نجمة نجمتي ( جمان فريد) منقولة

الجزء الاخير 2

تفاعلوا 💕💕💕

#نجمه_نجمتي

#جمان_فريد

الجزء الأخير. القسم الثاني 💕

الأربعه يجروا في ممر طويل..ممر مستشفى...لين وصلوا في غرفة محدده لقوا واحد قداهم....واحد من الأربعه سأل..
فارس: انت اللي جبته..
الراجل: اها..
طارق: كيف صار بالضبط
الراجل: كان واقف ع الشط وكنا حداه انا وواحد صاحبي شفناه سلح دبشه من فوق وخش البحر وقعد يعوم...
بعدها حسيته زي اللي ارتخى عرفته داخ عديتله طول طلعته كان دايخ ويهتري..ويقول "نجمه..نجمتي"
كلهم تأثروا وعصبوا في نفس الوقت..
طلع الدكتور وقاللهم لإنه عام في مية مصقعه وبذل جهد في جو مصقع..جاته نزلة برد ع صدره وجاته حمى...
شاهين كان يهتري ويقول نجمه نجمتي طول الوقت وماوعاش من الحرارة اللي كانت تركب وتنزل..ومعروف ع شاهين مرضه بمرضات...💔
أمه واخته كانوا في المستشفى مابوش يتحركوا بكل ودموعهم ماوقفتش نهائي...
***
هادي النهاية اللي يستاهلها
بريكه : لاشماته في الموت يابنتي..
نجمه : مش متشمته ياأمي..بس حاسه ربي خدالي حقي..
بريكه: اهو ربك خداه وفكك منه..
"خبر مؤكد منتشر في كل وسائل الأعلام والتواصل الإجتماعي وهو انتحار رجل الأعمال شكري عادل في منزله ..والخبر صحيح ..بس كيف صار هكي حنعرفوا بعدين"
نجمه: ربي مايخلي شي لازم ياخد حق المظلوم وكل ظالم وليه نهايه وخيمه...امه طريحة الفراش في دار العجزة..وشاديه تزوجت واحد في عمر بوها وقعدت خدامه ليه ولصغاره سبحانك ياعدل..
بريكه: ربك كبير..
الباب يطق..
بريكه: منو زعمه..
نجمه مطت شواربها بتساؤل ...وناضت بتفتح الباب..
نجمه فتحت الباب: أهلا وردة
خشت وردة ووجهها مايتفسرش ونجمه لاحظت وسكرت الباب..
نجمه بخوف: شن صاير ورده
ورده بخوف: شاهين يانجمه
نجمه بخوف شديد وعيونها تعبوا دموع: خيره!!!
وردة بألم: تعبان واجد يانجمه واجد
***
طلعوه مايقعدش هنا..
فارس: هدي يا أمي هادي مصحه خاصة وفيها كل شي..واللي فيه ولدك نفسي غالبا
غاده ببكي : نقعدوا نتفرجوا عليه هك وهو يذوب كيف الشمعه قدام عيوننا..
ناديه ببكي: الله يسامح اللي كان السبب
...
خشت تجري بشبب صبع خفيف وبالطو لابساته ع توته ووشاح يادوب حطاته ع راسها ومعاها صاحبتها..وصلت في الممر اللي فيه غرفته..لقت قدامها امه واخته وخوه..
غادة بعتب: نجمه...ليش هك يانجمه ليش درتي في خويا هك..حرام عليك..
نجمه تبكي ومش قادرة ترد جت عينها في عين ناديه اللي كانت تشبحلها شبحة حادة بعيونها المنفوخات من البكي..
وردة : شن حاله توا..
غاده : كيف بيكون حاله تعبان واجد وحرارته مايبيش يستقر وضعها..
نجمه وخرت ومشت بمسافه بعيده عنهم ووقفت ووجها مقابل الحيط وقعدت تبكي بحرقه..
مابتش تتحرك من مكانها لين غابت الشمس وهي في المستشفى..
فارس: امي عدي تريحي..
ناديه : نبي نقعد حدا ولدي
سند: امي ماينفعش اللي ديري فيه روحي الليله ارتاحي وبكرا تعالي خير مايصيرلك شي انتي الأخرى لاقدرالله
غادة: سند معاه حق ياماما...خل نروحوا توا ونردوا بكرا..
ناديه بعد تفكير:باه بس بكرا من الصبح حنجي هنا..
روح سند بغاده وناديه اللي لما جت ماشيه شبحت لنجمه شبحه ليها مغزى ومشت...
فارس مشي يكمل شغله بماإنه طبيب...هني نجمه استجمعت شجاعتها..وقدمت لغرفة شاهين ..فتحت الباب بشويه وخشت...انصدمت بيه كيف ولا..ملامحه الحلوه الحادة ذبلت وشعره طول..وجسمه ضعف ..مش شاهين اللي عرفاته..حطت ايدها ع فمها وقعدت تبكي بحرقه وغمضت عيونها من شدة ألمها عليه..قدمت ووقفت حداه...قعدت تتأمل فيه..
نجمه بنبرة باكيه: كنت نبيك تكون سعيد لما اخترت نبعد عنك..ماكنتش نبي يصيرفيك هكي..مش مصدقه انك تحبني لهالدرجه..شاهين والله ماكنت نبي يصير فيك هكي والله..
قعدت تبكي...والله واني بعيده عنك مارحت عن بالي ولالحظه ..شاغل بالي في كل وقت ..كنت نعرف اخبارك من بعيد نعرف ان تعبت وأني بعيده بس قلت في نفسي انهم يبالغوا..واحيانا كنت نقنع نفسي ونقول معليشي سيوره ينسى ..ومن داخلي مقهورة..تمنيت لو عرفتك من زمان...من واني بنت 7سنين..ضحكت ..وقتها حيكون عمرك خمس سنين..زغنون هلبه..تمسح في دموعها...وقعدت تشبح لأيده..وبعدين قامت ايدها وحطتها ع ايده وشدت عليها..
وبحزم..مستحيل نخليك مرة تانيه مستحيل ..انت غير نوض بالسلامه حنقعد جنبك ديما ايدي فإيدك..دموعها نزلوا من جديد...
شاهين أني "نحبك"..ايه بنقولها نحبك ..وحبك احلى شعور حسيت بيه في حياتي...انت اللي تستاهل نحبك انت اللي تتستاهل الحب...💖
مش حنخليك من هاللحظه....ونرمي كل شي ورا ظهري
قعمزت ع سريره...وهي تشبحله وابتسمت ...وبدت تغني..
🎼أنا لاحبيبي وحبيبي إلي
ياعصفورة بيضا لابئا تسألي
ولايعتب حدا ولايزعل حدا
انا لاحبيبي وحبيبي إلي
رشفت وبعدين كملت..
ندهلي حبيبي ئالي الشتي راح
حبيبي
رجعت اليمامه وزهر التفاح..
وانا ع درب الندي والصباح
بعيونوا ربيعي نور وحلي..
انا لاحبيبي وحبيبي إلي
ياعصفورة بيضا لابئا تسألي
ولايعتب حدا ولايزعل حدا
انا لاحبيبي وحبيبي إلي.. 💖
قعدت معاه ساعه وروحت وهو مازال مافاقش...
لما جت طالعه من المصحه شافها طارق..وقعد معاه بعيونه لين مشت وهو مصدوم..ركب فوق..
لقي شاهين مازال راقد..قعمز بحداه..لين خداه النوم..فاق ع حاجه تخربش في وذنه..
طارق وهو مش واعي: خلاص غاده حبيبتي..ويجيه كف ينوضه فوق...
طارق:ياعن.....شاهين امتى وعيت...
شاهين : ع آذان الفجر عييت وانا انوعي فيك بش تصلي ..لكن حضرتك كنت لاهي في احلامك😒
طارق: ههههههههههههههه كلب ياصاحبي خوفتنا عليك..تعرف كم لك هنا..
شاهين بضحكه: كم يعني..
طارق: 3ايام يامستهتر...
شاهين تنهد وقعمز ع سريره: حلمت بيها كانت جنبي..وقالتلي نحبك ومش حنخليك وغنتلي اغنيه حلوة واجد..صوتها حلو ياطارق..
طارق اذكر لما شافها وهي طالعه من المستشفى..
طارق ابتسم: ع الأغلب ماكنتش تحلم ..
شاهين فتح عيونه بصدمه : شن تقصد..
طارق ابتسم بثقه:كانت هنا فعلا..
شاهين بعدم تصديق ناض وقدم لطارق: تدوي جد ماتلعبش بعصابي..
طارق بضحكه: وحق من خلق فسختك نحكي جد ..
شاهين يضحك ومش مصدق ومرر صوابعه ع شعره..وزفر بقوة بعدين قال: كيف جت وين كانت..لحظه قصدك هيا كانت قريبه مني طول هالوقت..
طارق: في حد يعرفنا وبيناتنا يعرف مكانها وحافظ ع سرها..
شاهين بتساؤل: زي من يعني...
....
وجعتني لما جتني كانت تبكي حالتها كانت حاله دلتيها ع حوش جنب حوشنا للايجار ونقلت فيه وأمنتني مانقول لحد وماقلتش..
شاهين : ومخليتني هك ياوردة تحقي في حالي كل يوم كيف ولاتحرك ضميرك وخبرتي..
وردة بضحكه مرتبكه: ضميري!!كأنك مكبرها صح..
طارق بضحكه: عاش الدور..به هي قاعده غادي..
وردة ابتسمت: لا..
شاهين بخوف: وين عدت..وأشر بصبعه..دبالك تقولي ماتعرفيش
وردة بإبتسامه : لانعرف..حترد لحوشها الأول حوش عمتها
شاهين مصدوم وساكت..
طارق بفرحه: يعني
وردة: حترد لحياتها الأولى كلها..عشان بعض الناس قالتلي معش نقدر نخليهم وحدهم
طارق بضحكه: عندها الحق ماينعباش عليهم يقعدو برواحهم..يعدوا فيها بعدين..
شاهين مصدوم ووجهه أحمر ومش مصدق ..
طارق ووردة: 😂😂
...
هكي يانجمه هكي حتى اني مانعرفش مكانك..
نجمه بضحكه: عارفاتك حتشوشدي..
للاهم بضحكه: واخدة عليا شوشيدة يامعفنه..
نجمه: ههههههههه
بريكه: ماتعدليش عليها..هيا اللي كانت هاربه منه وخلاص..
نجمه بخجل: أمي 🙈
للاهم : هههههههه مهبوله..
...
طلع شاهين من المستشفى وتغيرت حالته 180درجه امه طيبتله بإيدها وكلي بشراهه وكلهم يشبحوله ويضحكوا..
رقد وهو يفكر في غدوة زعمه يمشي للشركه غدوة تجي ويشوفها؟..رقد من كتر التعب..بس فاق متأخر اليوم اللي بعده دوش بسرعه ولبس وطلع...وصل في الشركه نزل بسرعه..وخش طبعا استقبلوه الموظفين بالسلام ويتحمدوله ع السلامه..ركب الاصنصير ووصل للدور التاني..ويدور بعيونه..تلفت جيهة مكتبها وقعد يشبحله كان مسكر قعد يشبحله ..ويمشي ويوخر لين ..طاااف..
تلفت بيتأسف بس جمد في مكانه
نجمه بإبتسامه خجوله: صباح الخير 😊😳
شاهين 😍💓💓💓💓💓
نجمه تشبح لعيونه وتنزل في عيونها من الخجل: لاباس عليك..
شاهين بحب وشوق:مافيا باس وانت قدامي وعيوني تحق فيك..💖
نجمه تساوي في وشاحهها بخجل: احمم باه كويس..😳
شاهين قدملها ونزل راسه وقعد يشبحلها بنظرة شوق وابتسامه ماكرة : حسابك معايا كبير واجد وحنعاقبك بطريقتي..
نجمه بدوخ من قربه ومن انفاسه اللي تضرب في وجهها: شاهين بععد...
شاهين بعد: ههههههههههه ..هيا يااستاذة وراك شغل ليوم الدين..وعندي في المكتب..
نجمه: 😳ءء.....
شاهين بإبتسامه ماكره: لاإعتراض ياسمحه ..واشر بإيده ...ورايا..
هذاكا اليوم نجمه خدمت مع شاهين في المكتب .. هبلها بحركاته وخلاها مش عارفه حتى تتكلم زين وهو يضحك عليها..وفرحته بوجودها مش سايعته...قصد يخليها تخدم معاه في المكتب بش يملي عيونه منها..عيونه اللي ميتين شوق عليها...💖
***
علاش تبكي توا مش انتي هكي تبي..
امل ببكي: كنت نبي ننتقم لكرامتي يابابا بس ماكنتش نبيه يموت..
طاهر: لكن صدمتيني فيك هلبه ماتوقعكتش تعرفي ان الراجل اللي كان زوجك وانتي ع ذمته خاش في أعمال مشبوهه وغسيل أموال وانتي ساكته
أمل بأسف : ماقدرتش نتكلم يابابا...وقعدت تبكي..حضنها بوها بش يخفف عنها ألم الخيبه والفراق...
امل بلغت ع أعمال شكري المشبوهه لذلك صدر بحقه امر قبض وكل ماعنده يتصادر..وهو لما عرف انتحر لأنه ماقدرش يتحمل الوضع المهين اللي وصله..
***
انتي ياسمحه..انتي ياعسل ياللي مهبله قلبي ...وقفي شويه بس ..نسايرك في الطريق وتسايرني..
نجمه تمشي قدام شاهين مروحين..وهو وراها ويناشب فيها ونجمه شادة ضحكتها وبدوخ من كلامه الحلو..
شاهين : نا عليا من اللي ماشي ومش معبرني...
نجمه وقفت وشبحتله: بطل شاهين...
شاهين : آاااه يامحلى اسمي كيف يطلع من فمك ياحظه بس..
نجمه غمضت عيونها من الخجل: وووواك منك ومشت تجري لسيارتها..
شاهين : ههههههههههه...آااه نحبك نموت عليك..
واستمروا ع هالحال شاهين بيهبل عليها وهي محرجه من حركاته بس فرحانه هلبه من داخلها...
وفيوم كانوا في فندق كان فيه اجتماع مع وفد أجنبي ..
شاهين: نبيها تتشجع واطلع اللي فقلبها..
طارق يفكر ويوزع في نظره ع المكان لين طاحت عينه ع وحده من جماعه الوفد الاجنبي اللي جاي قريب تاكل شاهين بعيونها..
طارق ابتسم بمكر: الغيرة ياعزيزي..
شاهين شبح وين مايشبح بعدين شبحله: انت تبي تقربعها ع راسي مرة وحدة..
طارق: تس..توتشوف كيف يطلع المستور..
شاهين يفكر بعدين قال: هك قولك...
طارق : اها...تلفت شاهين من جديد للبنت اللي ابتسمتله طول وهو مش طايق حتى يردهالها بس اضطر يردها تنفيدا لرأي طارق..
نجمه كانت داخل تتناقش هي وناس من الوفد ولما جت طالعه جمدت في مكانها..لقت شاهين واقف ويهدرز ع وحده من جماعة الوفدكانت لابسة ضيق هلبه ومش متحجبه وكانت تضحك معاه..
نجمه خدت شهيق وزفير..وكملت طريقها ..وخطمت من بحداهم ولاكأنها شافت حاجه وركبت سيارتها وهي تتكلم بالتليفون وتحركت طول..
طارق:😯
شاهين:😒😡
ومشي وخلا البنت تهدرز بروحها
البنت😕
...
خيرك تقربعي..
نجمه وهي معصبة من اللي شافته بكري والغيرة مدايرة فيها عمايلها: وين الخلاط ياامي..
بريكه: تلقيه فوق ..وأشرت بإيدها..اويناه فوق الدولاب ..
جت لنجمه رساله....وفتحتها
(كنك اليوم ليش مروحه بدري..في شغل واجد كان في الشركه)
نجمه "خل هديكا العصبانه تكملهولك"..ودارت تليفونها صامت وحطاته في الدولاب..
شاهين في الحوش ..
شاهين بغضب: كان نحصل عليك ياطارق انت وشيرتك السودا... وانا الحمار اللي سمعتلك من الأصل..
ناديه: شاهين امي
شاهين : نعم..
ناديه : درت عصيده..
شاهين يعشق العصيده بالذات في الشتي لكن هالمرة اعصابه راكبات: لا مانيتيش...
ناديه بإستغراب: عصيده وانت مانيتكش فيها!!
شاهين بنفاذ صبر: الله يربحك ياأمي خليني..
ناديه طلعت ومستغربه فيه..
...
بشرى بفرحه : عصيييييده...
نجمه: ههههههههههههه
بريكه فرشت البخشه : المطر تصب وعشانا بالرب..
بشرى تغني: المطر تصب وعشانا بالرب..
نجمه حطت السفرة..وولت تاخد تليفونها لقت مسج تاني كيف وصل فتحت
(تردي توا ولا والله نقعد قدام حوشكم تحت المطر)
نجمه اتصلت بيه..
نجمه: يامهبول خش لسيارتك..
شاهين : خفتي عليا ياقلبي
نجمه: شاهين..
شاهين: حب شاهين..
نجمه بضحكه: به شن تبي..
شاهين : كنك اليوم رديتي بدري لحوشكم..
نجمه تسمع في صوت المطر: شاهين قاعد برا..
شاهين بضحكه: هيا شوي نركب السيارة..ركب وسكر الباب...
ايه هي جاوبي..
نجمه: اممم حسيت روحي مرهقه روحت..
شاهين ابتسم : نجمتي تعلمت الكذب..
نجمه لما سمعاته قال نجمتي قلبها قعد ينبض بقوة وحست بشعور حلو ع الآخر: وعلاش بنكذب😳
شاهين بضحكه: الإجابه عندك..
نجمه : مافيش عندي اجابه...
شاهين بمكر: به خلينا نحكوا ع الخدمه..متفائل اليوم ان الوفد اللي جا من شركة (******)حيوافق ع الشروط وحنوقعوا العقد فوقت قريب..
نجمه بتهكم: مالا شنو حتى اني حاسه هكي انت زبطتهم ع الآخر..
شاهين "ناعليا غارت حق": اها..وجاكلين مديرة العلاقات العامه اكدتلي هالشي..
نجمه بغيرة: اممممم كويس..
شاهين بخبث : انسانه متفهمه وراقية وناعمه و....طوط طوط طوط...هههههههههههههههههههههه..غرتي يانجمتي اه ياقلبي 💓
عاود عليها مابتش ترد ..جاه مسج..
(برا كمل باقي كلامك في المشروع مع جاكلين متاعك)
شاهين : ههههههههههههههههههههه يامحلا غيرتها ياناس...ااااه يانجمتي..انتي بس متاعي..مافش غيرك 💖..
نجمه ضمت الحوش وجت بطلع الكناسه ..فتحت الباب وحطتها قدام الباب..ضوت فجأة..شبحت القدام لقاته قاعد مقابل الحوش في السياره ...فتح فلاش تليفونه بش تشوف وجهه..ضحكت وخشت..
خدت تليفونها وكلماته رد طول..
نجمه: خيرك قاعد هني توقعتك مدرس قدام فندق(******)
شاهين: ههههههههههههههه..ياهبله..عيوني يحقن معاك حد هنا..؟
نجمه ابتسمت بخجل: باه علاش قاعد برا..
شاهين : امممم خاطري في حاجه اديرها ليا
نجمه: كان نقدر تو ندير..
شاهين بخبث: خاطري في حبيبه..
نجمه بتساؤل: حبيبه ؟؟!آكله هي😕
شاهين بإبتسامه ماكره :اها
نجمه: باه كيف طريقتها..
شاهين شاد ضحكته: ليها طرق واجده بس اللي انا نبيها حاليا بسيطه...
نجمه: باه قولي ع البسيطه منها..
شاهين بضحكه: نقولك فوتيها تو يجي وقتها..نبي حاجه تانيه...
نجمه بضحكه: هيا قول بسرعه بنرقد...
شاهين : ههههههه ...اممم عصيده...
نجمه ابتسمت : خل نسكر بش نديرها ع السريع...باي..وصكرت..
وبدت نجمه ادير في العصيده من قلبها وطول الوقت مبتسمه ..
كملت ورنت عليه ..
سلفرت الصونيه وطلعتها...فتحت الباب لقاته متكمش في بعضه ورافع ياقة بالطوه بش تغطي رقبته ع الصقع..
نجمه تمد في الصونيه: شدها بالمفرش متاعها سخونه ره..
شاهين مبتسم: تسلم ايدياتك ربي مايحرمني من طعامهن 💖..وخدي الصونيه...
نجمه بضحكه:لكنتكم تهبل 💖
شاهين بحب:وحق الله مافي حد يهبل في الدنيا غيرك😍
نجمه بإبتسامه: اني نخش ونصكر الباب احسنلي..
شاهين: هههههههههههههه..تعبتك معايا سامحيني
نجمه : ولايهمك تعبك راحه..وتو نشوف طريقة الحبيبة وندريهالك...
شاهين شاد ضحكته : كويس...
نجمه: تصبح ع خير...
شاهين بنبرة حلوة: وانتي من اهلي💖
نجمه صكرت الباب طول وايدها ع قلبها وتضحك..💖
وهو كمل ضحك ومشي ركب سيارته وروح

...يتبع...
الفصول الاربعة