#برجوازي
#بقلمي : #مشاعر_مبعثره
الحلقه(٥)
قلت له زح من قدامي وخليني امشي اخوي منتظرني برا طوالي انخلع وزحا قال لي اخوك قاعد هنا؟ غريبه كنت فاكرك تبع الخالات ديلك : خالات؟ وانا كنت فاكراهم عماتك : قرايب العريس : قرايبك ما بتعرفهم؟ طوالي مشيت خليتو واقف وهو زاتو خاف اعمل له مشكله من طلعت من الصاله كدا بس العربات وقفت بالصف لمن خفت عربات ملاكي تمشي وتجي الواحد لمن يقرب من جنبي بهدي وواحدين بقيفو عديل فاكرني واحده شمال رجعت الصاله تاني قعدت لمن لقيت نسوان من الحي ماشات مشيت معاهم جابر طبعا قالو في الحفله ونصر الدين واسماعيل بتعشو مع امي شاكلوني شكل وانا الفيني مكفيني اسماعيل قال لي تعالي اكلي بتكوني جعانه قلت له اكلت في الصاله: صحي اكلتو شنو؟ امي طوالي استلمتني تعالي يا سمر احكي لينا الحفله طلعت كيف؟ شفتي العرسان؟ : نعسانه وعاوزه انوم : نوم شنو يا سمر : خليها ساي العولاق دي جابر اسي بجي بحكي لينا
مع اني دخلت غرفتي وطفيت النور ورقدت بس ما قدرت انوم ابكي سااااي والعجب لمن جابر جاء وبقى يحكي لهم قلبي انقطع كان وجع كبير خلاص كبير علي ما قدرت اتحملو خاصة انو كل بنات المدرسه بما فيهم حلا عارفين اني مكسره في معتز واكيد حايضحكو علي حتى امي شاكه يعني متوقعه شنو دا غباء ما اكتر انا واقعه في حب انسان ما عارف بوجودي اصلا خلي يعرف اني بحبو والوم منو طيب غير نفسي لو في زول الومو كان اهون علي عشت فتره صعبه والمدرسه فتحت وانا لسه مكسوره اتغيرت شديد ومصاريفي زاتا كترت بس البركه في جابر اخوي شغلو مع معتز كان مربح
مالك يا ولدي الليله ما مشيت الشغل ؟ جابر جابر: عليك الله يا امي خليني : لو علي بخليك والله بس سمر دي والله الليله طاردنها في الرسوم وما رضت تقول لك عشان ما تتقل عليك هو طوالي طلع قروش من جيبو وقال لها هاك اديها ديل ولمن القى تاني بديها جيت قعدت جنبو وبقيت اعصر له رجولو قلت له لالا خليهم لسه في وقت الاستاذه دي ما عندها شغله ساي في ناس لنهاية السنه حتى يدفعو : ديلك قليلات ادب اهلهم بدوهم وما بدفعو عاجبهم الطرد اما نحن البنلقاه بنديهم له هاك امسكي : ربنا يخليك لي : والغاز يا جابر استهلاك الفحم كتر ومكمل القروش : مافي غاز يا امي قبيل مشيت المستودع عارف الشغل حار عليكم بس استحملوه الفتره دي عارف نفسي مقصر : ولا يهمك يا ولدي بس وريني مالك ما يكون متحسس وساكت؟ قعادك في البيت دا ما ساي اخد تنهيده طويله وقال انطردت يا امي والله : شنو ؟ طردوك ليه يعني ؟ الله لا كسبهم : والله يا امي لو عاوزه تدعي عليهم ابدي من حسين سليمان ومعتز خليه والله وقف معاي وحاول يرجعني
قلت له طردوك ليه؟ : ما مهم؟ : معليش يا جابر سايرني واخدني على قدر عقلي : يا ستي حسين دا واحد منافق وبتاع ملعبه وكل ما يكشفوه يخت اللوم فينا ويقول غلطنا نحن العمال ياخ البضاعه البحصل فيها مشاكل اثناء الترحيل نوديها المستودع هو يجي يشحنا بليل يبيعا ويخت القروش في جيبو وبرضو بتلاعب بالحسابات ويعمل مشاكل مع الزبائن ياخ دا زول فاسد شيب راس ابوه والله اخر مره عمل عملتو وطلعا في راسي لمن انطردت والله ابوه قرب يضربو قدامنا الا معتز حجزو وهدا ابوه : دي كلها غيره وحسد قلبو اسود هو وامو عشان كدا ما بتقدمو العواليق: انسان مقرف في زول بسرق مال ابوه اللهو مالو هو واخوانو : جعان وقلبو اسود : الله يغضب عليه ويعكسا عليه محل ما يقبل النيه السوداء ما بتغلب اصلا الله يوريه حي قبل يموت
أنت تقرأ
برجوازي
Actionاحبته منذ نعومة اظفارها كان حلما يراود منامها حلمت لم تحسبه مستحيلا كبرت به لتصدم بواقع اخر فهو لا يعرف بوجودها حتى من جهة اخرى يتعرض لصفعة قويه تنقله من الحياة البرجوازيه التي عاشها الى ما دون خط الفقر بلا مأوى بلا عمل او حتى صديق
