نجمة نجمتي ( جمان فريد) منقولة

الجزء الثاني والثلاثون

#نجمه_نجمتي

#جمان_فريد

الجزء32💓💕

💥حب عمره 15 سنه..السنه فيها365يوم...اليوم فيه 24ساعه..الساعه فيها 60دقيقه..دقيقه فيها60ثانيه..وإلى ماذلك من كل وحدات الوقت..الوقت اللي اكبر حيز فيه خداه هو في حياتها ...بل ولا حياتها بكل تفاصيلها..اختصرت كل شي فيه..والمحصله(0)...فهل بعد هذا كله مازال بتعطيه تانيه زياده حتى لو بمشاعر سلبيه..هو مايستحقش أصلا..
قيمته من قيمه الصفر اللي طلعت بيه من حياتها معاه...
كانت ردة فعل نجمه كالتالي..❣
نجمه وزعت نظرها ع الحاضرين: إن شاء الله مانكونش تأخرت...ماخدتش منها شبحتها لشكري أقل من جزء من الثانيه ...
وخرت الكرسي وقعمزت ..
شاهين ابتسم: زي عادتك ع وقتك بالضبط..
احد رجال الأعمال : حضرتك صاحبة الفكرة
نجمه بأبتسامه : ايه..
طاهر : نهنيك فكره جت في وقتها...
نجمه بإبتسامه خجوله: شكرا..
امل : متحمسه نسمع منك عنها اكثر..
نجمه دارت فحص سريع بنظرها ع ملامحها الباهته اللي خافيها المكياج : حالا حنبدا...
شاهين ابتسم: ليك المساحه
بدت نجمه تشرح عن المشروع بكل ثقه وثبات..تنسأل وتجاوب إجابات مقنعه الكل اقتنعوا بالمشروع بزياده وتشجعوا اكثر لتنفيذه...
نجمه: في الأخير نبي نوصل معلومه ..من نص الطريق مافيش رجعه إلا لو ظروف قاسيه اجبرتنا..اللي يفكر في الربح الكبير في وقت سريع نقوله من توا ماتخشش فيه..
طاهر بإعجاب: كلامك هذا تحديدا زادني اصرار..
احد رجال الأعمال: حتى أني ...
شاهين ابتسم : يعني كلكم اجمعتوا ع التنفيذ..مافي حد عنده اعتراض..ماحد اعترض..شاهين شبح لنجمه وابتسم..
شاهين : الله الموفق...
نجمه شبحتله وابتسمت...
شكري ...معاها هي وبس يعني هو مش سامع شن تقول مركز معاها ..قداش تغيرت..تغيرت هلبه..قويه ..جذابه...زادت حلاوة ..اكثر شي هبله هو تجاهلها ليه..وكإنه عمره ماكان ليه وجود في حياتها..كانت تشرح وتجمعه في نظرها لما توزع فيه ع الكل...تمناها لو ابدت اي ردت فعل لكن شي ولاكأنه يوم من الأيام كان حتى عابر سبيل في حياتها...
تم الإجتماع والكل ناضوا توزعوا في اماكن مختلفة..
نجمه كانت تقرا في مسج جاها من المراة اللي قاعده مع ام نجمه وبنتها..خدت شنطتها وبتروح..
شكري قريب يهبل يبي يستغل اي فرصه بش يكلمها..ولما شافها ماشيه بروحها..تحرك بيلحقها كيف بينادي عليها..
"نجمه"
نجمه التفت: شنو شاهين
شاهين وقف قدامها: حالها باهي بشورة..
نجمه: احسن من قبل بنروحلها توا...
شاهين : طمنيني عليها
نجمه ابتسمت: تمام..
شاهين : خايل عليك 💖 وشبح للبروش🌟
نجمه شبحت للبروش: ذوقك الحلو ..
شاهين ابتسم : ربي يحفظك
نجمه ابتسمت بخجل: وانت..هي سلام..ومشت طول طلعت ..
وشاهين معاها لين اختفت من قدامه..شكري كان واقف ويشبحلهم بغل..خطم شاهين من جنبه وهو ماشي تبادلوا نظرات حاده لبعض ..
شكري قعد يفكر شوي وبعدها ولا لمرته وبوها...
***
حالك باهي عسولتي..
بشرى : ايه ماما هاه حتى شوفي راسي وحطت ايد امها ع راسها ..
نجمه باستها ع راسها وحضنتها : بعيد السو على غلاتي..💖
جتها امها: عمتك اليوم جايه ..
نجمه : ايه بعتتلي رساله امس..
***
<<  الجرح سيوره يبرا...والكسر ربك يجبره ..وخليها للوقت والنصيب>>
<< شكري: زادت نقرت الزين وضحت في ذقنك ..
نجمه : ههههههههه زمان علاء كان يحب يبوسني عليها يقولي حلوة ...>>
<<شيكو..علاش ماتكملش قرايتك
شكري تنهد : طارت النيه مافيش مستقبل في الشهاده المستقبل اللي اني نبيه...
نجمه : بالعكس المستقبل كله في تخصصك هندسه كهربائيه ..انت شاطر هلبه وكنت ديما الأول ..لما تتخرج حتتخرج بمعدل قوي..>>
<< "نحبك" >>
<< "ونموت فيك.. ومانشوفش في الدنيا ...غيرك ">>
<< تبوس في رجله: ماتخلنيش بالله عليك ماتخليني معاش عندي غيرك..نفضها وبيطلع >>
<<أنا لاحبيبي وحبيبي إلي ..ياعصفورة بيضا لابئا تسألي
ولايعتب حدا ولايزعل حدا ..أنا لاحبيبي وحبيبي إلي>>
شكري يتمشي ..ويذكر ..عيونه دمعوا..حس بشعور يخنق فيه..
شكري إنسان متناقض..أناني ..ماتحملش لما شاف نجمه هكي..المراة المكسورة اللي طاحت عند رجليه يوم من الأيام..ناضت ع رجليها ورجعت احسن من قبل بل مش زي قبل مراة مميزة شخصيتها قويه حلوة بزياده ..وتجاهلاته تماما وهذا اللي زاد هبله..
***
نور : الزردة في حوازة جدو في(******)
للاهم: حيصير سباق فرسان غادي..وشاهين مشارك فيه..فحب الحاج يضرب عصفورين بحجر..
نجمه: سباق فرسان !!كيف؟
للاهم بضحكه: مش عارفه شنو يسموا فيه بالزبط..بس شاهين فارس ويركب ع الخيل..وكل مايشارك في هالسباق يفوز..
نور: اووماي قاد،لوشفتي صورته وهو لابس الزي التقليدي وراكب ع الحصان اطيحي في غرامه
نجمه:😍😳
للاهم: وانتي طحتي في غرامه..
نور بضحكه: لالا هو زي خوي
نجمه غمزت لعمتها:شكله القلب مش خالي
للاهم ردت الغمزة: هكي الباين.
نور:واااااوووو انتم ....وناضت من بحداهم..
وهما ضحكوا..
نجمه: حتمشي معانا..
للاهم : ايه احرجني الحاج لما حلف..
نجمه: حتى اني كلمني بروحه..امي متحشمه هلبه
للاهم: هما ناس بسطاء وطيبين ترتاحي معاهم
نجمه ابتسمت :صح💖
حنديروا كم نوع حلو ونرفعوهم معانا..
نجمه: كويس..بس ماعندناش مواد يسدوا..
للاهم : شن رايك نطلعوا اني وياك ناخدوا مع بعض..
نجمه ابتسمت :تمام..
***
ماتقوليش وين مشيت بعد ماتم الإجتماع..
شكري ببرود: كنت نتمشى..
امل: مازال تبي تسافر غدوة
شكري: ايه..
أمل: زيد فكر المشروع حلو والأستاذه نجمه شرحت عليه بطريقه تحمس..
شكري لماجابت سيرة نجمه سرح بعدين قال: حتى اني اقتنعت..بنروح نكمل اشغال ضروريه ماتمش إلا بحضوري وبعدين نولي..
امل مشت حضناته من الفرحه: فرحتني هلبه حبيبي..
شكري: باه حولي بنخش اندوش..
امل بعدت بكسرة خاطر وهو خش للحمام..
***
نجمه وللاهم بعد شروا الحاجات قعدوا يتمشوا بين المحلات..
نجمه: فيسع مارجعت الحياة لطبيعتها..
للاهم :ايه..
نجمه جت عينها ع محل ملابس اطفال لقت قفطان حلو عجبها: الله ياعمتو يجي ع بشورة من عند غادي
للاهم بإبتسامه: صح ..حيطلع عليها تحفه..
نجمه : هيا نخشوا ..وهما ماشيين للاهم تساوي في وحده من الكياس بطيح منها انخبطت في شخص ..ماشافتش ألا تليفونه طايح كل قطعه في جيهه
للاهم قامت راسها:أا.... سكتت مرة وحده..
نجمه : استاد طاهر..
طاهر بأبتسامه : اهلا اهلا..
نجمه: تاني مرة نتلاقوا اليوم
طاهر شبح للاهم بعدين شبحلها: من حسن حظي..
نجمه: نعرفك عمتي الدكتورة للاهم..عمتى استاد طاهر واحد من المساهمين المهمين في مشروعي..
للاهم مصدومه وخلاص.
طاهر يشبحلها برفعة حاجب ابتسم وشبح لنجمه: فرصة سعيده...عن اذنكم
نجمه بإبتسامه: حني اسعد مع السلامه لم تليفونه ومشي
نجمه : ياكبدي عليه هذا وهو هكي يهبل مال ايام شبابه كيف كان..
للاهم : احمم .حيقعد هني هلبه..
نجمه: ع حسب اللي يتطلب وجوده..علاش تسألي..طيحك😉
للاهم اتحمرطت: تحشمي يامعفنه ..وهي خشي للمحل..
نجمه بضحكه: بس بجديات عمتي طالعين ع بعض..لو تبي نخش في الموضوع ماعنديش مشكله..
للاهم وشاده ضحكتهاادف فيها: خشي خشي خير مانضربك في الشارع..
نجمه: هههههههههه..
***
تجهزوا للزردة ونسقوا مع بعض .نجمه وامها بنتها حيمشوا مع عمتها في سيارة وحده يخطموا ع فيلا الحاج فتح اللي الكل حيتسقد منه من  غادي ..
وصلوا كلهم لحوازة..كان فيها ..حوش كبير دور واحد مقسوم لإتنين كان في فاصل..جزء للرجاله وجزء للنساوين..برا كان في زي المربوعه الخارجيه كبيرة..ومن جهة تانيه..مطبخ خارجي كبير...إلى جانب مطبخ نظام بار في قسم النساوين..
خل نقوللكم جزء الرجاله من فيه..
فتح الله..عمر..عوض...شاهين ...ابراهيم..فارس..سند ..طارق صاحب شاهين وهو قريب يسجلوه في كتيب العائله😂..وأحمد ولد عبدالله
النساوين
ناديه ..للاهم..بريكه...مياده..احلام..نجمه..غاده...منى..نور 1 ونور 2..امتنان...
طبعا كاريمان مابتش تجي والسبب معروف..
توزعوا ..وبدوا يرتبوا في حاجاتهم..والرجاله كالعاده استلموا الدبايح والجو المليح والشوايات..
اما النساوين الرز بالخلطه ع راس القايمه😍 وأنواع موالح..
بشرى تعرفت ع تولين وبدوا مع بعض...
شاهين...جوه مافيش احلى منه 4ايام بلياليهم  نجمه قدام عيونه..ومعاه في نفس المكان..❤
تغدوا تغدايه حلوة..وبعد العصر..طلعوا يدهوروا في الحوازة..
البنات طالعات مع بعض يدهوروا فيها وغاده مدايره دليل سياحي لنجمه...
غادة: وهذم شجر اللوز
نجمه اصبحت هالشجرة مربوطه عندها بألم لذلك اضايقت لما شافتها بس حاولت تتجاهل..
نجمه: ماشاء الله الحوازة كلها زي الجنه..
احلام : فعلا جنه..وجت قدام اماكن كانت ليها فيها ذكريات مع عبدالله حست بغصة كتمتها ..
...
جاهزين..
تولين وبشرى: جاهزين
شاهين: للي بيوصل الأول يركبها.
تولين : حتى انت عمو..
شاهين: اكيد..
طارق: عليك فضايح قدام العرب هذوكا..
شاهين بضحكه: اسكت ياكلب وين بتحقنا..
طارق: بنتها تعاود
بشرى: لالا ماما قالتلي اللي يعاود الدوة نمام..
شاهين رقص حواجبه وهو يشبح لطارق
طارق: 😂
شاهين : هيا 1 \2\3
ووقعدوا يستابقوا الثلاته للدريجحه المربوطة في شجرة كبيره في الحوازة..
امتنان: حييي تعالوا بحتوا شاهين ههههههههههههه
جوها كلهم وقعدوا يتفرجوا معاها
غاده  بضحكه: لو يولي عمره90 سنه حيركبها..
نجمه ضحكت
شاهين : هيااااا خلااااص بنسبقكم هههههههههه
بشرى : لالا ..وجرت اسرع كان في زي الجرف بعد الدرجيحه ماكانش عالي هلبه..بس بشرى فقدت السيطرة ع نفسها لمازادت سرعتها..
نجمه بهلع: بنتييييييي..وطلعت تجري..
بس شاهين اندفع بسرعه وجي قدام بشرى طاح في الجرف ع ظهره وبشرى جت عليه..
مشوا يجروا كلهم..
لقوا بشرى تضرب وجه شاهين تبي تنوضه: شاهو شاهو نوض
كلهم خافوا..
نجمه بخوف : شاهين ..شاهين ..حي عليا..
غادة : شاهين صبي ياهمي
احلام : شكله فقد الوعي..
نجمه نزلت ع ركبيها: شاهييين...شاهييين تسمع فيا ..شاهييين..ياهمي اني شن صارله..كله مني كله مني..
احلام : هدي حبيبتي شن ذنبك..
نجمه: بش ينقد بنتي دار هكي
غاده : شاهييين ياشاهيين..
نور بخوف: حييي عليه هضا فاقد الوعي..
نجمه بدت تبكي..
غاده: نجمه ماتبكيش حبيبتي...
شاهين فتح عيونه: تبكي من جدها..
كلهم بصوت واحد:هيييييييييييييييي
غاده: والله ماتحشم..
نور للاهم: لين حسيت بدوخه من الخوف..
احلام : ربي يهديك..
شاهين : هعهههههههههه..عليك كبارات شورخ..يعني بالعقل الطيحه هنا شن بديرلي..
نور كاريمان: خوفتنا عليك..
نوض بشرى وناض: ياحبكن للدراما😂
جاهم طارق: كنكم شن صاير..
شاهين : والله ياصاحبي كان بنعبى عليك ..وانت حداي ماتندري عليا شن يصيرلي لين يجيبولك نباي..وانت لاهي تشلط..
غاده شبحتله بإزدراء وطارق شبحلها وضحك غير عيونه بسرعه..
ركب شاهين بشرى وركب بعدها ..ونجمه طايرتلها منه..مشوا كلهم وهو ماشي ورا نجمه وشاد ايد بشرى : شكلها امك زعلانه..
بشري: ايه ..ماتحبش الخلعات
شاهين : ناعليا من الخلعات
ضحكت بشرى...
شاهين : لوسمحتي يااختي  عليك غرامه في طيحه اللي طحتها وانا ننقذ في بنتك
لفت وبرفعة حاجب: غرامة شنو..
شاهين وراها راسه دم من اللتالي نجمه وقفت وقدمتله تتفحص في الجرح:حي عليا ..يوجع فيك
شاهين بإبتسامه : اها...
...
شاهين اثبت..
شاهين : حار المطهر..
نجمه بضحكه: حتى بشرى ما ديرش هكي .
شاهين: تحنطي بديتي..
نجمه: من عاشر قوما..نجمه درتله المطهر مرة تانيه
شاهين: آاااه وبحركه لااراديه شد ايدها..
نجمه تكهربت..وهو طول حولها..
شاهين : آسف..
نجمه: حصل خير😳...هيا اثبت بش نديرلك اللصقه..
لما ديرله فيها تشد في راسه بأيدها ..
وهو قلبه في 1000 ..تمنى لو يكون جريح حرب وهي اللي  اداويه ..❤
نجمه : خلاص تميت..
شاهين ناض وجي قدامها: مشكورة
نجمه : العفو..
غادة جتهم: ماتمتش هالغرامه..
شاهين : عدي دوري وعطلي ..
غاده: ههههههههه ياتافه يبيك جدي..
شاهين : اه منك ياجدي تقول حد مسلطك عليا. ومشي بعدين تلفت..شبح لنجمه وشبحتله غمزلهاوابتسم ولف ومشي
نجمه ذابت من الإحراج خصوصا ان غادة شافت حركة خوها وشدت ضحكتها...
***
في المطبخ الخارجي..
نور للاهم: ياااي احلى مق نسكافيه لأحلى نور..وكيف بتمد ايدها عليه..اختفى من قدامها..انصدمت شبحت ع جنبها..
نور بالإنجليزي: ياسافل اعطيني اياه
ابراهيم يشرب ولا عباله..خدي كعكه من المترد وطلع وهو يصفر وجوه مليح..
نور من الغيظ عيطت..
وهوطلع برا ضحك بمكر ومشي...
...
مش قادرة نبحت في غيره هو مالي عيوني مخليني مانشوفش غيره
نجمه: بصراحه طارق من خلطتي بيه في الخدمه نبصملك بالعشرة ع أخلاقه ماشفتش منه غلط
غاده: ممكن لإنه مكان عمل ..
نجمه: اللي اخلاقه مش تمام في كل مكان حيبان عليه..
غادة تنهدت: محتارة ومش عارفه شن اخرتها.
نجمه: استخيري حترتاحي
غاده: إن شاء الله..
نجمه التفت لقت احلام تدهور بروحها بين الشجر: ربي يجبرقلبها..
غاده : احلام جسد بلا روح من غير عبدالله..كلنا كسرتنا موته كسرة قويه..شاهين تعب واجد بعد مات عبدالله..
نجمه وعيونها معبيات دموع: الله يرحمه..
غاده وتمسح في دموعها: آمين ويرحم أمواتك
نجمه نزلت من عينها دمعه مسحتها : آااامين
...
في الليل
بعد تعشوا الكبار والصغار الصغيرين خشوا رقدوا ..اما الشباب فكانوا سهرانين..
كانوا غاده ونجمه والنورتين وامتنان..سهرانين ويهدرزوا..
شاهين وابراهيم وطارق وسند شبحوهم من بعيد
شاهين: نعدوا نكسدوا معاهم..
ابراهيم : هيا..
طارق: مرات يدون في مواضيع خاصه..
شاهين : ساهله نحنا نجوا يسكتن..
ابراهيم بضحكه: اهو قالها الفهيم..
شاهين : عندك شك 😏
ابراهيم بضحكه: ابدا..
ومشوا جيهتم..
شاهين قعمز طول : ايه كيفنكم..
غاده : ومن قالك قمعز...
شاهين : انا قلت لروحي..
كلهم:😂😂😂😂😂😂
قعمزوا الباقي ودارو دويرة...
غادة : بدال هالكساد شن رايكم نلعبوا الحقيقه والصراحه..
شاهين : كله من المسلسلات التركيه..
غاده: وووووه لازم  تعترض اسكت ياأخي..
شاهين : تو كان نصبي نبطحك مش خير..
نجمه بضحكه: خلاص خليها وانت واقفلها ع الكلمه..
غاده : الحمد لله اللي جاني من يحامي عليا..
ابراهيم : واحسن محامي مع نجمه مانقدروش ندوا نحنا
نجمه: هههههههههه
شاهين :😒
ابراهيم :😌
طارق: 😂
سند: هيا خل نلعبوا اللي قالت عليها غاده...
غاده: ها شنو تلعبوا..
كلهم هزوا راسهم بإيجاب..
غاده خدت شيشه وحطتها في النص ولفتها..
جت بين طارق ونجمه...
نجمه: حقيقه..ولاصراحه ولااعتراف..
طارق: صراحه..
نجمه: امتى ناوي تتزوج
كلهم ضحكوا وشاهين اضايق بغيره..
طارق : فاجئتيني..اممم قريب واجد مش مطول...
نجمه : في وحده بالك..
شاهين: تبي تخطبيله..
نجمه: لو عندي وحده تستاهله مش حنتردد
طارق تحشم : بارك الله فيك..
شاهين:😑
طارق: فيه وحده ايه..
نجمه: تمام ربي ينولك إلا بالك ..
طارق سرق نظرة لغاده : آاامين..
لفتها نجمه..جت بين نور للاهم وابراهيم..
نور : شنو تختار
ابراهيم : اعتراف..
نور : باهي اعترف
ابراهيم: نحبك ❤
كلهم😨😨😨😨😨😨
نور😨😨😲😳
نجمه: احمم ابراهيم تتكلم جد ..
شاهين : وحق الله راجل ياولد سيدي..اها يبيها وكلم جدي عليها
نور : Wath!!!!😲
كلهم ضحكوا...
نور : لو تقعد اخر راجل في الدنيا مش حناخدك..
ابراهيم بتحدي :تو نشوفوا.
غاده : نور حتكملي لعب
نور: اكيد مش حنوض ع خاطره..
ابراهيم غمزلها وهي شقلبت عيونها بس من داخلها قلبها يرقص من فرحته..
لفت نور الشيشه جت بين غاده وشاهين
غاده : شاهين بالله عليك غني..
شاهين : تو اللعبه هك هيا..
طارق: قديش ليا ع صوتك حتى انا نبي نسمعه..
نجمه منتبه معاهم وماتبيش تعلق..
نور للاهم : ارجوك شاهين حتى اني سمعت ان صوتك حلو هلبه..
شاهين : به وانتوا سكنتوا ..احمم نزولا عند رغبة الجماهير حنسمعكم حاجه للكبيده..
طارق بضحكه: عمرو دياب..
نجمه ابتسمت..
امتنان : حتى نا نحبه واجد هيا شاهين ابدا..
شاهين : احمم..
🎼قولي ياحبيبي ليه وانت عني بعيد
انا شوقي ليك بيزيد ..
وإن جيت انا برتاح..
قولي ياحبيبي
ايه اللي غيرني وازاي بتشغلني
عن عمر قبلك راح
معاك قلبي وبلاش تغيب عني بتوحشني
معاك قلبي والله ولا بنساك
معاك قلبي وبلاش تغيب عني بتوحشني
ماليش غيرك حبيب قلبي ياأحلى ملاك..
💖كل حرف كان طالع من وسط قلبه يغني بإحساسه وهذا اللي خلاهم كلهم ينسجموا معاه ويعيشوا مشاعرهم..كل اتنين قلوبهم لبعض ..يسرقوا في النظرات لبعض..إلا هو مش قادر..اما هي فكان صوته مخليها تحس بشعور حلو هلبه ..عجبها صوته لين خلاص طول ماهو يغني عيونها عليه ..ومش فاهمه شن هي عاصفة المشاعر اللي عصفت في قلبها..
🎼أحلى أيامي وأجمل سنين تتعاش
جنبك ياإما بلاش من غيرك اتمناه
هو ده كلامي
حبك مافيش بعديه
فتحت عيني عليه وعرفت راحتي معاه
معاك قلبي وبلاش تغيب عني بتوحشني
معاك قلبي والله ولابنساك
معاك قلبي وبلاش تغيب عني بتوحشني
ماليش غير حبيب قلبي ياأحلى ملاك..💖
كلهم صقفوا بحرارة..إلا نجمه تشبحله بس هو شبحلها... هي غيرت عيونها ووجهها احمر..ابتسم كالعاده...
نور : وسيم ...فارس..رجل أعمال ..وخفيف دم...وصوتك حلو.. بالإنجليزي "ماهذا ياإلهي " ..
شاهين: اخجلتي تواضعنا يابنت سيدي..غير خسارة سبقني ابراهيم..
ابراهيم  شبحلها بحده هي خافت واظاهرت بعكس هكي ..
غاده: هيا نكملوا ..لفتها...جت بين نور كاريمان ونجمه اللي كانوا اغلب الوقت مستمعات بس..
نور: شن تبي ..
نجمه:صراحه..
نور فكرت وبمكر: عليش اطلقتي...

....يتبع...
الفصول الاربعة