نجمة نجمتي ( جمان فريد) منقولة

الجزء الاخير 1

#نجمه_نجمتي

#جمان_فريد

الجزء الأخير...القسم الأول💔

ماخلا من سأل عليها..ماحد يعرف عنها شي...سأل ع خوها طلع مسافر بمرته للعلاج..سأل عمتها انصدمت وتفاجئت بالخبر وماتعرف عنها شي..بعت من يدور عليها في طرابلس..لاشيء..نجمه تبخرت تماما هي وأمها وبنتها..
فات شهر 💔...شاهين معاش شاهين الأول بكل...ولا إنسان جدي عصبي..مايتعاملش إلا بسطحيه شديده..حتى إدارته للشغل..ولت جاده هلبه..شاهين البصايري اللي يحب ديما يضحك..تحول لشخص منعزل والكل يتجنب يقرب منه..منكب ع الخدمه ومكرس نفسه للمشروع متاعها..حاجه منها لما ينشغل بيه يحس وكأنه معاها...
وزنه نقص ..وجهه شاحب ...كل شي فيه تغير...
غاده : كان نعرف ليش دارت فيه هك بس..حرام عليها ..ساد كسرة قلبه الأولى حتى بعد حكيتلها مارافتش بحاله!!
ناديه : ممكن ليها اسبابها..بس لو صارت فشاهين حاجه من وراها مش حنسامحها..واذكرت ناديه حديث دار بينها وبين نجمه يوم حفلة بشرى...
نجمه: انتي أم تتحملي تشوفي ولدك من غير صغار وعزوة؟!
ناديه : طبعا لا ..بس مش حنتحمل نحق ولدي يتعذب قدام عيوني لان اللي يحبها حب كبير تخلت عليه..
نجمه بألم: مش بإيدي والله..
ناديه : انا يانجمه عشت عمر طويل ندافع ع المراة وعن حقوقها في مجمتع كيف مجتمعنا مرن عليا قصص خلني نتعلم حاجات واجده كنت ديما نحط نفسي مكان كل وحده تعاني..وتنظلم..لذلك عمري ماحنظلمك بأشياء مالكش فيها..اطلقتي نصيب من ربي ..اكبر منه الرسول الكريم خدا اكبر منها واكثر من حب كانت هي..قدرلك ربي ودرتي عمليه ازاله رحم..مش بيدك شي..بس ولدي يحبك يبيك مقتنع بيك ..لما يبحث فيك نحق في عيونه لمعه حلوة واجد ...نحس فيه يشوف في الدنيا فيك..لو ماتكونيش معاه انا متأكده انه حيتعذب واجد هالمرة..و وقتها مش حنسامحك..
الوقت الحاضر...
فارس خش عليهم: السلام عليكم
غاده وناديه بأصوات متقطعه: وعليكم السلام..
فارس: شاهين في المكتب
ناديه بضيق: أها..
توجه فارس لشاهين..طق الباب..وخش
فارس : السلام عليكم..
شاهين وهو يقرا في ملف قدامه: وعليكم السلام..
فارس: نبي ناخد من وقتك شوي
شاهين : موضوع مهم
فارس: اها
شاهين: احكي..
فارس: طارق صاحبك كلمني ع اختك غاده يبي يطلبها ..
شاهين: مانكش غابي فطارق وتعرفه كويس..
فارس: يعني موافق...
شاهين: اكيد..
فارس: هو حكا معايا لإن متحشم منك..
شاهين هز راسه بإيجاب
فارس تنهد وناض: هي السلام عليكم
شاهين: وعليكم السلام..
***
كان نعرف وين تبخرت..
طاهر: ممكن محتاجه تبعد شويه بش تعيد حساباتها..
للاهم : ممكن بس علاش ادرق عليا..مستحيل حنقول ع مكانها
طاهر: ليها اسبابها
للاهم تنهدت: ربي يهديها وتطلع ..
طاهر : وانتي امتى ربي يهديك وتوافقي..
للاهم بضحكه: ومن قالك مش موافقه...
طاهر بضحكه: وعلاش تشحطي فيا..
للاهم: لاهيه بتجهيز بنتي...
طاهر: جهزيها وانتي عندي وحنساعدك ذوقي حلو
للاهم ضحكت بعدين قالت: شن حال أمل ..
طاهر: اممم احسن ..
***
طارق: لو نقدر ندير شي ره درته..ماهوش شاهين الأول ..
ابراهيم: الله يسامحها وخلاص..
طارق: ماخليت وين سألت تقول تبخرت في الهوا..
ابراهيم: النسوان الواحد مايعرفلهن..تحبهن من قلبك مش عاجبهن..ترفع خشمك عليهن مش عاجبهن...
طارق: ممكن لأنها ظروفها غير...
ابراهيم : مش لاقيلها مبرر ولاعذر...
طارق تنهد وسكت..
***
عذاب شاهين ماخفش بكل كل يوم يزيد أكثر من اليوم اللي قبله..كان يقعمز بروحه في جنان الفيلا..ويقعد سارح بالساعات ويفكر فيها وينها شن دير ..كويسه ولا..مرتاحه ولالا ..وبشرى حتى هيا مابطلش تفكير فيها..
احلام: في نور مادارش هك..
غاده : شاهين حب نجمه من قلبه حب شخصيتها وأخلاقها..ع عكس نور حبه ليها حب تعود بس..
احلام: بس والله حالته تقهر..
غادة تنهدت: حتى خطبتي من طارق ماحسيتش بفرحتها..تخايلت هاليوم لما يجي ينابشي فيه لين يكرهني فعمري..بس اللي صار ابتسملي ابتسامه بارده وقالي مبروك وعدا..
احلام بألم: الفراق صعب واجد بحياة أو موت..
غادة: صاح...
***
احسن شي..
نور :انا تعبت من كل شي ياماما..
كاريمان: حتى نا..خلاص ..
"السلام عليكم"
انصدموا الاتنين لما سمعوا الصوت وشافوا صاحبه...
عمر : نخش ولانطلع
كاريمان قعدت  تشبحله هلبه بعدين ابتسمت: خش..
***
وتعدي الأيام📅 ولاخبر عن نجمه..وشاهين ع حاله ممكن زاد سوء شاغل نفسه شغل تام في الخدمه وكان يروح متأخر ويروح بالخدمه معاه...وزاد انعزل اكثر..
وفي يوم...
طارق كان متوجه لمكتب شاهين
طارق: نبيله شاهين جوا
نبيله: اها..
طارق مشي طق الباب ..وخش وانصدم باللي شافه
شاهين طايح ع مكتبه وهو مقعمز..مشاله يجري..
طارق بخوف: شاهين ياشاهين شاااهين..
شاهين بصوت متعب: ووااعي..
طارق: ربي يهديك ...اتصل بنبيله قاللها تجيب عصير وحاجه مالحه..
جابت عصير وبشكوطي مالح ..نوضه بالشويه وعطاه البشكوطي وكلاه...وبعدين شربه العصير..
طارق بعصبيه: خلاص ياراجل خلاص انسى هيا عطاتك ظهرها تخطاها ماتقتلش روحك بالبطئ عشانها
شاهين بصوت متعب: ماتدويش عليها هك ..
طارق بملل: تي غير شن قلنا عليها نحنا
شاهين : بتجيب سيرتها جيبها بخير
ولااسكت..
طارق تنهد وحط ايده ع فمه: هاه سكتنا 🤐😒
طقطق..
طارق: تفضل..
خشت وردة قعدت تتفحص فشاهين بنظرها:إن شاء الله خير أستاذ فيك حاجه...
شاهين هز راسه بالنفي: كنك تبي حاجه..
وردة : اها ..نبي ناخد إجازة يومين عشان فرح خوي..
شاهين اشرله بإيده تجيب الورقه ..مدتهاله ووقع عليها..وعطهالها..
شاهين: مبارك عليه وربي يهنيه..
طارق :مبارك عليه..
وردة بإبتسامه:الله يبارك فيكم ..عقبالكم..
طارق: آاامين..
اما شاهين سرح وملامح وجهه تغيرت للحزن..وردة قعدت واقفة تشبحله هلبه..
طارق لاحظها: كنك وردة تبي تقولي حاجه ..
وردة بربكه: اها ..لالا..نستأذن..وطلعت وطارق معاها بنظرات الشك...
طارق شبح لشاهين: هيا صبي نطلعوا نغيروا جونا..شن رايك نتسابقوا بالموطو..
شاهين بملل: ماعنديش نيه ف شي ياطارق..اطلع وخليني نتم شغلي..
طارق ناض وبعصبيه: كويس استمر هك انت قاعد تسير بخطوات ثابته نحو الموت مش حطول...وطلع وخبط الباب بقوة..
أما شاهين فمسح بإيده ع وجهه ..وحرك وجهه ايمين وايسار بسرعه بش يصحصح..وولا للخدمه..
***
زي ماقتلك الرياضه يتعلموها للدفاع عن النفس وبس..
احمد بضحكه: حاضر ياأمي وحق الله فهمت..حتى سامي كان يقول فيها ليا لين حفظتها..
احلام وجهها ولا أحمر وسكتت..وصلوا في النادي نزل ونزلت معاه بش تكلم المسؤولين ع النادي..لقت سامي واقف يستنى ..
احمد توجهله: مرحبا وطق في ايده
سامي: اهلا بالبطل 👏
احمد: متحمس واجد
سامي بضحكه حط ايده ع كتف أحمد: كيف ماوصيتك ها...
احمد بضحكه: هذي رياضه للدفاع عن النفس ..امي توا كيف كانت تقول فيها ليا...
سامي رفع عيونه جت في عينها هي طول غيرتهم ابتسم وشبح لأحمد: هيا تعال نخشوا جوا
احمد : يللا..
احلام شبحتهم بيخشوا جت بتخش معاهم..
احلام : استنوا..
سامي شبحلها ورفع حواجبه  ووقف: هيييه وين ع خير
احلام برفعة حاجب: بنخش نكلم المسؤولين ونوصيهم عليه..
سامي : ونا جاي بنكشكلهم..؟
احلام: هضا ولدي ونا الأحق بهالشي..
سامي بنفاذ صبر: احمد قول لأمك ترد للحوش مانبيش اعصابي يطلعن عليها ونزعلك مني..
احلام: نعمممم!!؟
احمد بضحكه: خلاص امي عدي للحوش..
احلام شبحت لولدها وشبحتله: غير مانبيش نكسر كلمة احمد بس..حنعدي..شدت ايد ولدها..افطن لروحك
احمد ابتسم : اطمني ياأمي..
احلام ابتسمت : ربي يحفظك ليا ياقلب أمك..
سامي : به خلاص كملوا المشهد المؤثر هضا لما يرد للحوش بعدين...
احلام شبحتله بحده: الصببببر..
سامي : هيا حمادي..وخشوا هما الزوز...
احلام بغضب: مستفز هالمخلوق..
سامي: ردي للحوش..وخشوا
احلام : 😑...وولت لسيارتها ركبتها وروحت...
***
وهل تظنين انني سأرفض..
للاهم بضحكه: تكلمي عربي..
نور: هههههههههه..عيشي حياتك ماما واغتنمي هالفرصه اللي جاتك ياسر اللي ضاع من عمرك..
للاهم : مادام عندي بنت زيك رافعه راسي وين مانمشي فماضاع من عمري شي..بالعكس عمري مشي في الشي الصح..
نور باست امها: احبك..
للاهم بضحكه: وانا احبك أكثر💖
***
والله والله نشم خبر انك تكلم في غيري ..مش حنسيبك لا حنقتلك بأيديا
طارق: ههههههههههههههه....اصلا انتي لو تسبيني معانا قتلتيني..
غاده : عليش عذبتني الوقت هضا كله مادامك تبيني..
طارق: كنت نبي نجي من الباب ومانبيش نطعن رفيق عمري..
غاده ابتسمت: مانلومش شاهين كيف متمسك بصحبتك برغم انك ثقيل احيانا ..
طارق: هك صار ياغده...
غاده: حتى انت 😣
طارق: هههههههههههههه
***
الكل عايش الحب واغتنم فرصته اللي جاته بش يعيش سعيد
للاهم اللي عقد طاهر عليها قرانه واصبحت زوجته ..كل حد فيهم شاف في التاني دوا لجروحه..وللاهم بعدين سنين طويله من العذاب والوحده ربي عوضها حتى لو بعد وقت طويل...كل شي فوقته حلو..
نور اللي توتي لعرسها وهي ابراهيم برغم مناقرتهم لبعض لكن حبهم لبعض كل يوم يزيد..
غاده اللي فرحتها لاتوصف بعد صبر الإنسان اللي حباته من سنين ربي كتبه من نصيبها وعايشه في حبه احلى أيام
واحلام اللي حاسه ان قلبها قاعد يتمرد عليها..ويبي يفتح بابه لحد تاني غير عبدالله...وهي تحاول تمنعه ع قد ماتقدر...
عمر رجع عاش حياته مع كاريمان ونور وقرروا يهاجروا برا ...
يوم السفر..
العيله كانوا يودعوا فيهم في المطار...
وصلت نور في شاهين...
نور بإبتسامه: سامحني شاهين ع كل شي..
شاهين بإبتسامه: مسامحك يابنت سيدي..ركزي في حياتك..وفي قرارتك..
نور ضحكت: حاضر...شاهين
شاهين: اممم
نور: لو جا يوم وردت نجمه اطلب منها تسامحني..
شاهين : ادعي انها ترد..
نور: حترد صدقني حترد..
شاهين بألم : يسمع منك ربي...
نور : المهم وصيتك قوللها تسامحني
شاهين : برغم اني مش عارف شن صار بيناتكن..لكن حاضر...
نور ابتسمت...
"نور هي اللي ساعدت شكري في خطف بشرى ظنا منها ان نجمه حتولي لشكري...وهي ترجع لشاهين"..
سافروا عيلة عمر وهما متأملين بحياة جديد احسن 🏵..
***
وعجلة الأيام ادور 🍃
عرس ابراهيم ونور مازال عليه اسبوعين وتجهيزات قائمه ع قدم وساق ..نور عرسها حيكون في حوش جدها ...
بوها حيحضر بروحه بدون مرته وبنته ...ويكون
موجود في اسبوع العرس...
شاهين كان لاهي معاهم...ويحاول يطلع من الحاله اللي هو فيها..كان متمني لو يكون في مكان ابراهيم..بس الباين مش مكتوبله هالفرحه..غصة في قلبه ماتبيش تتنحى ونجمته ليها شهور غايبه ومش عارف عنها شي...
كان هو وطارق وابراهيم وفارس وسند في حوش ابراهيم..ينظفوا فيه..مابوا يجيبوا حد يدير هالمهمه كانوا يبوا يعيشوا جو خاص..اللي يسيق واللي ينشف واللي يكنس واللي يلمع..
ابراهيم واقف قدام دولاب دار النوم...
ابراهيم يأشر بإيديه: الجزء هضا ليا والجزء هضا ليها
فارس: ههههههههههه ..تشتقول انت الدولاب كله حيكون لها جزء لدبشها وجزء لأحذيتها...أسأل مجرب
طارق بضحكه: ع هالحاله لازم نديروا دار للدبش وحده..
فارس بضحكه: اها...
سند جاي من المطبخ: والله المطبخ خوك وباتك مش فيه..
فارس: مرات هي تجيب حاجات معاها
ابراهيم وهو يمسح في الدولاب: متفاهمين انا وياها في الحاجات هذينا..
طارق بمزح: ماتبيش مساعده هك ولاهك ..شي حاجه تبي تستفسر عليها..
ابراهيم بضحكه: عدي ياحيوان
فارس بضحكه: ماتحشمش ياولد سيدي نا صاحب خبرة وحنفيدك...
ابراهيم حدف  الفوطه اللي فيده عليهم: اخدم ياكلب انت وياه وغموا افامكم...مش محتاج نصايحكم
سند بأصطناع الصدمه: كيف مجرب من قبل..
ابراهيم خدي سطل اللي فيه مية مسخه وبيبزعها عليه بس سند هرب في الوقت المناسب...
فارس: والله فيك جو وانت متحشم..
ابراهيم: عليش بنتحشم ..عادي يعني...
سند بين راسه من الباب: قتلكم مجرب من قبل...
ابراهيم: يامسخ ..وطلع في جرته...
فارس وطارق:😂😂
اما شاهين فكان يكنس في الجنان برا ويسمع فيهم كيف يضحكوا ويبصروا ومبتسم ابتسامه خفيفه...تمنى لو كان هاليوم هو مكان ابراهيم ويناشبواا فيه هكي..
شاهين تنهد"الله يسامحك يانجمتي 💔"...
فات هذاكا اليوم وجي الليل والولاد كلهم طاحوا ورقدوا من التعب..لكن شاهين ماجاشي نوم كالعاده..ناض ركب سيارته وتوجه للمكان اللي يخفف عنه شوي ويرتاح لما يكون فيه ..درس ونزل ووقف ع الشط ..الجو صقع يجمد لكن هو مش حاس بشي..
كانوا في جنبه جماعه يسكروا ويغنوا شبحلهم وابتسم بتهكم وتلفت لقدام...
شاهين : كان نعرف  وينك شن صاير معاك مرتاحه ولالا بشرى شن دايرة في قرايتها اللي حتى مدرستها حويلتها منها
.ليش يانجمه ليش..والله كنت حنحطك فعيوني حنضحكك عمرك كله حنحبك بكل ماعندي حنكون اكثر من اب لبشرى..حتكونوا اغلى مانملك واحلى شي عايش عشانه..حرمتيني من اني تكون عندي عيله نحبها..حرمتيني من حبك ومن قربك حرمتيني حتى من اخبارك..عذبتيني ياقلب شاهين..اه لو تعرفي حال شاهين من بعدك يانجمتي..
: مسكين قيسه متليع..
: نقولوله يجي ينسى معانا همه..
:ياااااشاب..
شاهين التفتلهم: نعم..
: تفضل معانا فضفض وانسى همك
شاهين : نغضب ربي بش ننسى همي حيزيد همي هم ..قالولك عليا هبل
: ايييح دارلنا فيها جو الشيوخ
شاهين بضحكه : ربي يهديكم..وبعد عنهم شويه...
واحد من اللي يشربوا سيب الطاسه اللي فيده..
: اثر فيك...
: معاه حق...عطيني مكسرات من عندك
: هاك..
شاهين زاد قدم للشط يشبح لحركة البحر..بعدين قام راسه شبح نجمه ضيها قوي"انتي كيفها مانقدرش نطولك..بعيده بعيده واجده"...
وقعد يغني...ويحول في كبوطه والفانيليا متاعه
انا لك على طول خليك ليا..
خود عين مني وطل عليا..
وخود الإثنين وأسأل فيا
من أول يوم راح النوم...
: صوته سمح واجد
: سلح دبشه من فوق..
تلفتله: كنه انهبل هضا الجو جميدي
: الباين مجروح واجد...
: هههههه يقول مانشربش بش مانغضبش ربي..وهو بينتحر

خش شاهين للميه لين وصلت الميه لرقبته وقعد يعوم ويعوم ويعوم ومش حاس بشي..عيونه كانت دموعها تنزل أول مرة يبكي بعد ماغابت عنه نجمته من شهور...يبكي بحرقه..ومش حاس ببرودة الميه..والجو...ودموعه الساخنه تحرق فخده ..

"الراجل الحقاني الحنين لما يحب بصدق بقلبه الطيب الصافي ..عذابه يكون اضعاف من الفراق"

🎼حبيبي فين وانا أجيلك
سهرت الليل اناديلك..
بحبك مهما زاد ويلك
وحفضل أئول واعيدها كتير
بحبك...بحبك...بحبك....
ياغايب عني ومعايا
ياسامع قلبي جوايا
ياأحلى بدايه ونهايه
تعالى وئولي حالك ايه
منايا بس انا اطمن
بكلمه عليا بتهون
فراقك عندي مش هين
ياريتك حاسس اللي انا فيك
حبيبي فيك وانا اجيلك
سهرت الليل اناديلك
بحبك مهما زاد ويلك
وحفضل أقول وأعيدها كتير
بحبك...بحبك...بحبك...

...يتبع...
الفصول الاربعة