نجمة نجمتي ( جمان فريد) منقولة

الجزء الثاني وعشرون

استغفر الله العظيم واتوب اليه

للهم صلي علي محمد وعلى آله وصحبه أجمعين كما صليت على إبراهيم وعلى آل إبراهيم إنك حميد مجيد 🤍
#نجمه_نجمتي

#جمان_فريد

الجزء الثاني والعشرين🥀

شن تقول انت!!!!......لااااااااااااااا ...ياحفيييظ ماتقولهاااااش تتتررررربح..وطاح منها تليفونها...آااااااااااااااااااااااااااااااااه
نور طلعت تجري من دارها مخلوعه لما سمعت عياط امها..لقتها مقعمزة ع الوطا وتبكي بعبرتها..حضنتها
نور: ماما خيرك...للاهم تبكي وتشهق وخلاص...قعدت هكي لفترة بسيطه..بعدين بعدت بنتها وناضت ..ناضت معاها نور..
نور تمشي وراها: ماما وين ماشيه..
للاهم وهي بتخش لدارها: احجزلي في أقرب رحله لتونس..
نور : بتمشي لليبيا ..للاهم خشت الدار ومابتش ترد عليها...
***
علاش بس فهمني..
عادل : اني هذا حوشي منه مش حنطلع..تبي تطلعي انتي اطلعي..
ربيعه : مش عارفه علاش ياراجل انت ديما هكي..لأمتى بنقعدوا هنايا لأمتى..ولدك عنده حوش سياح نياح بيعطينا فيه دور كامل في حي راقي وتقول لا..
عادل: هذا حوش ولدك لولدك نمشيله زيارة باه لكن نعيش فيه لا..
ربيعه :خ.....
عادل بصوت عالي : من هني مش طالع بتطلعي انتي الطريق قدامك...
جتهم شاديه تجري: سمعتوا...
عادل وربيعه شبحولها بإستغراب..
شاديه: راجل خالتي بريكه توفى اليوم الصبح...
عادل انصدم..أما ربيعه فصدمتها تخلطتت بالشماته..هناك من يتشمت في الموت!!...
***
مانبيش نحكيلكم كيف كانت صدمة اول يوم معروفه..انهيار عياط وبكي وفقدان وعي..الناس جت من كل تركينه والحوش تعبى ..انور سمع وقريب هبل سيب خدمته وروح طول يعيط زي المراة..ويقول بوي مات وهو مش راضي عليا..هدوه بالسيف ...كان يوم صعب هلبه الموت مافيش اصعب منه لإنه فراق طويييل الأمد ليوم القيامه..والله أعلم يصير لقاء في الدار الآخرة ولالا..عادل كان موجود وربيعه كذلك..
بس الناس كانت تتسأل بنته وين..نجمه ماتعرفش ..ايه ماتعرفش ..كانت مشغوله تزين في حوشها بدير حفله خاصه بيها وبراجلها بمناسبه خشتهم لحوشهم..كانت تبي ادير اي شي بش تكسب شكري..بدت عايشه ع خاطره وبس وادور في فلكه هو وخلاص...أما هو فكان يدور في فلك طموحاته الفلوس بدوا يجروا في إيديه واسمه خلال فتره قصيرة ولا معروف بسبب معارف ليه في الدوله كسبهم بلسانه المتملق..سمع بموسى بس ماأهتمش هلبه كان مشغول بعالمه الجديد...
في الليل..
نزلت من سيارة التاكسي تجري تشبح في الخيمه ..خشت وعيون الناس عليها خاشة طول وتشبح بصدمه شديده...وقفت لما شافت بريكه تمشي ووحده مسندتها كانت في حالة يرثى لها..
"بريكه"..
بريكه سمعت الصوت قامت عيونها المجهدات من البكي فيها: جيتي..
للاهم بصدمه: وين موسى..
بريكه تشبحلها وعيونها معبيات دموع..
للاهم : جاوبييييني ..موسى وين ...خوي وين!!!
بريكه نزلوا دموعها: مااات ..وأشرت ع داره..الصبح لقيته ميت هني...ابتسمت بتهكم..لكن مامتش لين ربي خدالك حقك منه..
للاهم بعيطه: لااااااااااا اسكككككتي اسكككككتي..مشت لداره بتفتحها لقتها مسكره بالمفتاح قعدت تخبط بإيديها الزوز وتعيط: موسى افتتتح تررربح افتتتتح ياوخيييييي بالله عليك...نبيك تسامحني...اني مسامحاتك..27سنه قطيييييعه...يااااناااااااس وتوا لآخر العمرررر ..خووووووي نبي خووووووووي ..جوها وقعدوا يشدوا فيها وهيا تعيط بأعلى حسها وبريكه تشوفلها ودموعها سيل والناس تأثروا وحنين مصدومه وتبكي..قدمت بريكه للاهم وشدتها ..
بريكه بإبتسامه ألم : مسامحك ره ..هو قالها في العمرة قالهالي ..مسامحها وإن شاء الله هي تسامحني ..
للاهم سكتت بصدمه ودموعها ينزلوا حضنتها بريكه وقعدت تبكي وللاهم حتى هي بدت تبكي قعدوا يبكوا الزوز ويشهقوا اصوات أنينهم مسموعه لخيمة الرجاله برا اللي كانوا يسمعوا ومتأثرين ..خوته وولادهم وولاده يبكوا بالعبره...💔💔
***
أوووووف ياربي هضا وينه...
كاريمان خشت ع بنتها في الدار: صبي جهزي نفسك بنعدوا لحوش جدك ..
نور: ماعندش نيه عدي بروحك
كاريمان قدمتلها : انا قلت..صبي..جهزي نفسك..
نور بنفاذ صبر: مانبش مانبش ..
كاريمان بصوت عالي: تحركي يلا بلا تجعوين زايد
نور ناضت وقفت قدامها وبحزم: ناقلت لا...يعني لا..
جاهم عمر اللي كان يسمع في اصوات عراكهم: كنكم..
كاريمان : ماتبش تعدي لحوش جدها ...
عمر بهدوء: خليها ع راحتها..نور فرحت..
كاريمان برفعه حاجب: نعم ..
عمر بحده: اللي سمعتيه .ومشي وخلاهم
نور ولت قعمزت ع سريرها وكاريمان طلعت معصبه ع الآخر..
نور شدت تليفونها وتتصل ومافيش رد"وينك يامعين"..
***
فاتوا تلاته ايام  ع وفاة بو نجمه وللاهم قاعده في حوش خوها تهدرز مع حنين..
للاهم: معقول لهالدرجه بوها يموت وماتجيش..
حنين : اني متأكده ان صاير معاها شي صاحبتي ونعرفها تعصب بسرعه صح لكن قلبها رهيف وفيسع ماتولي ..
للاهم سكتت وتفكر ..
حنين : اني حنتصل بيها نشوفها..
للاهم هزت راسها بإيجاب وطلعت..اما حنين فاتصلت بنجمه..
في هالوقت نجمه كانت ترتب في تحف شرتهم للحوش ترتب وهي تتصنع السعاده وتمثل فيها حتى ع نفسها بش تصدقها وتكمل حياتها..تلاته ايام ماتندري ع شي..وعديم الضمير اللي متزوجاته مرفعهاش لأهله في هالفترة كاذب عليها وقايلها ماشين لعزي أقاربهم برا طرابلس ..هي ارتاحت من خالتها وحست هالفتره حتكون ليها فترة نقاهه..بتقولوا كيف ماكلمها حد من أهلها ووصلها المعلومه..لاماكلمها حد لأن انتشرت بيناتهم قصة عركتها مع بوها وإنه تبرا منها فمحد كلمها...حتى علاء اللي كان واخد منها موقف ..
ياطير وطاير على أطراف الدني
لوفيك تحكي للحبايب شوبني ياطير..
رن تليفونها قطعت غناها ومشت شافته ابتسمت لما شافت اسم حنين وردت وفي ايدها المنشف اللي تمسح بيه في التحف: باه والله لي تفكتيرني كيف صار عمك رفع الحظر ولا تكلمي فيا بالدرقه عليه..
حنين تأكدت أن نجمه ماتندري ع شي وبصوت يادوب طالع: كيف حالك..
نجمه ابتسمت: الحمد لله في خيار الخير خشيت حوشي ليا اسبوع وقاعده نضم فيه ونرتب في حاجاته..انتم كيف حالكم ..
حنين بنبرة مخنوقه: نجمه..
نجمه: هههههههههه من صوتك الباين عليك تتكلمي بالدرقه خايفه علاء يسمعك ولا حتى هو قاطعني مع بوه يللا الله يسامحكم كلكم...
حنين بصوت باكي: نجمه..وين بتجي تكمل كلامها ماتقدرش حاسه ان اللي حتقوله حيكون وقعه قوي عليها..
نجمه بضحكه: صكري صكري وانتي تقول تكلمي صاحبك..
حنين : عمي..
نجمه بهزوة: هيييي سمعك تكلمي فيا
حنين غمضت عيونها : عمي توفى..
حست بالأرض انهزت تحت رجليها وكأن الدنيا ادور..الشعور اللي حست بيه شبيه بشعور الناس اللي يجيهم زلزال ع غفله..بعد صمت دام للحظات..
نجمه : هههههههههههههههههههههههههههههههه...شنو الحاج موسى مالقاش كذبه خير من هادي يجيبني بيها للحوش..بش يحبسني فيه ويبعدني عن شكري..
حنين  بعصبيه: شكري شكري شكري شكري...اهو بوك مات وهو غاضب عليك بسببه..بري اقعدي تحت رجليه بش تخشي الجنه ..وصكرت عليها...
كلام حنين برغم قسوته لكنه صاب نجمه في مقتل قعدت مصدومه تبي تحاول تستوعب اللي سمعاته.."بوك مات وهو غاضب عليك بسببه "...ضيقت عيونها بعدم تصديق ..جمله وحده قعدت ترددت في وذنها بالصوت والصورة
<< يحرم عليك حوشي حي ولا ميت ..حتى عزاي ماتخشيله ..اني ماعاش عندي بنات.. >>...
قعدت جامده في مكانها...زي اللي محصل خبطة ع راسه..سمعت الباب انفتح..التفتت ببطئ ..هو خش شبحها كيف واقفه وتشبحله ..نظرتها كانت مش مفهومه..مش عارف علاش حس بخوف فوقتها...قطع الصمت صوتها وهي تقول
"عندك علم بموت بوي"
هو قعد يشبحلها وقارن حواجبه وساكت..تأكدت انه يعرف وماقاللهاش ..مشت بإندفاع جيهته شداته بإيدها الزوز من دجاكته السودا..وهي تبكي وتعيط : كيف ماتقوليييش كيف...بوووي يموووت واني مانعرفففش كيييييف تكللللم قووول..وقعدت تهز فيه..
هو بعصبيه ونفاذ صبر : إيييييييييييييه..وشد ايديها الزوز وقعد يهز فيها ويفنص وبصوت عالي: وهاااك عرفتي...شن بديري ...قولي ...هو حتى عزاه حرمه عليك..وبابتسامه ساخرة ...تبرا منك ولا نسيتي..
هي قعدت مصدومه وساكته بعدين تكلمت بصوت يدوب طالع: أقل شي نعرف..
هبدها ع الكنبه بقول همجيه: وعرفتي ..هي اندبي وابكي ع راحتك ...ولف طلع برا الحوش..اما هي فقعدت بروحها مكسورة وشويه قعدت تبكي تعيط تشهق وتنوح ..ع بوها...ع نفسها...ع اللي دارته في روحها تبكي وتبكي وتبكي...بس شنو ينفع البكي توا... ماخلاص..💔