نجمة نجمتي ( جمان فريد) منقولة

الجزء السابع

#نجمه_نجمتي

#جمان_فريد

الجزء السابع🥀

واضح هو هذا ..
تيفو: بطاحه واتي
البطاحه واحد زي الباب ومنظره يرعش : تم ..وطلع من السياره..
البطاحه : ياشاب
التفلتله الولد : تفضل
البطاحه وقفله وايديه في نصه : عندك حاجه فشارعنا
الولد: ايه إن شاء الله جاي بناسب الناس الطيبه اللي هني
البطاحه : معليشي ياغالي ماعندكش نصيب هني
الولد: ههههههههه دمك خفيف
البطاحه يأشر ع وجهه من فوق للوطا: تو هادي فسخة واحد خفيف دم..
الولد بدي يخاف: شن تبي من الأخير..
البطاحه : نبيك تلف وترجع من وين ماجيت
الولد : علاش باه ..
البطاحه : استغفر الله...باش تفهم معندكش نصيب هنايا ..
الولد : لو سمحت حول من طريقي ..وكيف جاي بيمشي شحه البطاحه من سوريته وطاح فيه ضرب
علاء: ههههههههههههه
تيفو: ياخوفي يقتله
علاء : يااااريت
البطاحه وهو يصفق في ايديه من بعض ع اساس ينفض فيهم: هالمره جاتك كسور مرة تانيه تحت التراب
الولد وهو طايح : تو نبلغ فيك يامجرم
البطاحه: ياااامااااما خوفتني ...تي برا بلغ اللي بتبلغه واخد عليه ..ومشي وخلاه..الولد بالسيف ناض وركب سيارته ويدوب طلع بيها...
علاء: منوووور يابطاااااحه
بطاحه : هذا واجبنا
توفيق: توقعته يموت بين ايديك
بطاحه: تي بكككل ياراجل هو تقول ملصق بالماستكه..
توفيق وعلاء😂😂
***
نجمه: هههههههههههه احلفي
حنين: والله وقال مافيش نصيب ..طبعا خوتي قعدوا يحققوا معاي وكان بوي مش قاعد ره اشبح شن دارو فيا
لكن منو اللي دار فيه هكي
نجمه : اهييم تستعبطي
حنين : راك تقوليلي خوك المتروشق
نجمه: ايه والله متروشق اللي قاعد يحب في وحده زيك ماعندهاش احساس
حنين: ههههههههه باهي ياأم الإحساس خيرك معاش هدرزتيلي شي عليك انتي والسي شيكو
نجمه تنهدت: مافي شي جديد كله عادي جدا..
حنين: قاعد يهدرزلك ع حبيبته
نجمه عيونها دمعوا: لا مش زي قبل ..
حنين : المهم انتي متأمليش روحك بشي
نجمه : اطمني ماعنديش أمل مع أمل..💔
حنين وجعتها صاحبتها: ربي يبعتلك اللي خير منه
نجمه : قولي ربي يحبب قلبه فيك وينسيه فيها💔
حنين تنهدت ...
***
شكري حبيبي ...
اه ياقلب حبيبك..
نحبك هلبات متهلبات 💓
ههههههههههه واني أكثر منهم بهلبه ❤
شكشك..
امولتي ...
(نحبك ...نحبك)
شكري كان يسمع في مكالمه مسجله بينه وبين أمل ودموعه تنزل وقلبه موجوع مش مصدق ان خلاص معاش في امل في حياته وهو كان باني معاه احلامه ومستقبله كله..في لحظة الضعف هادي اتصل باللي يرتاح لما يحكي معاها..
نجمه : حنو شكري خش انتظار
حنين : ههههههههه خلاص نتلاقوا غدوة باي...
نجمه ردت ع شكري: الو
شكري بنبرة باكيه: نجمه 💔
نجمه وقلبها معصور: خيرك شيكو..
شكري : تعبان يانجمه تعبان..
نجمه ودموعها نزلوا: سلامتك من التعب ..
شكري: كيف هكي كيف حب تلات سنين تنساه بسرعه كيف هان عليها تخليني وهي اللي مكانتش ترقد إلا لما تسمع صوتي..اني توامش قادر نرقد إلا لما نسمع مكالماتنا زمان...آاااااه استاحشتها..
نجمه معاش قدرت تتحمل فاض بيها وبدت تبكي: خلاااص خلاااص حرام عليك مزقتلي قلبي حرقتلي روحي ..ياسر وانت تتكلم عليها قدامي وتبكي ع خاطرها ..وهي شنو مشت وخلاتك ماألتفتش وراها...قولي ...اطمنت عليك..حتى لو برساله ..ليها فوق الشهر مسافرة..معقوله مافكرتش تكلمك ولو شويه ..هيا لو تحبك حق مادارتش هكي
شكري : تحبني وهلبه مش شويه
نجمه تبكي بإنهيار: عمرها ماحتحبك زي ماأني نحبك ولا في مخلوق حيحبك زي ماأني نحبك مافي حد حيحبك زي حتى نفسك حتى نفسك ياشكري...وصكرت عليه ونهارت بالبكي
اما هو فقعد مصدوم والتليفون ع وذنه ماتوقعش بكل إنها حتعترفله هكي...حس بشعور مش مفهوم..وقعد ملخبط هلبه..
***
هههههههه بجد دمك خفيف
معين : شكرا ❤
نور: امممم به توا نا لازم نرقد وراي امتحان بكرا
معين : اوكي موفقه نوارة❤
نور بضحكه : نوارة 😍
معين : اها عجبك ..
نور: وواجد آخره 💓
معين : هههههههه كويس..هي نخليك توا تصبحي ع خير
نور : وأنت من اهله...وصكرت..اتصل شاهين
نور شقلبت عيونها: افففففففف الله يسامحكم ياماما وبابا وردت
شاهين بصوت عاالي وبعصبيه: ماتقوليش مع من تحكي في هالوقت ليك فوق الساعه
نور: كنك عليش تعيط ..مش دويتلك من بدري ان بكرا بنديروا حفله وتوا كنت نحكي مع جيهان عليها..
شاهين برفعة حاجب: سيبتن النهار بطوله وجيتن عقاب الليل تحكن في الحفله
نور : وووووه ياشاهين وووه بنرقد انا باي وصكرت عليه وقفلت تليفونها والحركه هادي اكثر حركه يكرهها شاهين..حدف تلفونه ع طول ايده وطلع برا ومن حرقته حول تيشرته ونقز في المسبح...
***
فاتت هديكا الليله بطولها ع نجمه دموع وبكي محروقه من وسط قلبها واللي قاهرها انها اعترفتله ومش عارفه كيف حيصير بعد هالإعتراف كل خوفها ينسحب من حياتها مرة وحده..اما شكري فكان ملخبط هديكا الليله ومش فاهم بشنو يحس ولاعارف شن لازم يدير بعد مانجمه اعترفتله بمشاعرها..
شاهين ماطلعش من المسبح بكل حبه لنور فات التعلق كان يلقى يحطها في قلبه ويسكر عليها ويتمنى لو تحبه زي مايحبها لأن كان عارف ان حبه ليها اكبر بهلبه من حبها هي وخايف لو يجي يوم وتسيبه..💔
***
البنت جتتها نار تلهب..
عبير تو نكلم علاء ياعمتي ..
بريكه بخوف : يما.. بنتي.. نجيمتي
نجمه كانت راقده في ففراشها ووجها أحمر من الحرارة وتخترف : ماتخلينيش ...ماتخلنيش..
بريكه تحسابها قاصدتها: أني حداك ياامي مش مخلياتك..
عبير خشت : علاء جاي في الطريق ياعمتي
بريكه وهي تشبح لبنتها بخوف : به.. به ..وتقلب في الكمدات ع راسها...
***
هبل العيل هذا هبل ومستهتر
عبدالله قايم شاهين اللي كان ملوح حدا المسبح وهو عريان من فوق ومعاه فارس حطوه ع السرير
ناديه ببكي: عليش داير في روحه هك بس ..وقعدت تحاول تنوضه وتضرب بكفها ع وجهه بخفه ...حييه عليا ياعبدالله خوك نار شاعله ..
عبدالله : نكلم في الأسعاف ياأمي..
فارس : امي طمني بالك..مافش سوء
ناديه: شن هو اللي مافش سوء ..غابي في خوك انت لين يمرضه مرضته موت وتبكي ...
عبدالله جي وحضن امه : هدي ياأمي هدي تو ينوض منها زي كل مرة..
ناديه : ياااارب...
***
عطيناها خافض حراره وحرارتها حتنزل تدريجيا لعند الليل يكون حالها به
علاء: منور يادكتور
الدكتور ابتسم: هذا واجبي وإن شاء الله لاباس عليها..ومشي
بريكه : شن قالك ..
علاء : ماتخافيش يأمي الأمور تمام دارولها اللازم ومع الليل حيولي حالها باهي..
ع جية حنين تجري : خيرها نجمه
بريكه : بنوضها الصبح تمشي للجامعه لقيتها نار تشعل ومش قادرة تتحرك..
حنين : ييياربي به شن دارولها توا
علاء : امورها تمام مع الليل تولي احسن..
حنين : يااارب..
***
محصل برده ع صدره اني من قبل منبه ع حاله شن قايل ياعبدالله
عبدالله :يادكتور مجدي هو نفسه كان مهتم بروحه اكثر مننا بواجد اللي داره مكناش متوقعينه بكل ...
الدكتور : توا لازم يقعد تحت الملاحظه وياخد كورس حقن مضاد حيوي عطيناه خافض للحرارة وحتنزل تدريجيا ..ربي يشفيه..ومشي وخلاه...
***
فرخه بتو تعالي صورينا هنا ..
بتول خدت تليفون نور وااااو هذا متى خديته
نور : هذا جاني هديه ياسمحه
بتول: اكيد من شاهين
نور بغرور: اها..
بتول: بلاك نحصل واحد يحبني كيفه
ويصرف عليا هالصرف..معاش نبي شي..ماعنداش صحاب
نور: هههههههههه عنده
جيهان: لكن مافيش كيفه واحد بنداق وكريم بككل وخليقة طرف يرد الروح للميت..
نور: ههههههه هيا عاد صورينا ..
بتول : اللي يحقك وانت تصوري فكل زاويه يقول حترايفي ع المدرسه
نور بضحكه: تي هيا يابقره صوري وانت هرجتك ماتكملش..
بتول : ههههههههه.. وصورتهم...
***
علاء كانوا عيونه ع الحنين اللي كانت مقعمزة بحدا امه في المستشفى حنين التفتت جيهته غير عيونه بسرعه
حنين رجعت شبحت لأم نجمه بننزل نجيب ميه ياخالتي ..
بريكه : ايه والله حتى اني ريقي ناشف
حنين : حاضر من عيوني..وناضت حنين وهي ماشيه خطمت من حدا علاء اللي مشي واراها بسرعه
علاء : وين ماشيه
حنين : بنجيب ميه..
علاء: ولي تو نجيبها اني
حنين: مافيش داعي شكرا
جبدها من ذراعها وبعصبيه غير معهوده عليه: اني قلت ولي يعني ولي ..
حنين اول مرة تخاف منه : باهي ..
طلق ايدها وولت حدا بريكه وهو نزل لوطا
حنين "علاش خفت منه هكي 😥"
***
فات باقي النهار نجمه حالها ولا احسن ..هذاكا اليوم شكري ماأتصلش بيها بكل بعد اللي صار ومكانش عنده علم بمرضها بكل..
اما شاهين قاعد تحت الملاحظه ومعلقيله تغديه وكان يدوب يفيق ويرجع يرقد..وعمتك نور روحت لحوش جدها من امها مدايره لمه مع بنات خالاتها ومفكرتش تتصل بيه..تراجي فيه هو يتصل باش يرضيها لإنه علا صوته عليها ومش حترضى بالساهل لين يجيبلها هديه وهو طز فيه وفي مشاعره ..لأنها هكي تعودت يزعل وهو اللي يرضي..💔
اليوم اللي بعده نجمه روحت وطول لدارها ورقدت..
موسى: اكيد واخداته من وراك وانتي زي العاده راقده ع وذانك
بريكه: الله يسامحك ياموسى قدامي راده بالي منها لكن تمشي للجامعه بنمشي معاها!؟
موسى وهو يأشر بإيده: بالله اسكتي اسكتي اسكتي..علاء احفظ.مواعيد دواها زين واعطيهولها ع وقت انت صغير وقاعد بعقلك ..اني بنعطل ماتخلوليش غدي..ومشي طلع
علاء حط ايده ع كتف أمه: معليشي هذا لسانه ديما هكي
بريكه : ماتتكلمش ع بوك بهالأسلوب..وعطيني مواعيد دواها
علاء ابتسم وباس راسها : حاضر ياست الكل يازهر وفل..
بريكه: ههههههههه....
***
أمي اللي يحقك وانتي تبكي هك يقول نحتضر
ناديه : ضم فمك وانت ماتعرفش تدوي كلام مسقم
شاهين : ههههههه
غادة: يامعفن ديما مخوفنا عليك
شاهين: حقققو خفتي عليا ياغدة..
غاده: حرام فيك
شاهين: 😂
ناديه: باتك جايك بعدين شوي
شاهين: امي تربحي قوليله ولدي مريض ومش حمل محاضراتك
ناديه بضحكه: عيل قليل أدب
غادة😂
انفتح الباب بقوة وخشوا سعد وعبدالله..
شاهين : هادي مدامهه ولازيارة مريض
سعد: غم فمك خيرلك ليك عين تدوي يامستهتر
شاهين: غالط في النعته ياحاج فمي اللي يدوي مش عيني
ناديه وغاده😂😂
عبدالله 🤦‍♂️
سعد 😡😡
***
ياوالله النهار المبارك تعالى ياغالي
انور وهو يحضن في امه : استاحشتك ياغاليه ..
بريكه : واني اكثر ياغالي وتتفحص في ولدها ..خيرك ضاعف هكي وجهك زي الليمه😟
انور: ههههههههههه لإني بعيد عنك ياحلو...
بريكه ضرباته : ههههههههه ياملسن..
عبير مدت يدها: الحمدلله ع سلامتك
انور وهو يشبحلها بحب وسلم عليها: الله يسلمك ..بريكه انسحبت من حداهم تفهم في الجو😉
انور خداها في حضنه : استاحشتك موت ...❤
عبير: اني اكثر..❤😚
...
علاء خش للحوش : اهو ياامي الحاجات جبتهم
بريكه : حطهم في المطبخ..مشي علاء للمطبخ وينصدم بلقطه من العشق الممنوع وخر بدون مايحسوا بيه ..وحط الحاجات في الممر وطلع ووجهه احمر..
بريكه"هذا خيره ،،حي نسيت روحي مخليه خوه ومرت خوه في الكوجينه😨"
علاء وهو متحشم من اللي شافه"عليك عار ياانور تو مش عندهم حوش!!اني العار هذا مش حنديره كل شي بحدوده ربي يهديه حتى مرته من عيله......استغفر الله وخلاص"..
***
معقوله مامشيتي لتوا ..
نور : هاني بنعدي معاك..بعدين هو غلط فيا وعيط عليا
كاريمان : بس هو توا مريض..اقعدي زعلانه لكن اتصلي اسألي
نور: اووووف يامااااما اوووف تعبت نا
كاريمان قربتلها: من شنو تعبتي هاه من الهدايا والدلع ؟!
نور: انا مش ناقصني شي بيه ولابلاه
كاريمان: ماك غبيه وقاعد عقلك صغير..بكرا تقعدي راقده ع ملايين لما شاهين يمسك رزق باته
نور:هههه غير والله احلموا شاهين مش باله بكل ان يخش في شغل باته حتى توا بيفتح مشروع دار أزياء برا يعني حتى المشروع اللي قرر يديره تااافه كيفه بالزبط وحتى لما ندوي معاه ع شركات باته..يقولي مانحبش الوجيج ..
كاريمان سكتت شويه بعدين: توا يللا تعالي معاي ..وبعدين يصير خير..
...
غاده : لااتصلت لا بيا لابماما تطمن عليك
شاهين يحاول يخفي ضيقه: الحق عليا نا عيطت عليها وزعلتها
غادة: وكان زعلتها حالتك هذي استثناء لازم تكلمك تطمن عليك وتعزق الزعل وراها
طقطق..وانفتح الباب
وخشوا كاريمان ونور
كاريمان: الحمد لله ع سلامتك شاهين
شاهين وهو يشبح لنور: الله يسلمك يامرات عمي
نور : لاباس عليك شاهين
شاهين : ماتشوفي باس يابنت عمي وقعد يشبحلها بعتب وشوق وهي نزلت عيونها..
كاريمان : من امس كنا بنجو بس انشغلت بباتي حتى هو كان مريض..
غاده : لاباس عليه
شاهين : لاباس عليه..
كاريمان : ماتشوفوا باس.. غاده ممكن شويه
غاده فهمت عليها واضطرت تطلع معاها..
شاهين يشبحلها وهي تشبحله وتوزع في نظرها ع المكان
شاهين ابتسم: قاعده زعلانه
نور شبحتله ع جنب: انت شن رايك
شاهين: اسف ياقلبي ماقصدتش نزعلك.. ومد يده ..
ابتسمت بمجامله وجاته وشدت ايه : كيف حالك توا
شاهين: توا بس وليت بأحسن حال ❤

"اكبر غلط نرتكبوه في حق أنفسنا لما نعطوا الحب الصادق للشخص الغلط"....💔
...يتبع...
الفصول الاربعة