Time fi you

1

This book is fictional and everything is from my own imagination. I don't own any of the images in this book.

Karalana Atalyia Campbell (18)
Friday Oct 6, 2023
📍Pan e road

College just stressing suh and a jus mi first year. Mi honestly cah bother. "So much stress and mi deven reach thirty."

A good fi mi stills a who did tell mi fi guh tek up College? mi shoulda guh back a sixth form or tek a gap year but mi just too nuff.

Mi a jus 18 but mi wah hurry up and mek it suh mi can start get some money and live mi dreams.

Mi nuh come from a rich family but a rich family ago come from mi and that's a must. Wah mek mi mother and father proud. Mi see them d a struggle fi send mi gah high school suh mi work hard and pass mi subjects them innah ones, whola 14 subjects to suh mi get scholarship fi gah UWI.

Right now I'm studying banking and finance. It's all about the money fi mi, suh anything fi deal wid money ago spark my interest.

And mek mi tell yuh dah course yah anuh fi the weak, yah fi have yuh head pah yuh body at all times.

Mi deven have no time fi mi self.

Mi just wah hurry and get rich.

Right now mi a walk guh tek taxi, mi deven know Kingston,all mi know a the direction from mi apartment to school and also the taxi Stan. Nothing else suh if smaddy ask mi weh mi deh mi just go tell them mi deh a wah place a wah part.

I'm not a town girl, mi come from Sainty and a desso mi been all mi life and mi deven know deh good much less fi guh know Kingston.

"Sspttt, thickaz. . ." Was what I heard while walking pass two man. Typical Jamaican men.

Mi?? Hold my head straight and walk pass them cause mi know seh a only one thing dem yah man yah want and that mi cah gi weh a it a d only thing mi have leff.

"Eediat gyal dhat man, cuh pah she too she nuh all that." I heard next a voice saying.

See cause mi know how fi stay humble and gwaan bout mi business mi nuh ansa them cause God know. . .

Why Jamaican Men stay like this? Is like them have too much ego suh when smaddy reject them act. . .Mi deven know wah fi seh.

Mi nah come a Town come mek nuh body tek mi fi Eediat see Cause mi know weh mi a come from and what I've been through.

> > >
📍Her yard

"Girl, mi nuh too sure bout that." I told my friend, Trinika. She a call mi fi ask mi if mi nah Guh a teen fete.

"Lana nuh bother wid e foolishness, this a yuh chance fi see yuh man and my man suh a our man." Mi laugh when she seh that.

"Girl 450 a nuh your man, a my man weh yah talk bout, mi we fight yuh fi him innuh. Such man wah hear yuh." She let out a laugh.

"A joke mi a mek yah, one man to the Dolly body. But on a serious note,you're coming and mi nuh wah hear nuh excuses. Yuh annuh old smaddy, yuh just hitch up innah the apartment suh, how yah guh get a man if yuh nuh learn fi socialize." Dah girl yah, she just persistent suh but mi love her. She's one year older than I am and I met her on the first day I came up here and I guess mi spirit tek her.

And if a one thing mi know bout her a that she nah stop until she get weh she wah and she wah mi fi guh a that thing.

I'm actually considering going cause she mention 450. Mi have the biggest crush pan the man. And mi mek up different scenarios seh mi and him deh but mi know that will never happen. Mi really delusional.

"Alright, mi we come wid yuh and mek sure him deh deh fi true cause mi nah waste me time." I told her.

"Yeah, Mi and Malik ago come pick yuh up tomorrow and mek sure yuh ready by 5 cause mi wah guh early fi guh siddung a the front." Malik is her boyfriend of 2 years. Love them together yuh see. Being around them mek mi sick, mi nuh used to people a show suh much love to each other. Mi grow up in a toxic household.

"Yeah, whatever. Mi ago cook sumn cause right now hungry a kill mi." I told her getting up cause if mi follow her mi nuh do nothing.

"Alright. . .love you." She replied and I told her back then hang up the phone.

Alright now, weh mi ago look affa now?

Mi guh innah the kitchen guh see a wah in deh.

Mi guh see the cupboard pack, of course it go pack cause a mi alone live and a just Satdeh mi gah supermarket and todeh a Friday. Mi class them finish early pan Thursday and Friday suh mi get more free time.

Mi ago look wah next job when mi find the time next week, been working from mi come up here but mi quit cause mi boss a d pervert and mi nuh innah weh him innah.

Bout him wah mi gi him head and him we return the favour. Mi nuh do nothing more than throw wata pan him. Fucking bright, look how him old and wrinkle up and him want young gyal. Mi seh. . .

Mi look pan the time and a after six suh mi suppose to done cook by eight suh mi can finish up mi assignments them seeing as mi nah guh deh yere tomorrow evening.

Mi a get butterflies already. Cah wait fi see him.

Look pan mi to, fall in love wid somebody weh not even know mi name. Sighs.

Mi just couldn't help e.

Mi know seh mi soon haffi guh iron out dah crush yah cause likkle affa this yah guh hear seh hum find woman. A swear meeda bawl.

Honestly nuh know wah wrong wid mi and mi likkle heart.

_____________End of Chapter______________🤍

Thanks for reading!!

Hey ya'll. . .hope unnuh like dah chapta yah. Please duh the right. (Vote, comment and share)