نجمة نجمتي ( جمان فريد) منقولة

جزء الثلاثين

#نجمه_نجمتي

#جمان_فريد

الجزء الثلاثون💕

بعد انتهاء الإجتماع..
اللي هذا من الموظفين بدي يطلع..نجمه كانت تلملم في أوراقها ونور تشبحلها وتشبح لشاهين اللي كان يسرقلها في النظرات وهو قدام لاب توبه...👨‍💻
نور بصوت عالي بعض الشي: هوني شن رايك نطلعوا نتغدوا برا
شاهين:😲 نور نحنا في مكان عمل😒
نور بإبتسامه خبيثه: اسفه ننسى متعودة نادي فيك هوني معليش
شاهين:😨...وعيونه طول توجهوا لنجمه لقاها شادة شنطتها وبتطلع ولاكإنها تسمع في شي قعد معاها بعيونه لين طلعلت...
نور قدمتله: اهتمامك بيها غريب
شاهين بدون مايشبحلها: ماغريب إلا الشيطان..
نور: عليش تعامل فيها بتمييز لأنها تقرب لهذيك الولية ..
شاهين شبحلها بحده: مادخلكش..مايخصكش..مايعنيكش..
نور اضايقت هلبه : اوكي اسفه..وخدت شنطتها وطلعت...
جاه طارق اللي كان مقعمز بعيد شويه: كنها...
شاهين بنفاذ صبر: مزطتني ياراجل بديت نحس فروحي متحملها فوق من النفس..
طارق: ماتخليهاش تحط راسها براس نجمه
شاهين شبحله : هي تجرب دير حاجه كيف هذي بس وتشوف وجه شاهين الثاني..
طارق بضحكه: الا قولي شن التطورات هذينا جايين مع بعضكم وتضحكوا..
شاهين اذكر اللي صار الصبح ابتسم: صدفه...
طارق : يامكثر صدفك ..
شاهين ابتسم وقعد ساكت💓
مرت الأيام وراها الأيام وشاهين تعلق بنجمه تعلق مش طبيعي..مايتحملش نهاره يفوت من غير مايشوفها أو يكلمها..باقي اليوم برا الشركه يفوت كله تفكير فيها هي وبس..يوم الجمعه هذا اطول يوم يمر عليه لأن مايشوفش فيه في الإنسانه اللي ولت في فتره قصيره..محور حياته ...بس بعد مرور شهر هالجمعه كانت غير...
غاده: آنستيني
نجمه : هههههههه...الله يأنسك..
غاده: عجبك حوشنا..
نجمه : ماشاء الله نظامه وتصميمه وديكوره كل شي احلى من التاني..
غاده: عيونك الحلوة..
نجمه بإبتسامه: هي نبدوا قرايه ومانضيعوش وقت..
غاده بضحكه: اوكي.. وبدوا يقروا..
...
ياراجل ماعندكم غير الكلام في انجازات وقت فات خليكم في الحاضر..
سامي: االلي له ماضي له حاضر..
طارق: هههههه كلام فاضي خلاص راحت عليكم ووقتكم تم..
شاهين: بالله فكونا من الدوة ع الكورة..
سند: نستغرب فيك ياشاهين كيف ماتحبهش..
شاهين: ماخشتش راسي كورة ويقعدوا يجروا وراها 22راجل شن الفايده ولا الحكمه منها..
فارس: رياضه ..
شاهين : اللي يسمع يقول تمارس فيها ماك تفرج عليها وبس
سامي بملل: بدينا بالفلسفه اللي تنفخ الراس
طارق بضحكه: المشكله مش راكبين ع بعضهم شاهين والفلسفه..
كلهم :😂😂😂😂
شاهين: غم فمك خيرلك انت😒
طارق:😂
سامي: كلامه حق ماكذبش..
شاهين: انت التاني اسكت خير ماتنسى تحق عبدالله اليوم..
سامي: غصب عنك ..
شاهين: عليك نبرة حكى بيها كيف التمساح..خلاص خلاص نبصروا..
سامي:😑
احمد: عليش هو التمساح عنده صوت..
كلهم :😂😂😂😂😂
سامي: سيدك هضا ديما هك يفتي في اللي مالش فيه..
شاهين:😒 انا نصبي نجيب العيل قبل لتصير حاجات مش في صالحكم ...ومشي ..
خش للحوش..
شاهين بصوت عالي ومفخم شوي: يااااااعرب هووووو
جاته ناديه تجري بهمس: هييييه وطي حسك اختك صاحبتها عندها..
شاهين ضيق عيونه بإزدراء : انا سريب الصحبات اللي يجن ويمشن ع الحوش هضا مانحبه..وصاحبات بنتك بالذات
ناديه: كنهن بنات ناس ..
شاهين: يتجعونن ويتلصقن..وعندك شباب في الحوش..
ناديه بضحكه: هاليوم المبارك اللي نزوجك فيه انت وسند فنهار واحد..
شاهين بنفاذ صبر: بالله ياأمي تربحي عدي جيبي عبدالله من امه وفكيني من وجع الراس..
ناديه بضحكه: ربي يهديك...ومشت..
...
غاده: الله عليك يانجمه فهمتها منك أكثر من الدكتور نفسه..
نجمه بضحكه: كويس...تعالي نشوفوا اللي بعده..
غاده بضحكه: هي..
...
طلع شاهين بعبدالله..
شاهين : اهوا جبتلك الصنديد الصغير..عبدالله اول ماشاف سامي فرفش طول وطلق عمه ومشاله يجري...حضنه سامي..
سامي: اهلا بالسبع..وباسه..شن جوك
عبدالله الصغير: مليح وأشر بصبعه هك 👍
كلهم ضحكوا...
شاهين : يقلد فيك واجد
سامي ابتسم وباس عبدالله ع راسه..
احمد: نفخلنا راسنا انا وأمي بيه..سامي سامي ..حتى البارح روح من حفلة عيد ميلاد صاحبه معقبلك من حاجاته..
سامي حضن عبدالله وهو متأثر..
فارس: حتى نحنا عمامه مايحبنا هك
شاهين: سامي حتى هو عمه مافيش فرق
سامي شبح لشاهين وابتسم..
طلق عبدالله سامي: شويه..نجي..ومشي يجري..
شاهين ناض: غير وين ماشي يابطريق ولحقه
خش عبدالله خدي شنطته من حدا أمه وطلع يجري..وامه زبطتت شن بيدير ابتسمت..
طلع عبدالله مع شاهين ووصل في سامي وعطاه الشنطه فتحها ولقي فيها شكلاطه وحلويات وشيبس محطوطات في صونيه وملفوفات بسلفر نايلو.. الدنيا نصه مهرس من حركه عبدالله بالشنطه لكن سامي فرح بيها لأبعد حد..ومشي هو وعبدالله بعيد شوي وقعدوا ياكلوا بروحهم..
سامي أول محول السلفر فاح عليه عطر نسائي غمض عيونه وهو يشم فيه..وبعدين ابتسم وقعد ياكل مع عبدالله..
...
ناديه خشت لنجمه وغاده..
ناديه : خلاص ساد قرايه توا لكم ثلاث ساعات متواصلات تقرن..تعالن اطلعن للصاله مدايرين قعدة مواليح وشاهي..عصور مأخر..وبالمرة نتعرفوا ع نجمه
اكثر..ابتسمت..نرجوا فيكن..ومشت..
نجمه بضحكه: امك عندها حق خل ناخدوا رست..
غادة بضحكه: وأخيرا
نجمه: هههههههههههه
طلعوا قعمزوا مع ناديه وأحلام ومنى ونور اللي جتهم من عشرة دقايق..بدت تتلصق ع عيلة عمها ع خاطر شاهين..ومافيش حد مش زابطها لكن دايرين الحولة..لما شافت نجمه انصدمت ...ونجمه تفاجئت..
غاده: تعرفن بعضكن..
نجمه بإبتسامه ومتفاجئه: اني نخدم في شركتكم ع هكي...
ناديه: قصدك انتي موظفه عند ولدي شاهين..
نجمه بضحكه: ايه..
غاده : ههههههههه عليك صدفه..
أحلام : كم لك تشتغلي فيها..
نجمه: شهرين وشويه
غاده: وانا مانعلمش...
ناديه : معناها انتي اللي توظفتي عن طريق للاهم..
نجمه بإبتسامه: ايه...
ناديه : تقربلك هيا
نجمه : عمتي اخت بوي..
كلهم تفاجئوا..
غاده بدهشه مع ضحكه: سبحان الله..عندك علم للاهم تكون أم بنت عمنا..
نجمه بضحكه: اكيد نعرف القصه بس ماكنتش نعرف انكم انتم..لااني سألت عمتي ولاهي قالتلي ع عيلة بنتها من يكونوا..
نور تهز في رجلها بعصبيه ومابتش تشارك في الحوار بكل..
"يااااااعرب هووووووو"
ناديه بضحكه: رئيسك الموقر..
كلهم ضحكوا..
ناديه بصوت عالي شويه: تعال ياشاهين نحنا في الصاله..
خش شاهين وهو حاضن عبدالله ويلعب معاه ويضحك فيه..لين وصل فيهم وقف ففم الصاله ونجمه كانت عاطيه بالظهر استغرب لأن في وحده غريبه وأمه تبيه يخش وهي موجوده..
ناديه بضحكه: غير تعال مافي حد غريب..
شاهين بإستغراب نزل عبدالله خلاه يمشي ع رجليه وخش..جمد في ارضه لما شافها💖
نجمه قعدت تضحك وهما كذلك..
شاهين بدهشه : أمي في حد غيركم هناولا نا نتخايل
ناديه :هههههههههههههه..هذي الموظفه الجديده عندكم الغرباويه..
شاهين: هي نفسها صاحبة الغدة..
ضحكوا وغاده انحرجت..
ناديه : اها نفسها اللي بدري كنت تنبرط ومش عاجبك سريب الصاحبات اللي يجن للحوش....
شاهين بربكه : مانقصدهاش طبعا نجمه مش كيفهن..وشبحلها بنظرة ليها معنى ..هنا ثرى ونجمه ثريا..وشن جاب الثرى للثريا.⭐
نجمه انحرجت ع الآخر قريب غاصت في الكرسي اللي مقعمزة فيه..😳
كلهم ضحكوا...
احلام بضحكه: اكيد واخده ع حناطة رئيسك..
نجمه: احمم بديت نتعود😳
ناديه : خلاص عدي البنت انحرجت منك..
شاهين يتأمل فيها وهي محرجه وعيونها لوطا وابتسم: باه طالع...بس قبل لنطلع..اختي ياأحلى غدة شكرا من قلبي..وابتسم وطلع..
كلهم مافهموش قصده ..وأولهم نجمه اللي ماكانتش فاهمه شاهين كويس ..
الوحيده اللي فهمت في هالجلسه غير نور..أحلام اللي كانت فاهمه نظرات شاهين لنجمة وابتسمت..
منى: هضا سلفي غريب اطوار شوي..
ناديه بضحكه: صدقتي..
ضحكت نجمه...وكملوا هدرزة...لين جي وقت بتروح مع المغرب..
ناديه : تو نقول لسند يمشي وراها..
نجمه: والله مامستاهله اتعبوا حد ..
ناديه: لايابنتي الدنيا مش امان ..
غادة : كلمت سند وقال باه..
نجمه بإحراج: والله ماليه لزوم تعبوا حد ع الفاضي..
ناديه: لاتعب ولاشي ..واجب علينا تطلعي من حوشنا وتردي لحوشكم وانتي بخير
نجمه ابتسمت..وقعدوا يستنوا في سند بس اللي جي ماكانش سند واكيد عارفين منو😁
شاهين بإبتسامه: بتروحي خلاص..
نجمه بخجل: ايه...
ناديه: وين سند..
شاهين : وكني انا مش مالي عينك يانبع الحنان..
ناديه بضحكه: لا تملاها وتزيد ياصقري..يعني انت اللي حتسايرها ..
شاهين شبح لنجمه بإبتسامه: نا رئيسها ونا الملزوم نردها سالمه لحوشها..
نجمه ابتسمت بخجل ...
غاده بدت تركز ع خوها وابتسمت لاإراديا..
ناديه : خلاص امال في أمانتك..
نجمه سلمت ع ناديه وغاده: صحيتوا ع كل شي ..
ناديه : مافي شي من قدرك..
غاده: انتي اللي صحيتي لولاك ماكنتش فهمت الماده الغليظه هذيك..
ضحكت نجمه: ماعنديش فيه جميل..
شاهين يراقب ومبتسم بس...
نجمه: هي تصبحوا ع خير..
غاده وناديه: قدامك كل خير..
التفتت لشاهين..
شاهين بأبتسامه : هيا..مشي قدامها وهي وراه..
وصلوا في سياراتهم هي ركبت وهو ركب وعيونه عليها بس..تحركت نجمه وهو وراها ..
كان يلقى الطريق ماتمش..مستعد يكمل عمره هكي عادي المهم وراها ومعاها..مش فاهم ولاعارف كيف حبها بهالسرعه بس هو مايعرفش ان قلبه يعرفها من زمااان...
وصلت خشت للحوش بعد ماانفتح باب القراج وتسكر..راجاها شوي في باله انه حتطلع تشكره ..فاتت ربع ساعه وماطلعتش..
شاهين ابتسم"نستيني كالعاده "..وحرك سيارته ومشي..وهو يسوق وصله مسج فتحه
(اسفه ماطلعتش شكرتك بس بنتي شدتني من اول ماخشيت ماقدرتش نخليها..تعبتك معاي شكرا)
هو ابتسم وتنهد وبعتلها(بوسيلي هالطشه...تعبك راحه)
وضحك وكمل طريقه ومشاعرة تتوهج بكل قوة وقلبه كالعاده قايمها داخل 💓💓💓
...
فاتوا كم يوم والحال كما هو ..لين جي يوم...
طلعت تجري من مكتبها بسرعه..شبحها طارق اللي كان يكلم في واحد من الموظفين واستغرب..ركبت سيارتها بسرعه وتحركت بسرعه...
طارق توجه لمكتب شاهين وهو جاي بيخش شاهين طلع ..
شاهين: هاه شن صار..
طارق بتوتر: اها بلغت خالد وراضي...بس نجمه..
شاهين : كنها..
طارق: وانا نكلم ف راضي لمحتها طالعه تجري وكإن في شي صاير معاها..
دف طارق ومشي لمكتبها سأل وردة..قالتله ان جاها اتصال وطلعت تجري بدون ماتقول شي..شاهين سيطر عليه الخوف وقلبه مش مهنيه بكل...
نجمه في هالوقت وصلت للحوش..
نجمه: وينها بشرى خيرها
بريكه بخوف: روحت تبكي وخشت سكرت عليها الدار..مشت نجمه تجري لدار بنتها..فتحت الباب لقتها قاعده بحوايج المدرسه وضامه ركابها لصدرها وتبكي..
نجمه جت قعمزت بحداها وبخوف شديد: ماما بنتي خيرك تبكي..بشورتي..
بشرى قامت راسها ووجهها كله دموع وبعبره: حقة انتي..اختي ..مش ماما
انصعقت نجمه سؤال بنتها اللي قسم قلبها نصين عمرها مافكرت فيه..ايه بشرى تسجلت ع أسم بو نجمه..ووحده من ابلات بشرى مش فاهمه الوضع وقالت لبشرى لماكانت تسمي في أسماء الصغار بأبائهم وأمهاتهم..ان ام بشرى بريكه..مش نجمه...علاء خوها بطريقه او بأخرى سجلها رسميا هكي..
💔نجمه ناضت من حدا بنتها وهي في حاله صدمه وفي داخلها تردد"الله لايسامحك ياشكري..الله لايسامحك ياشكري الله لايسامحك ياشكري"..طلعت من دار بنتها تمشي بخطوات ثقيله لين وصلت في دارها وسكرت الباب..وهذا كله تحت نظر امها اللي حيرقى عليها السكر من الخوف لما شافت حالة بنتها...
رن جرس الحوش..مشت بريكه تجري فتحاته اول ماشافت للاهم حضنتها..
للاهم بخوف: بريكه شن في ..
بريكه بخوف وبكي: نجمه ياللاهم نجمه خشت الدار وسكرت ع روحها..
للاهم وهي خاشه تجري: نور ديري بالك ع مرت خالك..ووصلت في دار نجمه وفتحتها طول لقتها حاطه راسها بين ايديها ..
لللاهم قدمت : نجمه ..
نجمه قامت راسها : ريتي ياعمتي..بنتي شن سألتني..سؤال خلا لساني ينشل ..قالتلي انتي امي ولااختي..ريتي ياعمتي ريتي ..ريتي وانهارت نجمه بالبكي..قعمزت للاهم حداها وحضنتها..
نجمه تبكي بالعبره: تعبت ياعمتي تعبت..كل مانقول بنتخطى الماضي بننسى..بنعيش حياتي طبيعي..يرجعلي ماضيا الأسود يذكرني بيه ..وقعدت تبكي وتبكي..
وللاهم دموعها ينزلوا..وبشرى الطفلة البريئه واقفه قدام دار أمها وتشوف فيها كيف تبكي امها اللي تعودت تشوفها تضحك..القويه ..حضنها الآمن ... شافتها توا مكسورة وضعيفه وتبكي...
فات باقي اليوم ع نجمه وهي حابسه روحها في الدار  تصلس وتبكي وتقرا في القران وكانت رافضه تاكل او تشرب...
شاهين باقي يومه مشي متعكر قلبه يوجع فيه ومشغول عليها هلبه ..ومش قادر يوصل فيها...ولايعرف خيرها ..تلفونها طول اليوم مقفل...
نجمه اللي كانت راقده فاقت ع لمسه ايد صغيرة وناعمه تمسح في دموعها اللي تنزل وهي راقده..
بشرى ببراءة: معاش تبكي خلاص انتي ماما وبس انتي ماما واني نحبك هلبه معاش تبكي..حضنتها نجمه وقعدت تبكي..
نجمه: نحبك هلبه مانحبش حد اكثر منك في الدنيا ..بشرى زادت حضنت امها أكثر ..رقدتها نجمه في جنبها وحضنتها ورقدوا الزوز...
تاني يوم ..
فاقت تاني يوم لقت بنتها نايضه قبلها ولابسه حوايج المدرسه وتضحك مع نور وعمتها وامها وجوهم حلو ابتسمت بإرتياح..بدلت وسقدت بنتها للمدرسه ...وهي توجهت لسيارتها للشركه...اللي صار سببلها في وجع زاد ع أوجاعها..طول الطريق دموعها تنزل لين وصلت...
كالعاده الجارح يستنى في النجمه اللي مش قادر يطولها مهما طار وتعلى..اول ماخشت وجت نازله نزل وجاها طول..
شاهين بقلق: نجمه وينك امس ..
التفتت ووجها قاعد عليه اثار الدموع وعيونها منفوخات من البكي..كانت مش طايقه حد بتاتا واساسا هي تتعامل مع شاهين بجديه وديما تحب تحافظ ع وجود حدود بيناتهم الحدود اللي شاهين يبي يحولها بأي طريقه...
شاهين بخوف: نجمه كنك شن صاير معاك..
نجمه بنظره حاده وبجديه وحزم: رجاءا استاذ شاهين..معاش تتعامل معاي بهالطريقه اني زيي زي اي موظف هني اللي بيني وبينك الخدمه وبس حياتي الشخصيه مانسمح لحد يسألني عليها ..بالذات انت ياريت تحافظ ع حدود التعامل بيني وبينك في نطاق العمل وبس..ويإما حنسيب من هاللحظه ومش حنفكر لافعقد ولاغيره..
شاهين كلامها جرحه هلبه ملامح وجهه تغيرت لأبتسامه بارده تخفي الم جرحه وبصوت هادي طلعت منه كلمه وحده بس: آسف...
التفتت وكملت طريقها داخل وهو بعد شوي لحقها..طول اليوم شاهين كان يتجنب حتى يشبح لوجهها ..وهي مش فبالها بكل ملهيه روحها بالخدمه تبي تنسى شويه اللي صار معاها..
فات يوم اتنين...تلاته..اربعه...خمسه ..سته...سبعه..تمانيه...........عشرين يوم..وشاهين معاملته لنجمه معامله رسميه لأبعد حد ..نجمه بعد راقت وولت نفسيتها احسن..حست بضيق من تعامل شاهين معاها..حست روحها فاقدة شاهين هلبه وهو قدامها يوميا في الدوام..بس ماتقدر ادير شي هي هكي تبي وهو دار اللي تبيه..
في يوم...
كان في إجتماع بعد تم..
قاعد شاهين كالعاده يشوف في اللاب توب..وطارق بحداه يطلع ع عقود..
من جهة تانيه مقعمزات نجمه ورده يتناقشوا ..وخالد جنبهم يوري لراضي في صور الرحله متاع...
نجمه لفت ع جنبها لمحت صورة منظر حلو وسمعت خالد يقول راس الهلال..فضولها تحرك..
نجمه : خالد
خالد التفت وبإبتسامه: نعم..
نجمه :ممكن نشوف الصورة اللي فتليفونك..
خالد : اكيد ومدهولها قعدت تشبح في المكان اللي فصورة ..نجمه بإنبهار : سبحان الخلاق ..في أما بلاد
ضحك خالد: هضا المكان هنا في ليبيا وعندنا تحديدا في الشرق
نجمه شبحتله بصدمه : قول والله..
خالد بضحكه : والله..
وردة: وفي غيره في المرج والجبل ..
نجمه : المية متاع البحر لونها حلوووو بالمرة ومختلف ماشاء الله..هادوا ثروة سياحيه..
خالد : ومازال عندي غيرهن لمناطق واجده في ليبيا..انا ضمن فريق استكشاف ليبي نديروا في رحلات في اماكن مميزة في ليبيا نصوروا فيها ونزلوا في الفيس ونعرفوا في الناس عليها..
نجمه بإعجاب: برافو بجد..والله مايبان عليك
خالد بضحكه: حتى وانتي تمدحي تختميها بهزيبه محترمه
نجمه ووردة: هههههههههههههههههه
اضحكي يانجمه..وهو صدره يصهد من النار اللي راكبه في المضغة اللي ع ايسار صدره من الغيره..عيونه ع اللاب بس عقله معاها والغيرة واكلاته..صاحبه يشبح لرجله اللي تهز وقبضة ايده المشدودة بقوة...
طارق يبي يتصرف: خالد..
خالد شبحله: نعم ..
طارق: عدي جيبلي الملف اللي كلمتك عليه البارح
خالد ناض : حاضر..
نجمه مدتله التليفون ..
خالد: خليه عندك كملي باقي الصور..
"كل واحد ع مكتبه "
انصدموا في نبرة الأمر الحاده اللي طلعت منه وهو عيونه مركزات ع اللاب توب وملامحه جاده هلبه..
شبحتله نجمه بضيق وناضوا هيا ووردة ولحقوا خالد اللي طلع قبلهم..
طارق شبحله : ش....
سكت لما اشرله بإيده✋ يسكت...وكمل شاهين خدمه وهو معصب..
بس نجمه حست بضيق استاحشت شاهين الأول وقعدت تأنب في نفسها ع الكلام اللي قالتهوله أخر مرة..بس مش بإيدها نفسيتها تعبانه واللي يعرف اللي مرت بيه يعذرها..
فاتوا الخميس والجمعه...
في يوم السبت
الساعه 11 صباحا
نجمه : ايوه ورده اني طالعة توا للمكتبه القريبه من هني نجيبهم ونجي..
وردة: ارجي نعدوا جميع
نجمه : باه تلقيني في البركيدجو..وصكرت..قعدت نجمه لاهية بتليفونها كانت تحسب في حسابات بالآله الحاسبه وتمشي..
ع جية شاهين ع رجليه بيخش للبركيدجو عيونه عليها زي كل مرة..❤
هي تمشي ومش مركزة وصلت برا..كان في زي صورلاصق في بوابه البركيدجو..كان في عامل حط فوقه بلوكه يحط في البلوك ومش مركز عليها لإنها ع حافه بطيح..
شاهين شبحها..لقي نجمه تحتها..خلاص كانت حتطيح ..
شاهين لاإراديا مشي يجري..نجمه سمعت الجري قامت عيونه ظلمت الدنيا فجأة..
شاهين حضنها وبعدها عن البلوكه اللي طاحت وتفترشت..
وجو مقعمزين الزوز..
نجمه هني وزي اي حد تعرض للحادثه اللي تعرضتلها خطرت عليها طول اذكرتها بتفاصيلها..
بدت تضرب في شاهين وتسب فيه وتعيط ..
نجمه بهستيريا: حوووول من علياااااااا ياحيوااااااااااان حووووووول ياحقير..
بعد شاهين وهو مصدوم في حالتها ومش عارف كيف يتصرف..
جت وردة تجري: كنها...
شاهين يشبحلها ومصدوم واللي موجودين يتفرجوا..
شدتها ورده: نجمه حبيبتي..اهدي نجمه..نجمه حبيتي
نجمه بهلع: بعدووووه عليا هالحيوااااان بعدوه ..هال...هالل...حيي.. وفقدت الوعي في حضن وردة..
اي راجل في مكان شاهين حيحس روحه انحط في موقف زباله اللي يتفرجوا ع الموقف حيغزلوا قصص من راسهم ويفهموا غلط ..حيكره شبح وجهها حيخليها ويمشي...
اي راجل غير شاهين...مش راجل زي شاهين..اللي اول مافقدت الوعي تلقائيا..قامها في حضنه ضارب نظرات اللي حضروا الموقف ع الحيط ..وماكانش همه غير الإنسانه اللي قلبه يرعش عليها..
شاهين وهو قايم نجمه: تعالي ياورده..
وردة لحقتهم تجري ..ركب نجمه في الكرسي الخلفي وساعدته ورده وساوتها زين وركب وهو سكر الباب جهة نجمه وركب وطار بيها لأقرب مستشفى..
***
مش حناخد من وقتك واجد ياللاهم
للاهم ع التليفون: ولا تانيه زياده ع اللي خديته من وقتي زمان.ياعمر
عمر بغضب: لو رديتي لأمريكا قبل لنحكوا حنلحقك للاهم..
سكرت فوجهه ..
عمر: به ياللاهم زيدي وكثري..
***
متعرضه لموقف قبل سببلها في حالة الهلع هذي
شاهين بقلق : زي شن يادكتور ..
الدكتور : مانقدرش نتكهن لأن الأسباب واجده..
شاهين تنهد وسكت..
الدكتور: عموما الإبرة اللي خدتها حتخليها ترقد ساعتين وبعدها تفيق..لا باس أن شاء الله
شاهين هز راسه بإيجاب..والدكتور مشي...
وردة جاته : شن قالك..
شاهين بحزن: انتي اقرب حد ليها ياوردة كنها نجمه شن صاير معاها...
وردة تنهدت بألم: كل اللي نقدر نقولهولك إن هالأنسانه انكسرت واجد وتحاول تتجاوز ألامها ع قد ماتقدر وتكون قويه..
شاهين قلبه وجعه ع الآخر تمني لو يكون اقرب لنجمه من انفاسها بش يعرف خيرها شن شافت في دنيتها ..يداويها لو مجروحه يجبرها لو مكسورة يدير اي شي بش نظرة الحزن اللي فعيونها تتحول..
شاهين : عدي ياوردة للشركه واحضري مع طارق الآجتماع بالمندوبين ال*******
وردة بألم : حاضر..نبلغ اهلها..
شاهين: لالا ماتبلغي حد ..كلها ساعتين وتروح...
وردة : حاضر..نستأذن... ومشت
...
بعد ساعتين فاقت ..فتحت عيونها شافته واقف قدامها...اذكرت اللي صار..اذكرت ان ضعفها تعرى قدامه وهي اللي تبي تبان قويه قدام كل الرجاله الرجاله بالذات..جنس آدم اللي كان سبب في اللي هي فيه..بدت تبكي..قدملها..
شاهين بوجع وحزن: نجمه كنك قوليلي احكيلي يانجمه شن اللي خلاك هك شن اللي مبكيك..ووصلك لهالحال...
نجمه بكسرة والم وغضب وعصبيه: أنت شن دخلك اااه شن دخلك بيا مش قتلك معاش ليك بيا دخل حياتي ماتسألنيش عنها...
شاهين: قولي اللي بتقوليه انا مش حنخليك يانجمه قبل لنعرف اللي فيك..
نجمه تغيروا ملامحها وولت جامده وبنظرة تخوف: شن تبي تعرف اهااااا...قولي شن تبي...تعرف...اني بعت رضا بوي ورضا راجل باعني بالرخيص واني اللي شريته بأغلى مانملك..ان  اتهمني فشرفي وطلقني ونكر بنته..ولاتبي تعرف اني وليت مراة مافيهاش أنوثه رحمها حولوه منها...ولاتبي تعرف اني مغتصبه ...ايه مغتصبه ايه مغتصبه ..وقعدت تعيط وتندب..
شاهين فشل تماما من اللي سمعه مش مصدق وذانه بكل  حس دمه جمد فعروقه مش مستوعب ..لين خشوا الدكتور والممرضات وطلعوه برا وهما يدفوا فيه برا لأنه مش قادر يتحرك..وهي كانت تعيط بدون ماتتكلم..شدوها وضربولها اليبرة المهدئه...فشلت وصوتها اختفى تماما..ومشت في عالم اللاوعي...
وهو قاعد مش واعي للي صار ولا مستوعب نهائي اللي صار وكأنه كابوس...

...يتبع...
الفصول الاربعة