"بسم الله الرحمن الرحيم "
•
•
•
و مليحةٌ فوقَ الحياءِ تجمَّلت
وتكملت بالحسنِ لما تبسمت
"غرفة ريم "
كانت مستنده على سريرها وتتفاجئ بدخول ماهر المفاجئ رفعت نظرها له وهي تشوفه يجلس امامها وينظر اليها بنظرات وكانه يخترق روحها !
ريم بتوتر : وشفيك ؟
ماهر : وش بينك وبين سامي ؟
ريم بصدمه : وشهو !!!
ماهر بحده : سالتك بهدوء ردي علي بدون لف ودوران !
ريم بتوتر : مابيننا شي وربي !
ماهر : بفهم الحين انه غضب سامي واللي كان راح يذبح رامي عشانه خطبك وتقولين مابينكم شي !
ريم : ماهر مو منجدك تشك فيني !!
ماهر بحده : من حقي اشك وانا كاشف حركات سامي كلها واول موقف بالمستشفى يوم كنتي تعبانه هو نام برًا المستشفى ويوم سالته قال سيارته متعطله يلعب علي انا ماهر ولد راشد ! يحسب اني مو كاشف لعبته !
ريم انصدمت هل منجد هو نام برا عشانها ! قاطع افكارها ماهر : واليوم وانفعاله كشف كل اوراقه !
ريم رفعت حاجبها من حده ماهر اللي ما اعجبتها : ما سمعتك تقول ذا الكلام لنفسك يوم كنت تلف وتدور حولين الجازي وتاخذني معك وعايش دور العاشق الولهان يعني حلال عليك وحرام علي ؟
ماهر مسك فكها بقوه : كنت احبها من بعيد لبعيد ما قربت صوبها !
ريم بحده : اجل كيف حبيتها دامك ما قربت صوبها ؟
ماهر صر على اسنانه : ريم لا تحطين راسك من راسي انتي اللي بعدين بتزعلين ! ريم : اجل لا اشوفك تجي تسوي علي حركات المرجله ذي !
ماهر بعد عنها وهو يالله يتحمل كلامها : ريم افضلك ما تستفزيني !
ريم بقوه : يقولون اللي بيته من زجاج لا يرمي الناس بالحجر !
ماهر التفت عليها يناظرها بحده وطلع تاركها تبتسم بخفه ..
.
عند سامي اللي جالس بديوانه شبابيه وجالس فيها وهو يعسل وافكاره مشغلته
وقاطعه دخول راكان اللي جلس جنبه : توقعتك هنا
سامي تجاهله وهو بنفس وضعيته يعسل تنهد راكان : سامي والله اني اسف ما توقعت بيصير كذا !
سامي متجاهله بالكامل وزفر راكان : ياولد اهرجك !
سامي بحده : راكان انقلع عني لان وربي واصله حدي يعني احمد ربك لو ما انفجرت عليك !
راكان تنهد : والله من حقك بس طالبك تسامحني واهلي بيكلمون ريم عشان توافق
سامي : صدقني لو وافقت على ذاك الخ** ث وربي لذبحه !
راكان : الله لا يقوله يا ولد استهدي بالله
سامي ناظر لراكان : استهدي بالله ! صدقني لو كنت بمحلي وشفت اللي تحبها وتعشقها واحد بيخطبها قسم بالله ما يهنى لك نوم وفز واقف تارك راكان يحس بحرقه بقلبه طبعًا مراح يرضى يصير فيه مثل سامي وقام يلحقه
.
شهد الجالسه مع ترف وروان وراما وقالت لهم اللي صار والكل منصدم
روان : بس حماس اثنين يتنافسون عشانها !
ترف : روان مو وقت تخيلاتك
شهد : والله حرام المفروض ريم توافق على سامي لانه صدق يحبها
راما : مين قالك ؟
شهد : راكان كشف سامي وكانو على وشك الهوشه بس ربي ستر وقرر راكان يساعده بس ما توقع الامور توصل لهنا !
روان : اسوء شي انك تحبين ياختي ريحي مخك من الهم !
ترف بسخريه : انتي اخر وحده تتكلمي ذا الكلام !
روان كشرت بوجهها : وليه ان شاء الله ؟
ترف : انتي عارفه !
شهد : فيه شي جديد وانا معرف ؟
ترف : قصدك وش ما صار ؟؟؟؟
شهد ضحكت بحماس : اوووووه اسدحي لي كل شي يلاه
روان تكتفت : وش اقول يعني اني رحت وسويت حرب بمكتب الغبي عشانه يضحك ويسولف مع ممرضه ؟
راما ضحكت بصدمه : اوف اوف متى صار ذا !!!
ترف : قبل اسبوع اتوقع
شهد بصدمه : لا منتي صاحيه وليه ذا كله وانتي ما تحبينه !
روان : غرت غيرة الصداقه
راما : كل ذا وصداقه ؟؟؟
ترف بضحك : انتي شايفه !
روان : انتم وش تبون الحين !!!!
شهد بضحك : مانبي شي بس نبي نعرف روان وش تحس هنا وهي تاشر على قلبها
روان بسخريه : تحسبيني خفيفه مثلك انتي وياها وياها وياها !
شهد وترف انصدمو ولفو على راما : وياها ؟؟
روان ابتسمت بخبث وقامت : راما تفهمكم ومشت
راما بارتباك : شنو افهمه هيي تعالي هنااا !!
شهد : بتتكلمين ولا سحبت لك لسانك !
ترف : وخربنا لك رسماتك !!
راما بتوتر : والله روان ماعندها سالفه بس تخترع كذبه عشان تهرب
شهد : وليه مرتبكه ؟
راما بتوتر : من حركاتكم !!!
ترف : كذابه !
وبدو البنات يحشرون راما إلى ان اعترفت لهم بان مروان حاصرها وقالت لهم عن كلامه ..
•
الجد سعود لف على ابو خالد : مخلد
ابو خالد : سم يبه ؟
الجد سعود : سم الله عدوينك ابيك تقول لابو حاتم باننا بنجيه بكره بعشانا عشان نكفي باشر باللي جاه
ابو خالد : ابشر زي ماتبي
ابو نواف : وليه ماتعزمه عندنا ؟
الجد سعود : نروح لهم افضل اهله مراح يجون عشانهم تعبانين
صالح : احسن ما تسوي يا يبه
نواف همس لخالد : وين ماهر وراكان مالهم حس اليوم
خالد : علمي علمك ما شفتهم
دخل ابو ماهر : السلام عليكم
الكل : وعليكم السلام
جلس ابو ماهر جنب ابوه : عندي موضوع بقوله لكم
الجد سعود : وش عندك ؟
ابو ماهر : اليوم جاني الدكتور رامي كان هو مسؤول عن وضع بنتي ريم من تعبت وماقصر معنا وجاء يتقدم لها على سنه الله ورسوله بس مهب هو الوحيد
ابو خالد : فيه احد ثاني بعد خطب ؟
ابو ماهر : ايه جوني عيال مطلق متعب يخطب لاخوه سامي ريم
ابو نواف : الله الله وش صملت عليه ؟
ابو ماهر : قلت لهم الشور شور البنت تستخير وتعطيني خبر وبعدها نرد على الناس
ابو نواف : لا عاد يا ابو ماهر غلطت ما يحتاج تاخذ شورها اختار انت الرجال وهي ترضى به
ابو ماهر : معليك انت عندك راما ان شاء الله لاجاء نصيبها عدل غلطتي
رد ابو ماهر اصمت ابو نواف اللي زفر بغيض
الجد سعود : الله يوفقهم واللي فيه خير بياخذها
ابو ماهر : انشهد
نواف : سامي ؟ غريبه
خالد : الله يوفقه وعاد ماندري تكون من نصيب من
نواف : اي والله
.
دخل سامي البيت وهو متجاهل ندى تولين عليه ودخل غرفته وهو يقفل الباب بقوه وشق الثوب من ياقته يحس بكتمه واسرع يخلعه ويجلس على السرير وهو يمسك راسه بقهر يحس قلبه جالس يغلي بنيران الغيرة والحسره هو منقهر اكثر لمن يتذكر كلام ريم يوم كانت تقوله انها ماتبيه وانها ما تفكر فيه عند تولين تحت كانت متضايقه على اخوها ولكن انتفضت برعب يوم سمعت صوت التكسير واسرت تتصل على متعب الجالس وبحضنه غيث يلعبه ورن هاتفه ونوف اللي توها حاطه القهوه رد متعب وجاه صوت تولين المرتعب : متعبب الحق سامي قاعد يكسر كل شي بغرفته ماقدرت ادخل عنده
متعب بصدمه : وشهو جاي جاي وقفل وهو ينزل ولده ويركض جاعل من نوف تقلق ودخل بيت اهله وركض لغرفة سامي وتولين لحقته وطق الباب : سامي !!! ساميي رددد علييي وافتح الباب !!!
سامي : انقلعوووو عنييي
متعب : سامييييي قلت افتح الباب لا اكسره !!
تجاهله سامي وهو يرمي الفازه بقوه وعلى اثرها كسر متعب الباب وتولين اللي شهقت برعب من منظر الغرفه الفوضويه متعب لف على تولين : روحي للصاله لا توقفين هنا هزت راسها بخوف ونزلت ودخل متعب : سامي وش قايل لك استهدي بالله مراح تاخذ بنت الناس وانت بذي الحاله !
سامي بصراخ وغضب : مستحيللللل اقبلللل احد غيري ياخذها !!!!
فاااهمممممم
متعب وهو يحاول يهديه : فهمت بس هدي
سامي بنبره منكسره : متعب تكفى اوقف معي كلم ماهر ما يخليها تقبل بذاك الكلب سو اي شي !!!
متعب حضنه بقوه : ابشر بس الراي راي البنت مابيدي شي !
سامي دفعه بقوه : والله يا متعب لذبحه لو اخذها والله ما اخليه يدخل عليها فاهم
متعب توتر من غضب اخوه اللي لاول مره يشهد عليه هو يعرف سامي سمح ولا يعصب بس فعلا الحين طبق مقوله اتقى شر الحليم اذا غضب !
نطق متعب : سامي هذه مو كلام لا تخلي الغضب يتملكك !
سامي ضحك بغضب : لا يتملكني عشانك منت بمكاني تقول ذا الهرج
متعب سحبه بقوه وسامي يحاول يتفلت منه بس دفعه متعب داخل الحمام وهو يشغل مرش الماء وتساقط الماء على سامي ومتعب اللي يحاول يثبته : بتتنقع هنا بالماء لين اللي براسك يهدى فاااهمممم طلع متعب تارك سامي يجلس تحت الماء بشكل هادي وكانه يخطط لشيء ما
طلع متعب تحت نظرات تولين : متعب وش فيه ؟
متعب وهو يمسح المويه اللي عليه : خلي عينك عليه
تولين : طيب وطلع متجهه لبيته وانفجعت نوف على شكله : وشفيك علامك متغرق بالماء ؟
متعب تنهد : اغير ملابسي واجي اقولك
نوف : طيب وجلست تنتظره
عند تولين دخلت غرفة اخوها وهي تسمع تساقط الماء واسرعت ترتب الغرفه مع العامله اللي تساعدها
متعب جاء لعند نوف بعد ما غير ملابسه وجفف شعره نوف بفضول : متعب اعجل علي وشفيه ؟
متعب جلس وتنهد : اليوم رحنا انا وسامي ومعنا راكان ولد عمك نخطب بنت عمك راشد لسامي اخوي
نوف بصدمه وفرحه : وليه ما علمتني الا الحييين ؟
متعب : لان صار شي مو بالحسبان !
نوف باستغراب : وش صار ؟
متعب : راكان ما كلم ماهر ويحسب ان ماعند عمه احد بس يوم دخلنا انصدمنا برجال كبير بالعمر ومعه ولده والواضح بالعشرينات يعني بسنة سامي واللي صدمنا اكثر هو انهم جايين يخطبون والولد اسمه رامي ودكتور وهو اللي كان مسؤول عن حالة بنت عمك يوم تعبت
نوف شهقت بصدمه : ياويلييي وش صار بعدها
متعب : بدا يخطب الشايب لولده ويالله مسكت المصفوق سامي ولكن باغتني يوم فز وخطبها قدام ابوها واخوها والرجال و ولده
نوف بابتسامة مصدومه : يحبها ؟
متعب ناظرها ببسمه : ايه فجر راسي لو ما اخذها بيذبح الرجال
نوف صفقت بحماس : يالله حماس بس وش رد عمي ؟
متعب : عمك قال الشور شور البنت وبتفكر وبعد كم يوم بيرد علينا
نوف : يارب تجعلها من نصيب سامي
متعب : امين يارب وضعه مو عاجبني سامي ذا
نوف تنهدت : والله يكسر الخاطر يعني يشوف البنت اللي يحبها تنخطب قدامه !
متعب ناظر لنوف وهو يتذكر تعابير وجهه ماهر بخطبته على نوف وحس انها رجعت لاخوه بس ابعد نظره عنها وهو ياخذ غيم ويبوسها بحب : الله يكتب اللي فيه الخير نوف : امين يارب
.
" بيت ابو حاتم "
كانت دامه بغرفتها عشان فيه تصليحات بالمطبخ حق بيتهم ومحشوره بغرفتها اتجهت وهي توقف عند الشباك وتتذكر كلام ريان لها ( لعد ترقصين باليل لانك غافله عن عيون الذيب ) وسعت عيونها بصدمه معقوله يشوفها من هنا !
مستحيل هو مو راعي ذي السواليف انه يراقبها من شباك غرفتها ! وشردة بشباك غرفته مو منتبهه له وهو يناظرها بهدوء انتبهت له يوم شافة وقوف شخص بالشباك واسرعت تسحب الستاره وهي تمسك قلبها اللي تسارع نبضاته
وابتسمت : طلع صدق يراقبني !
ريان قاطعه دخول راما بابتسامة خبيثه : امي تبيك ضروري وهي بغرفتها
ريان باستغراب : وش فيه ؟
راما : مدري
ريان مشى متجهه لغرفة امه ودخل وهو يشوفها امه الجالسه على كنبه وريفان الصغيره تلعب بالعابها بالارض دخل وجلس جنبها : وش بغيتي ؟
ام نواف ابتسمت له ومسكت يده بحنان : بتكلم معك بموضوع بخاطر فيه من زمان بس سكت عشانك هنا انغز قلب ريان وهو يحس امه بتفاتحه بموضوع الزواج وتنهد : اسلمي ؟
ام نواف ابتسمت بهدوء: بخاطري اشوفك معرس ولابسه البشت وابخرك واغطرف لك وازفك على عروستك لا تحرمني ذي الفرحه
تنهد ريان : يمه الموضوع ذا مو مقفله من زمان معك !
ام نواف : لهدرجه ترفض باللي خاطري فيه !
ريان مسك يدها وباسها : يمه ما قصدي كذا بس اخاف ورب البيت اخاف اعرس ويصير ما صار بالمرحومه !
ام نواف تنهدت : ليه تقول كذا هذه يوم المرحومه ولا نقدر نرده !
وليه تخاف وفوقك رب ماينسى احد من عباده
ريان بهدوء: مراح القى وحده تهتم بريفان وتخاف ربها فيها
ام نواف : والله فيه فيه اللي تخاف ربها وتحبها ومتربيه وربي عاطيها الجمال والذرابه والزين فهم ريان انها تقصد دانه وناظر لامه : ومين ذي ؟
ام نواف : بنت ابو حاتم دانه بسم الله عليها وانت شاهد عليها هي اللي انقذت الورعه من الغرق رمت نفسها ولا فكرت بالعواقب اهم شي عندها انه تطلع ريفان من المسبح ريان بهدوء: موافق ! بشرط تقولين لهم من قبل ان بنتي بتكون بامانتها
ام نواف بفرحه : ابشر ابشر هذه اكيد بنقوله قام ريان : زين بس مو الحين خلي يومين كذا واعطيك خبر تروحين لهم
ام نواف : زين اللي توده
طلع ريان ولقى بوجهه راما اللي سوت نفسها تمسح الجدر : ايه كملي كملي عساس ما سمعتي شي ؟
راما ضحكت : ليه وش صار !
ريان رمقها بنظره ومشى تاركها تدخل عند امها تسالها
.
"بيت ابو ماهر "
••غرفة ريم ••
كانت روان وراما اللي اتصلت عليها روان انهم بيروحون لعند ريم وكانو يناظرونها بابتسامة ضحكت بخفه ريم : شهدوه اكيد نشرت الخبر ؟
روان : يعني صدق اللي قالته بالقروب ؟
ريم بهدوء: ايه
روان بحماس وهي تصفق : يايييي يحمسسس مثل الافلام يتهاوشون عليك !
ريم قلبت عيونها : روان قلتيها بالافلام بس بالحقيقه غير
راما : وليه غير وهم اثنين اللي خطبوك
ريم : مدري ممكن ارفضهم اثنينهم
روان : بلا استهبال اثنينهم يبونك اختاري واحد منهم
ريم : انا قلت يومين وارد عليهم
روان : اوف الحين ابو مريله ليه مايجي يسوي افلام كذا معي اهخ
راما : مين ابو مريله ؟
ريم ضحكت بقوه : تقصد تركي
روان عفست وجهها من طاريه : الله يقلعه
راما بصدمه : اوف اوف ليه حاقده
ريم : عشانها شافته يضحك مع وحده
راما ضحكت : ياحلوك كل ذي غيره ؟؟
روان بغيض : مالك دخل فكري بمروانك اللي يتغزل بالرايحه والجايه
راما بتوتر : شدخلني فيه !!
ريم شهقت : فيه شي وما ادري عنه !!
روان ابتسمت : اايه
راما ضربت روان : لا مافييييي ذي تكذب يا كذابه
روان ضحكت : توي ما قلت شي !!!!
ريم بحماس : قولووو لييي يلااه
راما كشرت بوجهه روان : ترا ذي كذابه يا ريموه لا تصدقينها هي واخوها المتحرش
ريم بصدمه : متحرش !!!
روان بقهقه نغزت راما بكتفها : الحين صار متحرش ؟!
راما رمقتها بغيض وضحكت ريم وتكلمت : وراكم شي تكلمو
روان ابتسمت : هذه يا طويلة العمر مروان حشرها والواضح عجبها الوضع
راما شهقت بصدمه وهي تضرب روان الميته ضحك على تعابيرها : كذاااابببه
ريم ضحكت : اوف اوف يا راما توقعتها من الكل الا منك !
راما بخجل واحراج : والله كذابه ما عجبني وكنت بصيح وهو كلب مثلها نسختها كان نذل وحقير هو وانفاسه مثل انفاس ثور هايج!!!
ريم وروان ضحكو بهستيريا على راما المغطيه وجهها
مسحت دموعها ريم : حسبي الله على بليسكم ذبحتوني ضحك
روان وهي مستمره تضحك : ياربيييييييي ثثثثوووورر لايق مره
ضربتها بحقد راما : خلاص اسكتيييي
روان حطت يدها على فمها وهي ميته ضحك
قهقة ريم : مو صاحيه مراح تسكت
راما : اعرفها سامجه وتافه
روان : خلاص بسكت عشاني تذكرت شي
ريم : وشهو ؟
روان : اليوم تعبتي قالت لي شهد
ريم تنهدت : جاني ضيق من سمعت اللي قالته
روان : يعني بتروحين المستشفى ؟
ريم : لا وعع كارهتها وازيد اروح للسيد !
راما : مين قصدك ؟
ريم : الدكتور رامي
راما : اها
روان : اقول بتروحين غصب !
ريم بخبث : ليه اشتقتي لتركي ؟
روان بكبرياء: لا طبعا بس طفشانه ومنها نتطمن على وضعك
ريم ابتسمت : ماني رايحه
روان : ريييييممم
ريم ضحكت : اعترفي !
روان زفرت : خلاص رايحه عشان اشوف التيس وش يسوي
راما وريم : هههههههههههههههههههههه
ريم : طيب بكلم ابوي
روان : يمه ليه عمييي !!!
ريم : متهاوشه مع ماهر
راما : يوه ليه
ريم : سبب تافه
روان : لا بالله عمي مراح اخذ راحتي اذا هو موجود
ريم : دبري امرك اجل
زفرت روان
.
"اليوم التالي "
بغرفة سامي اللي صحى وهو يلبس بنطلون اسود وتيشيرت رمادي وكاب وتعطر وطلع وهو يشوف تولين مسويه القهوه وتتقهوى ومن شافته فزت : سامي تبي تاكل ؟
سامي بهدوء: لا مالي نفس بطلع
تولين : طيب وطلع شغل سيارته ومشى رن هاتفه باسم راكان زفر بقوه وهو يرد : نعم !
راكان عض شفايفه من نبرته : وعليكم السلام يا طيب وينك فيه ابيك
سامي : رايح لجهنم تجي معي ؟
راكان بابتسامة : مشينا بس وينك
سامي مر من عند المستشفى وشاف رامي اللي نازل من سيارته ويلبس الابكوت حقه : عند الكلب رامي وقفل راكان نغزه قلب وفز تحت ندى شهد له بس طلع مستعجل وهو يركب سيارته ويدعس بنزين باتجاهه المستشفى وهو المكان الوحيد اللي راح يشوف فيه رامي
نزل سامي بس طلع بوجهه تركي : يامرحببااااا من زمان عنك يا سامي !
سامي ابتسم بمجامله : هلا والله كيفك ؟
تركي : الحمدالله بخير الا بشرني عنك وعن احوالك
سامي : بخير اللهم لك الحمد سامي لمح رامي اللي شايل اغراض معه وابتسم بسرعه لتركي واسرع يوقف امام رامي اللي رفع نظره له : خير ؟
سامي بحده : من وين بيجي الخير ان كان ذا وجهك
رفع حاجبه رامي : لا يا شيخ تعرف تنقلع عن وجهي ؟!
سامي مسكه من ياقته واسرع تركي يمسك سامي بس كان مثبت بياقة رامي ونطق بحده : والله تبطي عظم تاخذها !!! تركي : يا جماعه استهدو بالله
رامي مسك يدين سامي وابتسم بكل استفزاز : والله لاخذها وعينك تشوفني ازفها لبيتي ضرب سامي راسه بخشم رامي اللي تراجع لورا بالم بسبب ضربة انفه اللي صار ينزف دفع تركي سامي عن رامي : سامي !!!!
سامي ابتسم برضى : نشوف !
نزل راكان بسرعه وهو يشوف رامي الماسك انفه وتركي يحاول يوقف له النزيف وسامي اللي يبتسم مسكه بسرعه : وش سويت !!!
سامي : كسرت خشمه بس باقي ما كسرت له باقي عظامه
راكان سحبه : امش امش بس وسحبه لعند السياره وهو يقولها عن السالفه من البدايه ..
.
ابو ماهر : ريم وينك ؟
ريم : جيت جيت
ابو ماهر وهو يناظر بروان اللي واقفه بعبايتها ونقابها وكانت جاهزه : شوفي روان جهزت قبلك وانتي اللي بتروحين باقي !
ريم نزلت وهي تتنهد : جيت جيت
ماهر نزل وهو صاد : يبه انا بوديها
ابو ماهر : ياليت والله كان عندي مشوار بس عشانها كنت بوديها
ريم رمقة ماهر بهدوء وهو ينطق : لا خلاص استريح انا اخدمك يلاه ريم مشينا
ريم تنهدت ومشت وهي وروان وربكو مع ماهر اللي شغل السياره ومشى متجهه للمستشفى: ليه يوم تعبتي ما قلتي لي ؟
ريم مكتفه يدينها : منت فاضي لي جالسه تحلل المواضيع ورمقته بنظره فهمها وهو يتنهد ومسك يدها بحنان : براضيك بقهوه لو سمح الدكتور
ابتسمت ريم : احلف !
ماهر ابتسم : والله واكبر كوب بعد ولو ودك رحنا كوفي
روان بحماس : ياليت نروح كوفي افضل هنا القهوه لها طعم
ضحكت ريم : ملقوفه
ماهر : طالعه على اخوها
روان : مره يضحك
ضحك ماهر وريم كذلك عليها
.
تركي بعد ما وقف نزيف انف رامي وحط له قطنه طلع متجهه لسامي وراكان وسلم عليه : عسى ماشر وش بينكم ؟
سامي : شي خاص
راكان تنهد : تروك ذا ذابحني من اليوم اقنعه يمشي بس رافض
تركي : اجل تفضلو لمكتبي تراني فاضي
راكان : مكتبك افضل من الجلسه بالحر ذا
تركي ابتسم : حياكم ومشو مع بعض متجهين لمكتب تركي اللي دخلهم وطلب لهم قهوه وبدا راكان يقول عن صدفه رامي وسامي على خطبتهم بنفس اليوم ونفس البنت وسامي اللي ماسك نفسه بالقوه
تركي : اوبا الموضوع حساس وما الوم سامي
سامي : زين كنت بحط عليك خط احمر لو انك صفيت مع خويك التبن
تركي كتم ضحكته : لا والله هديها بس وتنحل باذن الله
.
وقف ماهر ونزلو الكل وجالسين ينتظرون لانهم قالو ان الدكتور رامي مشغول شويه وهو كان مصدع من الم انفه وبعد عشر دقايق نادى عليهم ودخلت ريم ومعها ماهر : السلام عليكم
فز رامي : وعليكم السلام تفضلو
جلست ريم وامامها ماهر ورامي اللي اكلها بنظراتها وماهر ما كان عاجبه بس ساكت بيشوف اخرتها معه لان من بعد سالفه سامي بدا ينحاز له لانه اكثر واحد يعرف اللي يمره فيه لكن انتبهه لانفه المضروب : سلامتك ؟
رامي صر على اسنانه وابتسم غصب : الله يسلمك كنت ماشي مع باب المستشفى ورجع علي الباب
ماهر : ماتشوف شر
رامي : الشر مايجيك بس الانسه فيها شي ؟
ريم قلبت عيونها وماهر ابتسم بخفه : بخير بس البارح جاها الم خفيف وموعدها اليوم
رامي : ااها صح تفضلي معي على السرير قامت ريم وهي مغصوبه وهي تجلس ويبدا كالعاده يفحصها .
عند روان اللي اتجهت لمكتب تركي وفتحت الباب بقوه وهي تلمح ظهر راكان ورفع نظره لها تركي اللي انصدم وسامي ناظرها باستغراب وجاء بيلف راكان بس اسرعت تقفل الباب بقوه روان وتركض بخوف : يييمممهههه
راكان : وجع وجع مبن ذا الغبي اللي يقفل الباب كذا !
سامي زفر : قصدك مريضه شكلها
تركي فرك يده بربكه : تلقاها مريضه غلطانه وعاد انا تعودت عليهم من كثرتهم
راكان : الله يعينك عليهم
تركي : امين
سامي : انا ماشي
تركي : ليتكم دايم تزوروني كذا
سامي : ان شاء لله بزورك كثير
راكان : الله لا يقوله
وضحك تركي وهو عارف مقصد راكان وسامي اللي طلعو وهو خلفهم
وروان اللي اول ما وقفت عند باب مكتب رامي وطلعون بوجهها ريم وماهر وخلفهم رامي ومسكت روان ريم وهي تهمس : بغيت اجيب العيد !!
ريم حست بارتعاش روان : وشفيك ؟
روان بهمس : راكان كان بمكتب تركي
انصدمت ريم همست : يمه لا يكون شافك !!
روان بخوف : لا الحمدالله
رامي صافح ماهر : في امان الله
ماهر : مع السلامه واشر للبنات يمشون
واول ما طلع سامي وراكان وتركي ومشو بس لمح سامي رامي وعصر يده بقوه تنهد راكان : سامي مشينا !
رامي ابتسم وهو يشوف سامي واشر على ماهر والبنات اللي خلفه التفت سامي وانصدم وصر على اسنانه ومسك تركي : هدي رامي مريضه يحب يستفز بس طنشه
رامي اقترب منهم وابتسم : واضح من نصيب من لا تتعب نفسك
سامي دفع تركي ومسك رامي من ياقته ورامي استغل غضب سامي وضرب راسه براس سامي يرجع حقه وهنا الممرضات صرخو بخوف من المنظر
والتفت ماهر والبنات وانصدمو برويتهم لتشابك سامي ورامي وكان راكان وتركي يحاولون يفكون بينهم
سامي وهو يخنق رامي وانفه ينزف : والله لذبحكككك ياا كلبببببب !!!
شهقت ريم بخوف وهي متمسكه بروان اللي مبسوطه اول مره تشوف هوشه قدامها : اووح اعطاه بكس !!
ماهر اسرع يفك بينهم
رامي بضحك مستفزه وهو يشوف سامي اللي ماسكه راكان وتركي يبعده : قايل لك بزفها لبيتي وانت تناظر بس معليك برسل لك عزيمه
سامي صرخ بغضب : تخسييي وتعقب يا كلببببببببب
راكان تنرفز من كلام رامي وفك سامي عليه اللي اسرع يضرب رامي بكل ما اعطاه الله ورامي يحاول يردعه بس غضب سامي كان اقوى منه وماهر اسرع يمسك سامي ويبعده عن رامي واصواتهم الغاضبه كانت مكتسحه المستشفى وجو حراس الامن يبعدونهم عن بعض
ماهر بغضب : راكان ماقدرت تفكهم من بعض !!!!
راكان بحقد : يستاهل رخمه ذا يتكلم بعلوم اكبر منه
ماهر زفر بقوه وهو يرمقه بحده والتفت على سامي : وشبلاك !
سامي مسح انفه وهو معصب : ذا يسولف بكلام مهو صاير ! يقول انه هو بياخذها !!!
رامي بصراخ وانفعال : ايييه باخذها طرق عنك وعنها وعن اكبر راس فاهممممممممممم !!!!
رفع حاجبه ماهر وهو يلتفت على رامي : وعنها ؟
رامي يحاول يضبط اعصابه : ما كنت اقصد كذا !
ماهر بحده : مالك نصيب عندنا وكنا ماجلين الموضوع عشان العيب بس من اليوم لا تشوفك عيني فاهم !
رامي انصعق وابتسم سامي بفرحه وهو يناظر لراكان اللي يهمس : شيل الابتسامه ذي لا يردك انت بعد !
سامي كتم بسمته وريم اللي كانت منصدمه من اللي صار وروان اللي كانت بتطير من الوناسه من الهوشه ولف ماهر على سامي ومشى تاركه يبتسم وهو يناظر لرامي ببسمه منتصره ورامي اللي مسكوه الامن قبل لا يهجم على سامي اللي مشى وخلفه راكان وتركي اللي صرخ : راكان بيننا الو
راكان اشر له بطيب وركبت ريم وروان وماهر وقف على ندى سامي ولف عليه يناظره اقترب سامي : المعذره ما بغيت يصير كذا قدام الاهل
ماهر بهدوء: حصل خير وطلع من جيب ثوبه منديل ومدها عليه : امسح خشمك
سامي ابتسم واخذها منه يضمد نزيف انفه : مشكور
ماهر : العفو استاذن منك
سامي : مع السلامه وركب ماهر وابتعد سامي ومشى ماهر تارك خلفه سامي اللي حضن راكان : رفضه !!!! تكفى قولي مو حلم !!
ضحك راكان : لا مو حلم
ضحك سامي وابتعد عنه ومشى وراكان كذلك
بسيارة ماهر كان الصمت يعم المكان وتكلمت روان : يا اخ ماهر لا تنسى الكوفي ! ماهر اللي راح من باله من المضاربه اللي صارت : طيب
ريم كانت تحس بقلق وهي تتذكر انف سامي اللي ينزف بسبب المضاربه ..
.
عند سامي اللي جالس مع راكان بالديوانيه : وش تتوقع يردون علي ؟
راكان ابتسم : الصراحه مدري بس شكل بعد الهوشه بيطردك انت بعد
فز سامي : اقول اكل تراب بس وشهو يطردني وربي لموت !!!
راكان ضحك بقوه : وضعك وربي مو طبيعي
سامي بغيض : اضحك اضحك وش عندك انتي خلاص تزوجت اللي تبيها ولا همك وكل اللي صار معي بسببك !
راكان تنهد : صدقني بيجي اليوم اللي تجلس معي وانت متزوجها ومريح مخك ومخي وقتها بهج عنك
سامي : ياررررببببب اصلا بس اتزوج والله ما تشوفني
راكان : يهب يالمصلحجي !
راقص سامي حواجبه بغيض لراكان
.
دخل ماهر الكوفي وجلس بعيد عن البنات اللي جلسو وروان مسكت يد ريم اللي سرحانه : وشفيك ؟
ريم : مافيني شي
روان : مدري احسك مو على بعضك
ريم تنهدت : يا روان احس بالي كله عند سامي ليه مدري !!
روان ابتسمت بحماس : تحبينه ؟؟؟
ريم : لاا
روان : اجل معجبه فيه !
ريم تنهدت بقوه : امكن اليوم حسيت بالخوف يوم شفت رامي ضربه على خشمه
روان بحماس : الله احس بيصير عرسكم رومنسي وتنزلين بفستان ابيض ونعومي وهو يستقبلك وينزلك مثل الامي اااااه قرصتها ريم : عشتي الجو مره محد يعطيك وجهه !
روان كشرت وهي تحك مكان القرصه واكلت من الحلا وهي ترمق ريم اللي ترتشف من قهوتها
اشر لهم ماهر يقومون عشان بيمشي واسرعو البنات ياخذون شنطهم وكل وحده اخذت كوب قهوتها وطلعو مع ماهر اللي ركب السياره وهم كذلك ومشى للبيت
.
عند بيت ابو حاتم طلعت دانه مع سواقهم وهي بتروح السوق تقضي لها اشياء وكانت حايسه بنقابها اللي اخترب وزفرت وهي تطلعه وتلف طرحتها زين
السواق : مدام دانه انتا مره تطول سوي عجله
زفرت دانه : يوسف لو سمحت اتركني براحتي وهسمت مدري انا المدام او هو
ريان طلع رايح للعزبه ولابس ثوب وشماغه راميه على كتفه باهمال وهو ينفض شعره بخفه ولف من سمع بصوتها ولقاها مكشفه وهي تكلمه وشاف العامل يدخل البيت واسرع وهو يمسكها من يدها بقوه : تغطي !!! وش بلاك مجلعه قدام خلق ربي !
دانه بربكه من نبرته الغاضبه : عادي تراه عامل
ريان بحده وشد يدها بقوه : والعامل مو رجال غطي وجهك لا والله تشوفين نجوم الليل بالظهر !
ارتعشت دانه وغطت وجهها بسرعه وتركها ريان وهو يتجهه لسيارته وشاف العامل يخرج وبيده اسطوانة الغاز ويحطها بالسياره وتركب معه لحالها ! حس ريان بشياطينه تقوله يروح ويسحبها من السياره ويركبها معه !
قاطع افكاره الناريه وقوف سيارة ماهر اللي نزل ونزلو روان وريم ودخلو وماهر اتجهه لريان اللي يرمق سياره السياق بنظرات مميته استغرب :السلام عليكم وش بك ؟
ريان مسح وجهه : وعليكم السلام مافيني شي بس افكر
ماهر ابتسم : يا رجال خلها على الله سمعت باللي صار ؟
ريان : عن خطبة سامي والدكتور اللي مدري وش اسمه
ماهر تكى على باب السياره امام ريان الجالس بالمقعد : ايه تو قبل شويه كانو بيذبحون بعض !
ريان بصدمه : اعوذ بالله وش بلاهم !
ماهر : قلك تحدي ماغير رفضت الدكتور رامي يوم سمعت غلط ويقول بيتخذها غصب عنها بعد !
ريان : لا ذا يستحق من يدبغ بحلقه
ماهر ابتسم : ماقصر سامي تسلم يمينه على كل ضربه
ابتسم ريان : افهم راضي عنه ؟
ماهر ابتسم : مره بذات اننا نعرفه
ريان : الله يوفق الجميع
ماهر : امين وياك يارب
رام ابتسم بخفه : ان شاء لله
ماهر ببسمه : توصي شي ؟
ريان : سلامتك
ماهر : الله يسلمك ودخل تارك ريان يشغل سيارته ويمشي بانجاه العزبه ينثر همومه وافكاره بعيد عن الازعاج ..
دخل ماهر البيت ولقى ريم جالسه تحكي لامها عن اللي صار
ام ماهر : ماهر اللي اسمعه صدق ؟
ماهر جلس وتنهد : ايه
ابو ماهر : وشفيهم اثنينهم مو صاحين ؟
ماهر : رامي يستاهل وتراني رديت عليه وقلت ماله نصيب عندنا !
انصدمت ريم اللي مادرت لانها بعيده عن الهوشه ابو ماهر : ليه ؟؟؟
ماهر : الاخ مب صاحي يقول والله لاخذها غصبن عنك يقصد سامي وبعدها قاله عنها هنا ما تحملت وقلت له مالك نصيب ومشيت تاركه
ابو ماهر : يخسي ويعقب ما بقى الا ياخذ بنتي غصب ! وانتي يا بنتي مافكرتي بسامي ؟؟؟ عشان مره وحده ارد عليهم اثنينهم واقولهم مالهم نصيب
ريم توترت وانحرجت كيف بتقول انها تبي سامي قدامهم حست بتحط نفسها بموقف مو زين قاطع افكارها ابتسامة ماهر : موافقه على سامي بس مستحيه ماتشوف يبه خدودها توردت
ام ماهر ابتسمت : اي والله صارت ورديه وقلبي انا
ريم بخجل : يمه ! ضحكت ام ماهر وهي تحضنه : قولي لي واقولهم
ابو ماهر ابتسم : ورفع جواله ابو متعب يتصل ورد وعليكم السلام
يا هلا ايه والله ردت علي
ريم ناظرت لابوها بربكه وسمعته يقول : والله يا ابو متعب مالكم نصيب عندنا انتفضت ريم وهي تهز امها وتهمس : لاااا يمه ابيه قولي لابوي تكفيييننن !!!
ضحكت ام ماهر : تبيه خلاص
ابو ماهر ضحك ولف لها جواله اللي بالاصل ما اتصل وضحك ماه بقوه : اعطييييييهاااااا يا ابو ماهرررررر ماعرفتك
ريم حست بالحراره تتفجر بوجهها من الخجل والاحراج وركضت لغرفتها وضحكو عليها
ام ماهر : الله يكتب لها كل خير
ابو ماهر وماهر : امين
ابو ماهر : خلصت الامور اللي قلت لك عنها ؟
ماهر : اوووه من اليوم الظهر وهي عند محل التزين
ابتسم ابو ماهر وام ماهر استغربت : وشهي ؟؟
ابو ماهر : جبت اللي وعدتها اياه
ام ماهر : سياره ؟؟؟؟؟
ابو ماهر ابتسم : ايه
ام ماهر : ياويلي منجدك توقعتك تمزح !
ابو ماهر : وشهو امزح وانا ناذر نذر عشانها
ماهر : يمه لا تخافين مو جايها شي ريم ماشاءالله شاطره بالسواقه
تنهدت ام ماهر : الله يكفيها شرها
ماهر : امين بروح اكلم السطحى تجيبها
ابو ماهر : طيب رن علي بعدها عشان اطلعها
ماهر : طيب وطلع ماهر يكلم وينسق كل شي مع صاحب السطحى اللي بيجيب سيارة ريم الجالسه بغرفتها وتضرب وجهها بالمخده باحراج كل ما تستذكر الموقف اللي انحطت فيه قاطعها اتصال وكانت الجازي ردت : يا هلا
الجازي : سلام كيفك
ريم : وعليكم السلام بخير الحمدالله انتي وشلونك ؟
الجازي : بخير بخير المهم ابيك تقولين للبنات الله يحيهم بكره وانتي اول وحده اشوفك جايه اوكيه ؟؟؟
ريم ابتسمت : وش المناسبه ؟
الجازي ببسمه خبيثه : اعتبريها سهرة خطبتك
ضحكت ريم : ماشاءالله الاخبار توصلك بسرعه
الجازي بضحك : اوووه طبعًا
ابتسمت ريم : طيب ياروحي الحين اكلمهم وتراهم مراح يعتذرون ماعندهم شي
الجازي : على خير ان شاء الله توصين شي ؟؟؟
ريم : سلامتك وقفلت واسرعت ترسل لقروب البنات تقولهم عن عزيمة الجازي
.
" بيت معاذ "
الجازي الجالسه مع امها وريما ومعاذ : معاذوه شرايك تودينا للسوق ؟؟
معاذ : والله مالي حيل
ريما : اي تكفى بروح معها وربي مره طفش
الجازي : ومنها ريما تمشي يلاه
معاذ زفر : افكر
ريما : لا يا شيخ !!! تراني بنفجر لو ما قمت
ضحك معاذ : طيب طيب الا انفجارك معكم عشر دقايق تجهزون فيها
فزت الجازي ركض على غرفتها وريما اللي قامت بشويش عشان بطنها وضحك معاذ على اشكالهم
ام معاذ ببسمه : حرام عليك
معاذ : اشكالهم تفطس
وتوه يشرب من فنجال القهوه الا ويشوف ريما والجازي واقفين قدامه
معاذ : صدق انكم تتحولون اذا بغيتو السوق !
الجازي : اقول قم ولا يكثر !
معاذ وسع عيونه : ما اسمع ؟؟؟
ريما : معاذذذيييي
معاذ فز وهو ينحنح : مشينا مشينا
وضحكت الجازي وهي تسحب ريما ويطلعون قدامه وهم ميتات ضحك عليه
وبعد ما اخذهم معاذ للسوق دخلو لمحل واتجهو لجهة المنزليه واخذت الجازي كذا حاجه ناقصتها واتجهت هي وريما للسوبر ماركت الكبير يقضون اغراضهم اللي ناقصتهم لسهرة بكره ...
.
دخل ماهر : جبتها جبتها
ابو ماهر : يلاه بناديها تطلع هز راسه ماهر وطلع بسرعه
ابو ماهر : ريممم
ريم نزلت : هلا ؟؟؟
ابو ماهر : البسي عبايتك بنروح نجيب اغراض للبيت
ريم : الحين ؟؟
ابو ماهر : اايه اعجلي
ريم : طيب واسرعت لغرفتها تلبس عبايتها وصادفت والدتها اللي تبتسم وهي لابسه زيها العبايه ما استغربت ربم وطلعت معهم واول ما طلعو للشارع شافت ماهر يبتسم وامامها سياره مزينه بشريطه كبيره حمراء استغربت : حقت مين ذي ؟؟
ابو ماهر ببسمه وهو يحضنها من اكتافها : حقتك
ريم بصدمه : تمزح يبه ؟؟؟
ابو ماهر : لا انا حلفت ونذرت اذا قمتي بالسلامه بتجيك سياره مرسدس وشوفيها قدامك اخر اصدار
ريم بفرحه حضنته : ياارررووحيييي الله يخليك لي يا بعد عمري وجعلك تمد من زود
ابو ماهر ابتسم وبادلها : امين والحين شوفي سيارتك
ماهر ضحك : شرايك بالشريطه بس
ضحكت ريم : فنانه وهي تمشي وتتلمس السياره بفرحه وحماس
ام ماهر : مبروك يا روحي والله يكفيك شرها
ريم ابتسمت : امين وركبت وهي تتلمس الدركسون بحماس : يااايييي تهبللللللل
ابو ماهر ببسمه : منتي ناويه تاخذينا لفه فيها ؟
ريم بحماس : الااااا اركبو يلاه
ركب جنبها ابو ماهر وام ماهر وماهر بالخلف وشغلتها ريم وهي تصفق بحماي وماهر يضحك : صوتها طررربببب
ريم : اااي والله وسمت بالرحمن وام ماهر متخوفه من ريم وسواقتها
ومشت ريم بالسياره بكل حماس وهي مركزه بالسواقه
ابو ماهر بإبتسامة : والله سواقتك زينه
ريم بابتسامة : نشكر الاخ ماهر لجهوده معي
ماهر بقهقه : عشان تفكيني من مشاويرك
ريم ضحكت وهي تمشي بخط سريع وكانت سواقتها نظاميه وابو ماهر وامها ام ماهر عاجبتهم قيادة ريم وقفت بعدها قدام البيت وصفق ابو ماهر : كفو والله سواقتك عال العال
ضحكت ريم : كفوك الطيب باخذ البنات فره
ابو ماهر : لحالكم لا !
ريم : يبه ترانا بالحاره تكفى
ماهر : مايصير لحالكم !!!
ريم : عشاني تكفون
تنهد ابو ماهر : اجل انتبهو بس يصير شي تتصلين فاهمه !!!
ريم : ابشر
ماهر : لا عاد يبه مو منجدك يروحون لحالهم
ريم : ماهر !
ماهر زفر : انتي وبنات عماني مو صاحين ومع السياره بتزيدون الوضع طينه
ام ماهر : لا ماشاءالله مع سواقة ريم مو جايهم شي
ريم : ماهر عشاني
ابو ماهر : وشتبين فيه خلاص انا وافقت ماله كلام
تنهد ماهر : زي ما قال ابوي
ريم بحماس : الله يوفقكم ويخليكم لي يا احلى اثنين بحياتييييي
ماهر بطقطقه : قريب بنصير ثلاثه صح يبه ؟
ابو ماهر : الشكوى لله بنصير رقم ثلاثه
ريم بخجل : يبه ماهر !!!
ضحكو ونزلو واسرعت ريم تتصل على قروب البنات محد رد وارسلت بالقروب : انا الحين واقفه بسيارتي اللي تبي تجي اخذ بها فره تركض قبل لا امشي وشافت البنات شافوها واللي تبارك واللي مالها حس وفزت روان اول ما شافت كلام ريم : يببههه رايحه مع رييممم
ام خالد : لوين ؟؟؟
روان : ريممممم اشترت سياره بتاخذنا لفه ونجي وطلعت لغرفتها تلبس عبايتها واسرعت تطلع تحت ضحكات والدها و والدتها على شكلها الفوضوي وطلع مروان معها وكانت ترف وراما ويارا مستعدين يطلعون مع ريم قاطعهم صىت شهد : راكان والله مو مطوله !!!
راكان : مافي روحه وش يعرفني وش بيصير بالخط !!
شهد : وش بيصير يعني بندخل معنا شباب كلها لفه وراجعين !!!
نواف وهو ماسك يد ترف ويهمس : استودعتك الله يا حلالي انتبهي على نفسك
ترف ابتسمت : ابشر يا نظر عيني حس نواف بفراشات بقلبه من كلامها الجميل
واتجهت ترف تركب مع يارا بالخلف وكانت روان قدام
راكان عض شفايفه : شهد !
شهد ناظرته بترجي وهي ماسكه يده : ركوني عشاني !!
راكان تنهد : طيب بس اي شي يصير تتصلين فيني
شهد ابتسمت بحماس واشرت له وهي ترفع ابهام يدها بحركة اوكيه واسرعت تركب مع يارا وترف بالخلف وجات راما مسرعه لابسه عبايتها ونقابها وسحبها نواف من عبايتها : اسمعي انتبهي على حلالي لا يصير لها شي
راكان مسك يدها من الجهه الثانيه : اي اي شي يصير تعلمينا عليه
راما مدت يدها : ما اسوي شي بلاش !
نواف قرصه : كبي عنك الفلسفه
راما : ااااه قرصها راكان عشان خالد ومروان موجودبن : اعقبي
راما كتمت المها وهي تهمس بغضب : اجل انسو حلالكم وجات بتمشي بس سحبها راكان وهو يعطيها ٥٠٠ ريال زرقاء ابتسمت بحماس وهي تحب راسه : ابشرو من عيوني بحط حلالكم هنا وهي تاشر على عيونها ومشت تركب مع روان وطلع ماهر وهو ياشر لريم تسوق بشويش هزت راسها ومشت تحت انظار الشباب
خالد : والله ما توقعت واحد بالميه وحده من بنات عماني تسوق
ماهر ابتسم : مو بس ريم حتى اختك المرجوجه روان تسوق
خالد لف على مروان اللي يسوي نفسه مشغول : من متى معلمها !! اجل صدمة سيارتك اللي من قبل فتره هي سببها صح ؟!
مروان ضحك مقدر يكذب من ملامح خالد : ايه بس ربي ستر
خالد : الله يستر بس لا يجيبون بانفسهم مصيبه
ماهر : لا اعوذ بالله ابعد عننا تشائمك
راكان تنهد : الحين كل شويه اللي عندي بتروح وتقول انا رايحه مع بنت عمي راشد وش يجلسهم
نواف وهو متخصر : اهم شي حلالي لا يصير فيه شي الباقي بالطقاق
خالد صفقه على رقبته : اعقب بس حلالنا كلنا مع الانسه ريم بنت عمنا راشد
ماهر ضحك : مب صاحين انتم ريم سواقتها ممتازه وش بلاكم !!!
مروان ضحك : خايفين لا بروح حلالهم
.
" بسيارة ريم "
مشغلين اغاني وصرخت راما : قهوتكم عليييي مري اغلى محل
ريم ضحكت : انتظري باخذ هنوف وهيفاء
شهد بضحك : وربي بنموت من الزحمه
يارا : حبايبي انا حامل بركب قدام وقفت ريم قدام بيت محمد ونطقت : ايه روان ارجعي ورا خلي بس راما عشانها قزمه ونحيفه
روان : وش قصدك انا دب !!!
ريم : مب صاحيه انتي مو قصدي كذا بس قصدي بتكون خفيفه على يارا
روان : يلاه طيب ونزلت هي ويارا وركبت روان بالخلف ويارا قدام وجنبها راما ونزلو هنوف وهيفاء مسرعات وصفقت هيفاء بحماس : ادعسسس يالسياره الفخمه ريم ضحكت : اركبووو
ركبت هيفاء اول بعدها هنوف كانو متزاحمين بس مبسوطين ورفعت الصوت راما والكل يصور ومبسوطين ومشت ريم وهي فرحانه متجهه للكوفي زي ما قالت راما
روان وهي تصفق : قهوتنا يا بنات على حساب راماااا
هنوف : الله حيووووووو
شهد : اي والله نفسي بقهوه تمخمخ لي راسي
ريم : ازهلوني
..
عند تركي جالس يتقهوى وكان لابس بنطلون اسود وتيشيرت رجالي ويتقهوى بهدوء وجلست قدامه الدكتوره مها اللي تبتسم وكانت محجبه : السلام عليكم دكتور تركي ؟
تركي انصدم من جرئتها وجلوسها معه بنفس الطاوله هو يعرفها انها زميلة العمل لا غير : دكتور مها ؟
ابتسمت مها وهي ترمقه من فوق لتحت هي تعترف بانها معجبه به ولعل ذي الصدفه اللي راح تخليها تتقرب منه اكثر ونطقت وهي تعلق عيناها بعيناه المصدومه : دكتور تركي لعل ذي الصدفه جمعتنا عشان نتكلم شويه عن وضع الوالده تذكر يوم جبتها لي ؟
تركي شده كلامها عن امه هو صح جابها لها عشان امه كان الضغط عندها مرتفع بشكل مخيف وهي اهتمت فيها : اسلمي وشفيها ؟؟؟
وقفت ريم قدام الكوفي ونزلو البنات وكلهم كاتمين الضحكه من اشكالهم المضحكه ودخلو روان بحماس : انا بطلب وش تبون ؟؟؟
ريم : ابي ايس دريب
هنوف : وانا بعد
هيفاء : وانا كمان
روان : كلكم ايس دريب ؟؟؟
ريم : اايه خلاص كلنا زي بعض
روان : والحلا ؟؟؟
ريم : اطلبي على ذوقك انتي وراما
راما : خلاص الحلا انا اختاره
روان : طيب وقفت قدام الباريستا : لو سمحت ابي وهي تعد البنات ثمانيه ايس دريب راما : وكمان الحلا واحد بانكيك واثنين كرنشي تشوكلت واثنين وافل تشوكلت وكوكيز اثنين
الباريستا ابتسم : تمام الحساب ٢٩٠ ريال
راما مدت له الكاش ورجع لها الباقي واتجهو للبنات اللي اخذو لهم طاولتين جنب بعض ريم جالسه قدام روان وضحكت : ياويلي شفتي الباريستا بغى يفطس على اشكالنا
روان ضحكت : ايييه وانا مع ذي الشبشب كني شغ وسكتت وهي توسع عيونها بصدمه وهي تشوف تركي الجالس قدامها برفقه فتاه جميلة محجبه وتضحك له وهو يبتسم بخفه ويشرب قهوته انتبهت عليها راما وريم والتفت للمكان اللي تناظر فيه عضت ريم شفايفها بقوه وناظرت لروان اللي تشوفها تقرص باطن يدها نحنحت : روان ؟
روان لمعت عيناها بس عجزت ربم تعرف هل غيرة او حزن او قهر كانت غامضه وقاطعها صوت جوالها يرن وكان ماهر اسرعت ترد وعينها على روان : هلا ماهر
ماهر : وينكم طولتو !
ريم : بكوفي نتقهوى ونجي
ماهر بصدمه : ودوبك تقولين !!!
ريم : ماهر تكفى لا تخرب علينا نبي نتهنى بس لو ساعه وجاين منت واثق فينا ولا هم واثقين باخواتهم وزوجاتهم ؟؟؟
ماهر زفر : ماقصدي كذا بس حنا نخاف عليكم من اشكال ماتخاف ربها
ريم : هدي رحنا لكوفي *** اللي رحنا له وكله حريم مافي الا كم واحد ومعه اهله
ماهر تنهد : اعجلو طيب اذا انا سكت وش بيسكت الباقين
ريم : بطريقتك تعرف تسكتهم ولا نقيب على الفاضي ؟
ماهر بسخريه : نقيب بالعمل مو مع احفاد وعيال سعود
ريم : واثقه فيك وثقتي مراح تخيب
ماهر ابتسم بخفه : يلاه عوافي عليكم
ريم : الله يعافيك وقفلت
راما كانت تتكلم روان تبي تغير عليها الجو بس صدمتهم يوم قامت روان والبنات ناظروها باستغراب ومشت وهي تشوف البنت مقربه من تركي اللي صاد وحركة روان يدها بخفه وهي بحركة سريعه تصتدم بالطاوله وطاحت القهوه الساخنه بحضن مها اللي فزت تصارخ بالم وتركي وقف منخرش ورفع عينه وانصدم وهو يتعلق نظره بنظر روان الحاده وكانها تتوعد له
البنات شهقو وقفتهم ريم : لحد يتحرك خلوها
هنوف : شسالفه ؟؟؟
مها بغضب : عمياء ماتشوفين ؟؟؟؟؟
روان بتمثيل وهي تاخذ منديل تساعدها لتنظيف عبايتها : اوه اسفه ماشفت بالغلط
مها بحده : وخر عني وناظرت لتركي وهي تتغير نظرتها بمياعه : تركي ممكن توصلني ؟ ناظرت روان لتركي بحده وكانها تقوله اتحداك توديها تركي حس بغيرة روان وكان الفراشات بداخله تحلق ونحنح : اعذريني مقدر لاني مواعد لي رجال هنا
مها بقهر : اوكيه مو مشكله مع السلامه نلتقي بالدوام ومشت مرت من جنبه روان وهي تهمس بحده : جعلكم تلتقون بجهنم ومشت واصدمت بشخص : سلامتك ؟
روان ابتسمت وهي تحس بوقته : ااه اسفه
تركي عصر يده وبغضب : لو سمحت ناظر قدامك !
الشخص : معليش مادريت
روان ابتسمت بسخريه ومشت تاركه تركي يجلس بقهر وجلست وهي تشوف نظرات البنات الثاقبه لها ولو انها رصاص كان هي الحين ميته واخذت قهوتها وهي تشرب : امممممم لذيذه
شهد : الحين ذا صدق ولا تمثيل ؟
روان بسخريه : لا ذي كاميرا خفيه
ضحكت ريم : مو صاحيه !
ترف : روان احمدي ربك محد من العيال هنا ولا رحتي فيها !
روان : ماني غبيه ! واعرف وش اسوي
راما بحماس : نفس شخصيه وحده مغرمه فيها من المسلسلات
روان : اقول تقهو بس وهي تاكل من البان كيك متجاهله نظرات تركي الثاقبه له وهو بداخله يقول بان كيدهن عظيم رجعت له الحركه بنفس الثواني !
دخل سامي وهو ياشر لتركي ابتسم له تركي وقام يسلم عليه
سامي : يا هلا ومرحبا كيفك
تركي ابتسم : بخير بشرني عنك
سامي : والله الحمدالله بنعمه
روان بصدمه : رييييم حقك جاء
ريم باستغراب : هاه وشهو حقي ؟؟؟
روان وهي تاشر بعيونها والتفت وهي تشوف سامي يجلس مع تركي ويضحك ويسولف تركي : تاخرت جيت وتقهويت بس عشانك بطلب قهوه مره ثانيه
قهقه سامي : عز الله انك كفو المعرفه
تركي ابتسم وفز يطلب وقام معه سامي يتهاوشون على الحساب
هيفاء: ياخي وشهو حقها ؟
يارا : تقصد الهبله روان ان ذا جاء وخطب ريم بس ماردينا عليه ألى الان
هنوف بصدمه : جد متى ذا الكلام ؟
ترف : له كم يوم بس
هنوف : عاد موضوع الخطبه مايحمس
شهد : وانتي متى فارسك يجي يخطب رسمي ؟
هنوف بسخريه : اذا حجة البقره على قرونها
روان ضحكت بقوه : ابشرك مراح تحج !
تركي التفت على صوت ضحكة روان وهو وده يقطع لها لسانها وبسبب شروده دفع الحساب سامي بخبث : يبغالي اشكر بنت الناس على ضحكتها اللي خلتك تشرد
تركي حك راسه وجلسو : وبنت الناس اللي خاطبها تراها وراك بالضبط
سامي انتفض : وين والتفت وهو يشوف طاولتين فيها بنات عرفها من بينهم كلهم وحس قلبه جالس يرقص او يحلق من الفرحه
روان بخبث : ريم حقك يناظر فيك
ريم بتوتر : وين ؟
روان كتكت ضحكتها : وراك بالضبط
هيفاء: لا تناظرينه خليك ثقيله
شهد بسخريه : هيفاء تتكلم عن الثقل ؟
هيفاء بخجل وتوتر : شهد !
ترف : ماشاءالله وراكم سواليف
هنوف : بذات عند جولييت ذي وهي تاشر على هيفاء
روان بحماس : اجل خلونا نجتمع اليوم في بيت جدتي منيره لان بيتها الوحيده الفاضي ماغير هي لحالها نسوي لها اجواء ومنها ننام عندها وناخذ علوم بعض
هيفاء: تم بكلم امي ومراح ترفض لان عند جدتي
يارا : خلاص تمام حتى انا برتاح شويه من خالد
ضحكت روان بخبث : اعلمه ؟
يارا : واعلمه وهي تاشر على تركي شرقت روان وضربتها راما : لا تذبحونها ونبلش فيها
تركي هز رجله بتوتر من شرقتها وهو يشوفها تضرب راما عشان خبطتها بقوه : وجع وجع كسرتي ظهري والله لتسوين لي مساج اذا رجعنا
راما ضحكت : خلاص طيب
روان بابتسامه وهمس : معليك مروان بيكافئك
راما وسعت عيونها بصدمه وهي تضربها بخفه : روان !
ضحكت روان وقع نظرها بنظر تركي اللي يفترسها شمقت عليها وهي تكمل سواليف مع البنات .
.
عند ريان دخل البيت وهو ينادي على امه اللي ردت عليه وكانت بالصاله برفقة ريفان : وشفيك تنادي ؟
ريان جلس : بكره اخطبيها لي
ام نواف بصدمه : هاه تقصد دانه ؟
ريان : ايه
ام نواف : بس بدري ؟
ريان : تبيني اهون ؟
ام نواف بسرعه : لا لا خلاص زي ماتبي
ريان قام وصعد لغرفته وهو يتجهه للشباك وهو يناظر ويشوف إلى الان ما جات ولكن وقف افكاره وقفو سياره السايق امام العماره ونزلت دانه ومعها اكياس وكذلك السايق نزل ومعه اكياس يضعها عند الباب وهي تشار له على باقي الاكياس ودخلت زفر بقوه وهو ينزل لتحت يبي يلهي افكاره عنها وابتسم لريفان اللي تاشر له يشيلها ونزل لمستواها وشالها وهو يقبل خديها
.
دخلت ريما والجازي ومعاذ وكانو معبين بالاكياس
ام معاذ : شكلكم اخذتو السوق كله !
معاذ جلس بتعب : حسبي الله الغبي اللي يسمع كلام الحريم ذي اخرتها
٣٠٠٠ الاف راحت نسمة الهواء من تحت رؤسهم
الجازي : اشغلتنا بفلوسك لو دفعت انا افضل
معاذ : لا يا شيخه اقول الحين تسوين لي مهيتو ابي اكل بموت جوع
ام معاذ ابتسمت : يلاه الحبن احط الاكل مسويه كبسه لحم
معاذ : اهخ تدرين يمه اني اموت فيك وهو يحضنها
الجازي كشت عليه : هذه انت دلوع الماما
ضحكت ريما وهي تفسخ عبايتها : الا معاذي !!
معاذ ابتسم وهو يشوف تمه دخلت المطبخ وجلس جنب ريما : يازين معاذي من لسانك العسل يا عسل انتي
الجازي بقرف : وع وعععع
ضحكت الجازي : معاذي وش قال لك ماهر ؟
معاذ فهمها وهو يلعب بشعرها : اممم قال يبي يهون ولا بتاكله الجازي
الجازي فسخت عبايتها : لا انتم تدورون الجلد ضرب وركض معاذ والجازي خلفه وريما ميته ضحك وهي تصورهم : ماهر شوفهم هذه وضعهم توم وجيري
الجازي شهقت : لاااا لا ترسلينهااااا
ريما ضحكت بشر : رسلتها
الجازي : لااااااا وهي تغطي وجهها باحراج ضحك معاذ وهو يجلس بتعب : تساهلين
.
ركبو البنات السياره وذي المره روان اللي حاولت بريم تسوق وما رفضت ريم سلمتها المفتاح وجلست مع البنات بالخلف ويارا وراما نفس مكانهم جنب روان اللي تحمست وهي تشغل السياره تحت انظار سامي اللي مشى خلفهم وتركي كذلك وهو يشوف السايق روان اللي متجاهلة نظراته من سيارته كان جنبها تمامًا وقفو قدام الاشاره وهو جنبها
ريم : روان حقك جنبنا
روان : خليه يناظر لين يفطس
ضحكت بقوه شهد : اوووه شايله عليه
روان وهي تشوف الاشاره على وشك انها تفتح : تمسكو بس
ريم بصدمه : يا بزر مانبي نموت
روان : قلت تسمكو ومو جايكم شي !
هيفاء: روان تكفين شويه شويه
هنوف : معلي لو مت بتفكيني من الكلب بدر
شهقت شهد وهي تقرصها : استغفري ربك
هنوف : ااااه استغفر الله
روان متجاهله كلام البنات واول ما اتشغلت الاشاره وهي تدعي بنزين بقوه وتسرع انصدم تركي ولحقها وهو ياشر لها تهدي وسامي مفجوع وقلبه فز وهو يدري بان ريم معهم ضحكت بقوه روان على صراخ البنات وخوفهم : وشفيكم ذي حركات علمني اياها مروان
راما بخوف : لا انتي صاحيه ولا اخوك !!!
روان : يابنات شفيكم خايفين مو صاير شي وهي تلف مع لفة التقاطع بسرعه والبنات كلهم صرخو وروان ميته ضحك عليهم وتركي وسامي مفجوعين من السواقه الخطيره اللي تسوقها روان اللي كانت متعوده لانها تسوق مع مروان زي كذا
ريم ضحكت وهي تشوف تركي يلحقهم : مخليته مثل الكلب يلحقنا !
روان ضحكت : مو بس حقي بعد حقك يلحقنا وهو ياشر اهدي
ريم بصدمه : وين ؟؟؟
روان : ورانا
ريم ابتسمت : اسرعي
روان : ابشري ما طلبتي شي وهي تدعي بنزين جاعله من صراخ البنات يرتفع وهي ميته ضحك على اشكالهم ..
واقفين الشباب قدام باب الشارع
زفر راكان بقوه : لهم ساعتين !!!
ماهر : وشفيكم انتم قايل لكم يتقهون ويجون !
راكان : هين يتقهون
نواف : عاد يصير شي كله براس اختك بنحطها
ماهر قلب عيونه : تراكم صدعتوني لكم ساعه كامله تصيحون فوق راسي !!!
خالد : منجد طولو مو معقوله
ماهر : لا تصف معهم عشان لا افجر فيكم احتاج الحين بندول على حلطمتكم ذي وسكتو على صوت التفحطيه القويه والتفت بسرعه على مدخل الحاره وهم يشوفون مسرعه قادمه وكانت سيارة ريم
روان ضحكت : احفاد سعود كلهم عند الباب تمسكو
يارا بخرشه : وش بتسوين !!!!!!!
شهد : يا مجنونه خلاص هديييي
ريم : روان يا كلبه ماهر معهم بيذبحني انا مو انتي !!!!
روان بضحكه : بوديهم عند باريهم
صارخو البنات وهم يشوفون سرعتها
راكان والشباب اتسعت عيونهم بصدمه
نواف : لااااا حلالييييي ياويليييي
ماهر : وخرووووو وابعد البنات ودعست روان فرامل وهي تضحك بقوه ضربتها ريم من الخلف : يا كلبه رحنا فيها بسببك
روان : هي خرجه مره وحده لازم نغامر فيها وفتحت الباب شهد وهي منزله راسها من نظرات راكان الغاضبه ولحقها للبيت
وهنوف وهيفاء دخلو لبيت جدتهم منيره وريم وترف نزلو ويارا وراما كذلك ماهر : مين يسوق ؟
مروان : انزلي انزلي بلعن خيرك
روان نزلت وهي تركض وخالد مسكها من اذنها وهي كاتمه المها : اااه اذنيييً
خالد : بقطعها بس مو لحالها حتى يدينك ورجولك
روان دفعته وركضت وهي تدخل البيت
ريم وقف قدامها ماهر : انتي مجنونه تخلين ذي تسوق وشذي السواقه!!!
ريم بتوتر : والله رفضت تمشي الا هي اللي تسوق
ماهر : ادخلي البيت بسرعه
ريم هزت راسها بسرعه وهي تسحب مفتاح السياره تقفلها وتمشي للبيت
والبنات الباقيات كذلك
.
" بيت ابو خالد "
كانت اصوات مروان وخالد مرتفعه وهم يطقون باب غرفة روان اللي رافضه تفتح : والله لتصل على الشرطه واقول انكم بتذبحوني !!!!
خالد : اتصلي لاني ذابحك ذابحك
روان بكذب : قبل لا تذبحني روح ليارا تقول انها تعبانه
خالد بصدمه وخوف : وشهووو وركض بسرعه لبيته
وفتحت الباب روان وهي تشوف مروان اللي كان بيصفقها : تلمسني افضحك !
مروان : ومين بيصدقك ؟
روان ابتسمت وهي ترفع جوالها : عندي مقطع صوتي باعترافك انك انت حاشر راما
مروان عض شفايفه بقهر :هين هين
روان ضحكت وهي تاشر له بباي ودخلت لغرفتها وهي تنسدح بابتسامة وهي تحس بالفرحه باللي سوته خففت عليها السواقه غيرتها ونار قلبها من اللي شافته
فعلا خلتها ترعد وتبرق عليهم كلهم وهي منسدحه بغرفتها
.
" بيت راكان "
اللي جالس بعصبيه : كيف تنقلعين للكوفي بدون لا تقولين
شهد تنهدت : والله كنا بناخذ لفه ونجي بس راما عزمتنا واضطريت مع حماس البنات اوافق ونسيت اتصل فيك وربي الكوفي مليان حريم مافي رجال الا مع عوائلهم
راكان بغضب : يعني كله من راس السوسه راما !
شهد : وشهو من راسها كله كوفي ماله داعي ذا الانفعال كله !
راكان : احلفي ماله داعي ! وش يدريني وش بيصير معكم لو لا سمح الله صار لكم شي وش اللي بينفعكم !
شهد : ليه تحب تقول شي ما صار هاه حنا جينا طيبين وحضنته : هدي واللي تبيه بيصير
راكان تنهد وهو متجاهل حضنها رفعت شهد راسها له وهي تبتسم بخفه : يعنني زعلان ؟ هاه اموت على المعصب وهي تبوس خدوده وتدغدغه وكان يبعدها بس ماتحمل ضحكها وحركاتها وضمها له وهي تقهقه : احبك
راكان : وانا اموت فيك وهو يقبل عنقها ...
.
دخلت ريم وهي تشوف امها وابوها يتكلمون
ابو ماهر : واخيرا جيتي طولتو ؟
ريم فسخت عبايتها وهي تجلس : رحنا تقهوينا وجينا
ام ماهر : بالعافيه عليكم
ريم : الله يعافيك
ابو ماهر : تراني رديت لمتعب الحين وقلت له حياكم الله عشان يجون الخطبه والملكه
ريم توترت : بصعد لغرفتي
ماهر اللي دخل وسمع كلام ابوه : ايه ايه اشردي
ريم : كتمت ضحكتها وصعدت لغرفتها وجلس ماهر وهو يتنهد : اجل قلتي لي يا يمه سواقة روان كويسه عز الله بغت تذبحهم
ابو ماهر : ليه ساقت ؟
ماهر : اااوهووو وبغت تدخلهم بالجدر
ام ماهر : ياويل حالي شكلها تستهبل ولا انا شاهده عليها كانت ماشاءالله نظاميه
ماهر : الله يعوض ومسك جواله وهو يفتح على رساله من ريما وكان مقطع ارخى الصوت وهو يشغله وابتسم وهو يشوف الجازي تلحق بمعاذ اللي فاطس ضحك عليها وهي معصبه واخر شي يوم شافت ريما وهي تخفي وجهها ابتسم باتساع
ام ماهر ابتسمت : ماشاءالله ورا الابتسامة ذي بلا
نحنح ماهر وهو يمسح شنبه : لا ولا شي بس مو كان العرس طول ؟
ابو ماهر اخفى بسمته : وراك مستعجل ؟
ماهر : ابي الحلال وضحك ابوه ..
.
نواف وهو كاتم ترف بحضنه : ياويلي تصدقين خفت عليك بغيت انجلط من سواقة اختك المهبوله كنت عارف انها مب صاحيه بس الحين تاكدت
ترف ضحكت : حرام عليك صح تخوف سواقتها بس وربي فنانه خلتنا نعيش تجربه اسطوريه
نواف : يابنتي ذي تدرين من مدربها مروان وهذه الثاني مب صاحي مثلها توائم وش نرتجي منهم
ترف بضحك : الله يهديهم بس
نواف بابتسامة: امين والحين خلينا بموضوعنا
ترف ابتسمت وهي تحاوط عنقه وهو ماسك خصرها : اي صح عندي موضوع وهو اني حاليا باخذ بجامتي وبروح عند جدتي منيره كلما يالبنات بننام مع بعض
نواف : لا والله انسييي مافي ما اقدر انام بعيد عنك
ترف : نواف ! مو منجدك كلنا بنجتمع
نواف : والله بكيفهم انا ابيك وهو يحضنها
ترف همست له بدلع : لو ماتخليني اروح ممكن ازعل واتضايق واتعب
نواف بقلق : لا وشهو تتعبين الله لا يقوله
ترف ابتسمت : والله لعوضك بدال ذي الليله
نواف ابتسم : وعد ؟
ترف : وعد
نواف بابتسامة: تمام اجل
ترف ابتسمت وهي تبوس خده وتركض للغرفه تغير ملابسها
هنوف قامت وهي تشوف اتصال باسم بدر ودخلت غرفة ريما القديمه وهي ترد : يا اغث ما شفت وي تبي ؟
بدر ابتسم : اغث ؟ لا بالله ماصدقتي
هنوف قلبت عيونها : اهرج وش عندك !
بدر : اممم مشتاق لصوتك قلت اتصل واسمعه
هنوف بقرف : وعع وانا العكس منغثه من صوتك وتلقائي اول ما اسمعه معدتي تمغصني منك
بدر ضحك : معليك عندي زيت ادهنه على بطنك ويخف
هنوف : هاها ها مره مضحك الحين جد وش تبي
بدر : قلت لك ابيك وحبيت التسلق اللي صار لغرفتك وابي اكرره قلت اتصل قبل كذا
هنوف : الحمدالله اني مراح انام ببيتنا
بدر باستغراب : اجل وين بتنامين ؟
هنوف : شي مايخصك وهي تقفل بوجه وتقفل جوالها نهائي بكل نذاله وهي تضحك برضى : اتصل الحين لين تقول امين وموت بفضولك
وطلعت عند هيفاء ولقت راما ويارا قد انهم جو وروان كذلك
روان : زين يا يارا طلعتي سالمه من عند خالد اللي بغى ينجلط يوم سمعني قلت انك تعبانه
يارا بضحك : يووه ذبحني وهو يسال بس قبت له انك كذوب وهو يتوعد فيك
روان : الله يعينني
.
عند سامي اللي اتصل عليه متعب ورد عليه وهو يشوف سيارة تركي خلفه بكم سياره وهم واقفين عند الاشاره : هلا متعب
متعب ابتسم : وينك ؟
سامي : جاي للبيت ليه في شي ؟
متعب ابتسم : فيه شي قوي لو دريت عنه بتطير من الفرحه ونشوفك مثل الحمام تحلق
ضحك سامي : الله على الشرح وشهو
متعب : وشرايك اذا جيت اقولك ؟
سامي : وش يصبرني عاد!!! وسع عيونه وهو يسوف السياره المسرعه له
متعب : معليك اص وانصدم من صوت اصتدام قوي وفز : سامي !!!
ما جاه رد وقفل الخط لان الجوال تقفل
متعب فز بخوف وهو يحس شي كاتم صدره
تركي نزل بسرعه وهو يشوف سامي بداخل السياره المعدومه بشكل مخيف لا ملامح لها الناس تجمهرو وتاكدو بان صاحب هذه السياره مستحيل عايش صرخ تركي : سااااميييي كح من دخان السياره اتصلوووو بالاسعافففف
وهو يحاول يفتح الباب بس كان معلق وساعده كم شخص بفتحه وشهق تركي من رؤية حالة سامي المفجعه ...
___________________________
✨ قراءه ممتعه ✨
اعطوني تحليلاتكم للبارت الجاي وش تتوقعون يصير بسامي ؟
واحتاج كلام محفز لان البارت القادم فيه تخطي بالسنوات كونو جاهزين 🫣
واعذروني اذا فيه اي اخطاء املائيه
أنت تقرأ
احتريتك من بين كل البشر وسميتك عشقي وفرحة سنيني
Actionالكاتبه شهد✍🏻 اول روايه لي وان شاء الله تنال اعجابكم 🤍 • اختصار للروايه ؛تتكلم عن حياة الجد سعود وعياله واحفاده ويومياتهم والاحداث والمغامرات اللي تصير معهم •• "" لا استبيح النقل او الاقتباس ""
