أبكيك سرآ

اللقطة ال36

اللقطة ال36
ابكيك سرا
هند الصالحي
....................

انا جروحي محطه
وناس تدفع ناس
ركب بيه الحزن
والنوح والدمعه
وجرى بروحي الحزن
مجرى النهر لو فاض
وغرق ناعور حزني
وما نشف نبعه
انقفل باب الفرح
واسئلت عالمفتاح
اضنه ببير يوسف
وياهو الي يطلعه
صبح خشبه الكَلب
يتونس عالنار
حرك هندام روحي
وياهو الي يصلحه
...............................

حسنه... هاودق نبره صوتج بيها انه خير،

ودق.... كل خير دادا يعني ما دام الولد اعترف بغلطه وداز هاي الاعتذارات فليش لا احاول انطي فرصه ثانيه....

حسنه... وانت شمدريج هو منين جبتي هاي الثقة احتمال اكو غير واحد

ودق.... مثل منو ليش هو منو الي مصارحني او معجب بيه غير قائد

حسنه.. واحتمال ربيع لو ناسيه هو ميت عليج ويتمنى يحجي او يتقرب منج وكل الي سواه هو بس حتى يكسرج وننجبر نزوجج له

ودق.... دادا من صدگ تحچين ربيع منو شحده اصلا يفكر بيه ولو مجرد تفكير

حسنه..... هو يفكر تردين ماتردين يفكر واخوج غيث مسانده اخاف ماتدرين لأن هذا بس يهوبز مامنه فايده ياهو الي يدگله يرگص.. وربيع خاش جوه ابطه ويقرا براسه

ودق.... مااتوقع يگدرون يسوون شي.. مادام بابا موجود محد يگدر يفتح حلگه.....

حسنه..... الله يحفظه ان شاء الله بس هسة شتسوين انت شلون تعرفين ياهو رقم قائد وتنطين موافقة

ودق.... مااعرف حاليا فكري يم جده مو يم أي موضوع ننتظر هلاسبوعين نشوف شيصير ممكن شهر شهرين ونرجع وبوقتها تكون المواجهه والتفاهم وجه لوجه احسن

حسنه... اي والله صدگتي.. اكلج اني راح امدد شوية انت ديربالج على جده
ودق.. لا تهتمين اني ادير بالي عليها
خالة حسنه نامت خطية ماداتشبع نوم واني بقيت اراقب حاله جده وواجهتني مشكلة اللغة والكل رجع للبيت وبابا هم جبرنا احنا يرجع وياهم خطية يتعب.. من يومها قررت اتعلم تركي بدون مااحد يعرف.. كتبت الي اريد اعرفه بالعربي وقررت من ارجع اسأل عن معانيهن ماترهم نگعد مثل الاطرش بالزفة
مرت فترة عشره ايام بثقل علينا قلة نوم قلة اكل تعب ملاحظه من كل الجهات لازم الكيس يتفرغ كل ماينملي الي مخلي الدكتور حتى يسحب الاوساخ من الورم واطرافه ونراقب الاوساخ نفسها ونجاح العملية يعتمد على رجوع جده للوعي.. مثل ماقررت جده خديجه بدينا نتناوب بالشفتات بعض منه يبقى والباقين يرحون للبيت وهكذا.. مرت تقريبا فتره عشره ايام من العلاج والمتابعه الحمد لله بعاشر يوم بفضل رب العالمين كرمنا وجده فتحت عيونها صح بعد هاي تقريبا نحسب احنا فتره 20 يوم اكثر هي بس نايمه وهسة رجعت للوعي الحمد لله والدكاتره گالوا من تكمل الاسبوعين هي راح تكون مسيطره وتگدر تحچي لكن ما تگدر تگوم على حيلها او طبيعيه مثل قبل يعني راح تكون مقعده نوعا ما وهذه استجابة جسمها تحددها يراد لها فترة حتى يرجع الوضع طبيعي جده جميله بقت فاقدة الوعي وموجودة بالمستشفى لمده اسبوعين وبعد هذه الصمامات الي زرعوها عادوا التحاليل الاخيره حتى يقررون نوعيه العلاج شنو راح يكون والدكتور شاف انه يعني اكو امكانيه لازاله الورم والعمليه بها نسبه نجاح اكثر من 60% بس قرر الدكتور انه يعطيها استراحه الاسبوعين الجاية حتى قبل رفع الورم لازم تاخذ مجموعه من العلاجات مثل المقويات او المنشطات الي تعدل لها نشاطها وخاصه انه بهذه فتره بقت بالفراش فشويه صارت عندها ضعف بدني وضعف نشاط بكل جسمها وحتى الحجي ما تگدر تحچي واصلا الورم اثر على المشي مالتها فكانت يعني مقعده تعرفون يعني شنو المريضة مقعده وشنو تحتاج مثلا احنا نڰول باللهجة مالتنا الحاجتين صارت جواها لازم اهتمام خاص ورعايه خاصه وتحمل وشخص قوي الفترة الي كانت موجوده بالمستشفى الاهتمام من قبل الممرضات اذا الاكل واذا السبح واذا تنظيف من كنت بالمستشفى من دخلت العمليه لحد ما استقر وضعها المده كانت اكثر من ثلاثه اشهر شنو الي لاحظته اني المصاريف كانت كلش قويه يعني بالدولارات المصاريف كانت بالدفاتر خاصه احنا حاجزين جناح خاص وعمليات وعلاجات وممرضات خاصات يهتمون بها و انا كنت اتابع كل شيء وياهم يعني خلينا نقول اتعلم طريقه شغلهم اذا طلعوها للبيت يعني اطبق تعليماتهم وعملهم وشغلهم وشلون كانوا ينظفوها شلون يسبحوها شلون يخلون لها الكانونه شلون يخلون لها العلاج يعني اخذت دوره طبيه سريعه لمده اربعه اشهر بس ما كنت احجي بس اراقب واتعلم كان دائما بعقلي وبتفكيري واللي يشاغلني هو المبالغ الهائلة و القويه والمصرف اللي يجينا مين ده يجي من العراق بابا مين ده يجيبها لان كرصيد مادي او هذه الامور احنا معتمدين على ارباح المزارع وهذه تتقسم بين الاولاد كلهم اولاد الحجي اسماعيل يعني وياهم يشترك اخوانه او اخوتي اذا اكو زايد ينطون لعمامهم ولعماتهم من الخير الزايد يعني حتى لا يكونون باقل من المستوى عدنا عمال هوايه عدنا شغلات مترتبه على صرف مادي بابا راتبه بالبدايه صح عنده ماجستير مساعد استاذ بس ما يستلم عشر ملايين يعني كله اذا يستلم يمكن ما يطلع المليون واخاف اسأل كان موضوع اكبر مني ولهذا و بيوم من الايام قررت انه اسوي شغلتين الشغله الاولى اسال دادا حسنه عن مصدر الأموال وبابا من عنده يجيبها لو اعمامي هم يشاركون بفلوس العلاج مالت جده يعني مشاركة من الكل لو فقط من بابا والثاني لازم اشتري موبايل ذكي