نجمة نجمتي ( جمان فريد) منقولة

الجزء الثامن

#نجمه_نجمتي

#جمان_فريد

الجزء الثامن🥀

الصبح الساعه 10:00
كانت مقعمزة ووجهها شاحب وسرحانه..
بريكه: امي نجمه افطري ماتمشيش للجامعه من غير فطور ودواك ارفعيه معاك...
نجمه ابتسمت لأمها وبدت تاكل شوي شوي ع خاطرها..وبعدين ناضت بتطلع...
بريكه: بنتي ردي بالك ع روحك وخودي هادوا
نجمه : عندي ياماما
بريكه: خودي واسكتي هادم من بوك..ابتسمت نجمه بتهكم وطلعت.. الفلوس مش همها ..همها بوها...تمنت لو تشوف من بوها شويه حب وحنان تشوف خوفه عليها..اللي حتى لما مرضت مافكرش يشوفها ويقوللها لاباس...تعودت هذا بوها من سنين وسنين هكي عمره ماحيتغير..💔
عامر: والله كلموني وقالولي ضروري نتلاقوا الليله في حوازة "البورا"..
انور بضحكه: تو نشوف الجو ونرد عليك..ع طلعة نجمه
عامر:💓💓💓💓
نجمه : صباح الخير
انور وعامر: صباح النور
انور : شن حالك اليوم
عامر 🙁
نجمه بإبتسامه :أحسن الحمد لله
انور طلع من جيبه فلوس وفتح شنطتها وحطهم فيها..
نجمه : والله مالازم عندي
انور : تبي نوصلك
نجمه ابتسمت: لالا بنتلاقا اني وحنين في راس للشارع وبنمشوا مع بعض ..
انور : خلاص تو نوصلك لراس الشارع..هي عمور نتكالموا ..
عامر هز راسه بإيجاب قعد بعيونه معاها لين ركبت لسيارة خوها ومشوا ..وولا للمحل..
احمد: شنو مالحقتش عليها
عامر : شفتها لكن وضعها مش عاجبني شكلها مريضه حتى خوها سألها ع صحتها..
احمد: بالك بردة ..هلبه ناس تجيهم مع خشة الصيف..
عامر : تعرف بنمشي للجامعه بنشوفها..
احمد متفاجئ: خلاص بتكلمها !!
عامر تنهد : بنطمن عليها بس ..
احمد : لأمتى بس
عامر: بالله خليني في حالي ...
***
طارق : ربك يتقي علينا من غضب الحاج سعد
شاهين: ههههههه ماتخافش الحاج سعد...يولع لكن مايحرقش..
طارق: تو يبزلي يبره عندي باتي مش اول مرة ومن تحت راسك..
شاهين: تي خلاص اسكت هيا خل نطلعوا كبدي دارهه من بنة المستشفى..
طارق : كبدك اللي دارهه هذي حتدفعنا ثمن غالي ..
شاهين ركب السياره : هيا طير بيا للمطار..
طارق : نهارك اسود😲
شاهين:ههههههههه تي عندي ماندير لازم نسافر ..
طارق : امتى حجزت..
شاهين : البارح مسعود جابلي تذكرة ...هيا هيا ماتعطلنيش
طارق: امري لله... وولع السياره ومشوا...
***
حنين : خلاص توا اللي صار صار يانجمه
نجمه ودموعها تنزل: معاش كلمني من نهارها واضح شن معناها ..
حنين : اهدي نجمه خلاص ..مرات هكي أحسن..
نجمه: احسن شني بس وحطت ايدها ع وجهها وقعدت تبكي..
حنين : خلاص نجمه بالله ..
"نجمه خيرك"...
حنين شبحت لمصدر الصوت بصدمه اما نجمه مش مصدقه وذانها حولت ايدها وقامت راسها ببط وابتسمت تلقائيا..
شكري : خيرك علاش تبكي ..
نجمه : خايفه من الإمتحانات
حنين😕
شكري بضحكه : ديما هكي انت تكبري فيها وهي صغيره..تخصصكم تافه وساهل تصفي مواده
حنين معجبهاش كيف تكلم بإستهزاء ع تخصص نجمه لفت بوجهها لجهه التانيه ..
نجمه: هو مش بس تافه ويدره الكبد ومافيشي مستقبل
حنين شبحتلها: وعلاش مافيشي مستقبل ..في شركات في البلاد تتوضفي فيها
شكري : هذا اللي مازال تخدم في الشركات..
حنين برفعة حاجب: وين المشكله
شكري: مكان مختلط وسمعة البنات اللي يخدموا غادي مش ولابد
حنين : معليشي بس كلامك مايقولوشي إلا المتخلفين
نجمه : حنييين..
حنين ناضت : نستأذن اني افضل ..ومشت ..شكري شبحلها بأزدراء : مش عارف علاش متمسكه بصحبتها
نجمه: حنين انسانه كويسه هلبه ونعم الصديقه..
شكري : ردي بالك منها هادي تبي تحط في راسك افكار تخربك ماتسمعيلهاش
نجمه: لا ابدا مش هكي بس هي متحررة شويه في تفكيرها ..
شكري: متحررة ولا رجعيه ردي بالك منها..
نجمه تبي تغير الموضوع: شكرا لأنك سألت عليا لما مرضت
شكري اتفاجئ وقعمز جنبها: مرضتي امتي
نجمه : من يومين
شكري : خيرك
نجمه: حرارتي ارتفعت ورفعوني للمستشفى..
شكري : لاباس عليك نجمه
نجمه : لايوريك باس 💓
وكانت في عيون تراقب فيهم بصدمه ممزوجه بالغيرة والغضب "هذا علاش يانجمه تتجاهلي فيا ..لكن باهي"..
***
عرفته بيديرها وببطلع
عبدالله: يعني عندك علم بسفرته ؟
سعد: ايه سفرته لشغل ..
عبدالله تفاجأ: شغل!!
سعد تنهد: قال انه بيفتح دار أزياء عربيه برا..
عبدالله بتهكم: أزياء ...
سعد: اهو المهم يخدم يتحمل مسؤوليه شي حاجه حتى لو يكون شي تافه في نظري ونظرك مادام هو يحبه حينجح فيه ويدير لروحه موضوع
عبدالله مط شواربه : إن شاء الله خيروخلاص..
سعد: إن شاء الله
....
هههههههههههههههههههه عليك مهزله
عوض : احسن خله ينشغل بعيد اكثر اكثر
ابراهيم: بس حط في بالك عمي عمر اللي يخططله شي ثاني ره
عوض: فاطنله ومداير روحي مانعلم بشي لأني عارف اللي يبيه ماهو صاير منه..
إبراهيم بضحكه: لكن والله عليه جو اللي ينقاله شاهين هههههههههه
عوض : باتي ناوي يديرله عشا لسلامته
إبراهيم برفعة حواجب: عليش طالع من حادث!!
عوض: هذا جدك  هالعيل واقطع الخبر..
ابراهيم: باهي اللي جدي وزع الورث كله كان هذا ره كتبه كله بإسمه
عوض: هههههه ايه والله يديرها ....الحمد لله..
***
يعني انت خلاص ناوي ..
شكري : ايه خلاص مع الفصل الجاي حنبدا إن شاء الله ..
نجمه : امم شيكو
شكري ابتسم : شنو
نجمه :عندي ليك راي..
شكري بضحكه: اتحفيني
نجمه: تتسهوك؟!!خلاص فوت مش قايله
شكري : هههههههه مانتسهوكش والله نحكي جد تتحفي فيا بكلامك ديما
نجمه ابتسمت: اممم باه،شن رايك لو تخدم في تصليح الأدوات الكهربائيه بروحك..يعني مثلا اي حد حاجاته الكهربائيه خاربه تصلحهاله وتمشي للحياش
شكري : كيف مش فاهم؟
نجمه: يعني مثلا اليوم صاحبتي كانت تتكلم ع مكيفهم وقالت فيه حاجه خاربه ويبوا حد يفهم فيهم وهما مش قادرين يجيبوله حد متمرس يصلحه لأنه حيطلب هذاكا الحساب ..شن رايك لو نكلمها بالذات واني نعرف إنك تفهم في تصليح المكيفات لأن خالتي قالتلي ع مكيف المربوعه متاعها اللي صلحته ومكيف جارتها عواطف ومن يومها ماعاد خربوا..
شكري مط شواربه وقعد يشبح القدام..
نجمه: ماتهزاش ع خدمه زي هادي ياشكري..ره هادي البدايه..وياما من ناجحين كانت بدايتهم بسيطه ووصلوا بعدها لأعلى المراتب"من كانت بدايته محرقه كانت نهايته مشرقه"
شكري ابتسم: انتي راحه ع هيئه أنسانه..
نجمه توردوا خدودها من الخجل: شكرا 😳..المهم فكر في كلامي..
شكري ابتسم لخجلها: مش محتاج تفكير اعطي رقمي لصاحبتك وتو نتفاهم معاهم
نجمه بغيره : تو ناخد رقم بوها ونعطيهولك افضل ..
شكري ابتسم وماباش يعلق..كملوا هدرزتهم وروح شكري ..فرحت نجمه انه ماجابش سيرة أخر مكالمه ..مش مهم عندها غير انها تقعد متواصله معاه وبس ويقعد في حياتها💓..
***
العشيه كان انور مداير عزومه لصحابه بدل ما يعزموه عزمهم هو قبل بعدين هما..متعودين في كل مرواحه لأنور لازم يديروله عزومه شواء بس هالمره هو غير الروتين وعزمهم ...ماصدقت عبير اتصلت بأختها جتها وكانت تبي تلصقها لعلاء بأي طريقه..
عبير: اني حنقول لعمتي ونجمه يركبوا يتعشوا وانتي ديري جوك
رولا: يعني علاء مش حيتعشا معاهم؟
عبير: تس تس ..في واحد من صحاب انور علاء مايتحابوش هو وياه مش حيتعشا معاهم وهو موجود..
رولا : كان هكي باه..
عبير: مانوصيكش خليك فالحه وغمزلتها واعرفي كيف تتصرفي
رولا : ههههههه اطمني لما نخليه يجيني يزحف مش صعبه نوعيته..
عبير: ورينا شطارتك..
رولا : تو تشوفيها😏..
***
اتهمها في شرفها تخيلي اتفق هو وجارها وعطاه فلوس وخلاله باب الحوش محلول ...بش يخش على زوجته للحوش ويدير روحه هو جاي صدفه ويشوفه معاها في الحوش وتبان انها خاينه وترتكب في الفاحشه..
مها اخت ناديه: قذارة منقطعة النظير..هضا كله بش ماطالبش بحقوقها..
ناديه : وياما وياما من حاجات تشيب راس الرضيع ..الراجل في مجتمعنا موقفه قوي من كل نواحي..تعرفي لما يتهم مراة في شرفها الناس تصدقه حتى لو ماحقت شي بعيونها...اما الراجل يدير مايدير ويبدوا شادينه بالثابت وعادي ولاكأنه داير حاجه يقوللك في النهاية راجل
مها: صدقتي هذا اللي صاير...إلا شاهين أمتى يطلع من المستشفى
ناديه بضحكه: طلع روحه بروحه وتوا في (****)
مها خبطت خدها بكفها: هيييييي شن يدير غادي
ناديه :عنده شغل ..حكالي ع مشروع دار ازياء عربيه بيفتحه غادي وبيجيب فيه مصممين ومصممات شباب من ليبيا ودول عربيه ..
مها: ضامن إنه ينجح؟
ناديه: هو قال حينجح مانعرفش ..إن شاء الله..
مها: إن شاء الله..
***
جي وقت العشي ونجمه وبريكه ركبوا وقعدوا يعاونوا في عبير  ..في هالوقت استغلت رولا انشغالهم ونزلت لوطا ..كانت لابسه توته ضيقه نزلت سريتتها من فوق وبخت ريحه وخشت لدار علاء بهدوء علاء كان لاهي بيطلع حوايج من دولابه لما تلفت جاته صدمه لف وجهه طول جهة الدولاب
علاء بعصبيه: شن اديري هني
رولا بدلع: شي غير كنت نبي نشوفك كان خاطرك تتعشى نديرولك صفرة
علاء : مانبيش نتسمسم واطلعي اقلبي وجهك
رولا قربت: خيرك معصب أهدى وانت معصب مش حلو..وحطت ايدها ع ضهره ..علاء بحركه سريعه تلفت جبد ايدها وقعد يلوي فيها: الحركات المسخه بري ديرها لإيهاب و
اللي زيه ..احمدي ربك اللي جيتي قريبة خوي كان هذا وحق ربي فضحتك وماخليت وين طلعت عارك ..وجبدها وفتح الباب ودفها برا بقوة وسكر الباب..
رولا : حقييير ..وهي ماشيه انخبطت بنجمه ..
نجمه: كان مش ع خاطر انور ره مافاتت هالليله ع خير بري لمي روحك واحترمي نفسك راك محسوبه ع خوي حتى لو كنتي اخت مرته..
رولا قريب ماتت من كلامها وركبت تجري..ونجمه مشت لدار علاء بطق هو جي طالع...
نجمه: الحقيرة رولا شن كانت تبي منك
علاء : زي ماقتلك طلعت وحده رخيصه لأبعد حد..تبي الحق العيله كلها مش خاشتلي راس وأولهم مرت خوك..
نجمه تنهدت: انور معمي فيها ع الأخير الله غالب ..
علاء: يللا اني طالع ..ردي بالك منهم
نجمه ابتسمت : تمام في امان الله..ابتسم علاء وطلع..
***
تاني يوم في كلية الطب
حنين : حي عليها المسخه!!
نجمه: علاء حطها في حجمها وعرفها قدرها..
حنين : معقوله ماأترثش فيه
نجمه: قتلك قبل خوي راجل 🙄
حنين : 💓😳
نجمه : حنين اعترفي انتي تحبيه
حنين : من هو 😨
نجمه: من غير جو الإستعباط اللي ديري فيه نعرفك صريحه وماتحبيش اللف والدوران..
حنين لفت بوجهها للجهة التانيه تهربا من نجمه..
نجمه: فرق العمر مش مهم بكل مدام الحب موجود وحب حقاني مش دوة بس واهلي مش شايفين فيه مشكله..وأني نعرفك أخر همك نظرة الناس..صدقيني حتعيشي اسعد وحده مع علاء خوي طيب وحنين وراجل بكلمته ويتحمل المسؤوليه اعطيه فرصه ياحنو ومش حتندمي..
حنين شبحت لنجمه وابتسمت : هيا نوضي عازمتك ع شاورما
نجمه بضحكه : مش حنقول لا..ضحكوا مع بعض وناضوا ..
***
🍃وتمر الأيام وتتبعها الأيام وشكري بدي بالخدمه وبدي اسمه ينعرف من واحد لواحد لين طلبه واحد عنده وكاله شركة مكيفات وبدي عندهم يصلح في المكيفات ويشوف فيها إلى جانب خدمته الخاصه ..توفق بشكل مش عادي ونجمه كانت تشجع فيه وترفع في معنوياته وتزيد من ثقته بنفسه أكثر وأكثر وزادت توطدت علاقتهم وتعود شكري ع وجود نجمه في حياته وشوي شوي بدي يقلل من التفكير في أمل..
🍃خلال الثلاثه الشهور اللي مروا شاهين كمل مشروعه ويستعد لإفتتاحه بأفخم التجهيزات وكانت حفلة افتتاحه بحضور شخصيات من ليبيا وبرا منها وعائلتها كلها حتكون موجوده..علاقته بنور زي ماهي هو يعطي وهي تاخد وبس وفي نفس الوقت كانت علاقتها تقوى بالصديق الجديد معين..
🌸اما علاء وحنين فمازال الوضع بيناتهم زي ماهو لين في يوم من الأيام...
نجمه : الحمد لله اموره متحسنه هلبه وكيف بدي قرايه كان متحمس بزياده..
حنين :ياريتك تتحمسي لقرايتك زيه غدوة بتبدا القرايه ره
نجمه: انتي وحده منكده هذا أولا وتانيا القرايه عندي مش ضروره قصوى زيه هو اللي راجل ولازم تكون عنده شهاده وخدمه ثابته في الدوله اللي ولت ضرورة في وقتنا هذا..
حنين: عقلية جدي وحناي اللي عندك عمرها ماحتتغير ولاحتفهمي إن الشهادة للمراة في وقتنا الحالي أهم من الراجل شهادتك حديرلك قيمه واستقلاليه وحتخليك مش بعازة حد في الدنيا..
نجمه : حنيييين خلاص عليك نفخ ...اصبري شويه في حد خش انتظار
حنين : اكيده الشيكو متاعك..
نجمه بضحكه: نحس فيك تغاري منه هههههههه وشافت الرقم ..هذا علاء
حنين😳💓
نجمه : هلا علوش ....نعم من معاي...ايه ........شنوووووو..خوي انت متأكد...به به ..وصكرت وطلعت تجري ركبت لشقه انور وقعدت اطق...
انفتح الباب
نجمه : سلسبيل بري نادي بابا بسرعه...
سلسبيل: باه ومشت تجري..شويه وجي انور
انور: خيرك نجمه
نجمه تبكي: توا كلموني من رقم علاء قالوا مداير حادث وهو في مستشفى(******)
انور بخوف : هيا شوي نجيب مفاتيحي..نزلت نجمه لبست عبايتها وارتاحت لما لقت امها راقده طلعت برا لحقها انور..وطلعوا طول ...
احمد قدام المحل: عاااامر
طلعله عامر : خيرك
احمد :شوف قدامك
عامر شاف نجمه وانور مفرفشين جاهم يجري : خيرك ياانور شن صاير
انور وهو يرعش: خوي داير حادث ومش عارف شن صار له
عامر جبد المفتاح من انور: اركبوا وتو نسوق أني ..ركبوا انور ونجمه وركب عامر وطلع بيهم...
عامر: كيف صارله بالزبط
انور : مش عارف اتصلوا برقمه ع رقم نجمه وبلغوها
نجمه تبكي: كلمني واحد قالي لقيناه خاش بسيارته في سور وكان ينزف ومغمى عليه ورفعه طول ل(******)
عامر قلبه ينعصر ع نجمه مش متحمل يشوف دموعها: خلاص اهدوا مافيه إلا الخير إن شاء الله..
انور ونجمه : ياااارب...
وصلوا للمستشفى واطمنوا ع حالة علاء طلع الحادث مش خطير مجرد كسر في رجله وراسه مدمدم ومافيش اي مضاعفات ولانزيف داخلي ..لكن مازال مافاقش
انور: خلاص نجمه تعالي نروح بيك اكيد امي فقداتك...
نجمه: زعمه مرتك ماقالتلهاش
انور : ماتعرفش اني طلعت ومقلت شي
نجمه : باه ...عامر كان واقف من بعيد وعيونه عليها مافارقهاش بنظره ولالحظه ...مشت هي وانور وصلوا فيه
انور : صحيت ياعمور
عامر: انتوا عيلتي هنايا ياأنور ...
انور ابتسم: هيا تعالى نروح بنجمه وبنولي ...
عامر: تمام..وطلعوا الثلاثه...
....
كيف ماتقولوليش كيف ..
موسى: خلاص اسكتي مافيه شي
نجمه "استغفر الله وخلاص": خلاص يما بإذن الله غدوة انور يجي ويرفعك
بريكه : قولي الحق خوك كويس
موسى : تس اففف
نجمه شبحتله وشبحت لأمها: كويس والله العظيم كويس
موسى: هيا هيا نوضي وتيلي العشي بنرقد بكري عندي ماندير غدوة وطلع من حداهم
نجمه شبحتله وهو طالع: امي متأكده ان هذا بونا
بريكه مسحت دموعهاو ناضت: اسكتي وسكري فمك وتعالي عاونيني ..
ناضت نجمه وهي مستاءة من سلبية أمها و ضعفها وخضوعها دائم لبوها...
***
قديش ليا خاطري نجي هنا
غادة : كنك ماقليتها لشاهين ره طار بيك هنا دغري..
نور بأبتسامه مستفزة: صاح راحت من بالي ..
غادة شقلبت عيونها ولفت وجهها عنها..
....
كاريمان : متحمسه للحفله وكيف جهزلها شاهين
ناديه : ههههه يكلم فيا ويقولي مجهز مفاجأة كبيرة
مياده: إن شاء الله مفاجأة سمحه ماترقيش الضغط لسعد
ناديه : هههههههههه هذي اللي نفكر فيها ..
***
نجمه : هههههههههههه انبصر عليك كسر في رجله بس الحادث مش قوي
حنين وهي تبكي: ماه حقيرة وتافه وحيوانه وماتتحشميش
نجمه : ههههههههههههههه وانتي طلعتي ميته في دباديب خوي
حنين تبكي وساكته ..
نجمه: غدوة بنمشي للزياره الساعه 5العشيه..
حنين : احممم ..عادي نمشي معاكم
نجمه: لا مش عادي
حنين سكتت
نجمه: ههههههههههههه ياحمارة اكيد عادي اهو بالمرة يشوفك خوي وينوض زي الجن..
حنين بضحكه: مبردك ياتافهه..
***
نور: هيا عاد هوووني قولي..
شاهين بضحكه: تستس ..
نور: هك صار...انا زعلانه تحكيش معايا
شاهين : ريتو يسلميلي الزعلان هههههههه بكرا ياقليبي تعرفي كل شي..
نور : ييييييي شن بيصبرني لبكرا
شاهين: اصبري اخرة الصبر حلوة ..نور
نور: هممممم
شاهين : شن جو البقر هضا
نور: ههههههههه ياتافه
شاهين: التافه هضا يحبك ويموت عليك..💓
نور بضيق مخفي: حتى انا...🙀
***
تاني يوم وقت الزيارة...
طقطق ...
علاء: تفضل..خشت نجمه وبريكه وبعدهم حنين علاء لما شافها حاول ينوض
نجمه جت بحداه وبضحكه: غير بشويه تو نساعدك
بريكه بضحكه: كيف حالك توا وليدي
علاء وهو يشوف لحنين: اني توا اصح إنسان ع وجه الأرض😍
حنين وجهها طماطم وبتموت من الإحراج قدام أمه ..
حنين: احمم...الحمد لله ع سلامتك
علاء : الله يسلمك 😍❤
نجمه تشبحلهم بإبتسامه : ماما ترا تعالي معاي نسألوا الدكتور ع حالته
بريكه بضحكه: هيا ...وطلعوا وهما يضحكوا..
علاء: خفتي عليا حنيني
حنين وتساوي في وشاحهها بإحراج: حتى وانت هكي مش مبطل قلة أدب😳
علاء: ههههههههه قلة ادب شنو بس ..حنين امتى بتفهمي اني نحبك ونبيك بالحلال ورب العزة لو تعطيني الضي الأخضر من غدوة نبعت امي..
حنين شبحتله: مش حتندم بعدين بعد ماتجري السنين ونكبر وتكبر ملامحي ونبان جنبك زي أمك .؟
علاء: انتي كل ماتكبري تزيد حلاوة واني نزيد نحبك وحبك يكبر في قلبي مستحيل نندم ..انتي حلمي الحاجه الحلوة اللي عايش ونكافح ع خاطرها مايغركش سني الصغير ..حتلقيني معاك راجل ووراك راجل سند وظهر وعمرك ماحتندمي انك قبلتي تكوني معاي حنيني ❤
حنين كلامه هز قلبها هز وخلاها تحس بشعور حلو هلبه مزيج بين الحب والأمان والإعجاب بدون تردد وفي لحظه : نحبك ❤
علاء اندهش بفرحه وحط ايده ورا راسه: ههههههههههههههههههههههههههههههههه الله أكبر ...واني نموت عليك موت ...غير نطلع من هني حنبعت امي طول
حنين تضحك عليه وفي نفس الوقت خجلانه وفرحانه وحاسه نفسها خدت القرار الصح بعد تردد دام فترة طويله..
***
في مكان آخر في وحده من دول العالم العربي ..
حفل افتتاح دار أزياء" الشاهين" للزي العربي التقليدي والحديث ..كان حفل غايه في الترتيب والنظام وفقراته كانت حلوة ونالت استحسان كل الحضور وتحديدا لما عرضوا الموديلات متاع الأزياء اللي حتكون موجود في دار الأزياء...
قبل مايقترب الحفل من نهايته...تقدم شاهين اللي ابهر الحضور بطلته بالزي الليبي الشرقاوي وكان غايه في الوسامه والجاذبيه ❤..
شاهين وهو يوزع في نظره ع الحضور: تشرفت جدا بحضوركم اللي زاد للحفل بهجته وكان سبب في نجاحه ..سكت ..وتابع يقول..انا اليوم هضا بالنسبه ليا يوم خاص ومهم واجد في حياتي لأني حققت فيه هدف كنت نسعاله في حاجه نحبها وخصوصا اني من محيبي الأناقه والمميزين فيها بشهادة الفامليا متاعي ...ضحكوا الحضور...ومميز لسبب ثاني وهو المفاجأة اللي مجهزها في هالحفل..قبل كل شي اسمحولي نادي على اغلى إنسانه ع قلبي من بعد أمي ..بنت عمي.."نووور " تفضلي جنبي هنا لوسمحتي ..
اهله كلهم كانوا متفاجئين ونور بزايد..شبحت لأمها اللي عطتها الموافقه تنوض وشبحت لبوها وكذلك عطاها الموافقه..وناضت تقدمت وسط نظرات عمها سعد وولده عبدالله اللي يحاولوا يتوقعوا مفاجأة او مصيبة شاهين الجديده..تمشي نور وعيون الحضور عليها وع قفطانها اللي كان من ماركه عالميه وكان طالع عليها خيااال جابه شاهين بهالمناسبه"نور مش متحجبه"..وصلت في شاهين وكانت ع وجهها ابتسامه استغراب وقفت جنبه...شد شاهين ايدها ..
شاهين: اني حلم حياتي من سنين فاتوا هو ارتباطي بهالمخلوق الجميل اللي واقف حدايا ..لهذا من بعد اذن جدي وباتي وعمي عمر حتكون نور خطيبتي من هاللحظه...
صدمه سعد وعبدالله صدمه افقدتهم القدرة ع ابداء أي ردت فعل مش اقل منهم صدمه ناديه وغاده ومرت خوه أحلام..الصدمه اللي كانت ممزوجه بالفرح تنقرا من ملامح وجوه كاريمان وعمر...بينما ابراهيم وبوه فكانوا متهكمين ويضحكوا بهزوة وشماته...
شاهين طلع من جيبه باكوصغير فتحه كانت فيه دبله ألماس فصهابارز وغايه في الجمال وخدي ايد نور اليمين ولبسهالها وباس ايدها...وسط تصفيق حار من جميع الحضور ..اللي قعد يحي فيهم شاهين ..ونور اللي نزلت عليها المفاجأة زي الصاعقه حست ان الدبله 💍 اللي لبسهالها شاهين حبل ارتبط حوالين رقبتها....

...يتبع....
الفصول الاربعة