نجمة نجمتي ( جمان فريد) منقولة

الجزء الواحد وعشرين

لا إله إلا الله وحده لا شريك له له الملك وله الحمد وهو على كل شيء قدير

استغفر الله العظيم واتوب اليه

#نجمه_نجمتي

#جمان_فريد

الجزء الحادي والعشرين🥀

روحت نجمه ع حوش اماليها وكانوا محتفلين غادي بتخرج علاء وحنين وسط العيلة وصوروا كل شي بالفيديو بش يوروه لموسى وبريكه لما يروحوا...شكري حضر لإن موسى مش موجود..بعد تمت الحفله ..كانوا الرجالة في المربوعه..انور وعلاء وشكري...
انور يكلم في بوه: كله تماااام...ايه صورولكم كل شي ..وشبح لعلاء وضحك..ايه...اطمن المفتاح في جيبي...ايه ..حاضر..هي ادعولنا ....تمام في أمان الله وصكر..
انور بضحكه وبحسن نيه: بوك متصل يسأل ع الكاصه...
علاء: امنيتي نعرف شن فيها اللي حتي فلوسه مايحطش فيهم ف الحوش..
انور : والله اني بروحي مانعرف ومن الخوف ماجربتش نعرف..ضحكوا كلهم بس شكري كان مركز في كلامه وعقله في جهة تانيه...
نجمه بضيق: معاش يقرب مني زي قبل نحس فيه زي اللي عايفني او مش عجباته..
حنين تشبحلها بألم: عادي مرات مشغول وباله مش فاضي..
نجمه : مرات ..نفكر لما نروحوا نديرله جو بالك تصير حاجه..نبي الصغار ياحنين نبيهم يملوا حياتي ويغيروها
الكلمتين الأخيرات كانوا كفيلات انهم يوصلوا لحنين تعاسه نجمه اللي تخفي فيها ورا قناع السعاده المزيفه اللي ديمه تحط فيه..
حنين : استنيني شويه وجايه...ركبت حنين لشقتها وجابت حاجه لنجمه وجتها ...
حنين وهي داهشه: خودي
نجمه : شن هذا ..
حنين : البسيه لماتروحوا حلو هلبه ويطلع عليك..
نجمه شافته وتحشمت
حنين بضحكه: ريت المتحشمه..
نجمه: هههههههه مبردك..
جاهم علاء: نجمه شكري قال هيا..
ناضت نجمه ولبست عبايتها سلمت ع حنين وطلعت سلمت ع خوتها وركبت مع شكري وروحوا..
في الطريق..
شكري: نجمه..
نجمه: نعم..
شكري: بوك يحط في فلوسه فالحوش ولا المصرف
نجمه بتلقائيه: في المصرف..علاش
شكري: لا غير الخنبه كاتره اليومين هادوا  بالذات في جيهتكم
نجمه: ربك الحافظ ..
شكري: لكن نسمع في الاولاد يدووا ع كاصه ماكاصه..
نجمه بحسن نيه: اها ايه عنده كاصه في دار النوم بس مافيهاش فلوس..ع حسب مانعرف وراق..
شكري ابتسم بخبث: أها...
وصلوا للحوش ..هورن تليفونه قعد يتكلم في الصاله..وهي انتهزت الفرصه..خشت شطفت جسمها ودارت لوشن ولبست اللي عطتهولها حنين..تحشمت هلبه ..بس تفكيرها في موضوع الصغار عطاها الجرأه طلعت من الحمام وشكري خش للدار وشافها ..
هي تحشمت وراسها لوطا..
شكري بإزدراء: شنو اللي لابستيه هذا ..
نجمه استغربت في نبرة صوته وقامت راسها وشبحتله: خيره مش حلو..
شكري : حلو لكن مايمشيش معاك..يبي وحده جسمها حلو وأنثى بكل معني الكلمه...
"رفقا بالقوارير" ...المراة زي المرشه تنكسر بسرعه وصعب كسرها يتصلح..كلمه كفيله انها تكسرها لأجزاء..كلمة شكري كسرت في نجمها ثقتها في نفسها حطمتها بكل معني الكلمه..
نجمه فمها يرعش: ككيف..أني مشش أنثى..
شكري برفعة حاجب: شبه...
نجمه: توا وليت شبه انثى؟
شكري: بصراحه ايه هامله نفسك شوفي جسمك كيف مولي زي المومياء مافيكش انوثه ...
هو يتكلم عادي جدا يطلع في الكلام بأريحيه وهي مع كل حرف قلبها ينجرح اكثر ونفسها تنكسر بزياده..نزلت دمعه حارقه ع خدها..مشت للدولاب طلعت منه توته خشت للحمام ولبستها وخشت فراشها ورقدت..اما هوطلع خدي عصير من الثلاجه شربه وخش غير حوايجه ورقد..
نجمه دموعها تنزل بصدمه معقوله شكري هادي حقيقته إنسان أناني بلاإحساس ومغرور لهالحد..او هي بحبها الزايد ليه خلاته هكي ..كملت ليلتها دموع وخلاص..
....
اهدا حبيبي اهدا
علاء : كيف نهدا فهميني رزقي راح في لمح في البصر
حنين: حسبنا الله ونعم الوكيل..طلع من شقته يجري وحنين حطت وشاحهها ونزلت وراه ..طلع من الباب وهي طلعت وراه لقوا انور واقف ع صاحبه اللي علاء مايتقبلاش..
انور: خيرك علاء شن في ..
علاء: المحل انخنب رزقي راح عطيني مفتاح سيارتك سيارتي في الورشه..
انور وهو مصدوم ويعطي فيه المفتاح : كيف صارهكي
علاء: شن عرفني..ومشي للسياره..
حنين : بالله عليك ياأنور أمشي معاه..
خيري يشبح لحنين وقدم لعلاء: تبي مساعده تفضل..
علاء بدون مايشبحله : صحيت ..وولع السياره..
حنين بخوف شديد: علاء هدي نفسك بالله عليك..علاء هذا وين استاقض بيها واقفه برا قام عينه لقي خيري عيونه فيها..
علاء  بعصبيه شديده وبصوت عالي: خشششششي داااااخل ياحمممممااااره
حنين انصدمت من اسلوبه خشت طول ..وجعها هلبه اهانها قدام خوه وراجل غريب..
عبير سمعاته وبخبث: معليشي حبيبه هادوا الرجاله ياخدوك باللسان والكلام الحلو وبعدين يبدوا يتعروا ويطلعوا ع حقيقتهم..
حنين شبحتلها ومابتش ترد خشت وفاتتها ..اما هي ضحكت وكانت رايقه ع الأخر..
....
مشوا المحل لقوه ع الزليز..طبعا هو محل موبايلات بيع وتصليح..خسارة كبيره كلاها علاء ومش عارف كيف حيعوضها..
انور: فوتها هالمصلحه وافتح صيدليه..
علاء بعصبيه: تشنو صبلي نشرب..راه دافع دمي قلبي فيه والصيدليه كنت ناوي نديرها بأرباح المحل هذا..كانت خدمتنا فيه ماشيه 100%..المصيبه ان في ناس مخلية تليفونتها للتصليح ومشت معاهم..
توفيق: لالا اني امس خديتهم للحوش كلهم بش نصلحهم سبحان الله تقول ربك الهمني..
علاء ارتاح وكذلك انور..
خيري كان معاهم مركز هلبه وعقله يغزله في هلبه حاجات..
خيري :خسارتك عليا
علاء بأنزعاج : صحيت مانبي منك شي..
خيري : عليا الطلاق لما تاخد حق بضاعتك اللي انخنبت..
علاء انصدم وانور كذلك..
خيري: دين مش صدقه ..وليك وقت مفتوح أمتى تبي رده..
توفيق نخص علاء وشبحله يبيه يوافق..
انور يشبحله بنظرة تقوله هذا الحل الوحيد..
علاء : عطيني وقت نفكر..
خيري بضحكه : راني حلفت بالطلاق..
علاء معاش عرف شن يرد ..وافق...مشوا للمركز بلغوا ع الخنبه ..ومنها توجهوا لمكان عمل خيري عطاه شيك بالمبلغ واصر علاء يدير ورقة تثبت حق خيري فرد الدين...
"بس ياترى عاقبه هاللي صار كيف حيكون شكلها ..وخيري دار اللي داره حبا للخير ولا عنده موال ويبي يغنيه؟"...
....
أسف كنت معصب وانتي ربي يهديك طالعه هكي قدام الراجل..
حنين قالبه وجهها وعيونها معبيات الدموع..
علاء: حبيبي خلاص ياروحي اعذريني عاد نموت فيك ونغار عليك..
حنين : انت اهنتني قدام خوك ..
علاء: حقك ع راسي واني الحمار..
حنين بضحكه: حاشاك ..مش هكي الإعتذار مفروض يكون..
غمزلها علاء: مالا كيف تبيه يكون..
ناضت حنين: صايع  😳
علاء ضحك وناض وراها ❤...
***
قبل مرواحة موسى وبريكه بأسبوع كانوا يوتوا في الحوش ويقلبوا فيه نجمه مشت تقلب مع حنين وعبير...يوم كامل ..
جي شكري تعشى ..وقعمز يهدرز ع انور..
شكري : سيارتك عاجبتني ونفكر نشري زيها..
انور : تبيها خودها ماتغلاش عليك..
شكري بضحكه: لا خلي سيارتك ليك..غير نبي نشوفها من داخل لوما فيش مشكله
انور بحسن نيه: اكيد مافيش مشكله ..طلعله شك مفاتيح ..خود شوفها بروحك الحق بطني معبيه ومتنبل ..
شكري"عبيط وساذج زي ماتوقعت": ههههه تمام مش معطل..طلع شكري برا ومشي لجهة السيارة فتحها وقعمز فيها وقعد يدور ع مفتاح لكاصه ..كان في واحد صغير ..واضح انه هو نسخ عنه..وطلع من السيارة سكرها وخش داخل..
شكري: خود هاك وحدفله المفاتيح ..
انور قعد يتفحص في المفاتيح بيتأكد من مفتاح الكاصه..
شكري ابتسم بتهكم وفي داخله"جي النهار اللي حنكسرك فيه ياموسى غير ع الله تطلع في حاجه تستاهل في الكاصه"...
***
أي ولايه؟؟....اها ..تمام ...مشكور واجد ...جميلك في رقبتي..بارك الله فيك...مع السلامه ..وصكر..تلفت لمرته اللي كانت معاه ع الخط...
كاريمان برفعة حاجب: واضح ان عندك سفرة ومهمه اخرى..
عمر بإبتسامه : اها...مهمه بالحيل..بيعدي معاي باتي ..
كاريمان بإستغراب: عمي ..
عمر ابتسم وهز راسه بأيجاب وخش لسريره بيرقد
كاريمان: يعني مش حتحكي ليش هالسفره..
عمر وهو يحط في راسه ع المخده: تصبحي ع خير..وتغطى..
كاريمان مطت شواربها بإستياء"ياخبر اليوم بفلوس بكرا يقعد ببلاش"..ورقدت حتى هيا...
***
في ليلة من ليالي..انفتح باب حوش موسى بهدوء شديد..خش شخص ملتم..كان عارف الحوش كويس ..يمشي بهدوء وحذر.."واضح انه فاضي زي ماقالي بالزبط"....تسلل لدار النوم وفتح الباب اللي ماكانش مسكر بالمفتاح..خش وسكر وراه الباب وقعد يدور ع الكاصه وبعد بحث طال شويه لقاها..وطلع المفتاح وفتحها..استغرب في اللي شافه طلع تليفونه واتصل برقم محدد..
: ايوه ...ره مالقيتش فيها غير ورقه وحدة بس..
: اللي تلقاه جيبه..
:باه ..وصكر عليه..طلع الورقه..وصكر الكاصه ..وحاول ترتيب كل شي زي ماكان..وطلع بسرعه...
***
جي يوم مرواح موسى وبريكه استقبلوهم علاء وانور في المطار روحوا بيهم بالكلاكساات ..كانوا في استقبالهم في الحوش عبد العظيم وخوت موسى وصغار خوته..ونجمه وام العز ونساوين عمامهم إلى جانب عبير وحنين...
دارو غدي..ووزعت فيه بريكه الهدايا ومية زمزم..وقعدت تحكيلهم ع العمرة وأجوائها...
...
وهادي سبحة وساعه وبيرو..وسوريه وهادي حصتك من مية زمزم..وحصة خالتي وعمي...
شكري بعدم اهتمام: غدوة ترفعي الحاجات وتعطيهم لبوي..
نجمه: بس هادوا متسميات عليك..
شكري: ماعندي ماندير بيهم..وخش لسريره ..سكري الضي بنرقد...
نجمه سكرت الضي وطلعت...كالعاده تبكي بروحها"الله يسامحك ياشكري ع اللي ديرلي فيه..يعلم الله قداش نحبك ونبي رضاك لكن أنت ديما كاسرني ..الله يسامحك الله يسامحك"
💔ذنبي أنا..ذنبي بهواك
وهمي انا ياحبيبي رضاك
وأنت ولا بتسأل ع حدا هايم بمدا عايش ع هواك
حظي انا بعيوني داريك تغفى وانا أسهر لياليك
بقلبي بكي بعيوني حكي ولا عم بشتكي ولافي جافيك💔..
***
حبيبي فين انا أجيلك
سهرت الليل اناديلك
حبيبي فين اناأجيلك
سهرت الليل  أناديلك..
الله الله ع الصوت السمح..
شاهين : اهههووووو غدة عاش من شافك..
غاده قعمزت جنبه: انت اللي عاش من شافك ..صاير انت سندباد كلها أيامك سفر
شاهين بضحكه: اسكتي وانتي صوتك كيف صوت سيارة  عطيه البواب وين يولعها الصبح..
غاده: ههههههههههه تافه والله..
شاهين: غده..
غاده: هممم...
شاهين : ياحبكم يا البنات لجو البقر هضا ..المهم شن دايرة في قرايتك..
غادة: مية مية كل شي تمام..
شاهين : به ..بنسألك...
غاده: تفضل..
شاهين تنهد: عادي غدة تزوجي وانتي تقري..
غاده وجهها ولا احمر..
شاهين: كنه وجك قعد ألوان كله سؤال ره..
غاده : احمم مش عارفه  😳
شاهين : كيف مش عارفه..تقدري ولالا..
غاده سكتت..
شاهين : من الاخر في واحد صاحبي راجل كويس وشكروه ليا وطلبك مني واللي خلاني نفتح معاك الموضوع طارق اللي مدحه ليا زدت تشجعت ..
غاده نخصها قلبها لما سمعت اخر جمله من كثر ماأضايقت ردت بدون تفكير: تمام كلمه وقوله موافقه مبدئيا
شاهين رفع حاجبه اليسار: شن القرار السريع هضا..تحشمي  ديري لقطه قولي نفكر ونرد عليك حتى بالكذب..
غاده : احمم رديت طول اختصار للوقت ..😳
شاهين : ع أساس بترقعيها توا ..صبي من يالاي صبي.. وفكري في الموضوع زين وردي عليا معاك اسبوع..
غاده ناضت وهي محرجه ومضايقه في نفس الوقت من طارق اللي قاعدة تتعذب في حبه وهو مش مدورها أو هي متهيألها هكي..
***
نزلت ولقت الباب مردود سمعت دوشه..
نجمه بخوف: شكري اشبح شن صاير داخل..
ضربه الفضول نزل من السيارة وخش هو وياها...
"أني مأمنك انت المفتاح عندك أنت "...
نجمه : يااربي شن صاير ..اما شكري فزبط شن صاير وابتسم بخبث.."ياشماتي فيك ياموسى***"
خشت نجمه لدار النوم اللي كان الصوت طالع منها ووراها شكري وقعد واقف في الباب..لقت أمها ترعش وتبكي وانور واقف قدام بوها وبوها وجهه أحمر من الغضب ..ع جية حنين وعلاء ..علاء خش وحنين قعدت برا..
علاء: شن في..
موسى : الباشا اللي امنته ع اهم شي عندي ..خاني
انور: ربي يهديك يابوي خيانة شني بس..
موسى : باه فهمني قولي كيف ..تنخنب الكاصه ولاهي مكسرة ولاصاير فيها خلع فهمني ..
انور بعصبيه : مش عاااارف مش عاااارف
موسى: ياتوا تطلع باللي كان في الكاسه ياتاخد مرتك وصغارك وتنتلف من هني معاش نبي نشوف وجهك..
كلهم انصدموا بقوة..
بريكه ببكي: لا ياموسى تربح لا تو يجيب اللي فيها تو يجيبه طلعه سلم ولدي تربح..
انور بصوت عااالي: تشششن تقولي يااام والله ماعندي حاجه بالله...
بريكه بخوف جاته : سلم وليدي طلع بالله عليك عارفتك تبي تسكن في حوش بروحك توا بوك يعاونك غير طلعه تربح
انور بغضب: لاالااا انتي شكلك خرفتي ..ويقدم موسى يضربه كف ويلحقه بالثاني: امشي اطلع برا ياكلب اطلع من حوشي ومعاش تخشله حي ولاميت..
انور خدي مرته وطلع وهو في أقصى مراحل الغضب..
بريكه بهلع: لا ياموسى لاتربح..
موسى: اسكتي انتي اسكتي الحاجه اللي كانت في الكاصه أغلى مانملك ولدك خنبني خنبني افهمي ضنوة خايبه ربايه مسخه..وهو يعيط ويكشخ لمح نجمه وقف لما شاف شكري في الباب يتفرج وشبحله بنظرة شماته..
موسى بغضب شديد اشر عليه: هذا شن يدير هني..
نجمه ببطئ التفتت لشكري..
شكري رفع حواجبه وقعد ساكت..
موسى: شن جابك هني انت شن ماد وجهك بيناتنا علاش بش تتمشت ياولد الخضار..
شكري قعد يشبحله والنار تطلع من عيونه: ولد الخضار ربى صغاره خير من ربايتك يا حضرة العقيد المتقاعد..والدليل العار اللي شفته توا
علاء: هييييه انت الزم حدك..
موسى: لولا بنتي اللي وقفت في وجهي ع خاطرك وهددتني اديرلي العار كان ماوافقت عليك ..نكرة زيك مندخله حوشي..
شكري : واني حوشك هادا بالله حلف ماعاد جايه ..نجمه ..عندك 5دقايق ماتطلعيش ماعاد قاعده ع ذمتي..ومشي
حنين تشبحله بإشمئزاز  ولفت وجهه لنجمه اللي كانت وافقه مصدومه فجأه ارتسمت ع وجهها ملامح الغضب والتفتت لبوها..
نجمه بغضب: انت اهنت راجلي وديما تهين فيه ولزيته توا ولادرتلي قيمه ..وأني اللي مايبيش راجلي معاش نبيه ولفت بتطلع ..
موسى بحزم: يحرم عليك حوشي حي ولا ميت ..حتى عزاي ماتخشيله ..اني ماعاش عندي بنات..
اقسى لحظه ممكن تمر ع كل من حضر هالموقف ..كلهم انصدموا في نجمه اللي باعت اهلها بش تشري شكري..طلعت من الحوش وهي شبه مش مستوعبه شن دارت ...شن اللي صاار..رجليها يرفعوا فيها...لالا قلبها..ايه قلبها ..هالمضغة الصغيره اللي انعمت بصيرته بالمرة..طلعت لقاته كيف بيمشي..ابتسم بنصر لما شافها طالعه فتحت الباب وركبت..وهادي كانت أخر مرة تخطي فيها نجمه هالحوش ..وأخر مرة تشوف فيها بوها..وياريتها تعلم 💔..
***
فاتوا أيام ع الحادثه اللي صارت..نجمه لقت روحها بروحها خلاص..اختارت يكون شكري وأهله هما عيلتها..معاش في خلاص من حياة الذل والمرمدة والإهانه..هي اختارت هي اختارت...الله يلعن اختيارات القلب والهوى...
انور حط مرته في حوش ماليها ومشي للصحراء..أخباره انقطعت تماما حتى أمه ماباش يسأل عنها..
موسى قعد حابس روحه في داره..يصلي ويرقد ومرة مرة يتفرج ع التلفزيون ورافض يطلع لأي حد أو يقابل حد..
...
ام العز: الله يهديك يابنتي معقوله هكي اديري..
نجمه ببكي: اهان راجلي  ولزه ياخالتي ولا دارلي قيمه..
ام العز: لكن هذا بوك
نجمه: بوي غير بالإسم ..
أم العز: يقعد بوك يانجمه ..
نجمه: خلاص اهو تبرا مني مرة وحده
ام العز: لحظة غضب..
نجمه ابتسمت بتهكم: بوي اللي يديره يقصده مافيش حاجه تطلع منه من غير قصد..
أم العز تنهدت: لاحول ولاقوة إلا بالله..
نجمه تمسح في دموعها: خلينا من هالموضوع معاش نبي نتكلم فيه ..قوليلي شن حال عمي عبد العظيم...
ام العز: خايفه عليه يانجمه حاله مش باهي
نجمه حطت ايدها ع ايد خالتها: ربي يشفيه إن شاء انتي ادعيله وخلاص..
ام العز تنهدت بألم : هو هذا...
***
اعتذر منك سيدي السيده للاهم تركت المنزل منذ مدة..
عبدالله : كم بالضبط..
:شهرين تقريبا
عبدالله: لا معلومات لديك عن مكان سكنها الجديد
: مع الأسف لا..
عبد الله مط شواربه بإستياء: حسنا..شكرا لك..ومشي للسيارة اللي كان فيها عمه وجده ..
عبدالله : سيبت حوشها هضا ليها شهرين ومافش معلومات عن مكان سكنها الجديد..
عمر ضرب ع فخده من القهر..وبوه طبطب ع فخده اللي ضربها ..
عبدالله : مافش قدامنا كان المستشفى..
فتح الله: خلاص توكل..
ولع السياره عبدالله وانطلق للمستشفى...وصلوا غادي لقوها سيبتها وكذلك مافيش عنها معلومه وعمر قريب يهبل..
***
فاتت الأيام وشكري قرر بيبدا مشروعه بس راس المال عنده مش هلبه وبيخش شراكه ومايبيش نسبته تكون أقل نسبه يبيها تكون ند بالند مع شركائه بش ماحد يحكم فيه..
كان مقعمز يفكر في الليل ..نجمه كانت تحدد في الحوايج ومركزة معاه...حطت الحديد ع تركينه وجاته قعمزت جنبه..
نجمه: خيرك شيكو..
شكري: مافي شي..
نجمه : عليا اني اني اكثر من حافظك وعارفك من لما تزوجنا ماريتكش مهموم هكي..
شكري حس روحه يبي يحكي بش يرتاح: في مشروع مضمون وفيه شراكه مع زوز من رجال الأعمال نبي نخش معاهم فيه بخبرتي بس نبي يكون عندي راس مال وبالنص معاهم فيها بش ماحد يتريس عليا..معاش نبي نكون تبع ياسر نبي نكون سيد خدمتي...
نجمه : قداش ناقصك بالزبط..
شكري ضحك بهزوة: علاش عندك..
نجمه : الله يسامحك ديما هازي عليا ..
شكري : فكينا من الدراما مش ناقص...
نجمه شدت ايده: غير خودني ع قد عقلي وقولي كم ناقص..
شكري بملل: 25ألف ..
نجمه سكتت وقعدت تفكر..
شكري: نوضي نوضي كملي اللي ديري فيه خل بنرقد..رقد وتغطى..
اما هيا فناضت تكمل في شغلها وهي تفكر..
اليوم اللي بعده طلبت منه تقعد في الحوش بحجة انها تبي اضمه وبعد إلحاح شديد وافق...
قعدت تخطط لشي معين..طيبت اللي يحبه..بعدها لادت ع روحها حلوة وفتله واستشوار...طلعت روب ليها وقت داسته قاعد جديد..عطرت الدار وبخرتها...
وهكي لين جي وقت مرواحه لبست ومكيجت وتعطرت ووتت العشي..والجو كان رومانسي ولا أروع..اول مافتح الباب شم ريحة البخور وشاف الجو الخاص اللي مدايرته بعدين طلعتله..شافها هالمرة عجباته الروب مناسبها بعض الشي..
شكري: شنو عيد ميلادك
نجمه بضحكه : لا عيد ميلادي فات..
شكري: ام باهي ومش عيد ميلادي..مالا شنو..
جاته وحطت ايدها ورا رقبته : راجلي ونبي ندلعه ضروري من المناسبه..
شكري عجبه الجوباسها ورفعها لدار النوم.. 💕
بعد وقت ...
وهما مقعمزين يتعشوا...نجمه تاكل وهي مضايقه..لأنه موضوع الصغار قاعد بعيد المنال كانت تحساب روحها بتتعرف تتصرف ماقدرتش ..بس حاولت تتغاضى وخلاص وتقول في نفسها"عادي مازال ماسكرنا سنه والعمر قدامنا"..
بعد سكوت تم ماكلته وناض لحقاته...
نجمه: شكري ..
شكري: هاه..
نجمه خشت وفتحت الدولاب وطلعت منه حاجه ملفوفه في كيسه سودا..وحطتها ع السرير...
شكري بأستغراب : هذا شنو..
نجمه : لحظه بس.. حولت الشكارة وتفاجأ بالكاصه ..فتحتها نجمه وحطتها قدامه انصدم بالذهب اللي فيها..
شكري بدهشه: هذا شنو..
نجمه بغصه: هذا ذهبي دارهولي بوي من لما كنت بنت لين تزوجت..
شكري"طلعنا منه بفايده": ايه باه..
نجمه: خودهم..
شكري وهو متفاجئ: شنو..
نجمه بإبتسامه: خودهم وكمل بيهم فلوسك وخش الشراكه وراسك مرفوع..
شكري عيونه ع الذهب ويفكر قداش يساوي وبتصنع: مش من حقي نتصرف فيهم..
نجمه: كان مش من حقك من حق منو امال ..اني كلي من حقك بكل مانملك..
شكري شبحلها وابتسم وحضنها..
نجمه بحب: نحبك نعشقك معندي في الدنيا أغلى منك..
شكري وهو مبتسم: مش حننسالك هالمعروف
نجمه حضناته بقوة ..وكإنه تقولي خلاص خسرت كل الناس بش نكسبك ماتخذلنيش..اما هو فقعد يتخايل روحه بعد يخش الشراكه في هالمشروع لوين ممكن يوصل...💸💰

وخش مشروعه ونجح فعلا واستقر وضعه وصار عنده إلى جانب هالشركه ..محل كبير للأدوات الكهربائيه..وتاني للمكيفات..والتركيب والتصليح..شري حوش وبدي يأثث فيه ونجمه فرحانه هلبه ..برغم ان ماتغير عليها شي...
***
31\12\2009
الفجر...
ناضت صلت صلاتها ..وطلعت ادور ع الحوش كعادتها ..بعدين مشتله للدار لقاته مقعمز ع الوطا ومتكي ع السرير وسبحته في ايده ويتفرج ع الجزيرة..
بريكه: نديرلك قهيوه ولامازال ...
موسى شبحلها وأبتسم: فوتي ربع ساعه تانيه...
بريكه بإبتسامه : حاضر..طلعت وردت الباب..
دارت دورة ع جنانها وع شجرتها تسقي وتنظف ..قطفت نعناع ..حست بقطرات ميه تنزل عليها شبحت لوطا لقت الأرض تسقبل في قطرة وراها قطرة خشت طول...
بريكه هي تشبح من الروشن :شكلها مطرة قويه ..حييي نسيت القهوة..حطت البكرج ع النار وجي خاطرها في العصيده مشت بتسأله كان خاطره حتى هو...
لما جت تقرب من الدار قعدت تسمع في صوت القرآن يتلى والصوت كان من التلفزيون..خشت لقاته متكي ع براسه ع حافة السرير...بريكه بضحكه: شن مرقده هكي..ركزت بنظرها ع ايده اليمين كانت فيها السبحه والسبابه متاعه شبحه مرفوعه في اتجاه معين..بلعت ريقها وهي تحرك في عيونها لوين مامتجهه سبابته...القبله..ايه القبله...🕋
بريكه تبلع في ريقها وتقرب بحذر وعيونها معبيات دموع ..
بريكه وهي ترعش: موسى...موسى..موسى..نوض ..موسى نوض ولاننخصك بصبعي..هاااه بننخصك ره..ويدها ترعش قعدت تنخص فيه ..موسى ...موسى..نوض ياموسى...صوت المطر بدي يقوي...موسى تسمع في المطر..فكرت نفطروا عصيده...ونتغدوا رشده مبكبكه...موسى ..موسى ...نوض ياغالي ..نوض بالله عليك نوض ..وبدت دموعها تنزل..موسى وراس صغارنا تنوض...ورحمه وبيك ..ورحمه عمي نوري نوض..موسى لاااالاالاااا ياموسى لااااااااا بالله عليك لااااااااااا ...موسى.....يااااااااااربي قعدت تهز فيه وبعدين حضناته...ياااااااربي ...موسىىىى موسى ...وانهارت بالبكي...

...يتبع...
الفصول الاربعة