أبكيك سرآ

اللقطة47

اللقطة47
ابكيك سرآ
الجزء الثاني
هند الصالحي
..................

ودق.....  تقريبا الحمد لله صار لنا اسبوع دنجرب  حياتنا الزوجيه وماما  ادور من عندي طفل...هسة عوفج من  موضوعي اني  محد  يكول لي جدة ليش انتكست شنو   السبب

حسنه..... يا عيني  هاي احنا نسينا نگولج  عمج غانم انخطف هو وواحد من ولده

ودق...... لا مو نسيتوا  انتو متقصدين ما تبلغوني باي شيء يعني خلي نگول انتو ماتبلغوني باي شي لان معتبريني غريبة عنكم  لان تزوجت بمكان بعيد... مثلا

حسنه.... بنتي غريبه شنو الظفر ما يطلع من اللحم بس انت هناك بعد بعيده  ما يصير كل ساعه شايلين التليفون عليج ومبلغينج بخبر وانت تجين جاره جنطتج وجايه  مثل ماهسة سويتي لان جده شوية متخربطة

ودق.. شوية متخربطة صدك تحجين دادا الحجية ماتدري الدنيا طشت لو رشت... يعني حياتها على المحك

حسنه... ودق الحجية مو صغيرة العمر له حوبه ومرضها مو بسبط شنو تردين تعمر الف سنة... كوني قوية واستعدي لاي شي يصير انت بس ادعيلها رب العالمين يخفف عنها المعاناة وترتاح

ودق....  امين يارب   بس  دادا اني من جيت وسلمت عليكم  عمو غانم جان موجود   وحسيت الوجوه   كان مخيم عليها الحزن  فتوقعت   بسبب مرض جدة ما اعرف انه ممكن يكون شيء ثاني غير مرض جده الحمد لله اثنيناتهم رجعوا  لو شنو بالضبط يعني

حسنه.....  الحمد لله والشكر رجعوهم  عمو غانم  رجال عمره جبير  علمود هاي عايفينه وما ماذينه  هوايه ماذين  مؤيد هوايه خطية وهسة  هو بالمستشفى بس ماحجوه كدام جده وضعها مايتحمل

ودق....  مؤيد مو هو الطبيب البيطري

حسنه....  ايه عيني هو طبيب بيطري بس هم عبالهم لان  اسمه طبيب  ومن بيت الباشا فاكيد يلعب بلفلوس لعب ما يعرفون هذا مو  طبيب بشري حتى يصير غني هذا طبيب بيطري  ماتفرفون بين واحد  عنده عياده واحد  ما عنده عياده واحد  يشتغل بمستشفى  يريدون يوم يجيبون له  بزونه لو فد چلب  يضربهن  ابرة  واصلا خايبه هو الطب البيطري  بالعراق شنو استفادته خطيه هاي غير الخاطر جدج ومن محبته له دخل هذه الكليه حتى يعالج البقر و الخيل مالتنا  فتح مثل العياده الصغيره يبيع بيها هاي الشغلات الي لها علاقه باختصاصهم فضت راحت بس تعالي فهمي هاي العقول الجامده الي نچلبت على الوادم  من بعد 2003 لازمين  دكتور كاتلينا المهندس كاتلينا استاذ الجامعه خاطفينه حتى العطال بطال ما سلم  من ايدهم

ودق.... حسبي الله ونعم الوكيل وهسه مؤيد وين شنو وضعه شنو حاله

حسنه.... والله طلعوه للشمال بمستشفى اهلي  هناك ومحتاج من عدنا الدعاء بلكت  الله  سبحانه يشگف  بحاله لخاطر وليداته.. والله احنا الي ماندري شنتحمل  شنگول شنحجي من وحدة لوحده  قبل شهر الي يشوف حالنا  والله يفطر الگلب