نجمة نجمتي ( جمان فريد) منقولة

الجزء العشرين

استغفر الله العظيم
استغفر الله العظيم
استغفر الله العظيم

#نجمه_نجمتي

#جمان_فريد

الجزء العشرون🥀

حنين
حنين تفطر في المطبخ:نعم
يوسف وفي ايده تليفونه: انتي مكلمه حد من تليفوني واني راقد؟
حنين تلفت وحطت ايدها ع فمها وتبلع في لقمتها وبضحكه: اها رصيدي تم كلمت نجمه صاحبتي..
يوسف : تو رقم رن عليا لما رديت سكر طول..بالك هي !!
حنين: ايه ممكن وقدمت لخوها ...ترانشوف..شافت الرقم...ايه رقمها...خل نكلمها وابتسمت لخوها وطلعت وهو ضحك ومشي يفطر ..
عند نجمه اللي كيف تلقت اقوى ضربه في حياتها من أخر شخص تتوقعها منه ..تعبانه وجسمها مهدود والكف معاش خلا فيها حيل...اما هو كان واقف يتنفس بعصبيه شديده ويشبحلها ويفكر شن بيدير فيها ..ع رنه التليفون شبحوله الزوز ..وهو شافه لقاه نفس الرقم..وبكل عنف وهمجيه شدها من شعرها ونوضها ...
شكري وجهه زي الغول: ردي ياكلبه..فتح الخط والمايك...
حنين: صباح الخيرات
شكري استغرب ...ردت نجمه بصوت تاعب: هاه حنين
حنين: قصدك قاعده تعبانه لتوا..
نجمه: لا غير كيف نايضه..رقم منو هذا
حنين: اها امس رصيدي تم لما ماعاودتليش كلمتك من رقم خوي..
شكري زي من صب عليه ميه سخونه طلقها وحط التليفون ع الطاولةوخش للدار ..وهي انهدت ع الكنبه..
حنين حست بشي غلط: نجمه شن في!!
نجمه: شي غير كيف نضت ومازال مافطرت..هيا حنين باي..وصكرت عليها بصعوبه..
حنين قعدت واقفه وتشبح للتليفون وحاسه ان في شي صاير معاها...
ناضت بخطوات مثاقله وتتسند ع الحيط تمشي لين وصلت في دار النوم..لقاته مقعمز ع السرير وراسه بين ايده..تسندت ع الباب وتشبحله..
"نحبك"
قام راسه وقعد يشبحلها وكأنه مدهوش توا بس لاحظ شحوب وجهها وانها واضح مريضه..والكلمه اللي قالتها كانت ردت فعل غير متوقعه منها...كملت تقول  بصوتها المتعب...
"ونموت فيك.. ومانشوفش في الدنيا ...غيرك "
هو قعد يشبحلها وحس انها تعبانه هلبه فجأة عيونها تسكروا وطاحت ع الأرض من غير حركه ....🍃
***
توا كويس
شاهين هز راسه بإيجاب وحس بقبضة في قلبه..
طارق: اول مرة تصير معاك الحاله هذي؟
شاهين قعد يفكر في سؤاله..من مده طويله وهو يحس بنخصات في قلبه بس كانت فترة وفتره لكن هالمرة أول مرة يحس بهالغمه ع صدره ويهرب عليه النفس...
طارق: أووووووي شاهين..
شاهين شبحله: اها أول مرة ..
طارق : لو تكررت عدي اكشف..
شاهين ابتسم بتهكم: كبار شورخ..
طارق بجديه: الصحه مافيهش استهتار ياشاهين..
شاهين سكت..
طارق تنهد: شنجوك مع نور
شاهين : مافيش جديد
طارق: متعاركين؟
شاهين: تس...
طارق : امالا شنو اللي صاير حاس انكم مش زي قبل
شاهين : هيا مش عارف كنها جوها شين بكل..
طارق : بالك صاير معاها شي ..
شاهين قعد يفكر لو ممكن نور تكون سمعت أو عرفت حاجه عن سرها المخفي: تو نطق في حوش عمي اليوم ونفهم منها ..
طارق: كويس ...هي صبي للفطور ..
شاهين: ماعندش نيه..
طارق: حتى في العجه..
شاهين بضحكه: ديما ماسكني من الإيد اللي توجعني ..وناض معاه ومشوا يفطروا...
***
الدكتوره بإستياء: صايرلها هبوط وعندها سوء تغذيه ودمها نازل ..وفعلامه في وجهها نبيلها تفسير
شكري بخوف: شن قصدك..
الدكتوره شبحتله من فوق للوطا : خافوا الله في بنات الناس ومشت وخلاته..وهو تنرفز من الدكتورة وتمنى لو يقدر يضربها..بعد ساعات كملت التغذيه ودارولها خروج ..روحت معاه والزوز ولا كلمه طول الطريق....وقف خدالها حاجات خاصه وماكله وروحوا ..خشوا للشقه..وهي خشت لدار النوم ..لوحلها شكارة الحاجه الخاصه قدامها.
شكري: تبي حاجه تكلمي ماتحطنيش في مواقف حقيرة بش اطلعيني مقصر..وطلع من حداها ..
"لاحظتوا ماأعتذرش واعترف بغلطه قلب عليها الطاوله وحط عليها هيا الحق وتجاوز اللي داره فيها..هلبه هكي يدير الغلط ومايعتذرش يتكبر ويقلب الطاوله ع المراة ولازم هي تطلع الغالطه ..المهم هو مايعتذرش ولايعترف بغلطه لأنه يحس الإعتذار نقص فرجولته..ومش مدرك انه نقص من رجولته بهالتصرفات"...
***
امتى سافرت!!!
كاريمان بربكه: البارح..كيف ماقالتلكش؟
شاهين بغضب: لا ...
كاريمان سكتت لأن نور كذبت عليها وقالتلها خبرت شاهين..
شاهين: وين سافرت..
كاريمان: لخالتها فقبرص..
شاهين هز راسه بإيجاب وناض بيطلع..
كاريمان: نور الفترة هذي نفسيتها تاعبه شويه من القرايه..
شاهين سمعها وطلع بدون رد...
***
الهروب مش حل ...
نور مقعمزه هي وخالتها ماجده في فيراندا حوشها..
نور : مانعرفش..نبي نطلع من هالجو اللي خانقني ..وأشرت ع رقبتها..
ماجده شبحتلها : في يدك انتي القرار..
نور: قرار شنو اللي فيدي ..باتي وامي ياخالتي يضغطوا عليا بشكل مش طبيعي..
ماجده: مش ضغط عمر وكاريمان اللي مخليك هك..انتي مش عارفه شن تبي..
نور شبحت لخالتها وسكتت..
ماجده بإبتسامه: كلامي صاح..
نور وطتت عيونها لوطا..
ماجده: محتارة بين شاهين اللي يعشقك ومدلعك ومستعد يدير أي شي عشانك..وبين معين اللي قلبك مايله ..مرات تحسي روحك تبيهم الأثنين..
نور شبحت لخالتها بتفنيصه..ضحكت ماجده ..ونور ضحكت..
ماجده سكتت وشبحتلها: نعطيك نصيحه..
نور شبحتلها تبيها تكمل..وكملت ماجده: خليك معاهم الاثنين..
نور بصدمه: شنووووو
ماجده: ههههههههههه اسمعيني قبل..خليك معاهم هذكي كصديق وشاهين كخطيب وركزي ع روحك منو اللي مش قادره تكملي حياتك من غيره واختاري...
نور تفكر وساكته...ورن تليفونها📱
ماجده بغمزة عين: منو..
نور بضحكه: معين..
ماجده: واضح من عيونك من بدري نحق فيك تبحتي في فونك ومبتسمه..ردي عليه
نور بدلع : انلا ..
ماجده ضحكت"نسختيني في طبعي كله"
سكت تليفونها ...ماجده: حليوه..
نور : اها ..وورتلها صورته..
ماجده : سمح ..بس ولد سيدك مازال اسمح منه وهيبه اكثر منه..
نور بإستياء: بس شاهين تفكيره تافه مش كيف معين...
ماجده مطت شورابها وسكتت..رن تليفونها من جديد بس هالمرة وجه نور تغير..
ماجده: الطير الجارح..
نور: اها..ضيقت عيونها وشبحت لخالتها..كإنه عاجبك ياموجي
ماجده : ههههههههههه وغمزتلها ..اها خسارته  طرف مطرف بس صغير واجد  ياعن فيته..
نور : هههههههههههههههههههههههههههه
ماجده :😂
***
🍁فاتت أيام نجمه قعدت فيهم في حوشها لإنها تعبانه وهي وشكري يتكلموا مع بعض برسميه..وطبعا هو اللي داير روحه زعلان"ضربني وبكى سبقني واشتكى"..
لين جي يوم روح فيه للحوش وكان فرحان..لقاها تصلي ابتسم..راجاها لين كملت ...ناضت وشبحتله لقاته مبتسم..
نجمه تشبحله وساكته..
شكري : ترقيت في وظيفتي في الوكاله متاع الشركة وليت مسؤول ع البضائع اللي تخص الشركه اللي توصل من الميناء..
نجمه : باه مبروك عليك..
قرب منها : فكينا من النكد خلاص ..
نجمه تشبح لعيونه وعيونها يدمعوا هو باسها..وحوللها الملايه..
شكري قربها ليه: كمليلي فرحتي نبي نكون فرحان وبس اليوم..
نجمه شبحتله وابتسمت : دوووم يااارب..
اما هو فقعد يحتفل براحته فيها...هي تحبه ومشكله المراة لما تحب الحب يسيطر عليها يلغي كل الإعتبارات اللي عندها وأولهم كرامتها..اللي تكون أول تنازل تقدمه لحبيبها...
🍃 وعجلة الأيام ادور..وتتبعها شهور..ونجمه ع حالها ..تمارس في دور الزوجه المطيعه ع أكمل وجه ..تلبي في طالباته و تخدم ع راحته ع حساب راحتها مستحيل تنقصه حاجه..مش بس هو حتى أهله وبش تثبت حبها ليه ..قاعده تخدم في أمه ووتتحمل فيها وفي معاملتها الزفت..كانت العزوز ترفع فيها لكل مناسبه تمشيلها مش لأنها تبي توريها للناس لا..بل لتتعمد تهينها قدام الناس ..وتحديدا بعد فات أربعه شهور ع زواجها وماحملتش بدت تلقح عليها...وفي الحقيقه شكري هو اللي مايبيش صغار في الوقت الحالي ويقوللها لين تتحسن ظروفي وناخدوا حوش ملك..وهي بش تحافظ ع صورته تكذب وتقول ان هي ماتبيش توا..
خلال هالفترة زارت أهلها 4مرات بس..يعني في الشهر مرة..
وكانت تمثل عليهم كالعاده انها مرتاحه..برغم انه نقص وزنها وشحوب وجهها يثبتوا العكس واهلها ملاحظين وساكتين لأنها ساكته..ومطلعه حياتها مع شكري كأنها في جنة...
وفي المرات اللي مشت فيهم غادي ماشافتش بوها بتاتا...
اضايقت بس في نفس الوقت ارتاحت..لأنها مش حتعرف تهرب من بوها اللي يعرف الناس من نظره وكانت فراسته عاليه...خافت تبان قدامه خاسرة للتحدي ويبانله ان كلامه صح ...
💐عرس حنين وعلاء..
كان عرس كبير...وعلاء كان فرحان هلبه ..نجمه فرحانه لفرحته ونست في عرسه مرار حياتها...
طبعا شكري حضر مع بوه..اسكتراد موسى زاد أكثر وكان رافع خشمه عليهم..ولامعبرهم ..شكري قريب يتفجر من معاملته وزاد حقده أضعاف مضاعفه..واضايق من بوه اللي كالعاده سلبي وساكت...
يوم الدخول روح علاء بحنين..كانت نجمه تتأمل في صاحبتها...كيف فرحانه..لابسه الفيلو..عروسه بالحق..محنيه وصابغه..وطالعه تجنن وابتسامتها ع وجهها ..خنقتها العبرة..بس لبست قناع السعاده الكاذبه وعاشت معاها اجواء فرحتها...
شويه وجي علاء وخدي عروسته وركب بيها لشقتهم
علاء سكر الباب وحضن حنين طول ..حنين حضناته وهي تضحك
علاء: اني اليوم أسعد مخلوق ..
حنين : هههههههه...
بعدها علاء وشد وجهها بإيده وباس راسها: وعد ياعمري ماحتبكي معاي غير دموع فرح..
حنين: ووعد مني حنصونك وحنسعدك ع قد مانقدر...علاء باسها بوسه طوييييييله...وبعدين بعد..
حنين وجهها أحمر: نصلوا قبل 😳
علاء:😂باه...
وفاتت عليهم ليله من أجمل الليالي اللي كلها حب ورومانسيه ❤
نجمه روحت مع شكري هديكا الليله بالسيف هو هكي يبي ..
قالب وجهه طول الطريق ..ولما خشوا للحوش ..
شكري: حوش بوك هذا اني معاش بنخشله تبي تمشي نحطك ونمشي طول ..
نجمه بخوف: شن اللي صار فهمني..
شكري : غابيه في بوك انتي..
نجمه غمضت في عيونها بأسف..
شكري خش للدار وطلع حوايجه وبدل ورقد..وهي بدلت وخشت سريرها ودموعها تنزل...
***
والدك حي !!
نور مع صديقتها اليابانيه اللي تقرا معاها في كليه الإقتصاد في أمريكا ..
نور: نعم ..أمي ترفض الحديث في هذا الأمر ياجينو
جينو: لابد ان هناك سرا تحاول والدتك اخفائه..
نور: نعم ...احاول جمع بعض المعلومات بالخفاء عنها..
جينو : وماذا ستفعلين ان اصبحت لديكي جميع المعلومات عن والدك وعائلتك..هل ستعودين لبلدك وتكملين حياتك معهم
نور : لا...فقط أريد التعرف عليهم ..لن اترك أمي مهما حدث..وانا مدركة انها لن تعود لليبيا ابدا ...تنهدت ..حياة امي مليئة بالأسرار ياجينو..
جينو : افضل أن تكملي الباقي من حياتك كما هي وألا تحاولي البحث ع اجابات أسئلتك مخافه أن تكون العاقبة ليست محمودة هناك بعض الأسرار يفضل لها أن تبقى أسرار..
نور سكتت وقعدت تفكر في كلام صاحبتها...
***
بدي عرس شيماء أخت شكري...ونجمه ماعندها شي جديد تلبسه ..اللي عندها لبساته في مناسبات العيله اكثر من مرة..ومش عارفه تطلب مش شكري تشري لبس..
شيماء: والله حاجات تجنن تلقيهم غادي
نجمه: شن أسعارهم ..
شيماء : مش غالي هلبه وشكري وضعه متحسن يانجمه مدلي في عرسي 1000دينار ره..
نجمه انصدمت لإنها ماتعرفش هو ديما يشكي من القله و كيف وضعه مش مستقر..عطي لأخته ألف مرة وحده"الألف مبلغ كبير وقتها"..
نجمه: تو نكلمه..
ع خشة ربيعه كانت تتصنت: لا ياماما الفلوس حطهم لشيماء وقال خلاص فلست معاش تكلموني ع شي..وكان مش اني ضغطت عليه ماريتهم..الراجل وراه ايجار وحوش يلم في حقه بالقرش..البسي اللي عندك مش حتقوم القيامه كان عاودتي نفس الحوايج..ماتكدريش ولدي ايواااه وطلعت..
شيماء بصدمه تشبح لنجمه اللي دمعتها في عينها..
شيماء حطت ايدها ع ايد نجمه: معليشي...الله غالب امي عمرها ماحتتغير
نجمه: تعبت والله العظيم..وحضنت شيماء وقعدت تبكي..وشيماء حضنتها ودموعها نزلت وتمنت لو تقدر ادير شي...
🍃 فاتوا أيام عرس شيماء زي السنين ع نجمه ع تلقيح واهانات وساكته ومتحمله تكمد وتكمد وخلاص..وقداش وحده كمدت في قلبها وركتبها أمراض وعلل..لين جي نهار الحفله...كلهم لابسين احسن اللبس وتسريحات ..ونجمه مسكينه بيناتهم ناقصه...
تمت الحفله وروحت شيماء ..وروحوا كلهم لحوش العيله نجمه كانت داخل تبدل ...وشكري مع عماته في المطبخ يهدرزوا عليه..
نوريه أم منى: اللهم صل ع النبي زايد زين ومولي ماشاء الله عليك
شكري بضحكه: ربي يحفظك ياعمتي..
عمته نجاح: ايه والله ..لكن وليد خوي مرتك بكل ره هامله روحها هلبه...
نوريه: معاش اذكريني قفطانها اليوم لبساته في ستين مناسبه والناس حفظوه عليها..هذا غير منظرها كيف رايحه تقول جابدينها من قبر...
ع خشة ربيعه : ع شن تهدرزوا..
نجاح : ع كنتك
ربيعه: أستغفر الله وخلاص..
شكري كان يسمع وساكت ويهز في رجله من العصبيه..
ربيعه : نشوف كناين الناس تركبني قهرة..
نوريه : الله غالب وخلاص ..من الأخير مش ليك ياشكري غير النصيب..
ربيعه: نصيب شنو هو اللي سكر راسه عليها وعاندني وهو يعرف من كنت نبيله..
نوريه فهمتها: الله غالب...
وقعدوا يشحنوا فيه عليها ويزيدوا يبشعوا فيها في نظره..هما كارهينها وحاقدين عليها ومايبوهاش سوا أمه اللي تكون خالتها ولاعماته اللي كانوا يبوا شكري ياخد وحده من بناتهم..وفي نساوين أهل الراجل هما اللي اختاروهم لولادهم..ومع هذا يتعاملوا معاهم تقول هاربات مع ولادهم 💔..والله اللي نحكي فيه نقطه من بحر اللي يصير في الواقع اللي فيه نماذج احرف من هكي مليون مرة،سواء في الزوج او أهل الزوج.✋
***
برييييكه..
خشت تجري من الجنان لقت راجلها في المطبخ ..
بريكه: روحت..
موسى بإبتسامه خفيفه: لا قاعد برا
تفاجئت بريكه بإبتسامته وضحكت...
موسى :وتي روحك لأخر الأسبوع بنمشو للعمرة
بريكه بفرحه : الله استاحشت الكعبه من 5سنين لما حجينا معاد مشينالها...
موسى: وهاك بتمشيلها وبنقعدوا غادي شهر..
بريكه : قول والله..
موسى بحده: واخده عليا نكذب
بريكه خافت: لامش هكي بس استغربت
موسى ابتسم : ماتستغربيش..اليوم تقاعدت..
بريكه بدهشه : حق !!؟
موسى : هههههه ..وطلع من بحداها..