نجمة نجمتي ( جمان فريد) منقولة

الجزء الثامن عشر

صلو على حبيب لله ❤
#نجمه_نجمتي

#جمان_فريد

الجزء الثامن عشر🍁

ماشيه كطبيبة زائرة..
نور: كم حتقعدي
للاهم: حاجه اسبوعين هكي ..
نور بتوسل:ماما نبي نمشي معاك
للاهم بضحكه: مش ماشيه ندهور
نور : عادي نمشي معاك انتي اخدمي واني ندهور 😄
للاهم قعدت تشبحلها وهي تشبح لأمها بنظرات رجاء طفوليه..
ضحكت للاهم: تمام باه..
نور بعيطه: يسسسسسسس ...اممممممواااااااه ياأحلى ماما
وطارت تجري لدارها بش توتي روحها..
فات يوم ومشت للاهم هي وبنتها لبريطانيا وماكنتش تعرف القدر شن مدرقلها في هالسفرة..
***
خاطري نطلعوا ندهوروا...
شكري وهو يلبس في ساعته : فوتي هاليومين بس نسلك فيهم أموري وتو نطلعوا ...
نجمه بإبتسامه: ربي ييسر أمرك ويفتحها عليك..
شكري ابتسم: ماتبي شي ...
نجمه : مانبي غير سلامتك..
شكري ابتسم وتوجه للباب ونجمه وراه..جاي بيفتح الباب بعدين تلفتلها وقعد يشبحلها ومبتسم بخبث ويحك في ذقنه..
نجمه: خيرك..
شكري: تعرفي ترقصي..
نجمه وجهها طماطم وساكته..
شكري شد ذقنها ورفع راسها : تعرفي ولالا.."هو شافها ترقص بس طبعا مايقدرش يقوللها شفتك"
نجمه هزت راسها بإيجاب ..
شكري باسها: تلقي حاجه في قجر الزيانه..نبيك ادلعيلي الجو الليله وغمزلها ..
نجمه متحشمه ع الآخر وهزت راسها كذلك بإيجاب ..
باسها وفتح الباب وطلع ..
***
متلاقيين ع الفطور في تاني يوم بعد حفلة دخول فارس...
نور كانت مش ع بعضها وتنقش تنقيش وشاهين مركز معاها وشغله حالها من أمس وضعها مش عاجبه كانت مطفيه ع الآخر وتتجنب فيه..
فتح الله: اهو فرحنا بفارس ..أمتى يجي دوركم انتم..
كلهم أنظارهم توجهت لشاهين ونور..ماعدا سعد وعبدالله اللي كانوا لاهيين بفطورهم ويبلعوا في اللقمه بالسيف...
فتح الله : شاهييين
شاهين استاقض: هاه ياجدي ..
فتح الله: عصا ع ظهرك
كلهم ضحكوا ..
شاهين بضحكه: نعم ياجدي كنك
فتح الله : امتى تسقد روحك انت وبنت عمك وتطلعوا الفرح..خوك اصغر منك وأمس كانت دخلته..
نور فزت: نتم قرايتي قبل ياجدي..
شاهين يشبحلها: اها نرجى فيها تم قرايتها وانا نتم اموري...
فتح الله: مش باهي تطويل الخيط..
كاريمان: تو يفوتوا سنين قرايتها بلمح البصر ياعمي ونفرحو بيهم ع حياة عينك..
كلهم قالوا : آاامين..
نور كانت مضايقه قامت راسها جت عينها في عين شاهين اللي كان يشبحلها بحب وخوف ..هي غيرت نظرها لصونيتها ودارت روحها تاكل أما هو تنهد ودار روحه ياكل...
إبراهيم: الحمد لله ياجدي مشروعي الجديد وحنفتتحه قريب...
فتح الله : بخصوص..
ابراهيم: وكاله شركة سيارات مشهورة..
فتح الله: ممتاز ...
عوض بفخر: تعب واجد ع المشروع بين هنا وبرا ومع مساعده ناس في الدوله والحمد لله تم ع خير..
سعد : بروا عليك ياإبراهيم...انا حنكون أول الداعمين والحاضرين...
إبراهيم شبح لشاهين وبعدين شبح لعمه وبفرحه: مشكوور واجد ياعمي..
عوض وعمر شبحوا لبعضهم ومتفاجئين..أما فتح الله فركز ع فطوره ومايبيش يشوف لشاهين اللي كان مصدوم في بوه بس اظاهر بعكس هكي..
شاهين شبح لإبراهيم وبإبتسامه واثقه:موفق ياولد سيدي..
إبراهيم ابتسمله وبرفعه حواجب: أجمعين ياولد سيدي..
شاهين وزع نظره ع الموجودين بإبتسامه لين جت عينه في عين عبدالله اللي كان يشبحله بنظره شاهين مافهمهاش وبعدين لهي بفطوره ...وشاهين حتى هو لهي بفطوره ويظاهر بلامبالاه وفي داخله غصة من معاملة بوه اللي كل مرة تزيد في القسوة...
...
خطأ كبير اللي قاعد يدير فيه عمي مع شاهين
عبدالله تنهد : عارف ..بس باتي شايل منه واجد ..
احلام: المعامله هذي حتزيد تنفر شاهين منكم..وتخليه يعاند اكثر وأكثر وممكن يدير أي شي بش يرد عليكم..
عبدالله: وهضا اللي خايف منه شاهين حيدير شي متأكد..
أحلام: غلطكم انكم ماعرفتوش تتعاملوا معاه شاهين شخصية تحب الإستقلاليه ويحب الكل يحترمه ويحترم تفكيره..ويعاند مع اللي يفرض عليه شي هو مايبيش وينفر من اللي يهزا عليه وعلى اهتماماته..
عبدالله : نقعدوا نمروحوا عليه بالمروحه يعني..
احلام : مش هك حبيبي قصدي احترموه جيبوه باللين والمسايسه..
عبدالله ضيق عيونه بملل: حتى احمد مانتعاملش معاه هك..اللي نا نعرفه انه مفروض يكون راجل ويتحمل المسؤولية وبس ..
احلام هزت راسها يمين ويسار بإبتسامه وسكتت...