Tristen Escoffery (23)
Friday, Oct 6, 2023
📍Him yard
"Mi seh the gyal wikid yuh fuck. Yuh nuh know weh she do? Mi bring her ova mi house and yuh know we do we ting so we fall asleep and alla that. Mi get up now, no sign a her, so mi check seh she leff suh mi seh alright then but mi d vex yuh fuck and yuh nuh know the worst part,the gyal guh weh wid mi wallet weh d have how much thousand dollar in deh, mi seh mi neva see sumn bun mi suh yet man." Jahvy said, telling me a story of him and his one night stand.
Mi just laugh and shake mi head.
"Then nuh fi yuh fault that mi g. . .nuh yuh guh bring waste gyal a yuh yard, annuh every and any body yuh fi cah home." Mi tell him.
Him hiss him teeth "Jah know mi artiste. Woman a wikid yere dhat. As long as mi live mi nah cah back home no more. She coulda just ask mi innuh."
Him and fi him drama. Woman a stress and mi cah deal wid that right now, mi nahve dem deh time deh.
And yuh can barely find one or two people weh real these days.
Suh mi just a fuck and leggo. And anuh every and any gyal mi fuck.
"Suh yuh ready fi the show tomorrow?"
"Wah kind a question that bredda? Then nuh must." I answered while swirling around the campari I had in my glass.
Mi just shake mi head and laugh. Him just nuh know wah fi talk bout and annuh like seh him nuh know seh mi nuh like the bagga chattings.
"Mi nuh know how woman siddung and chat suh long. . .Mia liff up yah nuh." He said while getting up.
Mi nod mi head affa him and relax back innah mi couch.
Man can chat yuh fuck , him a mi gee stillz but morewhile man wah siddung and medz life.
As long as him loyalty deh wid mi, cause these days yuh cah trust a soul.
> > >
"So wah time mi cah fawud up deh?, annuh tomorrow tho cause mi have a thing a deal wid." Mi tell e lady weh deh pan the phone. Them wah mi go uptown fi guh sign off some documents.
Bro just buy waah next house.
"You can come there on Monday at 10, no pressure." She replied.
"Alright thanks."
"Mi wah ask yuh wah question." She seh switching from her professional voice.
Jah Jah, a yah so the fuckry start.
Mi have a feeling mi know wah she wah ask but mi tell her yes anyways.
"Yuh have a woman?" She asked.
"Nosa and look mi nuh wah innah nothing wid nobody weh mi do business wid, mi nuh mix business wid pleasure." Mi hang up e phone afta that cause as mi seh before mi nuh innah nuh bagga chattings wid nobody.
Especially woman, them neva see mi before e fame. Why now?
Mi guh innah WhatsApp and check mi inbox.
Mommy kill mi now, a from morning she text mi. Mi guh innah e chat and press pan call.
It ring fi a few seconds before she ansa.
"Aye likkle boy, yuh find woman now suh yuh nuh memba mi?" She seh as the call connect.
"Nuh know weh yah talk bout innuh Ma'am. Nahve a woman." Mi tell her laughing, she always a talk bout woman.
"Yuh tan deh nuh find waah oman, mi waah mi grand pickiney them."
"Yuh gone too far lady. Mi nuh ready fi that yet"
"Anything yuh seh, when yah come dung, mi nuh wah yuh up deh a get mawga dung, yuh fi come dung yah weekend time fi mi look affa sumn fi yuh." She claim to seh mi nah eat nothing up yah and wah mi fi come a Clarendon.
"Or yuh can come up yah, mi nuh know weh yuh fraida town fah, been telling yuh seh yahso weh mi deh a d peaceful part." Mi all a d a convince her fi move up yah, mi woulda boy her a house but she just cah leff deh place deh.
"Likkle boy just mek sure seh yuh find yuh self down yah next week and a tell mi a tell yuh not ask." This lady.
Mi tell her seh mio fawud dung deh and then she gah talk bout other things.
"A one thing innuh Tristen, a hope yah wear a condom, mi nuh wah hear seh yuh ketch no disease and annuh every gyal fi have yuh pickiney suh yuh betta find wah nice one girl."
"A bare things yuh gwaan wid morewhile innuh mommy." Mi seh laughing, Jah know, dah woman yah.
She a d queen innah mi life stills and mi glad mi sort her out. That a d fuss thing mi do when mi buss and a help her. From mia a fifteen mi start write song and a innah 2019 mi decide fi start record and release.
Know how man feel when mi coulda buy her house and car and put a little thing innah her hand. Bare teeth she d a show.
Glad mi coulda mek her proud glad seh mi neva choose the wrong road.
Nuh know weh mi woulda deh todeh, probably siddung pan a corna a rub out hand middle.
Afta mi come off the phone wid mommy mi decide fi run a boat. My mada mek sure seh mi know how fi cook from mi likkle.
She we always tell mi seh. "Man fi know how fi cook." Or "Nuh woman nuh wah nuh man weh cyah cook"
Glad mi learn stills cause mi nah guh any and any weh guh nyam.
Mad to rass.
Not afta mi see the video wid Alice.
Mi turn on mi phone and connect it to mi speaker fi play some music.
Same time mi start gather the ingredients feel fi some lobster so a that mi ago deal wid.
This ago bad yuh fuck! Chef from a talla time.
_____________End of Chapter______________🤍
Thanks for reading!!
Hey ya'll. . .hope unnuh like dah chapta yah. Please duh the right. (Vote, comment and share)
YOU ARE READING
Time fi you
Fanfiction"Listen, mi anuh yuh b yer that." Mi tell him, artiste or not. . .mi just hate when men call mi Dat. "Why yaah behave suh strong? Think mi nuh know seh yuh love mi off? Mi see d way how yuh did a behave when mi did a perform." But wait- him full a...
