أبكيك سرآ

مقدمة تعريفية

مقدمة تعريفية
آبكيك سرا
هند الصالحي
...................
المكان..
أحد البيوت من الطراز القديم في قرية من القرى الحدودية بين تركيا وسوريا...
الوقت... بعد صلاه المغرب 
المناسبة.... مآدبة عشاء لأهل القرية  لمناسبة دينيه

ودق... آخذني الخيال والفكر وسرحت گدام مرايتي إلى اصبحت صديقتي الوحيده  وكاتمه اسراري.. يوميا آخذ مده من الزمن واگعد مقابيلها واعاتب وابجي بنفس الصمت ونفس النار الي بداخلي هي هي من 20  سنة ماتتغير.. اوكف گدام مرايتي اتامل خطوط الزمن وهي  تمر عليه وين كنت ووين صرت..
البيت اليوم هوسة وخبصه ورغم هذا مااسمع صوت ولا أحس بشي عالمي مثل تخطيط القلب بحاله الوفاه مستقيم جدا.. وليش بيتنا هوسه..
لان اليوم هو يوم عاشوراء ومثل كل يوم (اناني) .. جده زوجي من امه.. الي هي تركيه الاصل ومن المذهب الجعفري  وجدهم سوري من المذهب الحنفي .. نسب يدوخ 16 سنة واني بينهم مثل الأطرش بالزفه ماافرزن بينهم .. قريتنا والمحافظة الي ساكنين بيها  هي وحدة من القرى الكثيرة  الي بالأصل كانت تمثل شمال سوريه لكن خضعت للسيطرة التركيه حسب اتفاق او معاهدة لوزان سنة 1920.. المنطقة خليط كردي.. عربي.. وقليل تركي.. المنطقة مسالمة جدا والكل يعرف الكل وتربطهم علاقات قوية.. الطبيعة اجمل من الخيال نفسه..
بيتنا هو بيت متوارث للعائلة.. يعني البيت لأهل عمتي أم زوجي اما عائلة زوجي مازالوا في سوريا للان.. يزورونا زيارات على طول السنة..
المهم.. نرجع للمناسبة.. جده خديجه كل سنة بشهر محرم تجي لبيتنا لأن هي عايشه بمكان بعيد عن مركز المحافظة مع إبنها الكبير وآحفادها وعدد البيوت هناك قليل رغم امكانيتها زينه يعني صاحبه املاك لكن تعيش بالماضي وماتتقبل حياه الحاضر .... ليله عاشوراء لها خصوصيتها عند الجده .. من بعد صلاه المغرب الي تكون جماعيه بحديقتنا والمصلين من كل القوميات و المذاهب يصلون بروح الدين الواحد.. تكمل الصلاه وتنذبح الخرفان وتبدي شعائر الطبخ.. والجده خديجه تشرف على الكل.. ماتقبل اي أحد يطبخ الا مله باقي حفيد مله يعقوب مله الحسينية بقريتهم..  عمرها تعدى ال85 سنة ولكن قلبها شباب ماشاء الله.. طول شهر محرم والشعائر مستمرة بالمضيف الخاص لهذا الشهر..
كالمعتاد  آني بغرفتي توضيت وصليت  ونزعت ثوب الصلاه وشلت سجادتي ورجعتها لمكانها ووگفت اشيل شعري الي تتخلله عدد من الشعر الابيض وكل مرة ابتسم أبتسامه أني نفسي مااعرف شنو معناها.. والبس الايشارب الاسود الخاص بالعائلة لأن الجده خديجه كل سنه تفصل لنا ملابس وايشاربات سود تخص شهر محرم .. كالمعتاد تاخذني الصفنه لبيت آهلي لمنطقتي لمحافظتي لبلدي... اتذكرهم بنفس الحسرة... والدموع...
ممكن تسالون ليش آني عراقية وليش بيتي خارج العراق.. حتى أبدي القصة لازم اشرح لكم نبذه عن اهلي..  هههه اووو حتى اسولف لكم عن البدايات يعني لازم  اراجع دفتر العائلة الي آلفته أني بدون محد يدري. هذا الدفتر بي معلومات من المصدر الرئيسي أم آبويه جده دلژين.. نعم اسمها دلژين يعني قلب الحياه. دااحس صار عدكم فضول..
عفيه تفكيركم صحيح جده دلژين وجده خديجة أخوات..
. بس خطيه من عاشت بالعراق گلبوا الاسم من دلژين ل جميله لأن هي فعلا آيه من الجمال والأسم غريب ومحد يعرف يلفظه
..كنت استمع لها من تسولف لنا قصة حياتهم واني تطبع بدماغي بسرعه وبعدين أكتب كل كلامها بدفتر خاص محد يعرف بوجوده للان..
بيت جدي بالأصل من المناطق الحدوية بين العراق وسوريه.. جدي اسماعيل كان كبير آخوانه ذكي وسبع ويشغل ويجمع فلوس ويتعنى لمركز المحافظة ويشترى اراضي زراعيه او بيوت لحد ما لمع اسمه وطغى على إسم العشيرة الاصلي بدأت الناس تسمي باسم الباشا.. اسماعيل باشا.. جدو بحكم شغله بدا يسافر لسوريا لتركيا وتعرف على جدو اورهان بمدينة ماردين تجار وبضائع ويوم بعد يوم صارت علاقتهم قويه وجدو تقدم وخطب أخت اورهان الي هي جده دلژين وتمت الموافقة لأن قبل محد يسأل عن هذه الشغلات و الاختلاط   بين القوميات شي متعارف عليه.. تم الزواج وجتي العروسه للعراق عانت ماعانت حتى تتأقلم .. حتى تتعلم لغة وطباع وعادات وتقاليد أهل زوجها.. الي شفع لها هو أنها كانت تخلف ذكور.. وبنات هماتين بس البنات كلهم ماتوا وهم صغار.. كانت هاي نقطة القوة الي ماسمحت لجدو يفكر يتزوج مرة ثانيه... ونفسها نقطة القوة هذه هي الي خلت جدو يتعارك ويه اهله وياخذ جده جميله واولاده ويتحدى اهله ويجي يعيش بمركز المحافظة وبعدها وبموافقة الدولة بدا يبني عالمه الخاص او قريته الي تسمت بأسمه قريه اسماعيل باشه.. قريتنا بيها كلشي بيوتنا بساتين العين وماتمد كلشي تشتهي اكو بيها مستوصف بيها مدرسة بيها جامع وبمرور الزمن أولاد أحفاد اسماعيل باشا يديرونها وبرواتب من الدولة....

جدو اسماعيل مواليد.. 1920.مكان الولاده الأصلي لواء الموصل.. تزوج  وهو بعمر ال18 سنة يعني سنة 1938.
جده دلژين او جميله مواليد 1925 يعني تزوجت بعمر ال13 سنه أول طفل نولد لهم هو عمو سالم مواليد 1940
عمو ميرزا 1942
عمو غانم مواليد 1945
عمو مياح. 1948
من بعد عمو مياح نولدن 4 بنات وتوفن بعمر صغير او بعد الولاده مباشرة والسبب الله أعلم

اخر العنقود هو بابا باهر مواليد 1960.. هو الولد الي مختلف عن الكل وآخذ إهتمام خاص من جدو وجده وسبب لبابا مصايب ومشاكل وخاصه انه بعض زوجات عمامي كانوا يخلفون هن وجده جميله سوه.. ههههه عائله تحفه فعلا.
هسة خلي نتعرف عليهم

عمو سالم مواليد 1940
زوجته خاله صبرية موالبد 1945 ربه بيت.. زواجهم سنة 1958 أول طفل لهم هي حسنه مواليد 1960
صبحيه.. مواليد 1962
خالصة مواليد 1963 هذني ربات بيوت
نادرة مواليد 1965 معلمه
ناصح مواليد 1967 معلم متزوج بنت عمو ميرزا شعاع
ناصر مواليد 1969 مهندس زراعي متزوج بنت عمو  مياح دموع مواليد 1973
بنات عمو سالم كلهن متزوجات من الاقارب داخل القرية واكو خارج القرية بمسقط الراس

. عمو ميرزا... مواليد 1942 متزوج من بنت عمه إبراهيم باشا اسمها سعدية مواليد 1950 عدها 3 بنات
كوثر وسحر تؤام مواليد 1967
شعاع. 1968 وهي معلمة   بعد شعاع خاله سعديه صار عدها مشكله وشالوا الرحم عمو ميرزا مارضى بهذا الموضوع شنو سوى مثل أي رجل شرقي راح وتزوج منو خالة فخرية الي هي اخت خاله رعنه زوجة عمو غانم فخرية مواليد1955...
وسبحان الله خاله فخرية ماچذبت خبر وماانطت مجال خلفت واحد وره الثاني فاتح مواليد 1970 موظف
مجاهد 1972 مهندس وعنده معرض سيارات
حيدر وعلي تؤام مواليد 1974 حيدر معلم وعلي مدرس
موسى  مواليد 1976معاون طبي
ميثم مواليد 2978 طبيب أسنان
صلاح الدين 1979 مهندس

...... آنا آنا نارديسن (امي اين انت)

قطع حبل آفكاري صوت بنتي الصغيرة  لارا مواليد 2018... آكيد دازتها الجده حتى انزل جوه ولازم مثل كل سنه ترزلني لأن اتاخر بالنزول تتصور أني ابتعد لأن مااحب هذه المراسيم.. قبل كنت اجاوب وادافع وانفعل وانقهر لكن حاليا لا ماانطي رده فعل غير بالابتسامه وتغيير الموضوع.. راح اتركم تحفظون القسم الأول من عائلتي الي اني مرات اخربط بتفاصيله ولهذا سويت الدفتر العائلي..
أني ودق باهر صاحبه القصة... راح اتركم وانزل اشارك المراسيم مع عائلتي واهل قريتنا... ونلتقي قريبا
.........
صباح الخيرات لاجمل متابعات ومتابعين

آولا.. أعتذر عن التأخير لكن للضروره أحكام..
كان موعدنا بعد الامتحانات الوزارية لكن اثناء الأمتحانات وبسبب القلق النفسي نصابيت  بتسمم بسيط ويعدين إلتهاب بالجهة اليمنى من وجهي واخر بوم امتحانات قدمي اليمنى التوت ووگعت وصار عندي رض قوي وبعدها في قسم الاشراف تكلفنا بدخول دورة مع اليونسيف.. وحاليا مشغولين بكتابه تقارير عملنا لنهايه السنه.. صراحه بلحظات فكرت انزل اعلان حتى الغي القصة او آاجل النشر لان بيها تفاصيل كثيره.. لكن تراجعت وتركت الأمور تسير بسلاسه..
كملت جزء كبير من الأعمال الخاصة بالعمل وفكرت أنزل هذه النبذه  لعائلة البطله بالتسلسل لتسهيل حفظهم.. حتى أجدول اوقاتي ونحدد آوقات النشر..
القصة



حقيقية.. لكن غيرت بتفاصيل بسيطة مثل الاسماء الاعمار.. الاماكن داخل العراق المهن للحفاظ على هوية الابطال

صباح الخير مرة ثانية.. وقراءة ممتعة 🌹🌹🌹💞💖

أحبكم جدآ ومشتاقه لاراكم ودعمكم