أبكيك سرآ

اللقطة الرابعةعشر

اللقطة الرابعة عشر
الجزء الاول
ابكيك سرا
هند الصالحي
............. 
مــــــــــا ميت كَبل بس شايل التابوت
لأن كل مــــــــــــا أنام أتحلم بنعشي
أنــــه مبــلل رموشـــي بدمعة المحتاز
أنه دموع الفرح مـــــــا وصلت لرمشي
وكَت الخير عشته ومــا شفت بي خير
صاحولي ملك بس مـــا شفت عرشي
عندي عيون بس محسوب ع العميان
أنه مفتح ولكن مــــــــا شفت كلشي
أحــلم بالفــرج وأترس الظلـــمه حجار
ظل هواي ليش نكَول مــــــا ظل شي
********************
ما مجروح بس ندمان
عمر خلصته وي عميان
مو عميان قلة شوف
لا صاحين ويشوفون كلش زين
وادم عافت الله وعشگت الشيطان
.........؟............  .
باهر

والباقي تعرفينه اصلا من گد ماانشغلت وياه نسيت اعاتبه وشاعاتب منه كل يوم يمر اگول الحمد الله الصبح صبح ومياح يتنفس وعايش.. 

حسنه.... ياعيني عليك عمو مياح.. لحد هاي الدرجه جان يتوجع

باهر ببكاء.. كلمه وجع قليله ماتصف المعاناه والالم الي كان يعاني منه مياح.. مثل شمعة يذوب گدامي كل يوم  وماکدرت اسوي شي.. كل يوم اشوف دمه الحلو يتصفى وبروح.. هذا المياح الي يحب المرح والضحك ينتهي بين بطاله الدم والمغذيات والبلازما.. والي ماعدهم ضمير سووه سكير ويدور شغلات مو زينه.. حسبي الله ونعم الوكيل على كل ظالم

حسنه..  لا تبجي يا عيني قابل شبيدك اشو سوده عليه حتى شلت اغلب مصاريف العلاج وماگلت لاحد شسوي بعد. ماتكلي
لا تبجي الله كريم.  ربك المنتقم وان شاء كل ملامهم المو زبن يكوت حسنات لك . ربك بالمرصاد...

باهر..... ونعم بالله.... اگلج شقررتي أبو مخلد حچى ويه ابوج علمود يرجعج

حسنه...  ماادري والله هاي هسة دااسمع منك

باهر... ها شعجب ماگالج ابوج

حسنه...  لا يابه وين يگلي ابوي ملتهي بتسلم السلطه
بس انا عد موقفي اذا يريدني يجي هانه بيتي گعدة يم بيت اهله مااگعد.

باهر...  بكيفكم بعد.. خلي اگوم اروح يم الحجيه

حسنه.. تمام انا هم اروح انام..  ودق خلوها يمي تظل هانه .. خلي تخلص كل الهوسات يله ارجعها

باهر.. خليها قابل هي بيت غريب اشو بعد 5دقايق علينه.... يله تصبحين على خير

حسنه...  اجمعين عيني

ودق..  اول مرة اشوف بابا هيج مهزوز ومقهور.. الغريب اني مابجيت ماتنزل مني دموع.. حتى مارحت على جده صار يومين.. 

كل يومي افكر بكلام ابتسام الي گالته الي بالفاتحه ومن يومها تخابرني وتعيد نفس الكلام

العودة ليوم الفاتحه
.............. 

ابتسام...  ودق ودق وينج

ودق...  ها بسمه هاي انت