصير فيها..
شكري سكت  وبعدين: فكري في كلامي لو بجد تبينا نكونوا مع بعض ...واذكري كلامك اللي كنتي تقولي فيه...وصكر بدون مايسمع ردها...
أما هي فدموعها نزلوا ومش مصدقه اللي سمعاته دماغها انشل ع التفكير تماما ومش عارفه شن ادير...فات يوم بليلته ونجمه تفكر وتفكر..لين اذن الفجر..ناضت توضت وصلت ودعت لربي..وبعدين صلت استخاره ورقدت...
💛نجمه ..نجمتي..نجمه ..نجمتي ..يامحلا نجمتي...
من هذا اللي يغني هكي ..اغنيه عبيطه..بس صوته حلو...
نجمتي ..يامحلا نجمتي
ههههه مبرده كان يسكت صدعلي راسي ...
نجمه ...نجمتي ..
قعدت ادور عليه وينه ادور وادور بس مالقتاش ..
نجمه نجيمتي...
انت ياللي تغني أني هنايا...اسكت خلاص..
نجمه ....
اني هنايا .....وهي ادور وبتوصل فيه ..لأنه صوته قرب..طاحت في من ع جرف كبير وناضت مخلوعه...
نجمه : اعوذ بالله من الشيطان الرجيم...هوووووووف...استغفر الله...
***
عبادي حبيبي ...
وهو واقف يساوي في شعره: نعم حلومتي
احلام تشبحله بإبتسامه: انت ماليكش حل ديما تهبل في كل حالاتك..
عبدالله مبتسم وماردش...
احلام: اليوم بنعدي لهلي اختي هاجر روحت هي وراجلها وبتقعد في ليبيا شهر..وانا نبي ن.....
سكتها ببوسه وبعدين قال: بيات برا ...No ...نقطه اخر السطر...وطلع من بحداها ..
احلام وجهها أحمر لحقاته: عبادي حرام عليك مرايفتلها موت
عبدالله: حتى نا نرايف موت ...
احلام نازله وراه : عبادي ارجوك..
عبدالله وصل في الباب وخدي شنطته شدها من خصرها وباس ع راسها: انا لما نقول لا معاناها لا...وطلع وسكر الباب..
احلام تنهدت وبعدين ابتسمت: مشكلتي اني نحبك اكثر من روحي مانعرفش نزعل منك...
اما عبدالله اللي كان مبتسم وهو طالع تفاجأ بعمه عمر قدامه عمر : صباح الخير ياعبدالله..
عبدالله قدم لعمه وسلم عليه: صباح الخير ..
عمر: عندك شي ضروى توا..
عبدالله : حاليا لا...
عمر: تمام ..نبي ناخد من وقتك شوي..
شبحله عبدالله وبعدين هز راسه بإيجاب: تمام
عمر: تعال اركب معاي.. شبحله عبدالله بشك
عمر بضحكه:ماتخافش مش حنقتلك..
عبدالله ضحك وركب معاه..وطلعوا هما الزوز...
***
ككككككيف...!!!
نجمه وتحاول تخفي ألمها: امي هو ظروفه صعبه وصرف هلبه وخسر وكله بسببي لازم ندير شي بش نعوضه لو ضحيت بالعرس مش اخر الدنيا
بريكه: راك راس بنيه معقول تطلعي من حوش بوك ع الساكت تقول مدايرة عمله...!؟
نجمه بغصه: احمم..عادي ياأمي كله دوة زايده ..المهم الهني والراحه..
بريكه ودموعها في عيونها: كيف بنقول لبوك..
نجمه: تو نكلمه اني..
بريكه : قعمزي وهني روحك بلا وقاحه زايده ..تو نكلمه اني ..
نجمه ناضت : في اقرب فرصه لازم نرد عليه..امي مستحيل نفرط في شكري وصليها لبوي الكلمه هادي..ومشت لدارها..
بريكه مصدومه في بنتها ومش مصدقه لهالدرجه تحب شكري...!!
حب أعمى💝عامي القلب..تخليه مايشوفش في شي غير اللي يحبه..يابال نجمه اللي فايقه وراقده وهي تحلم باليوم اللي يجمعها بشكري وتعيش معاه عمر كامل...حب طفوله كبر مع كل يوم تكبر فيه وسيطر عليها سيطره تامه ...
***
والمطلوب..
عمر: نبيك تساعدني ..بيش نلقاهم..
عبدالله مط شواربه وهو يشبح لفنجان القهوة: باه ولو لقيتهم شن حيصير..
عمر: حنجيبهم يعيشوا معايا
عبدالله شبحله ورافع حواجبه بتساؤل: وكاريمان!!
عمر: مش مهم...نبي نصلح الغلط اللي كانت هي سببه..
عبدالله هز راسه بإيجاب: حنساعدك..بس حاليا أجل الموضوع شوي..
عمر: عليش..
عبدالله: مشغول في حاجه نتمها ونلهى بموضوعك..
عمر بضحكه: مش حنسألك لأنك مش حتحكي..
ضحك عبدالله وهز راسه بإيجاب: هيا نوض وصلني للمكتب..
ناضوا عمر وعبدالله...وطلعوا من المقهى وركبوا السيارة وتوجهوا لمكتب استيراد وتصدير يملكه عبدالله...لين وصله..
عمر: مشكور ..
عبدالله هز راسه بإيجاب مع إبتسامه ونزل من السياره..وعمر تنهد ومشي..
...
حطه قدام مكتبه..
: اها وعدى ..
عوض : تمام ...تمام زي ماوصيتك اي شي يصير خبرني بيه وصكر..
إبراهيم : شنو قالك..
عوض: طلعوا من المقهى حط عمر عبدالله عند مكتبه وعدى..
ابراهيم: قولك يلعب من ورانا..
عوض: كل شي وارد..لكن نا فاطنله ..
ابراهيم: لو فكر يطعنا من الظهر حننسى انه عمي اهو قتلك
عوض ابتسم بتهكم: نا حننسى انه خوي ولد بوي وأمي..
***
فتحت بريكه الموضوع مع موسى..تفاجئت انه وافق لكن كان رافض تماما انها ادير اي مظهر من مظاهر الفرح طالما اختارت تطلع هكي حتى الفيلو ماتلبساش ..
🍁فات أسبوع وجي اليوم اللي نجمه فيه بتتسقد لحوش راجلها..انقرت الفاتحه في نفس اليوم العصر..
كانت معاها حنين تشبح لصاحبتها وهي مقهورة عليها نجمه اللي كانت تتمنى تلبس فيلو من لما كانوا صغار..حتتزوج ومش حتلبسه"ياريت يانجمه يطلع راجل ويستاهل تضحيتك ع خاطره ياصاحبتي "...
لبست قفطان كريمي بسيط ومكيجوها مكياج بسيط ووتسريحه بسيطه دارتهالها حنين...
حنين وهي تحضن فيها: حلمك تحقق ربي يهنيك ويسعدك
نجمه وخانقتها العبرة:آميين..
حنين بعدت : ردي بالك تبكي...طاحت ايدي واني نديرلك فيه ونعاود..
نجمه ابتسمت بألم وهزت راسها بإيجاب..
خشت بريكه وبألم: راجلك جي هيا..
نجمه تشبح لأمها وامها كانت تهرب بعيونها عنها..جتها نجمه وحضنتها : ادعيلي ياأمي بالله عليك..امها حضنتها ودموعها تنزل: ربي يهنيك يابنيتي ويطمني عليك...
نجمه مابتش توخر حست بخوف وكانت تبي حضن أمها وبس..جت حنين بعدتها ..
حنين: خلاص يانجمه هي البسي عبايتك...
نجمه وهي تجاهد في دموعها بش ماتنزلش لبست العبايه وحطت الخمار فوق..طلعت من الدار ووراها امها وصاحبتها لقت علاء شبحلها وهو متألم كان يتمني لو دخلها للصاله وهي احلى عروسه ولابسه الفيلو..بس قدر الله وماشاء فعل..
حضن اخته وباس راسها: ربي يسعدك ياحبيبة خوك..
نجمه: ويفرحني بيك انت وصاحبة عمري..ابتسم علاء وحنين تحشمت..كملت طريقها وخوها جنبها لين طلعت برا...
ادور بعيونها ع بوها مالقتاش..لقت انور وشكري بس ..قدمت لأنور اللي حضنها وباس راسها: ربي يسعدك ..ردبالك ع راجلك وارفعي روسنا...
نجمه ابتسمت : حاضر...وقفت قدام شكري اللي كان طالع حلو هلبه ومتأنق لكن ماكانش لابس بدله كان لابس سوريه بيضا وسروال أسود...
شكري بإبتسامه: شن جو..
نجمه ابتسمت: كويسه...نزللها خمارها وبيطلعوا من الباب نجمه تمنت لوتشوف بوها ولو بلمحه لكن مع الأسف حرمها من شوفته فهاليوم...هو اصلا مش يوم مميز تستاهل تشوف فيه فرحة أحبابها..بشن بيفرحوا يعني...!؟..
وصلها شكري لسياره: هيا اركبي ..ومشي بيركب من جيهته...
"ووووووين مااااااشيه ياااانجججججممممه"
بصدمه نجمه شبحت لعامر اللي منظره كان مزري وشكري قعدت يشبحله بصدمه اكبر..
قدم عامر بخطوات متثاقله: ماتتتترككككبييييشششش معااااه تعاااااالللي ممممعااااااي..
شكري عصب ع الأخر ومشاله: انت منو ياحيوان
عامر : اااااننننتتت اللي منننننو يا€£₩$ يا£€€$#
ضربه شكري وطيحه ونجمه ترعش مع بعضها...
طلعوا انور وعلاء بعد سمعوا الدوشه ..
انور بدهشه: عامر..
عامر ناض بصعوبه: نججججمممه مشششش لييييك ليييااا أنننننيييي متاااااعععي انننييي مممممرتتتتي انننني.
ضربه علاء وطيحه وطاح فيه ضرب..
اما انور فجي لشكري : خود مرتك وروح بيها الناس تتفرج علينا تو نلحقك ونفهمك كل شي...
شكري توجه لنجمه وبصوت عالي: خشي انطمري في السياره..
نجمه وهي ترعش وتبكي ركبت للسيارة وركب شكري وهو بيتفجر حرق العجل وانطلق بأقصى سرعه...
انور جبد علاء من على عامر بصعوبه وجي احمد خدي عامر ومشي ..
وبريكه وحنين كانوا يبكوا من الرعشه والعار اللي ناس شافته..واللي محضراش موسى اللي كان هارب من شكري ومايبيش يشوف وجهه..
طول الطريق ساكت ..ونجمه تبكي وتشهق وهو ع أعصابه..
شكري بعصبيه شديده ضرب ايده ع الستيرسو: ماااانبيش نسمع حسك ضمي فمك اسسسكتي ..
نجمه ببكي: خليني ن....
شكري بصوت اعلى : فممممممك ضمييييه خير مانقلب بيك السيارة توا ...حظي اسود اني عارف روحي..
نجمه سكتت والخوف مسيطر عليها وقعدت تبكي بصمت وكان تلقى تكتم انفاسها بش مايزيدش يعصب منها...وهو يردد "حظ اسود..حظ أحرف"
💥يعني ياسيد شكري لو انت حظك اسود هي شن لون حظها..اللي فرحة عمرها انحرمت منها ع خاطرك  مش هكي وبس العار اللي ختم بيه هاليوم اللي كان باين من أوله لاليه لون ولاطعم ولاريحه...مسكينه يانجمه...💔
***
وبينا معاد لو احنا بعاد
اكيد راجع ولو بيني وبينو بلاد..
وبينا معاد لو احنا بعاد اكيد راجع لو بيني وبينوا بلاد
قصاد عيني في كل مكان قصاد عيني في كل مكان..
طارق : غيرلنا النكد.. حطلنا شي فرفوحي..
شاهين : اول شي الأغنيه مش نكديه ..ثاني حاجه لعمر دياب مستحيل نغير من عليها وأنت عارف..
طارق بضحكه: باه آسفين ياسيدي طقينا في اللحم الحي..
شاهين بضحكه: ماتعرفش وينه حلواني (******)
طارق : اها نعرفه..
شاهين: اللي يخش في حاجات الصبايا...انا بنحجز في اللي قالولي عليه وبنهرب لحوشك..طول اسبوع الفرح (عرس فارس)
طارق: ماعنديش لك سرير بترقد ع الوطا..
شاهين "غير اعبى": مافيش مشكله..
طارق :ههههههههههه عارفها رقدة الوطا ليا من توا ...
شاهين : عليش حليت فمك وتكلمت دابنك عارف ...
طارق : ههههههههههههه كلب ياصاحبي..
شاهين بضحكه: لأني مصاحب كلب..
طارق: ههههههههههههههه...
***
ركبت وراه للشقه فتح الباب وخش وخشت وراه سكر الباب وجبدها من ذراعها ودخلها لدار النوم ودفها ع السرير..
شكري بغضب: تقعدي هني لين يجي خوك ونتفاهم معاه ..وسكر عليها الباب بالمفتاح ..وخلاها تبكي بعبرتها ..حسرة ع نفسها ..ع اللي صاير فيها ع اليوم اللي استناته بفارغ الصبر ومتوقعه انه حيكون أسعد يوم في حياتها لكن كان اسود يوم ...ومش حيكون الأخير....

...يتبع...
الفصول الاربعة