نجمة نجمتي ( جمان فريد) منقولة

الجزء السادس

#نجمه_نجمتي

#جمان_فريد

الجزء السادس🥀

ياحظك بهالشاهين..
نور بغرور: قولي ماشاء الله حبيبتي العين حق
سناء : هههههههه ماشاء الله ياحنه..
نبال: نونو قاعده ترسمي كيف قبل
نور: اها الحاجه الوحيده اللي مستحيل نسيبها الرسم..هذا اوكسجيني ..
سناء: نحسابه شاهين اكسجينك..
نور : لا هذكي بترولي هههههههههههه
ضحكوا البنات...
نبال: بصراحه نبي نعرفك ع ولد خالي فنان في الرسم
نور: اها ..
نبال: موجود هنا...
نور: بالله!! وينه..
نبال تلفتت : معيييين ..تلفت شاب من بعيد جاهم ..
معين : مرحبا ..
كلهم: اهلين
نبال : شن جوك معين
معين : تمام ماشيه...حفلتك حلوة واجد
نبال : ذوقك الحلو..نبي نعرفك ع صاحباتي ..هادي سناء..وهادي نور اللي حكيتلك عليها..
معين : اها اللي رسماتك
نبال : اها ..
معين مد ايده وسلم عليها: بصراحه عجبني رسمك واجد متقن ويبين ان اليد اللي رسماته يد فنان ..
نور بخجل: شكرا...
معين حط ايديه في جيوبه: اني رسام هاوي
نور: حتى انا ..
طلع تليفونه وقعد حط ع الإستديو: تفضلي شوفي شغلي ..
نور خدت التليفون وبدت تتفرج بإنبهار...
نبال : تعالي سناء نعدوا للقروب هدوما انسجموا
سناء : ههههههه صح ..وناضوا وخلوهم بروحهم..وفعلا نور ومعين انسجموا هلبه وقعدوا يهدرزوا ع الرسم والفن التشكيلي...
***
مقعمزة في الجنان ع اساس تقرا بس هي كانت سرحانه وتذكر في الحديث اللي صار بيناتهم في الجامعه..
فلاش باك
شكري : شن جو القرايه
نجمه: ماشيه
شكري : وخيرك تقولي فيها
نجمه شبحتله : الحق ياربي نقرا إلا بالسيف أجباري
شكري: وعلاش التخصص مش عاجبك
نجمه هزت كتافها: مش التخصص بس القرايه كلها مانبيهاش
شكري: علاش!؟
نجمه: ماعنديش رغبه ياشكري ..بصراحه نفضل نكون ربة بيت نهتم بالحوش نتعلم الآكلات ووهكي...
شكري بضحكه: انتي من حبك لخالتي ام العز تبي تولي زيها
نجمه بإبتسامه : وهو في أحلى من حياتها عايشه ومريحه راسها وهي وعمي عبد العظيم منسجمين ع الآخر
شكري : بس الحياه الزوجيه لما مايكونش فيها صغار تبدا باهته
نجمه: الحب يلون كل شي بأحلى الألوان..
شكري سرح ...
نجمه بضيق: تفكر فيها..
شكري : في كل وقت
نجمه بتموت بس شاده روحها: نقدر نسألك علاش انفصلتوا..
شكري بتهكم: لأنها فوق وأني لوطا
نجمه بإستغراب: كيف يعني؟
شكري تنهد: هي بنت عيله معروفه تمشي ع الفلوس وحيدتهم ودلوعتهم ومتعلقه ببوها وامها وهما اكثر..حبتني صح ورفضت هلبه ناس جوها من مستواها واعلى ..ع خاطري ..وبوها لهالسبب قرر يطلع من ليبيا بعيلته يبي يبعدها عني بش تنساني...
نجمه بألم تحاول تخفيه: حلوة ؟
شكري ابتسم وخدي تليفونه وحط ع صورتها ووراهولها ..نجمه انصدمت وعيونها تعبوا دموع البنت كانت شقرا وحلوة هلبه ولون عيونها زي لون عيونه ومش متحجبه ويبان عليها بنت عز ودلال..
نجمه اغتصبت ابتسامه ع وجهها: حلوة هلبه زي الأوروبيات..
شكري خدي التليفون وقعد يتأمل في صورتها: أمها ألمانيه وعاشت في ليبيا من لما تزوجت بوها ..
نجمه تشبح في نظرات الحب في عيونه وهو يتأمل في الصورة كانت ممزوجه بالشوق..نزلت من عينها دمعه مسحتها بسرعه ولفت بوجهها و قعدت تشبح ايمينها ..
شكري قام راسه وركز عليها وجهها أحمر وفمها مقوس "نجوي كلامها حق شكله "...حب يغير الجو
شكري بأبتسامه : قررت نكمل قرايتي
نجمه شبحتله بفرحه والدمعه في عينها: الله ..
شكري ركز عليها: والله ..
نجمه : ممتاز ..هكي كويس خليك مركز ع هالخطوة بس والبااقي ساهل ..نزلت دمعه مسحتها بسرعه لين خبشت وجهها بالغلط  ..
شكري: نجمه خيرك..
نجمه : شي ..غير اني مقابله الشمس وعيوني يدمعوا لما نجي مقابلتها ..
شكري شبحلها هلبه بعدين ناض : هي نوضي نمشوا ..
ناضت وقعدوا يمشوا ..
شكري: نجمه عطيني رقمك
نجمه خدت تلفونه من ايده وقعدت تكتب في الرقم وسجلاته بنت خالتي وعطتهوله ..
شكري ضحك وكملوا طريقهم..
الوقت الحاضر..
نجمه : هيييييييي خيرك
علاء: ليا ربع ساعه نكلم فيك
نجمه : شن تبي ياحصله ..
علاء قرصها من خدها بقوه: من هو الحصله
نجمه: آاااه أااه اني اني الحصله..
علاء طلقها : هههههههههه نحساب..
نجمه تتحسس في خدها: مسموم خزززي..
علاء: خلينا منك توا ..وقوليلي شن جو صاحبتك
نجمه ضربت ع خدها بخفه:هيييه نسيتها بكل اليوم ..خل نكلمها..
علاء : اصبري شويه ..اليوم جاتك ولا
نجمه : ايه ووصلتلها منك للشيطان الرجيم ..
علاء : طيبتلي كبدي يانجمه..
نجمه : والله ياوخيي حاولت فيها فكرة فرق العمر مخليتها رافضه برغم اني ملاحظه انها تحس اتجاهك بشي بس تكابر
علاء بفرحه : معناها حتى انتي ملاحظه مش وهم
نجمه بضحكه :لا
علاء تنهد: باه والحل..
نجمه : لازم تثبتلها انك جاد في الفكرة..
علاء: كيف..
نجمه ناضت : كيف هادي فكر فيها انت ..خل نمشي نهدرز عليها وخشت داخل وخلت علاء محتار في أمره..
***
فات يوم ورا يوم لين مر شهر كامل....
نجمه قوت علاقتها بشكري اكثر مكالمات يوميا ويجيها للكليه مرة مرة يهدرزوا كمجرد صداقه لاأكثر..بينما شكري زاد تأكد إن نجمه تحبه...
شاهين ع حاله وكل يوم يزيد يتعلق بنور اللي أمتحاناتها بدت وشاهين وصى عليها الإدارة في المدرسه ودفع اللي فيه النصيب بش يردوا بالهم منها..
أما علاء فقاعد ماشي ع الخطه متاعه مع حنين اللي كانت برغم ضيقها من حصاره ليها لكن كانت فرحانه هلبه من داخلها وتحاول تقاوم هالشعور وفي ليله..
علاء مع توفيق وولد شارعهم معكسين مع بعض...
ايهاب : وووه صاروووخ نار
توفيق : خير بلاك ..
ايهاب: متعرف ع وحده ع فيس بعتتلي صورها من أخر عرس مشتله ناااار ناااار..
علاء: عيب يا راجل خاف ربي في خواتك..
ايهاب: ماضربتهاش ع ايدها هي وحده خفيفه بعتتهم دون مانطلب منها..
علاء : مهما كان هادي اعراض فوت الحاجات هادي
ايهاب : انت ديما معقد وعايش دور الوعاظ..غير شوف ياتيفو شوف..
توفيق شافها: حيييييييي ع أمها حي ...جبد علاء التليفون وناض بسرعه بيحذف الصورة لما شافها جاته صدمه
ايهاب جاه يجري: شن حركات المفرخ اهيا..
علاء بصدمه : منين تعرفها هادي ..
ايهاب: قتلك متعرف عليها في النت..علاش تعرفها..
علاء مدله التليفون: امسحها ياإيهاب واتقوا الله في اعراض الناس..ومشي وهو مصدوم..
توفيق: علااااااء علللللو يارااااااجل استنى..ولحقه
ايهاب"خير عمه هذا"...ورجع يفصل في الصورة..
***
نجمه: حنين بالله عليك ماديرهاش في علاء..
حنين ببكي : مش بإيدي غصب عني
نجمه: والله حيهبل لو عرف..سمعت صوت باب تسكر بقوه ..شكله روح خل انوض نشوفه ..وصكرت..طلعت نجمه من الصاله ومشت لخوها اللي خطم قدامها ..
نجمه: علوش ماتبيش عشي
علاء التفتلها: تعالي نجمه نبيك شويه..
نجمه بقلق: باهي...ومشتله..
***
انتي ياغده حطي ع قناة المصارعه
غادة : معاش تناديني غدة ياتافه وهوينا عندك تلفزيون في دارك عدي تفرج فيها
سند: امي فكت الريسفر ع خاطر الأمتحانات..بالله ياغاده شويه بس نتفرج قبل لتجي..
غادة وفي ايدها الريموت: عدي عدي لدارك واقرا ماتصدعليش راسي..
سند: ماك كلبه وحدف عليها مخده وركب لداره..وهو راكب تلاقى هو وشاهين شده ..
شاهين غمزله: عدي تفرج في داري ..
سند بفرحه: ناعليا منك
شاهين : هههههه ساعه لاأكثر
سند: باهي باهي وطار لدار شاهين..وشاهين نزل للصاله
شاهين: شن جو ياغده ..
غاده مابتش ترد عليه..
شاهين جبد مخده وحدفها عليها..
غادة: اااااااي ..
شاهين : لما ندويلك بحتي فيا وردي
غادة التفتله: هذا بدال ماترضيني تضرب
شاهين قعمز ع حافة الكنبه: وعليش نرضيك إن شاء الله..
غادة : سافرت وماحسبتني في حاجه حتى الخدم حسبتهم وأنا لا..
شاهين: ههههههههههههه ياغده هديتك عند امي يوم اللي روحت كنتي بايتة في حوش حني عطيتها هديتك توصلها لكي..
غادة: حيييييييه ليها فوق الشهر عندها وماعطتها ليا!!
شاهين : تلقيها لاهيه بشي قضيه من قضاياها تروح كلميها عليها..
غادة: وياتري جبتلي حاجه سمحه كيف اللي جايبه لهذكي المفعوصه
شاهين: غغغغده لسانك ...
غادة: شن قلنا يعني ..
شاهين : خلاص سكري ع الموضوع ..باتي مازال ماروح
غاده مطتت شواربها بيأس: اها في مكتبه من بدري..
ناض شاهين ومشي لبوه..اما غادة فقعدت تفكر بعلاقه خوها مع نور اللي مكانتش راضيه عليها.."آااه لو تعرف شنو تقول عليك قدام صحباتها"...
في هالوقت نور كانت تهدرز بالتليفون مع الصديق الجديد
نور: قصه المعرض تبيلها تفرغ وأنا توا مشغوله بالإمتحانات..
معين : مافيش مشكله انتي اصلا يلزمك تبدي ترسمي في لوحات واجد بمواضيع مختلفه بش تفتحي بيهن معرض
نور: ههههه حتى انا هكي فكرت..
معين : هههههههههه ع العموم انا معاك وحنكون أول الداعمين موهبتك تستاهل..
نور ابتسمت : مشكور ...وكملوا هدرزة..
***
تاني يوم بعد الغدي في حوش اهل نجمه..
موسى: انتي يابنت
نجمه"تقول ماعنديش اسم" : حاضر جايه ..
وصلت نجمه في بوها اللي كان يشرب في الشاهي أشرلها بإيده تقعمز..قعمزت..
موسى لبس نظاراته وخدي تليفونه وقعد يشوف فيه: شن صاير في قرايتك
نجمه : عادي زي قبل
موسى: قالوا معاش تحضري زي قبل
نجمه بخوف: لا نحضر..
موسى: الكذب مانحباااش
نجمه من الخوف قعدت ساكته..
موسى : ردي بالك من قرايتك والتافه هذاكا نسمع بيه جاييك للكليه مرة تانيه مش حيصيرلك ولايصيرله طيب..وناض
ايوه ياحسين..كيف حالك ..وطلع ..
نجمه مصدومه وساكته خايفه لو بوها يدير شي في شكري من غير شي مايطيقاش بسبب حادثه قديمه صارت..
زمان لما كانوا نجمه وشكري قاعدين في حوش خالتهم طلعوا للبحر..وكانوا نجمه وشكري يلعبوا ع الشط ..شويه وخشت هي وشكري داخل وقعدوا يعوموا ويلعبوا ..
نجمه جمعت ميه في ايدها: شييييكو
شكري التفت بخاته بالميه ع وجهه جت في عيونه وجعوه : ياكلبه تو نوريك ..قعد يجري في جرتها في الميه عفست نجمه ع رشاده فتحت رجلها وقفت شدها شكري
نجمه: شكري رجلي
شكري : فكيني من الكذب متاعك
نجمه وعيونها دمعوا : والله رجلي ..شكري شبح لوطا لقي الميه فيها دم..قامها في حضنه وطلع بيها وهو ميت من الخوف ..شافوها خالتها وراجل خالتها وطاروا بيها للمستشفى..راجل خالتها اتصل ببوها جي يجري وكان بوشكري غادي..
موسى : وينها البنت وينها
عبدالعظيم: هدي ياراجل رجلها انجرحت وخيطوهالها وحالها باهي ..
موسى: هادي الأمانه اللي أمنت عليها ياعبد العظيم
شكري : مادخلاش عمي اني اللي كنت نجري وراها وهي عفست ع الرشاده..شده موسى من رقبته
موسى وعيونه تقدح شرار: وعلاش تجري وراها ياكلب ..
عادل جي فك ولده من ايد موسى: صلي ع النبي ياموسى صغار ويلعبوا مع بعض
موسى: صغار شنو ولدك عمره 16سنه ههع صغير والله ..وجي يجبده من ورا بوه..وبوه يدف في موسى.. موسى دفه طيحه لوطا وضرب شكري كف
عبدالعظيم : علاش هكي ياموسى..
موسى :هذا اقل شي نديره يحمدوا ربهم اللي في بيني وبينهم قرابه للأسف ..وبنتي من اليوم حتروح للحوش دف عبدالعظيم وخش بياخد بنته..
شكري حس بإهانه كبيره في حقه وفي حق بوه اللي كان يشبحله كيف ملوح ع الأرض وهو متحشم من ولده ومن عجزه وضعفه..شكري كره ضعف بوه هلللبه ومن يومها اهتزت صورته في نظره وحقد ع بو نجمه حقد كبير ..وقطع علاقته بنجمه نهائي وحتى العيلتين زادت علاقتهم سوء ببعض..ونجمه تعبت هلبه من بعده وكانت تبكي هلبه ع خاطره وكلت من بوها طريحه قريب قتلها لما حاولت تمشي من وراهم لحوش خالتها بش تشوفه...برغم مرور السنين إلا ان موسى قاعد مش متقبل شكري نهائي...
***
شنو تقولي !!
نجمه : ايه وخوتها مسكرين راسهم عليه
علاء بعصبيه : الكلاب يبوا يفتكوا منها زي مادارو في خواتهم بش يفضالهم الحوش
نجمه : شن حدير..
علاء هز راسه بعصبيه : تو تشوفي شن حندير..وطلع طول...
نجمه "ياااارب استر"...
.....
علاء: ايوه تيفو وينك..تمام خليك غادي وكلم  البطاحه يجي ايه جايكم تو نتفاهموا ....يللا شوي ونوصل فيه ..وصكر..وركب سيارته ومشي..
***
السعداوي: وانت شنو تحس جيهتها
شكري تنهد: شي غير انها بنت خالتي..
السعداوي: نقولك حاجه ..الناس تقول خود اللي يحبك ماتاخدش اللي تحبه..
شكري بضحكه: غير استنى شويه ..شن خود وماخود مش فبالي شي توا اني حكيت  معاك عادي ..
السعداوي: لو الموضوع مش شاغلك ماحكيتش فيه ياشكري
شكري قعد ساكت...
السعداوي : هو مازال وقته ..بس لما يجي وقته فكر في كلامي كويس ..حتعيش ملك..
شكري شبحله بعدين شبحله القدام  وقعد يفكر...

...يتبع...
الفصول الاربعة