برجوازي

برجوازي 17

#برجوازي
#بقلمي : #مشاعر_مبعثره
الحلقه(١٧)

لو ما مسكت نفسي كان ضربتا وقلت لها دا مكاني انا والجنبك دا حبيبي وحقي انا براي اتزوجت وكل البنات الكانو مشاركني في حبك قنعو ما عداي انهرت بس برضو بحبك حتى بعد بقيت اب وبعد الكارثه الحصلت في حياتك حبيتك اكتر وكنت عاوزه اعمل كل البقدر عليه عشان اخفف عليك قلبي كان بقول لي لا ما بكفي لازم تعملي البرجوازي محتاج منك اكتر من كدا كنت حااديك كنت حااديك بدل عمري عمرين وتلاته من غير ندم حااضحي عشانك بس انت صدمتني بكل برود العالم قلت لي ما بحبك وشوفي حياتك من غيري واسي واقف بتطلب يدي شوف المفارقه دي : عشان كدا بتتقلي انا كنت ببكي طبعا فجاءة قعدت اضحك قلت له اتقل؟ انت شايف كدا صح؟ اي واحد زيك حايفهم كدا : لانو كدا ولو رجعتي لنفسك حاتلقي انك بتتقلي شديد كمان : لازم تقول كدا لو ما قلت ما حاتكون البرجوازي الانا بعرفو : دا حبك انتي وانا بحبك بطريقتي المتواضعه امكن حبي ما عظيم زيك كدا الناس بتختلف وانا والله دا كل البقدر عليه ولو اديتيني الفرصه حاأعوضك عن كل لحظه وجع سببتا لك بقصد او بدون قصد وكمان عن الدموع النزلتيها بس والله ما كنت عارف حتى الرساله دي ما فهمتها بدري وطلع الرساله الرسلتها له في السجن عاوزه اشيلا منو دساها وراه وقال لي ما تحلمي تشوفيها دي حاجه بتخصني فهمتي؟ سكت ساااي وانا بعاين له قال لي عرفت متأخر وندمان على كل الزمن الضيعتو بدونك حتى حياتي البرجوازيه ديك وهم ما أكتر ندمان عليها ندمان على حب الاسره المزيف والمالقيتو الا معاكم انا لو كنت احمق ومتهور وما بعرف الحب ذي ما قلتي كان انبهرت بجمالك واتزوجتك من زمان لانك بالجد ملفته بس انا كنت بفتش في الحب فتشتو في المكان الغلط وانخدعت فيه اما انتي ما كنت بعرفك ما بعرف غير انك واحده حلوه وتفكيري اسمى من كدا شويه شويه دخلتي حياتي من كل ابوابا وبقيتي اهم حاجه فيها انا كنت بتنفس باسمك لمن اضحك على نفسي فجاءة القى نفسي بتخيلك وابتسم لو صحيت من النوم اشوف صورتك حلمت بك كتير والله العظيم يا سمر بس كنت بلعن حظي المابسمح لي افصح عن الحب دا واستمتع به حرمت نفسي منك عشانك والله العظيم انا امكن من لما بديت شغل معاك حبيتك : فتره قصيره شديد : فعلا بس احلى فتره في حياتي رجعت مراهق من جديد بستغل انشغالك عشان أتأمل ملامحك وتفاصيلك كلها بشتاق لك حتى لما تكوني جنبي وانتي كل يوم بتعلقيني بك اكتر حبك حببني فيك كل ما احاول ابوح بالشي دا اتذكر الحصل لي واني ما مؤهل اقيف قدام اخوك واطلبك لاني لحدي اللحظه بنتي ما قادر اخدا حااقدر اخدك انتي؟ الموضوع دا كان مموتني عديل والله يا سمر علي هو الوحيد الحس بي واجبرني اعترف له ولما اسماعيل بدا يزن على راس جابر اخوك ويحرضو ضدي جابر مره جاء لقاني شايل نفس الرقه دي وفهم اي شي واصلا شكلو عارف انك بتحبيني لمن قال كدا انا نزلت راسي من الخجل عاد فضيحة الحب معاي الدنيا دي كلها عارفاني بحبو قاطع سرحتي سمر سامعاني انتي؟ : ايوا : اكمل؟ صريت له قال لي المهم يا سمر جابر قال لي البنت دي مجنونه وبتحبك لدرجة انها ما قادره تركز على اي حاجه في حياتا ما تعلقا بك للدرجه دي مدام ما قادر تقدم لها شي قلت له انا بالجد ما بقدر اقدم لها حاجه نفسي ما قادر اقدم لها حاجه بيت اقعد فيه ساي ما عندي كل ملابسي وبطاقاتي وقروشي مستلزماتي كلها ما موجوده عندي انا هويه ما عندي بس عاوز اعمل كدا : تعمل شنو ما قدرت اقول له بحبها بس ما بقدر اتزوجا لاني ما بقدر اسعدا وحاتعيش في جحيم معاي وبرضو هو فهم وعدتو اني ما اقيف في طريقك ولا اعترض سعادتك دا الشي الخلاني ابعد بالاضافه لضغط اسماعيل كنت عاوزك سعيده بس حتى لو من غيري يوم مرضت وجيتيني في الديوان قربت افقد السيطره في لحظه واعترف لك واكتر كمان قربك مني بالطريقه دي خلاني افقد احساس الزمان والمكان بس صحيت على نفسي في أخر لحظه ساعتا عرفت اني ضعيف شديد قدامك وتحت اي لحظه ممكن اظهر لك مشاعرك دي عشان كدا قسيت عليك وزعلتك امكن دي المره الوحيده الزعلتك فيها بقصد واتالمت اكتر منك بس لمن رجعت لشغلي ولقيت اني بكسب منو اتقدمت لك من جابر وكان مبسوط شديد قال لي كلما قلت له انت وريها وشوف رايا قلت له انا صديتا قبل كدا بسبب وضعي المادي شاكلني شديد وقال لي انت كدا صعبت الموضوع انا مستعد اعرس لك سمر دي حتى لو ما عندك تأكلا زاتو لانها بتحبك ولانك راجل شايف مستقبلك بعيوني وعارف انو مافي غيرك بسعدا هو كان واثق اني حاأسعدك بالحب ما اكتر ولحدي اللحظه ما بقدر اوعدك بأكتر من كدا الحب ما عندي غيرو والله العظيم ما عارف بكرا مخبي لي شنو حياتي معقده ومستقبلي مجهول ما كنت عاوز اظلمك معاي لانك عانيتي كفايه ومحتاجه ترتاحي بس................ انا دموعي طوالي جرت وقعدت ابكي بكيت بصوت عديل لمن بصرخ هو انخلع شديد قال سمر سمر مالك حبيبتي قلعت عيوني