احتريتك من بين كل البشر وسميتك عشقي وفرحة سنيني

39

"بسم الله الرحمن الرحيم "
رمضان مبارك ينعاد علينا بالصحه
والعافيه يارب 💗💗
•
•
•
•
"بعد شهر "
كان اول يوم برمضان وكانت عمارة الجد سعود
تبتهج بالفرحه والبهجه والحياه وكانو فارشين السفره بالحوش
وكانو الجد سعود وعياله جالسين واحفاده هم من يرتبون السفره وكان ماهر يجيب من بيتهم عدة اطباق مسويتها امه وكذلك خالد وباقي الشباب
جاتهم ريما وهي لابسه قميص روز ورافعه شعرها كعكه وخدودها مورده من التعب وجهها مكشر والعيال كتمو ضحكتهم من اول ما جتهم وهي تحط ثلاجة القهوه حقت الجد والفناجيل وطيف شايله صينيه حلا وريان وضع فطور امه اللي مسويته وهتف الجد من كشرت ريما : انتي وشبلاك ! مكشره كنك بومه !
ريما بدون نفس وهي تحط صحن الفواكه : اللهم اني صايمه يبه مابي اتكلم
الجد سعود رفع حاجبه :لا يكون صايمه عن الكلام بعد !
ريما ناظرته بعبوس : يبه توني عروس مالي الا شهر وامي مدخلتني المطبخ اكرف كرف العبيد
طيف : يبه اتركها تراها مدلعه مسميه المساعده كرف !
الجد سعود : هذه عقابك عشانك نايمه عندنا وتاركه رجلك
ريما عفست وجهها اكثر وهي تتذكر معاذ وزعله عليها عشانها بتصوم اول ايام رمضان عند اهلها مو عنده • فلاش باك •
"ريما بابتسامة وهي جالسه جنبه : معاذي
معاذ : هممم وهو شغال على اعماله
ريما نحنحت وهنا لف عليها وهو رافع حاجبه : الله يستر لان عارف ورا ذي النحنحه مصيبه !
ريما بدلع وهي تلعب بشعرها : ابي اصوم اول رمضان عند اهلي
معاذ بصدمه : وانا افطر لحالي ؟؟؟
ريما : يوه ليه تفطر لحالك فيه خالتي ام الجازي ما تقصر والجازي روح افطر انزل افطر معهم
معاذ : انا ابي افطر وانتي بوجهي !
ريما بغيض : ياخي بس يوم باقي الشهر عندك وشبلاك انت !
معاذ رفع حاجبه : وين الدلع اللي قبل شوي !!!
ريما زفرت : موجود لولا عنادك
معاذ : انا العنيد ولا انتي !
ريما : اوووف الحين بتخليني افطر عند اهلي ولا لا
معاذ ابتسم وريح ظهره على السرير ونطق : بشرط
ريما مغصها بطنها من ابتسامته اللي تعرف ان وراها بلا : وشهو !
معاذ : بوسه وغمز لها
ريما اختنق وجهها باللون الاحمر صح ان لها فتره متزوجه لكن دايم تخجل من حركات معاذ لها لان تحس بنفسها معه وكانها بنت انوثيه بزياده ما كانها ريما المرجوجه اللي تعشق الاستهبال وما كان اي احد قادر يخيلها تستحي لكن من تزوجت معاذ وهي تحس نفسها شخص ثاني واخيرا نطقت : لا باس بشرط
معاذ ابتسم بخبث : تبيني اصعبه !!
ريما شهقت وهي عارفه خبث معاذ وانه بيسوي اللي يبه لو قالت ايه : لا امزح شفيك
معاذ ضحك : يلاه اجل نحنحت ريما وقربت منه ببطء وقاطعها سحبت معاذ لها جاعل منها تغرق معه بعالمهم الخاص " استيقظت ريما من شرودها على ماجد اللي يبعثر كعكتها : وين شردتي !!
ريما : مالك دخل ودخلت البيت معصبه
ماجد بصدمه : علامها ذي ؟؟
طيف بضحك :معليك منها معصبه عشان تقول انها عروس إلى الان وخلينها تكرف
ماهر بابتسامة : الا ريما لحد يزعلها !
قاطعهم صدى صوت المؤذن واجتمع جميع عيال الجد سعود واحفاده حولين السفره واسرعت طيف تدخل وهي تشوف حريم اخوانها جالسين مع امها والبنات حولين سفره طويله وعطول جلست جنب ريم وهي تبتدي تسمي بالله وتفتح ريقها على حبة تمره والجميع كذلك
بعد الصلاه بعد ان اتى الجميع من المسجد برفقة الجد سعود وابتدو يفطرون
نواف بهمس لخالد : حظك شوي بتروح لزوجتك وانا بجلس لحالي !
خالد نغزه : ابلع وانت ساكت محد ضربك على يدك وقالك ما تتزوج !
نواف بعناد : من قالك ماني متزوج بتزوج باذن الله
"عند الحريم "
نوف اللي كانت تلاعب عيالها وداهمتها شهد وهي تشيل غيث : ودينوووو انا الحلو
نوف ابتسمت : يلاه عقبالك
شهد ضحكت بحياء :لا وين لاحقه على الغثى
ريم : حرام عليك تسمين ذا غثى !!!
شهد : والله اذا بكو يتعبون
نوف : يوووه بذي صادقه الله يهديهم بس
مها ام شهد : عاد لازم الجهاد معهم وانتي يا شهد يوم كنتي بزر كنتي من اكثر الاطفال ازعاج
شهد بصدمه : يمه !
مها بضحك : والله هذه الصدق كنتي شقيه بشكل فضيع
ريم وهي تنغز شهد : ومسويه نفسك طالعه منها بعد بكل بجاحه !
شهد بعبوس : كنت طفله
ضحكت نوف : وذول وش
شهد : اوف منكم واعطت ريم غيث واخذته ريم وهي تضحك على تعفيست وجهه شهد
ريما وهي متخصره : يمه مافي هيل وش السواه ؟
الجده منيره : اخذي من عند اخوانك
ريما زفرت : مين تروح تجيب من عندهم
ترف : انا الحين اجيبه لك
ريما : بسرعه بالله ودخلت المطبخ وقامت ترف تلبس شرشفها وفزت معها يارا
: بجي معك
ترف : طيب وانتظرت يارا تلبس وطلعو من الجهه الثانيه وشافو سفرة الرياجيل وابتسمت يارا وهي تتامل خالد : اكل جعل ما ياكل غيرك
ترف كتمت ضحكتها : صدق انك خفيفه امشي بس
يارا : تكفين انتظري واضطرت ترف تنتظر
"عند الرجال "
خالد : مسكينه اللي بتاخذها عز الله ان امها داعيه عليها
نواف ابتسم : انشهد انها محظوظه بس ما جاك فضول تعرف مين ؟
خالد لف عليه : من ؟
نواف : بتعرف الحين قطب خالد مابين حاجبيه باستغراب لان نواف ما قد لمح له انه عينه على وحده محدده وزاد فضوله بكلامه واستمع بتركيز على نواف اللي نحنح وعدل جلسته وهو يهتف بصوت جهوري : يا جد عندي موضوع وطالب فزعتك معي
الجد سعود اللي معروف عنه صحاب فزعات واللي ينتخيه يبشر بسعده ومستحيل يرد له طلب مهما كان ويحاول قدر مايقدر انه يحل له موضوعه وهتف بنخوه : ابشر بسعدك ! وش عندك
نواف ابتسم وعينه انتقلت على عمه ابو خالد : انا ولدكم وتعرفوني الحمدالله مايجي مني العيب وانا عندي طلب ودي لو عمي ابو خالد ما يردني خايب الامال !
كلام نواف استوقف يارا وترف اللي نغزها قلبها بقوه وهي بداخلها تقول لا يكون اللي ببالي !!! لا يا نواف لا تسويها ! لانها تعرف اللي يدور بخاطره الحين بالنظر له
ابو خالد : ابشر ياولدي وش عندك ؟
جميع الانظار كانت تحيط بنواف وكانت نظرتهم جميعًا بها الكثير من الفضول واكثرهم والده ناصر اللي يرمق ابنه باستغراب وترقب لما يريد قوله
كمل نواف كلامه بابتسامة : انا طالب القرب منك يا عم وابي اخطب بنتك الكبيره ولا ودي انك ترفض داخل على الله ثم عليك !
وقع كلامه على الجميع مثل الصدمه ولكن ليس مثل ترف اللي وقع عليها الكلام مثل الصاعقه وحست بدوخه ومسكتها يارا بصدمه وهي تهمس : ترف ترف بنت علامك اصحي
ترف : اهخ احس بدوخه ماني قادره
يارا كتمت ضحكتها: يابنتي لا تفضحينا قومي !!!
ترف اللي تحاول توازن نفسها بسبب الدوار الذي شعرت به فجاة من الصدمه التي داهمتها وتهمس ليارا : يعقب اوافق عليه !
يارا : امشي امشي لحد يشوفنا وسحبتها ورجعو وهم فاضين الايادي وريما اللي تخصرت بغضب : وين الهيل !!!
جلست ترف وهي تمسك راسها ويارا اللي وجهها متوتر : كنا راحين بس صار شي خلانا ننصدم
ريما استغربت وجيههم الملخبطه : وش صار ؟
يارا وهي تناظر لترف ونطقت : نواف ولدي عمي ناصر خطب ترف من عمي
ريما وسعت عيونها بصدمه : نواف ! غريبه ماقد لمح انه يبي من بنات العائله
ترف بقهر : ماني موافقه لو يحب السماء وطلعت من المطبخ تاركه وراها ريما ويارا اللي ناظرو لبعض ونطقت ريما : لا يكون بينهم شي لاني اعرف نواف كان يقول مستحيل يتزوج من العائله وش التغير اللي صار وليه ترف كذا قالبه !
يارا : مدري والله بس تخيلي داخت علي يوم سمعت كلام نواف
ريما : ذي وراها بلا ولازم اعرف انتبهي للقهوه
يارا : ابشري واسرعت ريما تلحق ترف وتدورها وسالت البنات وقالو لها انها دخلت غرفة طيف وراحت لها ريما ودخلت الغرفه ولقتها جالسه وقفلت وراها الباب وهي تجلس قدامها : اسدحي كل ما في جبعتك لا والله سحبت العلوم من لسانك سحب
ترف بتوتر لفت عنها : ماعندي شي
ريما : ترف !!! تراني اعرفكم كلكم يا عيال اخواني واعرف حركاتكم عشان كذا انطقي !
ترف زفرت بغيض : وش تبيني اقولك اني انا غبيه فتحت على نفسي باب ماله قفل !
ريما : وشهو بابه ! انطقي با بنت !!!
ترف لفت عليها وبدت تسرد لها اول موقف لها مع نواف لمن توقعت بملكه اخوها انه خالد ويوم خوفها وانتقمت منه وبعدها باقي المواقف اللي صارت معها انصدمت ريما وهي تسمع كلام ترف : كل ذا صار وانا ما لاحظت !!
ترف بهدوء : اخر مره قال لي دوري لي عروسه وفجاة يحاصرني ويعترف لي تخيلي مجنون مب صاحي
ريما ضحكت : لا عاد ترا نواف اكثر واحد قادر يخفي مشاعره قسم بالله يوم اشوفه ما اصدق انه يحبك ويبيك
ترف بتكشيره : حبه برص ان شاء الله
ريما ضربتها بخفه ونطقت بجديه : اقول عن الثقل لا تسوين سوايا شهد كانت زيك واسوء وبهذلت براكان لين خلته يعشقها واخر المطاف حبته واتوقع انتي زيها
انتفضت ترف من كلام ريما : الله لا يقوله !!!
ريما رفعت حاجبها : وليه ان شاء الله! نواف وش زينه قسم بالله انه اكثر عيال اخوي فله وخفيف دم وينحب بسرعه
ترف بكرهه : وع شبيه الرجال ذاك يحسبني بحبه يدز امها
ريما وسعت عيونها بصدمه : وش بلاك انتي شايله عليه كذا هدي ولعد تقولين ذا الكلام لانه فيه حق ! ولو نجي للحق ترا نواف سيد الرجال عشان كذا يا ترف لا تزعليني منك ولعد تعيدين ذي الكلمه !!! وقامت بزعل من عندها وطلعت للبنات تاركه ترف تبوز بقهر من فزعة ريما لنواف ضدها !
"عند الرجال "
ابتسم الجد سعود وهو يحب زواج عيال العم : هاه يا ابو خالد وش ردك !
ابتسم مخلد وهو مستحيل يلقى زوج لبنته احسن من نواف ونطق : والله اني موافق وانت وولد اخوي وانت اولى ببنتي بس عاد تدري الشور شور البنت وباذن الله بيصير اللي فيه الخير والمكتوب الكل بيرضى فيه
ابتسم نواف ولكن بداخله خوف من رفض ترف له وقاطع شروده خالد اللي ينغزه : يا كلب ما قلت لي انك بتخطب اختي !!!
نواف ابتسم : كنت اقولك يا النسيب بس ما تصدقني
خالد ضحك : كنت ناويها وانا مغمي علي مثل الادلخ
نواف : توك تدري
وبدت فقرتهم اللي مستحيل تنتهي وكان الكل مبسوط لنواف وبعد صلاة التراويح كان الكل مجتمع ببيت الشعر ويشربون شاهي وكان عندهم صديق الجد سعود ابو سيف و ولده سيف وكان يعج المجلس بالسواليف وهرج الكبار
بجهة ماهر اللي جالس بجانب سيف ذو الملامح الحاده وكان اسلوبه رسمي نوعًا ما مع الشباب ونطق ماهر بابتسامة: كيفك يا سيف بشرني عنك
سيف : الحمدالله بخير انت شخبارك
ماهر : اللهم لك الحمد بخير من زمان عنك ياولد بغيت انسى ملامحك
ابتسم سيف بثقل : والله الدراسه  بالخارج كانت مشغلتني والاعمال مع ابوي مهي مخليتني افضى وتعرف ماعند ابوي غيري عشان كذا كل الامور علي
ماهر : اعانك الله
سيف : امين يارب
.
.
بيت الجده منيره اللي بدا يفضى من حريم عيالها وحفيداتها بسبب روحتهم لبيوتهم ينهون باقي اشغالهم وبعد روحت الجده لبيت التحفيظ بعد التراويح و
ريما وهي توها ماخذه احلى ترويشه وكانت جالسه لافه المنشفه فوق راسها وطيف اللي جالسه معها تتسمع لسواليف ريما عن معاذ  : ياويلي يا طيف اول مره احب شخص كذا بس تدرين وش
طيف وهي تشرب شاهي بحماس : وشهو
ريما بابتسامة خبيثه : معذبته من تزوجنا ما قلت له احبك وهو بيموت على ما اقولها له
طيف بضحك : الله يقطع بليسك تراك معذبته !
ريما بقهقه شريره : خليه عشان يعرف اني مو سهله
وقاطع سواليفهم دخول ماجد : طيوفه الله يعافيك يمديك تروحين لرهف تبيك تسوين معها شنطتها
طيف فزت : ابشر الحين البس شرشفي واروح لها
ماجد بحب : يا روحي انا يعطيك العافيه يا عين اخوك
ابتسمت طيف وراحت تلبس  شرشفها وجلس ماجد جنب ريما ونطق : كيف معاذ معك ؟
ريما ابتسمت : زين
ماجد بمزح : لايكون بس معذبه الرجال !!
ريما بخبث : اي والله معذبته بحبي
ماجد ضحك وهو يلوي يدها بمزح : ما تستحين انتي !!!
ريما :ااااه فكني قد قلت لك انا ما استحي
وبدت نقرتهم الحلوه لبعض وضحكهم وطلعت طيف باتجاه بيت ماجد ودخلت وهي تشوف رهف اللي ترحب فيها وكانت تبي منها تقفل لها سحاب الفستان
طيف : ماجد قايل لي انك تبيني اسوي شنطتك !!
رهف : قلتها لماجد عشان مستحيه اقوله يقفل لي السحاب خفت ينفرط قدامه
ضحكت طيف : لا منتي بصاحيه ترا ماجد يحبك مهما كنتي واصلا انتي يا نحفك ماغير متنانه شوي بسبب الحمل شي طبيعي
رهف : مدري استحيت منه وضحكت طيف مره ثانيه عليها وكملت تقفل لها السحاب وساعدتها بكم شغله وطلعت طيف وهي تضحك ناسيه شرشفها : مهبوله والله
عند سيف اللي طالع من المجلس متجهه للحمام الخارجي وتجمد من رفع عينه على اجمل خلق الله كانت لابسه فستانها الاصفر الفاتح وكان مخصر من عند خصرها الريان وشعرها الحرير يلفح خلفها وبياضها الناصع كان مجملها وضحكتها اللي معذبه فيها قلب الهواوي رفعت راسها والتقت عينها بعيون سيف حالكه بالظلمه ارتعش جسمها من هيئته وركضت بسرعه لداخل البيت تاركه خلفها سيف الشارد بملامحها وهو من اول ما رفع عينه عليها وهو ينسخها بعقله ابتسم بخفه ودخل المجلس عكس طيف اللي من دخلت وهي تلهث برعب ولفو عليها ريما وماجد ونطق باستغراب : وشفيك ؟؟
طيف بتوتر : ولا شي بس كان فيه قطو
ماجد ضحك وهو يفز : يا خوافه يلاه انا بروح لعند الرجال تبون شي؟
طيف ما ردت لانها كانت شارده البال وجلست بجانب ريما اللي ملاحظه تغير اختها ونطقت : لا سلامتك ؛ طلع ماجد ولفت ريما عطول على طيف : وشفيك ليه وجهك منفجع !!
طيف بلعت ريها بخوف : واضح علي ؟؟
ريما : ايه بس وشفيك
طيف : مدري كنت طالعه من عند رهف وكنت اطقطق واضحك عليها وانصدمت بالرجال الواقف قدامي كان يخوف مرررره نظراته تفجع شكله جني !
ريما بصدمه : ركزييي جني ولا انسااان !!!
طيف وهي تستذكر ملامح سيف المخيفه وبلعت ريقها بخوف : هو شكله انسان بس مدري يخوف
ريما ضحكت بقوه : يابنتي وش بلاك منخرعه وشهقت فجاة: لايكون طالعه قدام ولد صديق ابوي !!
طيف بتوتر : منهو ؟!
ريما : سيف ولد ابو سيف صحاب ابوي قد شفته وكانت ملامحه شويه حاده وحواجبه كثيفه وفكه نحيف وعيونه تحسينها مظلمه وقاطعتها طيف وهي تهتف : ااااااييييه هذه اللي شفته مره يفجع !
ريما ضحكت بقوه : اااااهخ ياويلي عنك يا طيف
طيف زفرت : اوف مو وقت ضحكك السامج !!!
ريما : والله شسويي تضحكين !!
طيف كشت عليها ورن هاتف ريما برقم معاذ وردت : هلا 
معاذ : هلا جافه كذا !!!
ريما ضحكت وهي تناظر بطيف ونطقت : اوف حبيبي وش تبيني اقولك !
طيف وسعت عيونها ولكن مو مثل معاذ اللي شهق بصدمه : وششش قلتييي
ريما ضحكت بقوه : حبيبي !!
معاذ : عيون حبيبك
ريما استحت ونطقت مره ثانيه : اشتقت لك وينك فيه ؟
طيف كشت عليها وقامت للمطبخ تاركه ريما تنفجر من الضحك ومعاذ اللي مبتسم على صوت ضحكها : جعلها دايمه اجهزي تراني قريب من البيت
ريما : جاهزه
معاذ : شوفيني وقفت قدام بيتكم ونزل
ريما : اجل بقفل عشان البس النقاب
معاذ : طيب وقفلت ريما واسرعت تتجهز وطق معاذ الباب وفتح له ماهر اللي ابتسم بفرحه : يا هلا يا مرحبا حياك الله
معاذ ابتسم من ترحيب ماهر وسلم عليه : الله يبقيك ودخلو بعدها وابتداء معاذ يسلم على عمه سعود وكمل يسلم على الباقي : استاذنكم انا جاي اخذ الاهل وماشي
الجد سعود : استودعناكم الله
تكررت كلمه معاذ " استاذنكم انا جاي اخذ الاهل وماشي " براس سيف اللي يحس بقهر يعني الحوريه اللي طلعت قدامه زوجة ذا !!! تغيرت نظراته باتجه معاذ اللي لاحظها بس ما اهتم وطلع وهو يشوف ريما اللي تضحك مع ماهر وسحبها معاذ لحضنه : ما شبعتو منها !!!
ماهر : لااا ولا راح نشبع
ريما انحرجت من حركت معاذ وهي تحاول تبتعد عنه بس كان معاذ اقوى منها ومثبتها : معاذ !!
معاذ : اقولها من اليوم مشتاق لك بجي اخذك تقول لا بالله يرضيك
ماهر ضحك : لا والله
ريما بخجل : مععععااااذذ ؟؟
معاذ قفل فمها بيده : اص بس فيه رياجيل توصي على شي يا ماهر ؟
ماهر بابتسامة : لا سلامتك
مشى معاذ وهو يسحب بريما اللي تتهاوش معه عشان قفل فمها وكملو هوشتهم بالسياره تاركين خلفهم ماهر اللي مبتسم وهو يتخيل نفسه مع الجازي وهز راسه بخفه واتجهه لبيتهم
دخل وهو يشوف ريم اللي تتهاوش مع الشغاله : انا ما قلت لك تغسلينهم !!
الشغاله : انتا مدام مره مو كويس عشان انتا ما يسمع انا اقول شويه شويه !
ريم متخصره وبغضب : لا والله محطيتني طرشه على غفله !!
الشغاله : ايش قول انتا !!!
ريم بغيض : مالك دخل وكملي شغلك
الشغاله : انتا اذا سوي معي مشكل والله امشي واخلي انتا تغسل صحون هذا
ريم وسعت عيونها بصدمه : تهدديني ؟؟؟
الشغاله : والله هذا كلام حقي انا ومشت تكمل شغلها تاركه وراها ريم اللي بتموت من الغيض : الله يسامحك يا يمه كانت غلطت عمرك
ماهر ضحك : اهخ شكلك وانتي تهاوشينها يفطس
ريم لفت عليه : والله يا طحنا على شغاله تبط الكبد بس متحمله عشان رمضان
ماهر جلس وهو يصب له قهوه : وانتي ما لقيت تحطين راسك الا براس المسكينه ذي
ريم جلست : لا يغرك وجهها كذابه تراها
ماهر قهقه : اقول بس اتركينا منها وقولي لي وين امي
ريم : راحت السوق
ماهر : اها ويارا ما جات ؟
ريم : لا الحين انت جالس تحقق شايفني مخبره عندك ؟
ماهر ابتسم : احلى مخبره والله
ريم ابتسمت : الله يجبر بخاطرك
.
ابو خالد اللي كان جالس بغرفه ترف اللي متوتره من نظرات ابوها اللي من قال لها الخبر وهي رافضه بس هو مصر الا تصلي وتستخير
ترف : يبه ما ابي زواج الاقارب !
ابو خالد : وش العيب اللي فيه هاه شوفي بنت عمك شهد بتتزوج راكان !
ترف : والله بكيفها انا غير وهي غير
ابو خالد : تكفين يا ترف انا طالبك ما ترفضين وتفكرين بالموضوع ما ابي انحرج قدام ابوي و اخواني
ترف رق قلبها من بعد كلامه هي ماودها تحرجه ولا تحطه بموقف الحرج بس مهي راضيه عن نواف ولا ودها تنجبر عليه : بشوف يا يبه وان شاء الله مهو صاير الا كل خير
ابتسم ابو خالد وحب راسها وطلع تنهدت ترف وهي مقهوره من نواف اللي تركها تتخبط بالموقف الحرج مع ابوها