#برجوازي
#بقلمي : #مشاعر_مبعثره
الحلقه(١)
يا بنات ست خديجه مافي قالو لكم قفلو الفصل دا واطلعو البنت الجابت البشاره فجاءة لقت نفسا معصوره في الباب من شدة اندفاعنا وحصرناها وزاحمناها في الباب تشاكل ساااي
اصلكن يا بنات مهيره قليلات ادي وما دايرات ليكن قرايه بكرا ينقلوكم بصمتكم دي يجيبوكم لينا الادبي عشان تفقعو مرارتنا الجري لشنو ونطيط الشبابيك قايلات روحكن صغار ما هديل نسوان كبار الواحده لو عرسوها تلدي وتمسك بيت كرهتونا ياخ المدرسه دي والله أكعب دفعه مرت علينا
نحن طبعا بقينا ما بنتأثر بالكلام دا انا نطيت بالشباك الجنبي مباشرة وروعه بتحاول تلحقني
يا سمر اقيفي ياخ دا شنو شبطي زاتو اتقطع : عشان نلحق عربية معتز ما يفوتنا : والله محسساني انها عربية اخوك : يا بنت بطلي نقه وخفي دا زمن رجعتو لو ما اسرعنا بفوتنا ونرجع البيت برجلينا : سمر سمر اقيفي دقيقه : مالك ياخ : هسسسسس تعالي ديك مش حلا سليمان؟ : اي والله
طبعا حلا زميلتنا وجارتنا في نفس الوقت ابوها سليمان التاج اغنى واحد في الحي عندو شركه بتاعة ايراد وتصدير حلا دي بنتو الصغيره ومدلعه دلع شديد + بتكرهنا موت خاصة انا يلا هي كانت قاعده مع طالب ورا كافتريا المدرسه وببوس فيها منظرا استفزاني شديد
والله امشي اشاكلا : يا بنت هوي مالك ومالا خلينا في حالنا : دي قلة ادب منها اهلا لو عرفو يقولو شنو؟ يخسي ناقصه شنو عشان تعمل كدا : ما عندنا شغله بها يا سمر خلينا نمشي
انا رميت حجر باتجاهم طوالي الولد قام جاري خلاها شافتنا غضبا ذاد أضعاف مشينا وهي ورانا تتسكع اول ما طلعنا شفنا عربية معتز من بعيد طوالي وقفنا معتز دا طبعا اخو حلا الكبير ولد كدا ذي البنشوفهم في الافلام طويل وحلبي عيونو عسليه قالو ذي عيون امو لانو اخوانو كلهم مافيهم واحد عيونو كدا ولا حتى ابوه مكسرني شديد وهو متعود كل ما يجي راجع من الشغل ويلقى طلبه من الحي يوصلهم معاه عاد انا مرات بدك الحصه الاخيره عشان اصادفو واركب معاه امنيتي بس اركب معاه قدام بس دايما بننعصر ورا وما بتشيلنا زاتو وهو مسمينا أحفاد نيوتن بقيف لينا براه يلا أول ما شفناه جرينا جري وحلا ورانا انا طوالي عاوزه أجري اركب قدام روعه قالت لي ما شايفه اختو يعني؟ هو اصلا واقف له هي هو لمن شافنا ابتسم وقال لينا احفاد نيوتن الله يقويكم يلا سرعه حلا طبعا ماشه تتسكع قال لها يلا يا حلا صرت وشا وقالت له ما عاوزه أركب معاك انت اتصلت بحسين اخوي وجايني امشي مشيك ساي طبعا بتكره اخوها دا كره ذي التقول عدوها مع انو بحبها وبعطف عليها شديد المقاعد الورا ما بتشيل طبعا معتز قال لينا مدام حلا ما جايه واحده فيكم تجي تركب قدام انا قمت ذي الطاقاني كهرباء جريت عاد دي.كانت احلى لحظه في حياتي حسيت كأني مرتو واصلا دي امنيتي اني ابقى مدام معتز سليمان ياخي بحبو حب الولد دا وهو زاتو على حلاتو ظريف ياخي وكلامو حلو ومتواضع ما ذي باقي اخوانو كلهم متكبرين ذي حلا عاد انا قربت اقول له صور اللحظه دي مبسوطه مبسوطه شديد وهو يسأل فينا من الدراسه لمن وصلنا وانا التقول ما أنزل للحظه كنت حاأحكي له بعمايل أختو بس تاني سكت امي كانت بتطبخ وانا من اجي جعانه دائما بأكل الأخضر واليابس انا طبعا اصغر واحده في البيت والبنت الوحيده اخواني كلهم اولاد وأكبر مني مدلعني دلع شديد خاصة اخوي الكبير جابر هو بمثابة أبوي لانو ابوي اتوفى من زمان ما بتزكرو نهائي أصعب لحظه في حياتي لمن يجو يجمعو الرسوم ويقولو الايتام يقيفو انا بخجل وما بقيف لكن كل الناس عارفاني كوني يتيمه حاسه بنقص شديد مع انو امي واخواني ما مقصرين مني بدلعوني دلع شديد ابوي كان استاذ في مدرسة ابوذر الكوده وسجل اخواني فيها بتخفيض طبعا ولمن هو اتوفى جابر ما كمل وطلع وانا المدرسه احتضنتني سنه واحده بس سنه اولى هناك شفت معتز سليمان لأول مره كان الطالب المثالي في المدرسي وبكرموه في كل الفعاليات امي قالت كان بجي لأبوي يدرسو انجليزي وهو لحدي اللحظه دي ما ناسي جميلو وبقول انا اتعلمت الانجليزي بفضل استاذ الفاتح كان مثالي بالجد في مظهره ونظافة لبسو شنطتو كراساتو جزمتو شعرو في كلامو انسان مثقف وواعي جدا قرا إدارة أعمال ولمن اتخرج ابوه شغلو في الشركه بتاعتو اداه منصب المدير المالي انا مسمياه البرجوازي لانو متعود اي حاجه يعوزا بحصل عليها من غير تعب في حياتو كلها ما حصل اشتغل حاجه مرهقه ولا تعب حتى في شغلو دا مرتاح بس قاعد في مكتبو المكيف والكرسي المريح قدام اللابتوب عندو هواية التصوير وعندو كاميرا خاصه بصور وينزل الصور على طول في الفيس لقيتو في الشخصيات العامه وعملت له متابعه عندو قناة في اليوتيوب هو حرفيا كدا مكسر نص البنات ما كنت شايفه الفرق بينا خالص يعني هو انسان برجوازي وأهلو من أعلى طبقات المجتمع ما متخيله اصلا شكل حياتهم وانا بنت فقيره عديل مش بس من من الطبقه المتوسطه خاصة بعد وفاة ابوي ما عندنا ضهر ولا سند ولا حتى معاش بس معتمدين على شغل جابر اخوي المابغطي ابوي كان بعمل الطعميه بالمساء ويبيعها جابر حاول يمشي على خطاه بس ما قدر في النهايه باع الطبليه الكان شغال عليها ابوي اشتغل في الحداده ودي الحاجه البعرفا هو نصر الدين اخوي بقراء في الجامعه هو ما بالحيل كدا في القرايه بس جابر عاصرو شغال في محل طباعه في الجامعه ومكفي نفسو امي دي لمن ابوي اتوفى اشتغلت شاي وباعت كسره بس جابر بعداك حماها اهلنا ممكن يرسلو لينا بس القروش والحاجات البرسلوها لينا دي ما بتغطي متطلباتنا الكبرت معانا خاصة انا وهم حريصين انو ما ينقصني اي شي او احس اني اقل من البنات المعاي
أنت تقرأ
برجوازي
Acciónاحبته منذ نعومة اظفارها كان حلما يراود منامها حلمت لم تحسبه مستحيلا كبرت به لتصدم بواقع اخر فهو لا يعرف بوجودها حتى من جهة اخرى يتعرض لصفعة قويه تنقله من الحياة البرجوازيه التي عاشها الى ما دون خط الفقر بلا مأوى بلا عمل او حتى صديق
