نجمة نجمتي ( جمان فريد) منقولة

الحزء الواحد وثلاثون

يعني لازم نقولوا تفاعلوا بش تتفاعلوا😔

#نجمه_نجمتي

#جمان_فريد

الجزء 31💓💓💓

💛 مقعمزين في القارب بس كان مايتحركش هو مقعمز مقابلها بس كان لاف وجهه ويشبح للشروق..
نجمه: هيا جذف بش يتحرك القارب..
هو ومازال لاف وجهه ويشبح للشمس: مانقدرش بروحي
نجمه شبحت للقارب لقت في جنبها لوح تجذيف وهو في جنبه لوح تجذيف فهمت وابتسمت ..نساعدك لكن بشرط
هو: شنو
نجمه : خليني نشوف وجهك ...
لف وجهه وشافته...
نجمه : شاهين...
شاهين : هي ساعديني بش يتحرك ونعرفوا شن في أخر البحر حتى انا نبي نعرف...
نجمه ابتسمت باهي ..وبدت تحرك فيه وهو معاها وكانوا فرحانين هلبه..
فاقت ..فتحت عيونها شبحت للسقف بعدين لفت لقاته جنبها ..ايه مقعمز جنبها ..قاعد ..مامشاش ..ماخلهاش ..الأغرب من هكي إنه يشبحلها بنظرة حلوة ..حست آمان الدنيا كلها في عيونه السود اللي تقول مكحلات 💖..
نجمه بصوت متعب: مازال قاعد..
شاهين ابتسم : اها مافش أمل للخلاص مني..
نجمه قعدت تشبحله هلبه والحلم في بالها"يارب شن مقدرلي معاه بس يااارب يكون خير يااارب"
شاهين: عارف روحي سمح ماتبحتيش فيا واجد لأني نتحشم..❤
نجمه غصب عنها ضحكت..
هو تنهد وابتسم براحه : الله لايغيبها..
نجمه: شن هيا..
شاهين بإبتسامه: ضحكتك..💖
نجمه شبحتله بنظرة مش مستوعبه فيها هالراجل معقول مايكونش زيهم زي ابناء جنسه..
شاهين غمض عيونه : خلاص معاش تبحتي فيا هك...
نجمه : ههههههههههه
هو فتح عيونه وابتسم بفرح...
***
في أمريكا
مقعمزة في أحد مقاهي تتفرج ع الغروب وتتفكر اخر لقاء جمعها بيه في المستشفى والكلام اللي حكاهولها...
فلاش باك..
اول مرة قلبي يوجعني فيها وجع عضوي لما ماتت اقرب انسانه واحب انسانه ع قلبي اللي عوضتني عن حنان الأم اللي انحرمت منه ..بالمناسبه أني من اب ليبي وأم ليبيه بس أصولها ايطاليه...امي ماتت وعمري 5سنوات بحادث سيارة.
صدمتها سيارة...لما فقدتها فقدت هلبه حاجات..تربيت في حضن عماتي بعد ماتزوج بوي ولهي عني..لكن كملت حياتي وربي مارزقاش بصغار غيري...وتوفى وخلالي كل مايملك..عشت في عالم الفلوس..التجارة ..تخرجت من الجامعه وطلعت من ليبيا وخشيت في عالم ريادة الأعمال اللي كان في وقت ما ممنوع في ليبيا..تعرفت عليها حبيتها وحبتني برغم انه تختلف عني في كل شي لهي من اصلي ولامن ديني..بس كانت ملاك في كل شي...ألمانيه ع فكرة تزوجنا وبعد زواجنا بخمس سنين اضطريت نروح لليبيا ع خاطر عيلتي محتاجين معاهم راجل..ومن ليبيا مايبوش يطلعوا...قبلت تطلع معاي سيبت كل شي كل شي وروحت معاي..كنت خايف لوماتتحملش العيشه فليبيا..لكن تفاجئت كيف خشت في العيله في الأجواء كل شي عرفاته وتعلماته ..ضحك تعلمت طيب البازين والعصبان وكان من احلى ماضقت..
للاهم ضحكت..هو قعد يشبحلها..بعدين كمل..
حبي ليها زاد لما جابت أمل ..بس بعده صارتلها مشاكل خلتها مستحيل تحمل بعدها..رضيت برزقي من ربي حمدته اللي عطاني أمل عشقت بنتي من عشقي لأمها كبرتها وهي تكبر وتولي نسخة أمها...جي النهار اللي ماكنتش حاسبله حساب وفارقتني بنفس طريقة فقداني لأمي..صدمتها سيارة وماتت في أرضها..جتني نوبه قلبيه..وكانت الأولى ومنها قلبي ولا قلب مريض نفسيا وعضويا..كرهت كل شي وبعدت عن كل وانعزلت عن الناس..بس اللي خلاني نرجع للحياة بنتي..أغلى مانملك..ع خاطرها تمسكت بالحياة..بس قلبي توا واجعني عليها..
للاهم: علاش ..
طاهر : لانها حبت الشخص الغلط ..حتى لما بعدتها عنه قعدت متمسكه بحبه وتعبت هلبه في بعده ورفضت هلبه شبان محترمين وولاد عيله ع خاطره..القدر جمعهم من جديد ..لإن معاش قعد عندي غيرها بعد ماراحت امها رضخت لرغبتها ..قلت ممكن..ممكن ..تكون سعيده معاه واني نظرتي فيه غلط...ويااااريت طلعت نظرتي فيه غلط.. من اول سنه انكشفت نواياه كان يستفيد من اسمي بش يركب في عالم المال والأعمال وفعلا ولا رجل أعمال ناجح ولهي بصفقاته ومشاريعه..وأمل ولت مجرد ديكور يكمل فحياته اسمها في عالم الأعمال كان مستفيد هلبه..زاد اهماله ليها بعد عرفوا ان الإنجاب عندها مستحيل..زادت تمسكت بيه بسبب عجزها تحاول ترضيه بكل الوسائل والطرق..بس هالشي زاده غرور وكبر..خانها بدل المرة مرات وهي تعرف وساكته..
للاهم بألم: علاش ماادخلتش..
هو : ادخلت مرات بس نتيجه هالتدخل ديما تجي في صالحه..كانت عنده قدرة عجيبه انه يخلي المواقف اللي ضده تولي في صالحه وتزاعلت اني وبنتي أكثر من مرة...بس ماخليتهاش لقدرها قعدت معاها حضن تلجأله لما تنجرح منه ..
للاهم: وخليك هكي ديما مهما صار خليك في ظهرها وجودك حيقويها وفي نفس الوقت هو حيقعد عامله حساب..خلي بنتك تحس انها قويه وتقدر تستغني عنه بالتدريج حيجي يوم وتخليه..
هو ابتسم بحسرة: خايف يجي يوم وهو اللي يخليها
للاهم بإبتسامه ليها مغزي: مادام مصالحه قائمه معاها ومعاك مش يخليها..
طاهر فهمها وقعد يشبحلها هلبه وبعدين ضحك..
للاهم بضحكه: خليتني طبيبة نفسيه
طاهر : ارتحتلك من اول مرة شفتك فيها
للاهم وجهه انحمر وقعدت ساكته..
ضحك وشبح فوق بعدين شبحلها: خجلك ليه نكهه خاصه..
للاهم قريب تهبل ع حركاته وضحكته جذاب باضعاف قوة جاذبية المغناطيس للحديد ..
طاهر : للاهم.."كان ينطق فيه بطريقة مميزة نطق الغرب للغة العربيه فهمتوا🤗"
للاهم ابتسمت لما سمعت اسمها للمرة تانيه بنفس الطريقه اللي سمعاته بيها المرة الأولى: اممم
طاهر بالإنجليزي: هل يمكن لنا أن نصبح أصدقاء ..
للاهم بنفس اللغه: الى جانب وظيفتي كطبيبه..
طاهر ابتسم وأشر بصبعه : نعم ولكن بدون أجر..
للاهم : ههههههههه حسنا..
قعد يشبحلها بنظرة خلت قلب للاهم يرجف رجفه حلوة: اتقبلين..
للاهم : 😳اقبل..
هو ضحك من خجلها: هههههههههه
للاهم :😳
الوقت الحاضر..
ابتسمت وقامت تلفونها وقعدت تقرا في اخر مسج وصلها كان منه بالإنجليزي(مرحبا ..صديقتي اريد ان اراكي غدا في (******) هل يمكن ذلك)
طبعا هي ردت بالموافقه وهي حاليا تستنى فيه..في غفلة جي حد قعمز مقابلها وقال: Hallo
للاهم انصدمت: انت شن جابك..
عمر بضحكه : انا قتلك بتهربي حنلحقك
للاهم بحده: مافي شي يخليني نهرب منك كلك ع بعضك..ولاحاجه بالنسبه ليا..
عمر: عارف كل اللي تقوليه ردت فعل مانلومكش وانا مستعد نتحمل منك كل شي المهم في النهايه نردوا لبعضنا..
للاهم: ثقتك بنفسك تعدت الحد..عمر..انسى اني مازال ممكن نفكر ان يجمعني معاك شي يوم من الأيام..اللي بيناتنا نور نور وبس..
عمر عصب وقعد ساكت ويشبحلها..
ف هاللحظه وصلها مسج(أعتقد ان الأمور قد اشتبهت عليكي وظننتي ان المرسل احدهم..انا من اخطأت لأني لم أنهي الرساله بإسمي..اتمنى لكي وقتا طيبا)
قعدت ادور بعيونها في المكان لقاته واقف بعيد..ابتسم ولف ومشي..وهو يعطي فيها بظهره ويمشي للاهم حست روحها انخنقت..دموعها تجمعوا في عيونها..
عمر: للاهم خيرك..
للاهم بنظرة غضب: اطلع من حياتي اطلع..وناضت تجري ..عمر لحقها وشدها..
عمر : للاهم اسمعيني
للاهم نفضت ايدها: قسما بالله تلحقني حنعيط ونتهمك بالتحرش..
عمر انصدم من ردة فعلها العنيفه..وهي مشت ودموعها تنزل..
***
البحر وصوت أمواجه...ريحته الحلوة ..الزوز مقعمزين ع رشاده كبيرة وبيناتهم مسافه باهيه..مغمضين عيونهم ويسمعوا في الموجه..
نجمه : مانحبش البحر هلبه
شاهين فتح عيونه: في حد مايحبش البحر..
نجمه فتحت عيونها وشبحتله: لأنه كبير هلبه وعميق هلبه ويخوف..
شاهين : اعرفي كيف تتعاملي معاه بس ..
نجمه : لهالسبب حتى لو مشيت مانعومش نخاف منه..
شاهين بضحكه: عندك علم اني نركب في الموج
نجمه شبحتله بتفاجئ: حقه!!
ابتسم : اها...وطلع تليفونه من جيبه وفتحلها فيديو ليه وهو يركب في الموج...
نجمه لما شافته تحشمت لإنه كان لابس شورت بس لكن انذهلت بقدرته ع ركوب الموج..
نجمه : متهور..
شاهين وهو ياخد في تليفونه: ههههههههه كلمه عبدالله وباتي الله يرحمهم..
نجمه: الله يرحمهم..حتى اني بوي متوفي
شاهين : الله يرحمه ويجمعك بيه ف جنات النعيم..
نجمه: يااارب..شاهين..
شاهين لما سمع اسمه من فمهما قريب حضنها: نعم..
نجمه بألم: انت وليت تاني شخص يعرف سري من اللي حواليا انت وعمتي بس اللي تعرفوه...
شاهين ابتسم بألم عليها أشر ع قلبه : سرك حيتم هنا ويموت معاه لما يموت..
نجمه: بعد عمر طويل..
شاهين ابتسم وقعد يشبحلها..
نجمه تحشمت وقعدت تشبح للبحر..
شاهين: اني كنت محترمك واجد وتوا زاد احترامي لكي انتي وليه قويه واجد وليه قوتها رجال مايملكوها..
نجمه وطتت راسها لوطا ودمعتها في عينها..
شاهين: نا دخيلك ماتنزليها ارفعي راسك فوق اللي كيفك راسه ديما فوق جبل شامخ ماتهزه ريح مهما عصفت بيه..
نجمه شبحت لعيونه قعدوا يشبحوا لبعض هلبه ...
نجمه : شاهين نبيك تكون خو دنيتي..
شاهين سكت تفهم إن نجمه في حالتها هادي غير مستعده للارتباط العاطفي ولا بأي شكل..قرر انه يكون معاها بأي صفة كانت غير الحبيب بش يداوي جروحها ويخليها تحبه وترمي الماضي ورا ظهرها...
شاهين ابتسم: مستعد نكون اللي تبيها المهم نقعد جنبك ..خوك اها خوك اعتبريني من هاللحظه..خوك سندك حنحميك من وراك وقدامك انتي وبنتك وأي حد يعنيلك ويخصك...
نجمه : انت شنو بالزبط ..
شاهين بغرور مصطنع: انا فارس لم تنجب مثله النساء..
نجمه: هههههههههههه الله ع التواضع..
شاهين بضحكه: اللهم زدني تواضعا...
نجمه ضحكت وشبحت للبحر: بلادنا حلوة هلبه
شاهين : اها بس قسوة الظروف خلتها بهالحال
نجمه حست بشعور الم "يابلادي حالك من حالي"
نجمه: شاهين فبالي فكرة مشروع نبي نطرحه عليك
شاهين ابتسم : وانا كلي آذان صاغيه...
نجمه ابتسمت:............
***
في الليل
هي حنينه نبي عصيده..
بريكه بضحكه: تباهي هاني ماشيه نديرها..
بشرى تضحك بفرح..
نجمه خشت عليهم الكوجينه بضحكه: تبي عصيده هالشفشه..
بشرى : ايه ماما...
بريكه : نطيبها وانتي عصديها ..
نجمه : حاضر..
نجمه تليفونها كان في ايدها جاها مسج..
(كولي كويس الدكتور قالي ناقصة تغديه...وبكرا تعالي بدري بش نحكوا اكثر في فكرة مشروعك طرحتها ع رجال أعمال وعجبتهم الفكره وبكرا جايين منهم ناس بنحكوافيه أكثر)
نجمه فرحت لين خلاص وبعتت
(تمام )
هو وصلاته رساله وضحك كانت مختصرة هلبه ورسميه بس تعود عليها وحب اسلوبها الجدي أكثر...❤
📑مشروع نجمه عجب رجال اعمال ليبين بعد ماتناقشت معاهم هي وشاهين فيه وحبوا يشاركوا فيه..
انتشر خبر المشروع ع نطاق واسع..وسادةاعمال ليبين في الخارج عجبهم..من بينهم أمال طاهر اللي كانت متحسمتله وتبي زوجها يشارك معاها فيه..
امل بحماس: شن رايك..
هو يساوي في روحه ع المرايه: حلوة الفكره..
امل بفرحه: بجد عجباتك..
هو ويبخ في عطره : ايه..
امل :يعني موافق
هز راسه بإيجاب ..جاته رساله قراها ابتسم نص ابتسامه..وجي بيطلع..
امل بحزن: حتى الليله طالع
هو اشرلها بإيده 🖐 وطلع بدون ولاحرف..
اما هي فحطت ايدها ع قلبها وقعدت تبكي :ياريتني نقدر نجبدك من صدري ونعفس عليك ياريت وانهارت بالبكي..زي كل ليله..
***
ماعندي بيه لازم مشي العراس
نجمه: لا ياأمي حتمشي وحتحضريه من الصبح لليل لمراة جت هني وعزماتك ..
بريكه : فكيني ترا..
نجمه بإصرار: حتمشي يعني حتمشي...
بريكه بتعجب: خييرك يامراة مانبيش نمشي..
نجمه: بشرى اني حنعرف كيف ندبرلها..
بريكه : ريح روحك اني قاعده معاها..
جت لأمها وباست ايدها: افرحي ياأمي وعيشي الفرح ياسرنا حزن ياسر..
بريكه وعيونها تعبوا دموع : انتي هكي تبي..
نجمه حط كفها ع خد امها: اللي يريحك انتي واللي تبيه ديريه..
بريكه: باه وبشري..
نجمه هزت راسها بالنفي : ماتفكريش فيها حنتصرف..
...
هيا ماما انزلي ..
نزلت البنيه الحلوة من السيارة بحماس..وسكرت الباب بإيديها الزوز ومشت تجري حطت ايدها في ايد أمها وبدوا يمشوا مع بعض..
بشرى : حني وين ماما
نجمه: هذا المكان اللي نخدم فيه
بشرى بدهشه: يعني حنقعد معاك في العمل ..
نجمه بضحكه: ايه ..وقعدوا ماشيين..لين تلاقوا مع راضي وهما راكبين الدروج..
راضي بضحكه: ماشاء الله ماشاء الله من هالحلوة هذي..
نجمه بضحكه: الحلوة هادي بنوتي...
انحني راضي وباس ع راس بشري: ربي يحفظهالك ويفرحك بيها..
نجمه : آمين..استاذ شاهين فوق..
راضي : اها ..
نجمه : تمام..هيا ماما..سلام راضي..
راضي بإبتسامه: سلام...ومشي
طول ماكانت نجمه تمشي مع بنتها بعد خشت الشركه..اللي هذا يسلم عليهاويبوس كانت حلوة هلبه ومليكتها خفيفه زي مايقولوا..وين بيوصلوا في مكتب شاهين..
نجمه: توا بنخشوا لمديري..
بشرى: سمين هو
نجمه بضحكه: لالا علاش
بشرى: زي ابله عطيات مديرتنا سمييينه هلبه..
نجمه: ههههههههههههههههه
خشوا لنبيله: مساء الخير نبيله..
نبيله ناضت من مكتبها: نزك نزك.. من هالسمحه هذي
نجمه بضحكه : بنتي ..
نبيله: ماشاء الله عليها عسسسسسل ربي يحميها...
نجمه بآبتسامه: تسلمي..
نبيله عطتها شكلاطه..
بشرى: شكرا ..
نبيله : عفوا ياعسل...
نجمه: استاذ شاهين فاضي..
نبيله بتعويجة فم: البرنسيسه نور جوا
نجمه : ههههههههههه..به شوفيه كان نقدر نخشله..
نبيله: تمام..اتصلت بيه نبيله...استاذ ..استاذه نجمه برا ندخلها.........تمام ..وصكرت
نبيله بإبتسامه: تفضلي..
نجمه ابتسمت: تمام..هيا ماما ..شدتها من ايدها ومشوا لين وصلوا للباب...طقت نجمه..
"تفضلي"
فتحت وخشت مع بشرى ...أول ماشافها شاهين ارتسمت ع وجهه ابتسامه حلوةناض من مكانه طول ومشالها ونور تشقلب في عيونها وتسطر في نجمه بنظرات غيرة ..
شاهين وهونازل ع روس صوابعه : شن اسمك ياحلوة..
بشرى: بشرى..
شاهين تفاجئ هلبه وابتسم حضن بشرى وقامها...
شاهين : مااشاء الله ماشاء الله كبرتي ياسمحه
نجمه اللي كانت مبتسمه تلاشت ابتسامتها لما حست انها شافت زي هاللقطه قبل في حياتها بس..امتى...وكيف..
⚡اذكرت ايه..هو نفسه ..نفسه..نفس الشاب اللي شافته من حوالي 3سنين فاتوا...جت اللقطه بين عيونها ...
هو شبحلها ع جنب بإبتسامه وكإن يقوللها "اذكرتي"..
طولت نظراتهم لبعض..نجمه حطت ايدها ع فمها من الدهشه وضحكت ..وهو ضحك...
نور اللي كانت تنحرق من نظراتهم لبعض: شنو ياشاهين الشركه انقلبت حضانه ..
تلفتولها الزوز...نجمه اضايقت..اما شاهين نزل بشرى وشدها من ايدها وقدم لنور وابتسم: اممم والله فكرة..
نورفنصت ونجمه استغربت..
في مكان فاضي في دور الأول نجهزه بما يخليه كيف الروضه ..واي موظفه ماعندها وين تخلي عيالها تجيبه يقعد فيه..
نجمه : تتكلم جد..
شاهين التفت وابتسم: وجد الجد اخرى..
نجمه بإعجاب: فكره حلوة..
شاهين: المكان مستخطي وجاي في جهه بروحه وله باب ع برا..
نجمه: ممتاز..
شاهين غمض عيونه وفتحهم وهويشبحلها بإبتسامه..
نجمه :😍😳
نور ناضت حامقه : كويس بكل دبالكم تنسوا تقولوا انها فكرتي ..وخدت شنطتها وطلعت وهي معصبه ع الآخر وخبطت الباب وراها..
نجمه شبحتله وابتسمت: غارت عليك..فاهمه غلط..
شاهين "الا فاهمه صح وصح الصح": خلينا منها تو عدي كملي شغلك وخليني انا مع هالسمحه اللي كبرت وراحت عروس حلوة واجد..
بشرى: شكرا..
شاهين: نجك نجك ..شبح لنجمه ..اذكرتيني..
نجمه بإستعباط: ايه..شفت صورك ع الفيس قبل..
شاهين رفع حاجبه الإيسار: صوري ع الفيس صار...
نجمه : ههههههههههه...50يورو قاعدات لتوا..
شاهين بدهشه: بالله ..
نجمه شبحت لساعتها وضحكت: ايه..توا خل نمشي للشغلي..في امانتك بشورة..
شاهين : اطمني في عيوني...
نجمه"يابختها": هيا عن اذنك..
شاهين ابتسم: اذنك معاك..وطلعت نجمه ..
شويه وطلع شاهين مع بشرى قضا معاها اجمل تلات ساعات في حياته لعبوا كلوا شربوا هدرزوا...بشرى عاشت شعور مختلف مع شاهين شعور ماعشاتاش قبل..شاهين رجل حنون لأبعد وحنانه حست بيه بشرى هلبه ..حنان الأب💖
اللي فقدتاه...
روحت بشرى وطول الوقت وهي تحكي ع شاهين شن دار شاهين شن قال شاهين شاهين..وطبعا روحت بكومة ألعاب وهدايا..
بشرى جت لأمها مدتلها حاجه: هاكي ماما
نجمه : شنو هذا ..
بشرى: من شاهو..
نجمه بضحكه: شاهو...؟
بشرى تاكل في الحلوة: اممم ..حولت المصاصه...هو قالي ناديني شاهو...
نجمه ضحكت..
بشرى : هيا ماما افتحيها...
نجمه ضحكت وفتحتها..لقت باكو صغير فتحاته..لقت بروش حلو هلبه ع هيئه نجمه🌟 كان راقي منظره..نجمه ابتسمت..
روحت امها في الليل وكان واضح جوها متغير للأحسن وقعدت تحكيلها ع العرس بتفاصيله المختلفه تفاصيل العرس الشرقاوي اللي عجبت نجمه هلبه ❤...
فاتت الأيام والشغل ع بداية المشروع ع قدم وساق تم الإتفاق بين 7 سادة اعمال ليبين لتنفيد المشروع وكان يعدد فيهم طارق لشاهين ..
ورجل الأعمال الليبي الألماني "طاهر عثمان***"
وبنته سيدة الأعمال "أمل طاهر ***"
وزوجها رجل الأعمال الليبي الألماني "شكري عادل"...
"نقصد بالليبي الألماني يعني عنده جنسيتين"
شاهين : بكرا أول إجتماع في فندق(*******)
طارق: حرص ع نجمه تجي ع الوقت..
شاهين: بنتها مريضه حنخليه زياده نص ساعه انتظار..
طارق بضحكه: مستعد تعطل العالم ع شانها
شاهين ابتسم: لو نطول نديرها..💖
***
كلمة حلوة وكلمتين
حلوة يابلدي ..
غنوة وغنوتين.
قمر يابلدي..
تتفرج من روشن سيارة الأجره اللي راكبتها ع بنغازي اللي كانت فيها مظاهر دمار بسبب الحرب بأسى..
هو: في الأول كنت مقتنع بالمشروع بس توا ندمت..
امل : علاش..
هو: ماتشوفيش في الواقع المأساوي..البلاد هادي انوجدت بش تدمر بس..
امل: البلاد اللي عايشن فيها كانت في يوم مدمرة اكثر من هكي بمية مرة وتوا شوفها كيف ولت..
هو بتهكم: تقارني في الألمان بالليبين..
امل : اللي تسبب في دمار ألمانيا ألماني..
هو بملل: به به ..لكن بنقولك بنحضر اجتماع غدوة وبنروح طول عندي ماندير غادي اهم مية مرة من المشاريع الفاشله فهالبلاد الخاربه..
امل سكتت وشبحت للروشن ودموعها فعيونها..
***
يوم الاجتماع ..
حب شاهين يخلي أول اجتماع جوه اريحي فخلاه في مطعم الفندق..كان في طاوله طويله خاصه مجهزة بكل شي وبكراسي جلد فخمه وكان المطعم مطل ع البحر ...
الكل كانوا موجودين بس يستنوا في صاحبة الكرسي الفاضي..
احد رجال الأعمال: هي صاحبة الفكرة..
شاهين ابتسم: اها ..
طاهر : بصراحه فكرة مثيرة للإعجاب نبي نشوفها بش نهنيها عليها..
أمل: فعلا اول ماسمعت عن المشروع تحمست هلبه اني نكون من ضمن المساهمين فيه
ابراهيم بإبتسامه: كلنا تحمسنا ..
شكري كان حاط رجل ع رجل وايد تحت خده وايد تانيه فيها تليفون ويراقب في حركة البورصى..
شكري قام راسه وبعقدة حاجب: حنستنوا هلبه
شاهين شبح لساعه ايده : 5دقايق وتكون هنا..
شكري هز راسه بإيجاب ورجع ركز ع تليفونه..
🌟نزلت من سيارتها بكامل أناقتها وشنطتها العمليه في أيدها..اختارت اليوم تلبس جديد...لأنها حاسه هالمشروع حيكون مرحله جديده في حياتها...خشت للفندق سألت الإستقبال دلوها ع المكان..كملت بخطوات واثقه لين شافتهم من بعيد ابتسمت ..قدمت تمشي ناحيتهم ..لمحها شاهين قعد سرحان فيها كانت غير كلها حيويه وجمال وثقه وفرح لما شافها لابسه البروش🌟 بس كانت لاهية بتليفونها تبعت في رساله للمراة اللي خلتها مع أمها بش تهتم ببشرى لأنها مريضه بالبردة..وصلت فيهم..
نجمه : إن شاء الله مانكونش تأخرت...
⚡"هالمقطع تخيلوه بالعرض البطيء"⚡
كل الموجودين قاموا راسهم لما سمعوا كلمه نجمه...وهي كانت توزع في نظرها ع الموجودين بإبتسامه لعند ماطاحت عينها عليه ..🍃
هو كان جاحظ نظره ..مقدرش يرمش ...مصدوم..مش مستوعب...مش مصدق عيونه...حس كله شي اختفي من حواليه ..من هي هادي ؟!مستحيل تكون هي نفسها مستحيل...!!الغريب إن قلبه نبضاته كان اشبه بصوت المدفعيه لما تضرب ...فشل تماما...
اما هي فأخر شي كانت متوقعاته انها ترجع تشوفه من جديد..الراجل اللي كسرها...اللي ذلها ..اللي هانها..اللي دمر فيها كل شي حلو...اللي باعها بأرخص ثمن...
6سنين فاتوا...بعد سته سنين جمعهم القدر من جديد بس ..

شن حيصير في نجمه بعد هاللقاء...؟!! وكيف حتكون ردة فعلها....؟؟

....يتبع...
الفصول الاربعة