#برجوازي
#بقلمي : #مشاعر_مبعثره
الحلقه (١٠)
لمن بقينا ماشين مع اللخمه ما عارفه وديتا وين عاوزه اغلفا ياخ فتشت الغرفه دي سماء وارض ما لقيتا ومافي زمن عشان اعمل غيرا وجابر بستعجل فيني شلت العمود وطلعت مشينا طبعا عارفين انه ما حايقبل يشوفنا ختينا الحاجات وانا اترجيت العسكري قلت له عليك الله اديهم له كلهم يخلي لك اولادك انشاءالله انا جبت طعميه كتيره وفول في الكيس التاني دا شيلو انت والعمود لمعتز قال لي في زول قال لك نحن بنشيل حاجات المساجين؟ جابر صرا لي وقال له ما تشتغل بها دي طفله ساي يلا نحن حانمشي وصل سلامنا لمعتز سليمان قول له جابر واختو بسلمو عليك كتير شد حيلك السجن حق الرجال : ابشر
طلعنا وماشين بعد قربنا نحصل الموقف بس نسمع لك زول بنادي انا اتلفت لقيتو العسكري سبحان الله طلع ود حلال الدنيا دي فيها حاجات تحيرك وحاجات ما بتتوقعا تحصل العسكري قال لينا معتز عاوز يشوفكم وما فضل غير ١٠ دقائق اسرعو قمنا جارين جري انا عن نفسي ما استفدت حاجه لاني مجرد ما شفتو بملابس السجن وشكلو متغير قعدت ابكي بس جابر قعد يتكلم معاه ويوصي فيه هو لمن شاف دموعي ابتسم لي وعمل لي اوك بيدو برضو ما بطلت بكاء لحدي ما مشينا جابر قال لي بنت فضيحه خلاص يعني الزول مسجون تقعدي تبكي له عشان تحسسيه انو بائس؟ : ما حصل شفت لي زول مسجون : طيب الجابك شنو ؟ تاني اوعا تفكري تجي معاي
يلا النتيجه بتاعتنا طلعت وانا عاوزه اموت من التوتر ونتيجتي ابت تطلع سرعه اشيل وارسل عاد اليوم داك لا اكل لا شراب ومن الخوف والتوتر جاني مغض جبت ٨٨ قربت اجن من الفرح ما اتوقعتا نهائي ولا زول في البيت ما ختاها لي لمن بكيت من شدة الفرح وامي تزغرد واسماعيل دا جرا جاب البارد والحلاوه جابر قال لي والله الا اشتري لك تلفون A12s تمشي به الجامعه ومع الاسف في نفس اليوم دا سليمان التاج والد معتز اتوفى كانت صدمه كبيره للناس كلها لانو بالجد رجل فاضل وبساعد الناس مافي زول ما بكاه مشينا العزاء اولادو كانو ببكو سااي بس ما حسيت انو من قلبهم خاصة زوجتو ابتسام وحلا حلا دي اصلا عيونا جافه ما حسيتا زعلانه طبعا هي جابت بس ٥٠ وسمعت الاستاذات بتكلمو قالو ابوها قال لهم تنزل تعيد تاني وتجتهدو معاها
اهلو بس الكانو زعلانين بالجد لمن بغمرو وانا بكيت والله بكيت على معتز ياربي حايواجه الخبر دا كيف ما كفايه عليه السجن والظلم والخيانة كانت سنه صعبه شديد عليه امكن معتز اول مره في حياتو يواجه تحديات ذي دي ولو جنى والله ما بستغرب لاني ختيت نفسي مكانو ما كنت حاأتحمل والله
النقص المادي والعدم والالم والتعب الجسدي والمهاترات ما بتتقارن بالألم النفسي ابدا انا مع اني عانيت حياتي كلها حاسه انو وجعي ما بسوى قدام وجع معتز ربنا يصبرو انشاءالله اتمنيت اقيف جنبو في اللحظات دي بس بوين مرت الايام وانا قدمت للجامعه قدمت قانون وشالوني كنت بقراء وبشتغل في الطبليه في الجامعه اتعرضت للتنمر كل الناس العرفت اني بشتغل اتنمرو علي وانا من كنت بشتغل بهم وبزعل سفهتهم كنت بعد الايام والليالي وبعمل خط في الحيطه كل ما يمر يوم منتظره طلعت معتز من السجن امكن حتى هو ما دقيق زيي كدا مره كان عندنا قعده وبسألو اسئله عامه قامت واحده قالت لهم السؤال موجه للاولاد تقبل تتزوج واحده بياعة طعميه وامها بياعة كسره قعدو يضحكو قالت لهم خلوني ازيدكم من الشعر بيت لو كانت يتيمه ما بتشفقو عليها في ناس انزعجو وقامو وناس ضحكو وناس اصلا ما فاهمين شي كان في اولاد جنبي شغالين طعميه ب ١٠٠ طعميه ب ١٠٠ هاك اديني فتة فول انا طوالي قمت على حيلي قعدت ابكي
أنت تقرأ
برجوازي
Actionاحبته منذ نعومة اظفارها كان حلما يراود منامها حلمت لم تحسبه مستحيلا كبرت به لتصدم بواقع اخر فهو لا يعرف بوجودها حتى من جهة اخرى يتعرض لصفعة قويه تنقله من الحياة البرجوازيه التي عاشها الى ما دون خط الفقر بلا مأوى بلا عمل او حتى صديق
