احتريتك من بين كل البشر وسميتك عشقي وفرحة سنيني

26

"بسم الله الرحمن الرحيم "
•
•
•
•
تذكير باخر حدث •
عند الجازي اللي بدت تسولف مع ريما ودخلت معها بجو وانبسطت بشخصية ريما الفرفوشه كانت تسولف وهي متحمسه ابتسمت  الجازي : شرايك تجين معي اوريك بلكونة غرفتي ؟
ريما ابتسمت : ما اقول لا
الجازي : اجل تفضلي معي ومشت ريما مع الجازي وصعدو لغرفتها ودخلو وريما اللي كان عاجبها تصميم الغرفه : ماشاءالله غرفتك تجننننن اللي صممها عليه ذوق يهبل
الجازي ابتسمت باتساع : ااايه ذوق اخوي معاذ دايم يفوز ؛ كحت ريما بصدمه وهي تخبط على صدرها وكتمت الجازي ضحكتها : بروح اجيب لك كاسة مويه
هزت راسها ريما وراحت الجازي بسرعه تجيب لها مويه
وريما اللي عضت على اصابيعها بقهر : لييييش تقولين رايك صدق هبله !!
الجازي دخلت المطبخ وهي تاخذ كاسة مويه لريما وجات بتطلع بس شافة باب قسم الرجال مفتوح وابتسمت وهي ناويه تروح لمعاذ عشان بتقوله عن رأيها بريما وانصدمت وهي تطلع بوجهه ماهر اللي تــجــمــد من الفاتنه اللي قدامه وبلع ريقه اكثر من مره والجازي اللي صارت ترجف والكاسه تهتز بين يدها ورجولها متيبسه ما قدرت تتحرك من مكانها وعيونها تعلقت بعيون ماهر اللي ذايب قدام عيونها وجمالها الفاتن بشكل ملفت للنظر ...
الجازي لاول مره تتأمل ملامح ماهر الوسيمه واللي بلعت ريقها عندما لمحت نظراته الحاده قاطعها صوته الثقيل بنبره مغرمه :
. ‏' شفتك ومن بعد ذاك اليوم ماعاد أشوف
‏ من يوم جت عيني بـ عينك و قلبي غريق
‏علمني وشلون تشرح حبك أربع حروف ؟
‏حملّت كلمة أحبك " فوق مالا تطيق "
‏تقول ياليت مال الناس عندك شفوف
‏واقول أحبك وغيرك جعلهم في حريق !
‏شعوري اللي بدونك بين وحشه و خوف
‏شعور شايب توحش في عزا "آخر صديق '
ناظرته الجازي بعيون متسعه ومصدومه ما توقعت ان ماهر يحبها ولو واحد بالميه ماجاء ببالها انه ممكن يغرم بها ويقصد فيها مثل كذا وركضت بسرعه للداخل وهي ترجف وتلهث بتوتر وصدمه ومشاعر متلخبطه ماتدري وش سوا فيها ماهر بس بلمحه منه وبقصيده قدر انه يوترها بكلماته العذبه جلست بالمطبخ وهي تهوجس فيه بالقصيده اللي قالها
وعند ماهر اللي رجع للمجلس وهو يمسك قلبه اللي نبضاته كل مالها تسرع اكثر واكثر وجلس يبتسم ابتسامة شقة فمه من الفرحه وكل ما يفكر بملامح الجازي يذوب اكثر ويحس انه غرق بحبها ولا يقدر يطلع غرامها
...
ريما زفرت وهي تشوف بان الجازي تاخرت وخرجت من الغرفه وهي تشوف غرفه فيها برواز بصورة معاذ فز فيها عرق اللقافه ودخلت الغرفه وهي تقرب من الصوره وتتخصر : يلعن ام النرجسيه حتى بغرفته حاط صورته يا شينه شيناه
معاذ دخل لغرفة بعد ان كان متجهه لغرفة الجازي بس لمح ريما بغرفته واتجهه لها : يا شين لقافتك
ريما شهقت ولفت عليه : يا قليل الادب وش تسوي هنا ؟؟؟؟؟
معاذ وسع عيونه وقرب منها بصدمه : بتجلطيني انتي !! الغرفه غرفتي وجايه تقولين لي قليل ادب !!!
ريما برفعة حاجبها : اتركنا من موضوع الغرفه ليه تكذب وتقول للجازي انها حبيبتك هاااه !
معاذ ابتسم ونظراته ثابته بعيونها : بشوف هل تغارين ولا لا
ريما بسخريه : انا اغار !! انت اكيد تحلم
معاذ ابتسم اكثر : وليه ما تغارين وانتي بغيتي تذبحيني لاني قلت لك انها حبيبتي
ريما : بالله لا تضحكني لاني انا اصلا ما احس بشي اتجاهك عشان اغار يا المعتوهه ؛ وجات بتمشي بس وقف قدامها كانت بتروح للاتجاه الثاني وصد لها للمره الثانيه ورفعت حاجبها بمعنى وخر معاذ سحبها له وهو يهمس لها : بس انا احس بمشاعر اتجاهك
ريما وسعت عيونها واحتقن وجهها باللون الاحمر وكتمت انفاسها بصدمه وضحك معاذ بعلو وهو يشوف تعابير وجهها المصدوم : يا هبله تنفسي امزح معك !!
ريما شهقت تستنشق الهواء وناظرت بغضب وهي تضربه على يده : اعطيتك وجهه ترا لعد تمزح يا خبل
معاذ بضحك : طيب يا بقره لا تضربين بتخعلين يدي
ريما بغضب من ضحكه : اذا انا بقره انت ثور
معاذ بخبث : عشان كذا لابسه احمر تبين تغريني !
ريما شهقت من تفكيره : لااااااا لعد تفكرررر يا وسخ وخر من قدامي الحين لا قسم بالله اجلدك
معاذ : سكنهم مساكنهم شكلهم شياطينك قامت
ريما عضت شفايفها بغضب: ايه قامت تبيني افكها عليك
معاذ نزلت انظاره لشفايفها المغريه واللي زادها اغراء عضها لها : لا تعضينها
ريما قطبة حواجبها باستغراب : وش تقصد ؟
مهاذ قرب منها وبهدوء رفع ابهام وهو يسحب شفتها من بين اسنانها وناظرها بنظرات متخدره : لعد تعضينها عشان لا اعاقبك
ريما ضربة يده : لعد تلمسني لا والله اقطع يدك
معاذ لتوه ينتبه لفتحة فستانها وعض على شفايفه بدون وعي هنا ريما عصبت وهي ترفع يدها وتضربه كــف : يا قليل الاصل غض بصرك لا افقع عينك كم مره حذرتك وما تسمع مني
معاذ تجمد من فعلتها وبغضب ناظرها : كيف تتجرأين وتمدين يدك !!
ريما لاول مره تتوتر من غضبه : تستأهل لانك جالس تناظر بشي مو لك
معاذ صر على اسنانه ومسك يدها بقوه وقرب وجهه منها وبهمس غاضب : انا يوم اناظر شي اكون واثق بانه لي يا انسه ريما والحين لو ما تنقلعين عن وجههي والله لجرم فيك !!
ريما بلعت ريقها وهي تنفض يدها وتمثل القوه : اصلا كنت رايحه ؛ وطلعت وهي تنتفض يدها منه تركته وراها يصارع عصبيته وافكاره الشيطانيه
الجازي طلعت وصادفة ريما وهي تبتسم : معليش تاخرت عليك
ريما بتوتر : لا معليك خلينا ننزل نجلس تحت
الجازي : تفضلي ؛ ونزلت معها وهي ملاحظه توتر ريما وجلسو مع الجده منيره وام معاذ يسولفون ويتقهون
....................................
ببيت صالح عند شهد اللي جالسه بالبلكونه حقتها وهي تنتظر قدوم راكان اللي تاخر وزفرت وهي طفشت من الانتظار الى ان سمعت صوت سياره وقفت وقامت بفضول ولقتها سيارة راكان اللي نزل وهو شايل شماغه بيده ويلعب بشعره ابتسمت وهي تهتف : بسرعه تراني انتظرك ؛ رفع راسه راكان وانصدم بروية شهد مغطيه نفسها ببطانيه وحاطه نظرات شمسيه ضحك : وش مسويه بنفسك !
شهد : اطلع واقولك
راكان : جايك ماني مطول ودخل البيت ورجعت شهد تجلس على الكرسي وهي تنتظره وطلع لغرفته ودخل وهو يقفل الباب ورمى شماغه على السرير واتجهه للبلكونه وابتسم وهو يشوف كيف البطانيه مكبرتها : جيت يا نظر عيني
شهد ابتسمت: ادري عشان كذا اكتمل القمر بجيتك
ابتسم راكان بحب وهو يناظر القمر ويلقاه مكتمل وناظرها بعشق : احبك ولو انها قليله بحقك
شهد ابتسمت بسعادة : وانا اموت فيك يا حبيبي
راكان : تكفين معد اقدر اتحمل خليني اشوفك
شهد : لاااا يا ركوني وش اتفقنا عليه ؟
راكان بغيض : انتظري والله العظيم لو خلصنا ملكتنا ماني مطول بالزواج اسبوعين وانتي ببيتي
شهد ضحكت بقوه : مو منجدك !!!
راكان : والله انا رجال عند كلمتي
شهد : ابوي مستحيل يوافق على سرعة الزواج
راكان : لا بيوافق ان شاء الله وبتشوفين وبتقولين يا راكان انت صادق
شهد ابتسمت وهتفت بهدوء: راكان بسالك ما مدى ثقتك فيني ؟
راكان رفع حاجبه باستغراب : وش مناسبة السؤال ؟
شهد : بس كذا حبيت اعرف
راكان ابتسم : اثق فيك ثقه عمياء يعني مستحيل واحد بالميه اشك فيك ابدا
شهد ابتسمت : نفس الشي مستحيل اشك فيك ولو شفت بعيني
راكان ابتسم بحب : لهدرجه تحبيني ؟
شهد بعشق : واكثر والله ولو بيدي اعطيتك روحي
راكان تنهد بحب :  يابخت قلبي يوم جيت وسكنته
و يابخت عيني دامك انت نظرۿا ˹
شهد بابتسامة عاشقه : شافوك بعيوني وانا ما تكلمت
كل من لمحني قال والله تحبه
راكان بدهشه : تعرفين تقصدين !!
شهد ضحكت : لا والله اني من جنبها بس ذا سمعته من لسان ابوي دايم يقوله لامي
راكان ابتسم : عمي صالح الوحيد اللي تزوج اللي يحبها وتحبه
شهد بنفس الابتسامة : جعلنا مثلهم ما يفرقنا شي
راكان : اميييييين
قاطعهم صوت ريما وهي تتهاوش مع ماهر : انت عاق بعمتك !!!
الجده منيره تقرص ريما : والله لو ما تسكتين لتعلم عليك ذي العصا
ريما عبست بغيض وهي تناظر لماهر وتاشر له بمعنى اوريك وضحك وهو يشوف تعابيرها المضحكه ودخلو للبيت تحت انظار راكان وشهد اللي يراقبونهم من فوق البلكونه كتمت ضحكتها شهد من هبل ريما : الله يستر وش مسوي لها ماهر عشان تقول كذا
راكان بضحك : اول مره اسمع بعقوق العمه
شهد وهي تدمع من الضحك : ريما كل شي عندها حصري
راكان ابتسم وهو يراقبها وهي تضحك سكتت شهد يوم حست بالهدوء ومسحت دموع الضحك من ورا البطانيه وسمعت تنهيدة راكان : متى بيشفق علي القمر وينور علي بنوره
شهد بخجل : ركونييي
راكان :عيونه وقلبه وروح ركوني إمري
شهد : تكفى لعد تطلب تشوفني
راكان تنهد : خلاص طيب
شهد : تامرني على شي لاني نعست ودي انام
راكان بابتسامة : لا مابي الا سلامتك ونوم العوافي
شهد بابتسامة : الله يعافيك يا نور عيني
ودخلت شهد لغرفتها وهي تنسدح وكل تفكيرها براكان نامت بعد عنى مع التفكير وراكان اللي دخل يستحم .
___________
عند متعب اللي جالس ويلعب بشعر نوف اللي تاكل ثلج وتتفرج بفلم ومندمجه ومتفاعله مع الاحداث مو منتبهه لنظرات متعب المتأمله ابتسم وهو يشوفها متحمسه : نفنفي بسك ثلج والله اخاف عليك تمرضين !
نوف بعبوس : مقدر مشتهيته حاولت اخفف بس ما قدرت
متعب : خلاص بشيله مقدر اتفرج عليك وانتي تعرضين نفسك للتعب
نوف بابتسامة : اجل خلاص شيله بحاول اخفف من اليوم ورايح
متعب ابتسم : ايه شاطره
نوف ضحكت : ماني بزر
متعب ابتسم : اجل لا تتصرفين مثلهم
نوف بعصبيه : قلت لك ماني مثلهممم ما تفهم !!
متعب انصدم من عصبيتها : فهمت ليه العصبيه ؟
نوف ضحكت على تعابير وجهه : امزح معك
متعب : والله صرت اخاف من تقلبات مزاجك صايره تخرشني
نوف ضحكت اكثر : اهخ يا حبيبي وش كثر انت صابر علي
متعب بحب : وبصبر يا بعد روحي كم عندي نوف وحده وبقلبي وبروحي
نوف ابتسمت وهي تحضنه بقوه وهو يبادلها ويبوس خدها بحب وتكلمت بهدوء: متعب انا احبك
متعب ابتسم وهو يحس بدغدغه من اثر الكلمه عليه : وانا اعشقك يا اميرتي
نوف اتسعت ابتسامتها وشدت عليه .
....
•اليوم التالي •
عند ماجد اللي دخل شنطة رهف ودخلت رهف وراه واستقبلته ريما وهي متخصره : على وين ؟؟
ماجد : بطلع شنطة رهف لغرفتي
ريما بمزح : ماشاءالله شكلكم مضيعين بيتكم !!
ماجد رمى شنطة رهف : لا والله شكل جلدك يحكك ؛ واتجهه لها وهي تركض لجهة رهف وتمسكها : والله لو تمد يدك لهبد زوجتك وبزرك اللي جايي
رهف صرخة بخرشه : ماجد تراها مجنونه تسويها بالله فكنا منها !
ماجد : قلك ماخذتهم الحين اسيرين وانا اللي مفكر اذا جتني بنت اسميها ريما
ريما وخرت بسرعه عن ماجد : لااا خلاص فكيتهم بس والله تسميها ريما لو انها بنت ؟؟
ماجد مسك ماجد يد رهف واخذ الشنطه : ليه شافتني مجنون اسميها ريما وتطلع مثلك
ريما بغضب : اصلا محد بيطلع مثلي لاني نادره
رهف : خفي علينا يا نادره
ريما : احسن لك تاخذ مرتك عشان لا اكلك واكلها وراك
ماجد همس لرهف ونظراته باتجاه ريما : والله تسويها وتاكلنا خلينا نطلع لغرفتي بسلام
رهف كتمت ضحكته واسرعت تطلع مع ماجد وريما تراقبهم بعصبيه وجلست وهي تتذمر وجاء ببالها معاذ وضربت راسها : وش الطاري اللي جابه ببالي صادقه رهف يوم قالت اني مجنونه ؛ وقامت للمطبخ تخترع حلا
...
لين وهي تقفل اخر شنطه لها : خلصت ترا
ريان : يلاه مشينا ومسك الشنطه وشالها ومدها لراكان اللي مسكها ونزل بها يحطها بسيارة ريان اللي غمز للين تغطي عيونها وفهمته واسرعت تغطي عيونها وشبكت يدها بيد ريان اللي شد عليها ونزلو واستقبلتهم ام نواف : خلاص رايحين ؟
ريان تقدم يحب رأسها ويدها : ايه يا نظري بغيتي شي ناقصك شي ؟؟
ام نواف : لا وانا امك بس ابي سلامتكم ولا تغيبون عننا كثير
ريان : ابشري من عيوني كل بعد يومين تلقيني عندك
راما وهي تحضن لين : بشتاق لك والله
لين ابتسمت بادلتها : وانا بعد ؛ وابتعدت عن راما واتجهت تحب راس ويد ام نواف : توصين شي يا عمه
ام نواف بحنان : لا يا قلبي انتبهي لك ولريان وللصغير
لين ابتسمت : من عيوني
ريان : يلاه يا لين
لين : جايه جايه ؛ واتجهت له وهي تخرج وتركب بسيارة ريان
راكان ناظر لريان وابتسم : ماشاءالله اول من تزوج فينا و اول من طلع لبيت لحاله
ريان ابتسم : عقبالك
راكان رفع يدينه للسماء: امييييين يارب
ضحك ريان : تبي شي ؟
راكان بابتسامة : لا سلامتك
ريان : الله يسلمك وركب سيارته ومشى لبيته الجديد اللي اشتراه قبل شهر بس كان منشغل بتاثيثه والحين يمديهم يسكنونه مسكت لين يده وشد عليها وهو يبتسم لها : اخترته قريب من بيت اهلي عشان لا يحسون ببعدي
لين بابتسامة رقيقه: احسن ما سويت يا روحي
ريان باس كف يدها و وقف عند شقتهم القريبه من بيت اهله ونزلو وهو يشيل بالشنط ويدخلها ولين اللي خلعت عباتها ترتب بالشنط وريان اللي يساعدها
....
يارا اللي قررت تفاجىء اهلها وجات لهم بدون علمهم ودخلت البيت وهي تشوفه هادي حتى امها وابوها مو موجودين استغربت وهي تخرج لخالد : شكلهم مو فيه !
خالد : ليه ؟
يارا : مالهم حس
خالد : انا اعرف وين ؛ وهو يشوف الجزم كثيره عند باب بيت الجده منيره
يارا: معقوله عند جدتي ؟
خالد : اكيد
يارا : اجل بروح لهم
خالد بحب : انتبهي لنفسك
يارا بابتسامة : وانت بعد يا قلبي
خالد مشى بعد ما رسل لها قبله بالهواء ودخلت يارا وهي تشوف البنات يسولفون ويلعبون اونو والجده وامها وحريم عمانها جالسين يتقهون
يارا ابتسمت وهي تتجهه لامها : انا جيت يا جنتي
ام ماهر رفعت راسها ليارا وبشتياق فزت تحضنها وتبادلها يارا اللي تدمع عيونه باشتياق لامها : يا حبيبتي يا يارا متى جيتي هاه يا روحي
البنات تعالت اصوات صرخاتهم بفرحه لرؤية يارا
يارا وهي ترد على امها بسرعه : توي جيت قاطعها حضن ريم القوي وبادلتها بحب وبشتياق والبنات احضنوها حضن جماعي ويارا اللي تضحك : كتمتونيييي والله لعلم عليكم خالد
وخرت ريم عنها وتخصرت ريما : اقول هنا مافي خالد هنا حنا وبس ريم وهي تصفق كتف يارا : يا زقه اشتقت لك كيفك
يارا : بخير بس دقيقه بسلم على جدتي ؛ واتجهت بسرعه لجدتها تسلم عليها وتحب راسها ويدها وتقدمت تسلم على حريم عمانها واخذوها البنات لغرفة ريما وامسكوها أساله
وريما طلعت تفتح الباب لانه يطق وكان ماهر اللي تكلم بعجله : وين يارا !!!
ريما ابتسمت : كم تدفع واطلعها لك ؟؟
ماهر : ريما مو وقت هبلك بسرعه قولي لها تجي
ريما : اوف طيب طيب ومشت لغرفتها وهي تبتسم : يارا تعالي
يارا : وش فيه
ريما مسكتها وسحبتها بسرعه لبرا وفتحت الباب وطلع بوجهم ماهر اسرعت يارا تحضنه وهو يبادلها باشتياق : كذا تسحبين شهر كامل !!
يارا : والله عشاني مسافره ولا يشهد الله اني ولهت عليكم
ريما : ماهر شكل اختك لحس مخها خالدوه
ماهر : ذاك بخليه يعض الارض عشان مره الثانيه ما يقطعها عنا كذا
خالد : كانكم تخططون علي !!
ماهر لف عليه بعد ما وخر يارا عنه : ايه وبنفذ كلامي واتجهه ماهر لخالد وهم يتمسكون ببعض ويارا بخوف عليهم : ماهر خالد تكفون فكو بعضضض
ريما بتشجيع : لااااا يا ماهر اجلده ذاك اليوم عيا يجيبها لنا يقول ما شبعت منها يعني الحين شبع منها وبيرميها
شهقت يارا من كلام ريما : لاااااا تصدقها ذي كذوووب
ماهر وهو يخبط بخالد وخالد كذالك وريما تشجع بحماس إلى ان قاطعهم دخول الجد وابو ماهر وابو ناصر وابو خالد وبعدو عن بعض ماهر وخالد وتقدم ابو ماهر يرحب بفرحه ببنته وتقدمت يارا تقبل رأس والدها ويده وحضنها : بشريني يا بنتي عساك بخير كيفك انت وخالد ؟
يارا : بخير يا يبه بشرني عن صحتك
ابو ماهر : الحمدالله عال العال بشوفتك ابتسمت يارا واتجهت للجد سعود تحب رأسه ويده وكذالك عمانها واخذو احوالها ودخلت ما بقى الا ريما اللي اتجهت لخالد وبضحك : وش شعورك وانت متصفق قدام زوجتك ؟؟؟
خالد بغبنه : بس لو يروح جدي وقتها بتشوفين شعوري الصدقي
ضحكت ريما ودخلت للبيت وماهر مشى مع خالد ياخذون احوال بعض ودخلو للمجلس ولقو مروان ونواف يلعبون بلاستيشن وخبط مروان نواف بصدمه : شفففف منووو جااااااء ؛ نواف لف راسه لجهة الباب وفز واقف بصدمه : خاااااالددددد
خالد ضحك وفتح يدينه لنواف اللي ركض وحضنه بقوه : يا كلب بعتني عشان وحده!!!!
ماهر صفق راس نواف : هييه الوحده ذي تراها اختي لا اهفك بيدي
نواف : مالت عليك وعليها وسحب خالد له : واخيرا جيت يا حبيبي
خالد بقرف دفه : الله يقرفك
نواف ضيق عيونه : شكل صدق علومك ضاعت من بعد الزواج
ماهر ضحك من هبل نواف وجلس يمسك يد البلاستيشن ويلعب مع مروان
خالد : لا والله نفس ما انا اللهم النفسيه تغيرت قبل كنت عايش معكم بنكد
راكان دخل وهو يصفق راس خالد : تقصد حنا نكد ؟؟
خالد ضحك وسلم عليه : اقصدهم كلهم الا انت
ضحك راكان وبدا ياخذ احواله وجلسو يتقهون ويسولفون
...
عند البنات وهم جالسين وحاطين القهوه والحلا ويسولفون وتحكيلهم يارا عن سفرتها لتركيا وهي متحمسه والبنات يتفرجون على الصور اللي مصورتها وميتين على الطبيعه بتركيا
راما : لاززززمممم اسافر نفسي ارسم وانا جالسه بمكان يهبل مثل كذا
روان : اذا تزوجتي ارسمي باللي تبينه ذا كلام الاهل
راما زفرت : مافي حل يعني ؟
شهد : الا حبي وتزوجي اللي تحبينه وروحي معه اللي تبين وارسمي اللي تبين
ريما وهي تاشر على شهد : معكم استشارية الحب والعلاقة العاشقه شهد بنت صالح
يارا : وش صار عليك يا شهوده
راما : الاخت مانعته ما تخليه يشوفها ولا يلمسها
يارا : لا يكون بينكم شي ؟؟
شهد : لا بس قلت له تعال واعقد وقتها اللي تبيه يصير بس هو ازعجه كلامي بس تخيلوووو وش يقول
البنات : ووووش
شهد : يقول معك اسبوعين تجهزين فيها نفسك لان بعد الاسبوعين الزواج
راما بصدمه : يووووه كيف يبينا نجهز كل ذا باسبوعين !!!
ريم : والله راكان مو طبيعي يعني ذا زواج مو حفله بسيطه عشان يسويها بسرعه
يارا : اكيد قالها كذا من الزعل
روان : بس الرجال حلف !
رهف بصدمه : والله حتى لو حلف مايمدي البنت تسوي حاجه وهو مستعجل مثل كذا
ريما : وعاد هو متهور يسويها والله
ترف : الله يعينك دامه عنيد كذا
شهد زفرت : لا ان شاء الله الله يلين عناده شوي وشذا احس مايمديني اسوي حتى جلسة ليزر
روان : ابدي من الحين
شهد : شكلي بسويها لاني ما اضمن قرارات راكان
يارا : الله يوفقكم ويقرب ما بينكم
شهد بابتسامة: امين يا قلبي
وكملو البنات سواليفهم وضحكهم مع بعض
..
عند تولين الجالسه لحالها وتحس بالطفش ولبست شرشفها وهي ناويه تروح بيت اخوها متعب جنب بيتهم بس بينهم جدار الحوش وتقدمت تضغط على الجرس وبعد دقيقه فتح لها متعب : يا هلا تولين عسى مو ناقصك شي
تولين بابتسامة : لا والله بس طفشت لحالي قلت اجي عند نوف نسولف
متعب : والله انا ماخذ نوف لبيت جدتها
تولين بعبوس : جيت بوقت غلط شكلي
جاهم صوت نوف : متعب حبيبي منو جاء ؟؟
متعب : هاذي تولين
نوف جاتهم وهي تعدل نقابها وشايله شنطتها : وش بغيتي يا قلبي ؟
متعب : كانت تبي تجلس معك عساس تسولفون مادرت انك رايحه
تولين : معليه الجايات اكثر
نوف : طيب عادي تروحين معي لبيت جدتي هناك البنات مجتمعين
تولين ناظرت بمتعب ولنوف وباحراج : لا والله ماردي اثقل عليكم روحي انتي
نوف بعناد : لا والله ما امشي الا رجلك على رجلي
متعب ابتسم : مو من مصلحتك تجادلينها لانها بتاكلك هي والتوائم اللي ببطنها
تولين كتمت ضحكتها : اجل بروح البس واسرعت تدخل بيتهم وتصعد لغرفتها تجهز نفسها
عند نوف اللي  تخصرت : شكلي باكلك انت ولا شرايك ؟
متعب ضحك وقرب منها وهو يبوس خدها : اموت فيك يا بنت الحلال
نوف ابتسمت وتورت خدودها : خلنا ننتظر تولين بسياره
متعب : طيب ومسك يدها واتجه للسياره يفتح لها الباب وركبت نوف وهي تبتسم وركب بعدها وجلسو ينتظرون تولين اللي مرت عشرين دقيقه ونزلت لهم وهي لابسه عباتها وركبت بالخلف ومشى متعب وتولين اللي مبسوطه بالطلعه لانها تطفش لحالها رسلت نوف لراما انها جايه ومعها تولين
راما : تولين جاااايه مع نوف بسرعه المل ينظففففف
البنات انتشرو كل وحده تنظف وتساعد الثانيه وترف تسوي القهوه وتجهز الحلا
روان : احس كثرانه جيات تولين ذي
ريم : وشفيها عادي البنت يازينها جمال واخلاق واسلوبها يفتح النفس وحتى ماشاءالله تساعدنا اذا شافتنا نرتب او نسوي حاجه
روان : ماشاءالله ان كان عاجبتك زوجيها ماهر
ريم : وليه ما تزوجينها انتي لمروان !!
ترف : مو منجدكم جالسات تتهاوشون تزوجون البنت مين !!!
ريم : شوفي اختك مهبوله
روان : عن الغلط انتي اكبر المهابيل
ريم : وانتي اكبر الدببه
روان شهقت بصدمه وناظرت لنفسها وهي تشوف ريم تضحك عليها : والله لوريك منو الدبه وركضت وراها وريم تضحك وتشرد عنها ووقفهم صراخ ريما : والله اللي ما تهجد للعن شكلها توي مرتبه ومكنسه الصاله
روان وريم وقفو جنب بعض بخرشه من ريما وترف كتمت ضحكتها على اشكالهم وراحت ترتب السفره حقت الضيافه وريما الحقتها
وروان تحارش بريم بصمت وريم كذالك
شهد وهي تاخذ جزمة والدتها وتفتح باب بيت جدتها وتحط الجزمه برا وترتب الجزامه لان شكلها كان مبعثر لكثرة الجزم ولمن خلصت نفضت يدينها ورفعت شعرها عن وجهها وانصدمت برؤية راكان يتأملها بابتسامة بادلته الابتسامة غصب عنها ودخلت بسرعه وهو عض على شفايفه يكتم ابتسامته
دخلت نوف وهي تخلع نقابها واستقبلها راكان يحيها : يا هلا ومسهلا منورة بيتنا
نوف ابتسمت وسلمت عليه : منور باهله يا قلبي كيفك شخبارك
راكان : بخير انتي بشريني عن التوائم عساهم بخير
تولين دخلت وهي تنصدم برؤية الرجل الوسيم اللي يسلم على نوف ويقاويها تأملت ملامحه الحاده والوسيمه وابتسامته الجميله نزلت نظراتها بسرعه لمن انتبهت لنظراته السريعه عليها وصد ولفت نوف : حياك يا تولين ادخلي
ومشت تولين تدخل معها واستقبلتهم الجده منيره ومشت بالدور نوف سلمت على جدتها وبعدين على امها وعلى زوجات عمانها وبعدهم البنات وتولين وراها تمشي وتسلم وبعدها فسخو عبايتهم وجلسو ياخذون احوال بعض ويتقهون ويسولفون وشهد اللي ناظرت لتولين بنظرات حاده واستغربت تولين من النظرات المريبه اللي ترسلها شهد
• فلاش باك •
شهد دخلت البيت بعد رويتها لراكان وابتسمت وهي تراقب راكان من الشباك وشافت نوف تدخل وتسلم على راكان اللي يرحب بها وكانو ياخذون احوال بعض الى ان لاحظت دخول تولين من باب الحوش و وقفوها ونظرات الاعجاب لراكان لم تخفى على شهد وبعدها رات راكان وهو يرفع نظره لتولين وبعدها نوف اخبرت تولين بان تدخل معها للداخل •نهاية الفلاش باك •
شربت تولين من القهوه وشهد بنفس نظراتها إلى احست بريما وهي تنغزها وتهمس لها : شفيك انتي من جيتي وانتي مو طبيعيه ؟؟
شهد : مالي خلق اتكلم وقامت و وجهها منزعج والكل لاحظها ابتسمت ريما : بروح اشوفها واجي ابتسمت ريم لتولين : والله انك منوره جلستنا يا تولين
تولين بابتسامة : بنوركم يا قلبي
ترف : ماشاءالله انتي خلصتي دراسه ولا باقي ؟
تولين : لا الحمدالله خلصت تخرج من تخصص اعلام وتوي اول سنه تخرج
روان : تخصصك ممتع
تولين : ايه والله الكل يقول بس سبحان الله ما عجبني لكن متعب اصر اني اكمل فيه
نوف : يعني جابرك ؟
تولين : بالعكس كان يبيني اصير مذيعه عشان تروح عني الرهبه
يارا : رهبة وش ؟
عند شهد اللي اخذت قارورة مويه وتشربها وهي ودها بشي يوقف نار قلبها المشتعله دخلت ريما وانصدمت من حالة شهد المزريه كان وجهها محمر وشعرها متناثر وتلهث وكانها تحارب شي ما قربت منها بقلق : انتي مو طبيعيه علامك !!
شهد ببرود : قلت مافينييي شييي ما تفهمين انتي !
ريما : الكذبه ذي اكذبيها على غيري مو علي والحين تكلمي من شفتي تولين وانتي وضعك مو طبيعي ابدا
شهد بغضب : الكلبه ذيك كانت تتأمل براكان والكلب كان يتاملها اصلا بستغرب لو ما ناظرها كلهم زي بعض يمشون ورا رغباتهم المعفنه
ريما انصدمت من كلام شهد المنفعل ولاول مره تشوف غيرة شهد : عشان كذا انتي معصبه ؟
شهد : لهدرجه شايفه الموضوع تافه !!! اقولك كانت تناظره باعجاببببب والزق ما قصر معها واعطها نظرات وسوا فيها انه محترم وصد بعد ما حفظ شكلها
ريما : هدي ولا تحطين حرتك بالبنت تولين والله مسكينه لعل وعسى ناظرته بالغلط ومحد معصوم عن الغلط
شهد بغيرة وحرقه : مراح تحسين بشعوري ولا راح تتفهميني إلى ان تجربين
ريما : جعلني لا جربت دامني بحرق نفسي كذا
شهد بغضب : ريما تكفين اتركيني لحالي مالي خلق لآي شي ولمصلحة الكل لا تخليني المح تولين عشان لا والله اجرم فيها الكلبه
ريما : طيب انتي حاولي تهدين وتصيرين ريلاكس
شهد بهدوء وراه عاصفه : طيب
ريما طلعت وهي تاخذ جوالها وترن على رقم راكان اللي كان يسولف مع متعب والشباب وقام واقف وهو يطلع من المجلس ويرد :يا هلا عساه خير وش سبب الإتصال
ريما : انشهد انك كنت رجال طيب وعصبي شوي الله يرحمك
راكان باستغراب : علامك انتي وش تقولين ما فهمت ؟
ريما : وينك انت ؟
راكان : بمجلس جدي
ريما : لازم تقابل شهد ولا بتخسرها
راكان بخوف : وش تقولين شــهــد علامهاااااا !!!
ريما : مافيها الا العافيه بس ؛ وقامت تقوله اللي صار 
راكان بصدمه : يشهد الله اني ناظرتها لاني استغربت الزول اللي ورا نوف واول ما شفتها غريبه صديت
ريما : اتمنى تفهمها لانها الحين هي تصارع غضبها كانت بتذبح البنت بنظراتها
راكان مسح على وجهه : طيب كيف اقبلها يمديك تساعديني؟؟
ريما تنهدت : وانا اقدر اقول لا ؟
راكان ابتسم : اجل طلعيها لي ورا الحوش
ريما : تم الحين تجيك وقفلت وهي تتجه لشهد دخلت ولقتها تربط شعرها وهي شارده بالذهن ابتسمت وسحبتها بسرعها وما اعطتها مجال تتكلم : ااااصصص لا تفتحين فمك
شهد اللي ما لحقت تربط شعرها كان متناثر ويتطاير بالهواء: يا بنتتتتت علامك انتييي وقفيييي دقيقه وين ماخذتني !!
بعد ما وصلو لورا الحوش ريما دفتها لحضن راكان وركضت وهي تنطنط بمشاغبه :الله يرزقني على كثر ما اساعد ودخلت البيت وراحت للبنات
عند شهد اللي تــجــمــدت بحضن راكان اللي شدها لصدره وغمض عيونه وهو يستنشق رائحتها المسكره بالنسبه له وتكلم بصوت خشن ومتخدر : ليه تغارين وانتي تدرين محد يسكن قلبي غيرك ؟؟
شهد بكت وهي تحشر وجهها اكثر بصدره : ما قدرت اتحمل وانا اشوفها تتاملك باعجاب وانت تبادلها قلبي انحرق من نظراتك لها ليه هااااه ليه يا راكان
راكان ضمها له اكثر : يا جعل الحرق بقلبي مو بقلبك يا روحي انتي تـكـفـيـن وقفي بكى عشان خاطري
شهد بعدت عنه وهي تمسح دموعها : احلف انك ما كنت قاصد نظراتك
راكان : قسم بالله ما كنت اقصد كانت نظره سريعه لاني استغربت الزول اللي ورا نوف ما توقعت انها بنت غريبه والله يشهد على كلامي سكتت شهد هتف راكان : وليه ذا الكلام من الاساس مو انتي قلتي انك واثقه فيني ثقه عمياء ولو انك حتى شفتي بعيونك
شهد بتبرير : ما قدرت ما اقاوم غيرتي حسيت بالنار تراع بقلبي حط نفسك مكاني وبتحس بنفس احساسي
راكان بانفعال : والله لذبحه واشرب من دمه لو بس فكر احد يناظرك بنظره
شهد رفعت حاجبها : وليه تذبحه شوفني ما ذبحت تولين ولا تبيني اذبحها عشان صدق يبرد خاطري !!
راكان : مين تولين !!
شهد بسخريه : معجبتك
راكان تنهد وهو حاس ان اليوم مراح يعدي على خير : شهد تكفين لا تغثيني بها انا حلفت لك وش تبين اكثر من كذا واكبر اثبات اني بتقدم لك ان شاء الله الاسبوع الجاي
شهد بصدمه : منجدددددد !!!!
راكان ابتسم : ااايه وبتصيرين حلالي وقتها اعرف كيف اطلع الاول والتالي منك
شهد ابتسمت : اجل مع السلامه نلتقي وقت كتب الكتاب ومشت بسرعه
راكان ابتسم وهو يتامل زولها بحب وكيف انها تنط من الفرحه : الله يجعلك من نصيبي والله يخلينا لبعض ؛ ومشى للشباب دخلت شهد للبيت وهي تبتسم وتلعب بشعرها قاطعها صوت ترف : شهوده تعالي ارقصي معنا قربت منهم وهي تشوف ريما ونوف يرقصون وادخلت معهم بالرقصه وهي تهف بشعرها ومها تشجع بنتها وريما تبتسم بخبث وهي عارفه انه رضت عن راكان ولا ما جات ترقص معهم وشهد ترمقها بابتسامة وقابلتها تراقصها ونوف جلست بتعب والبنات يضحكون عليها ورهف الوحيده اللي مقدره تعب نوف بالحمل
وتولين اللي لاحظت تغير نظرات شهد لها
ترف جاتهم من المطبخ وهي تمسك خصرها : وحده منكم تجيب نعناع
روان : حنا ماعندنا
راما : حنا عندنا روحي اخذي
ترف : منجدك انتي !!!
راما : وش فيه اخواني كلهم بالمجلس عند جدي مو يم البيت
ترف : اقول فزي على حيلك وجيبي نعناع بسرعه
راما : والله ماني قايمه انا تعبانه معي الدوره مالي خلق اروح رايحه وجايه
ترف : تخيلي لو احد طلع قدامي !!
راما : يابنت الحلال اخواني واعرفهم مستحيل يجون الحين والبسي انتي شرشفك
ترف زفرت وهي ترمي المخده بغيض على راما ولبست الشرشف واتجهت لبيت عمها ناصر وهي متوتره احد يطلع لها ودخلت بسرعه للبيت واتجهت للمطبخ وهي تفتح الثلاجه وتاخذ كيس النعناع واسرعت بتطلع مع باب المطبخ الخارجي وتصدم راسها بصدر شخص ويوم رفعت راسها انـصـدمـت : انت !!
نواف بنفس الصدمه : انتي !
_________________________
ان شاء الله البارت ينال اعجابكم 🫶🏻
ومعليش اذا فيه اي اخطاء
واسفه على التاخير بس حاولو تتعودون على التاخير
لان وراي كليه الاسبوع الجاي كله دوام وادعو لي بالتوفيق 🥺💞