نجمة نجمتي ( جمان فريد) منقولة

جزء الثالث

#نجمه_نجمتي

#جمان_فريد

الجزء الثالث🥀

طلعت تجري بانت عليها شجرة اللوز اللي كانت شجرة اللوز الوحيده المزروعه فوق ارض مستواها مرتفع شكلها زي تله ..هالشجرة زرعتها هي وياه لما كانوا صغار ..بان عليها هو كان مقعمز وعاطي بظهره فجأة بدت خطواتها بطيئه وقلبها نبضاته قوت هلبه ليها سنييين عليه ماشافته...قربت بالشويه لقاته حط راسه بين ايديه وباين مهمووووم ع الآخر💔
نجمه وقلبها قريب يفر: شيكو...."دلع اسم شكري"
شكري لف بوجهه لمصدر الصوت وايده قاعدات ع راسه وعيونه باينات من بين صوابعه كانوا حمر من البكي قعد يشبحلها ..
نجمه انصدمت في منظره وعيونها دمعوا : شيكو...خيرك .. تبكي ..
شكري ابتسم وقاعد بنفس وضعيته : نجمه ..
قربت وقعمزت بحداه وهو نزل ايده وحطهم ع راكبه اللي كانوا متنيات لفوق وشبح القدام: شن جو..
نجمه : شيكو انت كويس..؟
شكري ابتسم بألم ولقي روحه يتكلم تلقائيا وكأنه ماصدق حد يسأله عن حاله: مش كويس بكل بكل ..مدمر متحطم..مافيش حاجه ماشيتلي القدام ..عمري قاعد يجري  وماقدرتش ندير ولا حاجه من اللي كنت مخططه كلها معاكسه معاي كلها..حتى البنت اللي نبيها سيبتني وتسألي فيا كويس ولالا ..
برغم النخصه اللي حست بيها فقلبها لما تكلم ع أمل لكن وجعها حاله هلبه بالذات وانه يتكلم وعيونه دموعها تنزل..
حطت ايدها ع ايده وشدتها..هو حس بقشعريرة في جسمه من حركتها..
نجمه تشبحله ومبتسمه: نتفكر زمان لما ابلة الرسم كانت تعطي فينا حصة الصلصال كنت افشل وحده في هديكا الحصه كنت نروح نبكي لخالتي ونقوللها مانعرفش..مانقدرش صعبه..وكل مانحاول ونغلط نلوحه ونبكي لين جيتني انت وقتها كان عندك امتحان ومتكنطي طلعت فاصل ووشعرك مشفشف ولابس شورتك الأزرق اللي فيه اصفر تذكره ..
شكري ضحك ..نجمه قريب ماتت في ضحكته..تمالكت نفسها وكملت: كشخت عليا وقعدت تقولي خير بلاك ياحصله يانشفه نبي نقرا ..خالتي قالتلك معاش تكلمها هكي..سألتها خيرني..حكتلك..انتي جيت قعمزت جنبي وخديت الأدوات وقتلي هيا تعالي نعلمك ..قتلك مانعرفش..مانقدرش..انت قتلي انتي تعرفي وتقدري غير مش واثقه في روحك وقاعده تبكي وخلاص حاولي مرة اتنين تلاته عشره لين تجيبي الشكل صح مش من اول مرة تبكي زي البيبي ..
مسحت دموعي وكلامك اتر فيا جيت بحداك وقعدت نحاول وانت تساعد فيا لين جبتها في الأخير وجبت احسن درجه..
شكري ابتسم وشبح القدام: نجمه اني حاولت عشرات المرات..مافيش فايده الفشل حليفي الدائم..
نجمه : هاه شوف روحك كيف تتكلم الأفكار السلبيه هادي مسيطره ع عقلك وخلاتك هكي حتى لما تجي تحاول عقلك الباطن مخزن عنده انك فاشل وانك حتفشل هذا علاش ترتكب اخطاء من الخوف وتخليك تفشل..
شكري أشر ع قلبه: باه وهذا اللي يحبها سافرت لغير رجعه وخلاته مجروح ومكسور..
نجمه وقلبها يعصر فيها بس اظاهرت بعكس هكي: الجرح سيوره يبرا...والكسر ربك يجبره ..وخليها للوقت والنصيب..
شكري حس بكمية راحه غير عاديه من كلامها وكأنه كان في قبر وردتله الروح وطلع منه: انتي امتى كبرتي هكي
نجمه بضحكه : من زمان غير انت ماعندكش علم..
شكري : ههههههههه وضحكت نجمه لضحكته..وقعديسأل فيها ع العيله وقرايتها وشن دارت في هالسنين وفاتوا اكثر من ساعتين وهما يهدرزوا لين نادتهم خالتهم خشوا وشوي وجي راجل خالتهم اللي فرح هلبه لما شافهم مع بعض وتغدوا في جو لايخلو من الضحك والهدرزة...❤
***
في احد المطاعم في مدينة بنغازي..
عمر عم شاهين: عبدالله شوكه في الحلق هالعيل..
عوض عمه التاني: شيطان مستاقض لكل شي وحال عيونه زين
عمر: آححح حتى لما هده المرض خلف عيال كيفه وأحرف
عوض : ماتتعقدش حنتعبوه واجد بروحه مايقدرش علينا..
عمر : حط فبالك في غيره تلاته..
عوض بتهكم: منو قصدك شاهين العيل التافه الهبل اللي همه كله حوايجه من وين يشريهم والسيارات اللي يغير فيهم كل كم شهر ولا سفراته وطياشته ..ولافارس اللي من زمان وهو يبي يولي دكتور وقايلها حتى لباتي انه مايبيش يخش في الشغل بككل..ولا سند اللي قاعد ماطلع من المدرسه..طيحته قريبه ..غير انت هديلي روحك وخليك ريلاكس
عمر: ههههههههه باهي تو نولي ريلاكس...لكن نبي نشوف نتيجه ..
عوض:اطمن حتشوف وواجد اخره...
...
عمر وعوض خوت سعد من بوه ..سعد الكبير..امه توفت وهو في عمر 5سنين تزوج بوه بعدها ام عمر وعوض امهم كانت مراة لاباهيه لاكويسه..لكن لما تشوف معامله راجلها لسعد والفرق اللي يدير فيه بينه وبين خوته كرهاته وكرهت خوته فيه..بوه كان يحاول يعوضه عن حنان الأم وكان مهتم بيه بزياده لهالسبب؛ كبروا وسعد تفوق ع خوته من جميع النواحي في القرايه وفي الخدمه وكبر شغل بوه ووسعه برا ليبيا في دول عربيه وغربيه ..عكس عمر وعوض اللي كانوا يدوب ينجحوا في تنفيد مهام يوكلهم بيها بوهم..صارت حساسيات بين الخوت فقرر بوهم ع حياة عينه يقسم الورث بالعدل وكان نصيب الأسد لسعد لأن الرزق كثر وكبر بجهده وتعبه
وخوته زادو حقد عليه وامهم لين تموت وهي توصي فيهم مايخلوش سعد ياخد حقهم ع حسب تفكيرها..وقعد الحقد قائم والحرب البارده مستمرة...
عمر متزوج بنت عمه كاريمان وعنده نور بس وهي حبيبة شاهين
عوض متزوج بنت خالته مياده وعنده منها
اروي مواليد 84 متزوجه...إكرام 88متزوجه..إمتنان مواليد93 تقرا في المدرسه..
ونجو لواحد من ابطالنا اللي حيبرزوا هلبه في نص الروايه
إبراهيم ..مواليد 86 هذا شاب ناجح هلبه ويخدم مع بوه وهو سبب قوة بوه عوض زرع فيه الحقد ع عمه وصغاره وهو طبعا يسعى مع بوه بش ياخدوا حقهم من عمه كيف مافهمه بوه..كره كبيييير يحمله لولد عمه شاهين..اللي كان ملفت هلبه ومميز ويحظى بمكانه كبيره عند جده..
شاهين كان صقار..وفارس...وهالميزات نادرة شويه في الشباب اللي فسنهم هداكا الوقت يحاول ابراهيم يقلد شاهين..وشاهين فاهمه وديما يلقح عليه..تلقيحته المشهوره
"قااالك الغراب جي بيقلد مشية الحمامه نسي مشيته" ..
وفعلا ركبت ابراهيم عقده نقص من شاهين كان يحاول يقلده حتى في شكله ولبسه بس ماكانش يطلع عليه وشاهين كان ماسح بيه الأرض من ضحك وتسهويك...
***
قضت نجمه يومين حلوين في حوش خالتها مع شكري كانت ناسيه الدنيا ومافيها وتمنت هاليومين لو يصيروا العمر كله..
روحت واتصلت بحنين ونفختلها وراسها شكري قال شكري حط شكله كيف..دارلي حطلي جابلي وحنين مرة تضحك مرة تنسجم مرة تساير لما نجمه تعاود في نفس الكلام
حنين: تي والله تجيني الكليه تنفخيلي راسي بنفسي الدوة نفترشك.
نجمه: هههههههههه حيوانه ..
***
كان واقف في مكان يبان حلو هلبه وكأنه يعرفه بس معالم المكان ماكانتش واضحه ..قعد يجري وينادي..
"نجمه ...نجمتي ...نجمه ..نجمتي..وبدي يغني فيها غني..لين سمع صوت يقوله ..أني هناااايا ..تلفت وقعد يدور ويدور ومالقهاش ...نجمه ..نجمتى لين ويعلي في  صوته لين انبح تماما "
فاق مخلوع من النوم تعوذ من الشيطان وولا ع مخدته ويفكر في الحلم اللي شافه...
***
فاتوا الأيام وجي يوم الخميس حوش خال نجمه"محفوظ" تعبى بناسهم وأحبابهم وبدوا البنات يقلبوا في الحوش ويضموا وأيامتهم سود"ياناري علينا 😭😂" ..
كانت الأجواء اكثر من حلوة وعمات نسرين يهبلوا وجوهم حلو وهما كل ميديروا حاجه يبدوا يدربكوا ويغنوا ويقلبوا الدنيا..
نهار الجمعه مع المغرب كانوا يديروا في الكعك وطاحوا يدربكوا ع الطاولات اللي يديروا في الكعك عليهم ويغنوا والبنات بيجنحوا..😂
نجمه كانت تصفق وترد وراهم في الأغاني لين نوضتها خالتها أم العز ترقص وهي ناضت وتحشمت هلبه شجعوها بالأغاني لوحت الحشم بعيد وبدت ترقص وترقص وكان رقيصها فضيع بجسمها الحلو كانت طويله وجسمها مليان ع طولها وكانت لابسه قفطان كريمي كمه تلات ارباع ولتحت الركبه بشوي..
في هاللحظات شكري كان جايب حاجات وصوه عليهم وكان يخش من باب الكوجينه الخلفي والباب القدامي اللي كان يفتح ع الصاله مسكر ..كان يدخل في الحاجات ويولي يطلع ويدخل ..وهوطالع وحده من خالاته خشت خدت حاجه وطلعت و خلت الباب مردود بدون ماتنتبه ..خش شكري حط الحاجات وقام عينه ويجمد في مكانه وهو يتفرج ع نجمه ورقيصها وجسمها اللي كانت يتمايل بشكل حلو هلبه ..كانت قايمه شعرها كعكه مش مشدوده زين انفتحت وطاح شعرها الأسود اللي زي الليل اللي واصل لأخر ظهرها وكان يتحرك مع حركاتها...شكري قريب مات فيها تلخبط هلبه بعدين زمط ريقه واستاقض لنفسه وطلع بسرعه وهو في حاله 💓..
***
عواليا....عواليا...عواليا...عواليا ..مجنني بعد الغاليه ..عواليا
طارق بضحكه: جو رومانسي ع بحر وتتأمل في النجوم  وعواليا ..حبيبتك اسماها نور ولا نجمه ..
شاهين سكت قعد يشبحله : يادماغ القنبالي..النجمه تشع الضي والضي اسمه الثاني نور ..وصلاتك توا ياثور..
طارق: ههههههههه خف علينا ياأرسطو والله ماعرفتك
شاهين : ايش يفهمك في الحاجات هذينا خليك في التخرييط متاعك والوجيج الفارغ..
طارق : باهي ياعاقل انت أمتى الطيارة ..
شاهين: بكرا
طارق : لاوالله نحسابه امس ...ياغبي قصدي الساعه ..
شاهين : انا مش عارف من غيري كيف يصير فيك اللي حتى موعد طيارتك عابي عليا اني نعرفه لكي ..لا وباتي يقولي تعلم من صاحبك شويه شوق ماتعلمت..
طارق: مكثر هرجتك ياااراجل..قولي الساعه وأخلص..
شاهين : 10
طارق : في الصبح ولا في الليل..
ناض شاهين : الكلب اللي مزال يرفعك معاه ..ومشي وخلاه وهو ينفض في حوايجه من القزة
طارق : ههههههههههههه وفي الأخير تولي كيف اللي قلت عليه وترفعني معاك ...😂
****
جي يوم الأحد وبدوا ينصبوا في الخيمه من الصبح وداخل النساوين مدايرين فطور وجو مليح..
البنات مقعمزات مع بعض..
شيماء : ع الغالب هكي بعد العيد
نجوى اخت نسرين : ربي يتمملك ع خير ..وانتي نجو مافيش مواضيع..
نجمه: لالاا بكل "تكذب"
شاديه برفعة حاجب: بتقنعيني توا انك ماتكلمي في حد ولاعندك حد
نجمه وهي تاكل في الشاميه: لا مانكلم في حد وانتي حرة تصدقي ولالا..
أماني بنت عم نسرين: بصراحه حتى اني ماصدقتش كيف وحده بحلاوتك قاعده هكي..
شاديه طرمت شواربها بهزوة..
نجمه: انتي الحلوة حبيبتي بس صدقيني مافي حد وتو تجي حنين اليوم وتقوللكم ..
نجوى: استاحشتها الفرخه حنين قداش ليا عليها...
نسرين جتهم : سمعت اسم حنين خيرها الكلبه ماجتش ..
"جوووود مورنيننق قيرلز"
عيطوا ومشولها يجروا وسلموا عليها بالأحضان ومرة مرة تاكل ضربه ع خاطر ليها وقت مغيبه...
شاديه طبعا كانت ماتحبهاش بتاتا أي شي ليه علاقه بحوش خالتها كانت ماطيقاش بككل وهالكره خداته من أمها اللي كانت تتعامل مع أختها بريكه برسميه في العرس..
طلعوا البنات للخيمه وبدوا يفرشوا فيها في البساطات وهما بصارة وضحك وجوا
حنين : امتى توصل المنظومه ..
نجوى : بعتنا علاء يجيبها
نجمه تشبح لحنين وترقص في حواجبها ..وحنين تلكمست وجهها ولا أحمر 😳...
***
واقف قدام المرايه يساوي في زمالته اللي لبسها أخر شي بعد لبس اللبس العربي وعليه جرد وكانت اللبسه درناويه ..
كان في سباق خيل وحاضرينه ناس مهمه وفيها فرسان متنافسين ومن بينهم ولد عمه ابراهيم اللي مات بالضحك لما سمع بيه مشارك ..صور صورة وبعتها لنور...وطلع ..
وصل في الساحه اللي بيقام فيها السباق لقي جده واقف مع خوه فارس وصاحبه طارق..
جده فتح الله : لاقوة إلا بالله ع فارس عيت (******)
شاهين باس راس جده: راسك هذا حنرفعهولك كيف ماتعودت إن شاء الله
فتح الله : عارفك مادير كان اللي ترفع الراس ..
طارق : شنو يابوصاحب جاهز بش تاخد المركز الأول..
شاهين : من البارح  ..
كلهم :😂😂
فارس : انا شوري التصوير ..
شاهين : احسن حاجه تصويرك خير من بعض البشر ..
طارق :😂
....
ابراهيم : كل شي تمام
: اها زي ماقتلي بالضبط مش حيوصل في نص الطريق إلا وهو طايح من الخيل ومدقدق ..
ابراهيم: إن شاء الله ماعاد ينوض..
..تجهزوا الفرسان للسباق وكل واحد جاب معاه خيله وركبوا كلهم مع بعضهم يستنوا في إشارة البدء...
***
وصلت المنظومه خشوا ركبوها...بعدين طلعوا البنات ..
نجمه : اني اني اني بالله عليكم خاطري في اغنيه نبي نرقص عليها..
نجوى : هههههههههههه خلاص هي نجمه الأولى ...
حطت السي دي ...وبدت الأغنيه وزبطوها البنات (نلقى كفاف)
سمعتها وحده من عمات نسرين طلعت تجري ..
:حي عليكم نحبها هادي ..
نلقى كفاف تنوح ع كامل الأوصاف
نلقى كفاف تنوح ع كامل الأوصاف..
وبدوا يرقصوا وطلعوا النساوين الكبار حتى هما يرقصوا عليها والدنيا تصفيق وزغاريط وهياجه..
وع كلمات الأغنيه🎶في شرق البلاد..
بدي السباق وكان اميز فارس من المتنافسين شاهين كان يجري ومنسجم مع خيله ومتحكم فيه الكل عيونهم عليه .. ناس من كبار الشخصيات وقتها معجبين بيه كان هو اللي سابق وابراهيم وراه بشوي..وفتح الله كان شايف روحه بأحفاده...
نبي مولاي يجيب ارياف عزيز وميعاد وبصاف
عييت من الماشي وجاي بديت نخاف عليها من طعم المنذال
☆ نجمه ترقص وسط البنات مع خالتها ام العز وأمها وأم العروسه وعمتها ومدايرين عليهم دايرة...
...
رافع راسه وشاد خيله من زمامها وماشي هو وياها جهة جده
فتح الله : الله يرفع راسك كيف ماأنت رافع راسي..
ابتسم شاهين وباس راسه: مرفوع راسك من قبل مانجي ع الدنيا..
طارق غمزله: الجماعه بيشوشطوا
شاهين بإبتسامه نصر : جعلهم هبي ...والتفت شبح لإبراهيم شبحة استفزت ابراهيم وتلفت القدام..
ابراهيم وهو بينفجر: الكلب هذكي وين عدى
: مانعلمش بيه اختفى فجأة..
ابراهيم بعصبيه شديده : جيبه لو كان كارس تحت الوطا ولا مش حتشوف خير ..ومشي
:😨😨😨😨
***
تفضلي ياحاجه كامله..
نجمه : ووووك عليا هذا شنو كم وزنها هادي
حنين بضحكه : اسكتي يافرخه..
نجوى جتهم : عمتي كامله هادي مراة مبروكه ره ومكشوف عليها الحجاب ..
نجمه مطت شواربها : ياخسارة الماجستير اللي تحضري فيه..
نجوى بضحكه: ياحماره كلهم هكي يقولوا..
حنين: وانتي تقولي مع القائلين
نجمه :😂😂😂
نجوى: ياكلمتي وليلي ...عليك كلبات انتي وهي
نجمه وحنين: 😂😂
خالتهم ام العز: وحده منكم تجيب طاسه عصير لوز وتلاته طروف عبمبر للحاجه كامله
حنين : 3🤤
نجمه : ماهو طرف واحد ذوقه بالنسبه للي في حجمها..وقعدت تأشر يإيديها الزوز...
حنين ونجوى😂😂😂
ام العز: ههههههه يامعفنه مراة كبيرة ماتتسهوكيش عليها..عقابا ليك انتي اللي حديري صفرتها وتجيبيها وطلعت
نجمه : يللا وين المشكله نوتيها اني...وتتها نجمه وطلعت ..وكيف قربت من المراة مدتلها الصفرة المراة كانت لاهيه تهدرز وماقدر حد يقاطعها من الإحترام الزايد😁
ونجمه قعدت ماده ايديها وتقول تفضلي والمراة شي لين كملت دوتها وطلعت منديل ومسحت وجهها وشافت الصفرة خدت العصير وصونيه العبمبر وشبحت لنجمه ..ملامح وجهها تغيروا ...قعدت تشبحلها بتفنيص ..وبعدين ضيقت عيونها..
بريكه وأم العز خافوا..لكن نجمه كانت شاده ضحكتها من حركاتها..وكيف جت بتمشي..
كامله : اوقفي
كلهم قعدوا يشبحولها ...
نجمه التفت: أني..
كامله وهي تشرب في العصير: شن سماك ربي
نجمه باستغراب : نجمه 😕
كامله قعدت تشبحلها هلبه بعدين : باهي بري..
نجمه في خاطرها"ناقصني مهبله"
شبحتلها كامله وهي ماشيه
بريكه بقلق: خيرك ياحاجه شن في
كامله وهي تاكل في طرف عبمبر: خير ياحنه خير...
***
هيييييييييييييي يامينتي عليك طرف أغبر احرف ..
نور : هيييييه ماتزوديهاش
جيهان: ناعليا نا عليك عيون عليك لحيه عليك شعر عليك شخصيه ولا اللبسه كيف طالعه عليه..وووك انا ذبت خلاص
نور: هههههههه ياكلبه تحشمي ماتحقيش فيا قدامك.
جيهان: ع اساس انتي فارق معاك...والنبي نونو خودي فلوسه واعطيهولي...😍
نور : انلاااااا انا نبيه بفلوسه راجل طرف ومعبي من اللي بتسلم في كنز كيف هظا..
جيهان : عليك حظ عندك يافرخه
نور ابتسمت بغرور: قل أعوذ برب الفلق...
***
في الليل
حنين :وين العصير
نجوى: قصدك تم
حنين : خلاص تم ..
اماني تلقيه برا في جنب الكوجينه ..
نجوى: نو نطلع نجيبه
حنين :لالا خليك هاني طالعه...طلعت حنين والتفت لقت الصندوق قدامها كان(راني) مشت خداته ..وهي لافه ..
حنين: هيييييييييييييييييي
علاء بضحكه: خيرك اهدي اني علاء
حنين : باه حول 😳
علاء : مانبيش 😍..حنين فاتاته وجت بتمشي وقف قدامها تأففت مشت من الجهه التانيه ووقف قدامها..
حنين غمضت عيونها بملل: علاء مش وقته جو ااصغار اللي دير فيه
علاء : مانديرش في جو صغار ..هادي جاي الصندوق اني ندخله
حنين بتلقائيه: وين ادخله الكوجينه معبيه بنات..😡
علاء قعد يشبحلها بحب ومبتسم اما هي استاقضت ع روحها شن قالت : قصدي كيف تخش عليهم هكي عيب😳
علاء: 😂باه نوصله لباب الكوجينه وانتي كملي بيه داخل..
حنين شبحتله وعرفاته مستحيل يتحرك من قدامها لو مادارش اللي يبيه قررت تسايره..مدتهوله وهو لما خداه مس ايديها ..
حنين : تحشم ع وجهك علاء بلا حركات تافهه
علاء:بالغلط يادكتورة 😂
مشت قدامه وهي متنرفزة وهو وراها وقريب يهبل عليها وصلت في الباب : هيا هات جاي
قعد يشبحلها بهيام...
حنين: هيا الناس تراجي 😳
علاء تنهد: واني لا أمتى بنقعد نراجي
حنين : في شنو 😳
علاء : في قلبك يحن عليا نراجيك تحسي بيا وتقدري مشاعري حنين  اني نحبك ونبيك مرتي ياحنين والله كان نلقى اندير عرسي مع نسرين معاش قادر نتحمل..
حنين جبدت صندوق العصير: تو تكبر وتنسى.. وخشت
اما علاء انجرح من كلمتها هلبه وكيف استهرت بمشاعره ديما كانت تصد فيه بس هالمره كانت اسلوبها جارح ..مشي وهو طايرتله...
بدت السهريه ...ومعروفه أجوائها ...والمنظومه تربخ والبنات يرقصوا ..كامله كانت مركزة مع نجمه:حمالة بلي يابنيه والدنيا داستلك مرار وضيم هلبه...الفرح معاك عمره قصير وحتى أنتي همك حيقصر عمرك...
سمعتها ام الخير وكانت ترعش وعيونها يدمعوا تبي تعرف كامله لمن تشبح ماعرفتش وكانت شاكه انها تشوف لوحده بعينها...
ام العز طبست ع كامله: على منو كلامك ياخالتي كامله
كامله ضحكت: خليك في الفرح الفرح مايبي كان الفرح وقعدت تصفق ..وأم العز قلبها مقبوض...
"في ناس عندهم كرامات كامله مش عرافه لكن تحس بحاجات احساس قوي من ملامح الناس اللي تشوف فيهم واحساسها يصدق بإذن الله...والله تعالى أعلم"
....يتبع...
الفصول الاربعة