احتريتك من بين كل البشر وسميتك عشقي وفرحة سنيني

57

"بسم الله الرحمن الرحيم "
•
•
•
•
ترف جلست وهي تبتسم لنواف : تعالي نتصور لنا للذكرى ابتسم نواف وقرب منها ينزل لها الوشاح الابيض وحضنها من الخلف ورفعت ترف جوالها تتصور اكثر من صوره ونواف يستهبل عليها بالحركات وبعدها لفت عليه وهي تضحك : ياخي ما تثبت انت !
نواف عض شفايفه بحب : وين اثبت وانا قدامي قمررررر !!!
قهقة ترف بخجل : ساعديني افتح لي السحاب عشان بغير الفستان طفشني
نواف ابتسم بخبث : اوببب ابشريييي
ترف : نوافوه ضحك وهو يلف خلفها ويفتح لها السحاب وسحبها له وهمس : ماله داعي تلبسين شي
ترف شهقت بخجل ودفعته : نواافف !!! نواف ضحك بقوه عليها : خلاص بخليك على راحتك وضحكت ترف واسرعت تسحب شنطتها للحمام وهي تدخل وتغير ملابسها تبي الفكه من الفستان اللي كاتم انفاسها وبعد ما خلصت من تغير ملابسها وهي ترتب شعرها وترش من عطرها وهي خايفه اخذت شهيق وزفير وطلعت وهي تسوي نفسها مشغوله : نواف وين جوالي ما حصلته !
نواف لف بيرد عليها بس انعقد لسانه وهو يشوفها كان يحس انها كثيره عليه !
من جمالها حس وده يخبيها عن الكل ! ونطق بنبره هاديه : وشهو جوال !
ترف عقدت حواجبها : هيي جوالي وش اللي وشهو !!
ومشت تدوره بس سحبها له وهو يمسح على خدها : مو وقته يا قمر انتي استحت وهي تناظر لعيونه اللي كان يتفحص بتركيز وبعدها ...
.
.
عند راكان اللي ماسك يد شهد ويبوسها وهو مبتسم ابتسمت له شهد وهي تردد مع الاغنيه راكان : ناخذ قهوه ؟؟؟
شهد : ياليت والله ما اقول لا راكان ضحك : ابشري واتجه وقف عند بارنيز وطلب اثنين قهوه شهد : ركاني حجزت لنا رحله ؟؟؟
راكان اخفى ابتسامته : معليش يا شهد ما امداني عندي ظروف ذي الفتره
شهد بقهر : لا عادي مو مشكله
راكان ناظرها وشافها مبوزه وضحك : افا وانا يهون علي زعلك طبعا حجزت بقلب سويسرا شهد بحماس : اااحلللفففف !!
راكان يقهقه : وربي ورحلتنا بكره العصر
شهد بحماس : اااااحبببببببك
راكان ابتسم : وانا اموت فيك يابعد قلبي انتي
شهد ابتسمت وهي تحمد ربها على وجوده وصل طلبهم اخذوه ومشى وهم متجهين للفندق وصلو بعد عشر دقايق وقف راكان ونزل يساعد شهد اللي حايسه بالفستان ومسك يدها عشان تتثبت فيه وتنزل وهي تغط العبايه عليها زين ومشت معه لداخل الفندق وصعدو بالمصعد وبعدها دخلو الجناح وراكان شايل شنطة شهد وشنطته ودخلت شهد قبله ودخل وراها وهو يقفل الباب برجله وشهد فسخت عبايتها وهي تتفحص الجناح اللي كان فخم ومعروف وحط راكان الشنط بالارض : وش حاطه بشنطتك وربي حسبتك خاطفه احد ومنحشته بالشنطه !
شهد بضحك : شدعوه كلها كم غرض حاطتهم
راكان مسك ظهره : ماشاءالله واضح
شهد بتلاعب وهي تتمشى بالغرفه : طلعت يالله تشيل نفسك يا حسافه !
راكان ناظرها وهو رافع حاجبه : لا يشيخه ! تبيني اوريك ؟
شهد بتوتر : شوف الاجواء برا مره حلوه
راكان كتم ضحكته وقف وهو يشيل البشت ويقرب منها ويحضنها من الخلف ويتكي راسه على كتفها : ما اشوف الا قطاوه تتهاوش !
شهد رجفة بتوتر : لا شوف السماء كيف الغيوم مررره تجننن
راكان وهو ياشر على القمره : شوفي هذي انتي
شهد ضحكت بخجل : ادري
راكان لفها عليه : تدرين اجل وضحكت شهد وحضنها ..
.
" بالقاعة "
مروان كان بمكان السايق وخالد بالمقعد الامامي وام خالد وروان ويارا بالخلف ومشو بعد ما تاكدو من انهم اخذو اغراضهم كلها
وعند ماهر اللي اخذ امه وابوه ومشى وريان معه امه واخته راما واخذ نوف وعيالها عشانها بتنام عند اهلها وراما حاطه بحضنها غيث النايم وغيم بحضن امها على وشك النوم وريفان النايمه كانو الاطفال حاطينهم بغرفه بالقاعه ومعهم عامله تنتبهه لهم عشان ما يزعجونهم لانهم اهل العرسان وراهم الف حاجه
ريان : خلاص نمشي اتكلنا على الله ؟
ام نواف : ايه وانا امك
ريان : سمي وحرك سيارته باتجاهه البيت
مابقى احد بالقاعه وخلصت اطول واجمل ليله عليهم صح تعبو بس استشعرو لذتها وفرحتها ..
دخل ماهر وامه وابوه للبيت وريم كانت نايمه على الكنبه وماريا الجلسه على الارض جنب ريم ونايمه
ام ماهر همست لماريا : ماريا روحي نامي قامت وهي توقف : طيب وترا ريم اكل انا اعطيتها اكل واخذت علاج ونامت
ام ماهر : زين زين ومشت ماريا ونزل ماهر شماغه وعقاله على الكنبه وهمس لابوه : بشيلها لغرفتها ابو ماهر : ايه وانا ابوك بشويش عليها
ماهر هز راسه لابوه ونزل لمستواها وهو ييعد البطانيه ويشيلها بهدوء وصعد فيها للغرفه وام ماهر خلفه وفتحت له غرفتها واتجهه لسريرها وسدحها بشويش وام ماهر تغطيها زين وابتسم ماهر : خلاص يمه روحي ارتاحي انا بشيك عليها كل شوي لا تخافين
ام ماهر : الله يحفظك يا حبيبي الحنين
ابتسم ماهر وحب يدها ومشت ام ماهر تنام لانها تعبت حيل واتجه ماهر اللي رد باب غرفة ريم نص عشان يسمعها اذا نادت او شي وراح يغير ملابسه وقاطعه اتصال الجازي اللي نزلت عبايتها اول ما وصلت واتصلت بماهر اللي رد عليها : تصدقين اني زعلان منك !!!
الجازي : ليه ؟؟؟
ماهر : ماورتيني كشختك يهون عليك الكل يشوفك وانا لا !!!!
الجازي ضحكت : افتح لك كام من عيوني وفتحت له وهو يسوي نفسه زعلان : لا خلاص معد ابي بعد ايش توريني بعد ما الكل شافك قبلي !!
الجازي قهقة : يعني مراح ترضى ؟
ماهر وهو يسوي نفسه مايشوفها : لا
الجازي وهي ترسل له بوسه : امموووووحححح والحين ؟؟؟؟
ماهر ابتسم باتساع : عيديييهااااا
الجازي ضحكت : مو زعلان ؟!
ماهر : يلعن ابو الزعل يا شيخه عيدي بس ضحكت الجازي وهي تعيديها وابتسم ماهر بحب : يالبيه صدق ياليت عرسنا اليوم
الجازي : لا بدري مره باقي لي اشياء ما خلصتها !
ماهر : معليه نخلصها بعد العرس
الجازي ابتسمت : مابعد الصبر الا الفرج !
ماهر تنهد : الله يكون بعون قلبي المسكين ؛ ضحكت الجازي وسهرت الليل كله تسولف معه ..
.
" اليوم التالي "
•العصر الساعه ٤ بيت ابو خالد •
روان قامت وهي تسمع امها تقومها تسوي قهوه لابوها لانها رايحه لعمتها منيره ام خالد : والله لو ما قمتي يا ويلك
روان بنعاس وهي تعدل وضيعة نومها : طيب
ولبست شرشفها ام خالد ونزلت عند الباب وقبل لا تخرج نادت عليها وطلعت وروان قامت بغيض وهي تضرب المخده بالارض : وين الزفته ترف وقامت بغضب تبي تحط حرتها فيها ودفعت باب الغرفه برجلها وشافتها مافيها احد وفجاة حكت راسها وهي تتذكر انها تزوجت واسرعت لجوالها تتصل عليها
"بالفندق حق ترف ونواف "
كانت ترف تتمكيج قالها نواف انهم بيطلعون يتقهون برا وبكرة رحلتهم
ونواف اللي دخل وكان لابس طقم كشخه : ترف قلبي ما خلصتي ؟
ترف : على وشك وقاطعها جوالها واخذته وهي تشوف روان استغربت وردت : هلا روان
روان ببكاء : وينك انتي مو جايه لنا !!
ترف بفجعه : ليه فيكم شي تكلمي !! نواف قرب من ترف يبي يسمع وهو مستغرب نبرة ترف الخايفه ردت عليها روان وهي تفرك عينها بحزن : لا بس اشتقت لك ! ترف عضت شفايفها تكتم ضحكتها نواف سمعها وهمس : افتحي سبيكر ترف رفضت بس اصر. نواف وفتحت وكملت روان : الله يقلعه نواف ذاك ابو راس كنت انصحك ما تتزوجين من القرايب انتي شايفه راسه ورعك بعدين بيجي راسه قد ثلاجة جدتي منيره ! نواف انصدم وترف ضحكت بقوه ورد بغبنه : انا ابو راس ؟؟؟؟؟ والله راسك الكبير انتي وكعكتك اللي حاطتها فوق راسك كنها زق ! روان شهقت ومسحت دموعها : والله لو ماتسكت لاخذ منك ترف !!! نواف : تخسين وترف تحلمين تشوفينها بكره طيارتنا رايحين طرابزون وانتي خيسي بالبيت !
ترف تضحك ودفة نواف : معليك منه بجيكم اسلم عليكم بكره قبل لا اسافر
روان : لا يشيخه بتروحون تركيا بدوني !
ترف : يابنتي وشفيك انتي ! نواف : مافي روحه اص ماناخذ اطفال
روان بغيض : قولي له هين ان وريته
ترف : خلاص عاد عن المشاكل
نواف ضحك وباس خد ترف بقوه : دقيتي بالوقت الغلط سمعتي كيف ابوسها ؟؟
ترف انصدمت  وقفلت باحراج وهي تضربه بخفه : نوووااافففف !!!
نواف ضحك : عيونه ؟
ترف : اوووف تراها هبله بتمسكها علي قرن كامل !
نواف : يابنتي معليك ذي بزر بس مشينا
تنهدت ترف وهي بتموت من الموقف اللي صار معها
روان ناظرت للجوال. بصدمه : يمه وسخين ! ييعععع وهي تحس بقشعريرة من التقزز وراحت لغرفتها تغسل وجهها وتتوضى وتصلي
"بيت ابو ماهر "
ريم اللي افطرت واخذت ادويتها ونزلت مع ماريا بالدرج وفز ابو ماهر اللي كان جالس يتقهوى : وش قومك انتي !!! ريم وهي تمشي بشويش : طفشت من السدحه ! ابوها مسكها من يدها وهو ينسدها عليه ويمشيها : حتى ولو !
تنهدت ريم : ماني متعوده كذا طفشت حتى من البيت وجلست على الكنبه وامها تعدل لها المخدات : وين تبين تروحين !
ريم : اي مكان وربي احس بخنقه يكفي خنقة المستشفى!!
ابو ماهر : اجل وش رايك نروح الشاليه حق ابوي ؟
ريم ابتسمت : ياليت نغير جو والبنات معنا راح انبسط والله
ام ماهر : ايه صح وقته الشاليه خلاص دخلنا الصيف
ابو ماهر : خلاص ابشرو بكلم ابوي والعيال نطلع سوا يزين الطلعه مع الجماعه افضل من تكون لحالك
ام ماهر : صادق والله ومنها عمتي تغير جو لان من بعد ما تزوجت طيف وهي تحس بالوحده مع انو والله لا انا ولا ام خالد ولا ام نواف وام شهد دايم وحنا عندها وماشاءالله ماتقصر ام سعود
ابو ماهر : خلاص معليكم اكلمهم اعتبرو الموضوع تم !
ريم ابتسمت بحماس : الله يخليك لنا
ابو ماهر ابتسم : امين
""
كلم ابو ماهر ابوه اللي وافق ويجهزون اغراضهم من اليوم عشان عصر بكره يمشون للشاليه وكان الكل مبسوط كانو محتاجين طلعه بعد التعب اللي جاهم بالعرس يحتاجون تعويض
"بيت ابو حاتم "
جو ابو حاتم وام حاتم من سفرتهم وركضت لهم دانه تحضنهم : اشتقتتتت لكممم
ام حاتم : يابعد روحي وانا ولهت عليك
بدر : ماظنتي يا يمه رحتي انتي وابوي تجددون شهر العسل حركات والله
ابو حاتم : ولد ! ضحك بدر وسلم على راس ابوه ويده وامه كذلك
دانه : معليكم من ذا الدفش بس تعالو ارتاحو عشان تحكوني على السفره كلها
بدر وهو يهدد دانه بالاشاره وهي تطلع له لسانها باستفزاز ويوم رفع يده وهي تركض وتجلس جنب ابوها : ايه يبه اخبارك
ابو حاتم : الحمدالله بشريني عنك !
دانه بدلع : شفت يا بابا ولدك ذا يهددني كل شويه
بدر جلس : اسالو ليه ! ام حاتم : ليه ؟
بدر : الاخت من اسبوعين ما تاكل الا من المطاعم والليل كله سهر حتى الصبح ما تنام الا الظهر
دانه : مالك دخل فيني ! يحشر نفسه بكل شي !
ام حاتم بعصبيه : دانه قبل لا امشي من هنا وش قلت !!!
دانه كتفت يدينها وهي مبوزه : قلتي مافي سهر ولا مطاعم
ام حاتم : شفتك تسوين العكس !!!
ابو حاتم وهو يحضن دانه : خلاص بشويش على بنيتي !
بدر : يمه شفتي ابوي اللي يخربها
دانه وهي تحرك فمها بدون صوت : بعلم عليك عن هنوف
بدر رفع حاجبه بحده وبنفس حركتها : بقطع لك لسانك واخلي العامله تطبخه واوكلك اياه دانه بلعت ريقها بخوف وهي تعرفه مجنون وتخاف من جنونه
ام حاتم : وش تقولين انتي وياه !
دانه بتوتر : ولا شي
بدر وهو يبتسم  : يب
.
"بيت تركي "
توه جاي من دوامه وهو يغير ملابسه ويلقى امه مسويه القهوه والحلا وجلس وهو يصب به فنجال : كيفك بعد الردح ؟
ام تركي بابتسامه : زينه وجايبه لك البشاير
تركي : وشهي ؟
ام تركي : لقيتك لك وحده تقول تطرح الطير من السماء جمالها ياهي تهبل
تركي تنهد بهدوء : يمه مو قايلك لك الموضوع ذا لا تفتحينه ؟
ام تركي : يا ولدي مابي البنت تروح علينا !
تركي بسخريه : منهي ذي اللي تطرح الطير من السماء من جمالها !
ام تركي بعفويه : بنت ام خالد اسمها روان واخت العروس للي رحت لهم والله ياهي عليها زين يذبح ! تركي وسع عيونه بصدمه ونزل فنجاله : بنت ابو خالد ؟ ام تركي : ايه فكر يا ولدي الزين مايقعد ترا !
تركي مسح على شاربه بشرود :  هممم افكر وارد لك
ام تركي بفرحه : تكفى يا ولدي فكر زين لين متى بنتظرك تعرس انا وحيده وابي اشوف وافرح بعيالك !
تركي ابتسم وحب يدها : ان شاء الله يانظر عيني
.
" بالفندق عند راكان وشهد "
كانت شهد تغني وهي تتعطر بعد ما خلصت من الميك اب وشعرها اللي مجففته لانه مبلل ودخل راكان اللي يبتسم ويناظرها والجوال باذنه : عقبالك يا سامي
سامي : تكفى كثر دعاء
راكان نحنح : ابشر ابشر
شهد لفت عليه وهي تبتسم وترسل له بوسه بالهواء اتسعت ابتسامة راكان سامي رد عليه : اسمع ماتدري عن وضعها الحين كيف ؟؟؟
راكان : طيبه طيبه مافيها شي
سامي : اجل اسمع ابي فزعتك اول ما ترجع من سفرتك توقف معي وتخاويني اخطبها !
راكان : ابشر بس اتركني وراي امور اخلصها
سامي ضحك : موفق مع السلامه
شهد كتمت ضحكتها ورد راكان : في امان الله وقفل وهو يصفر وهو واصل لاخر مراحل الخقه من جمالها : اسالك بالله يرضيك تخطفين قلبي كذا !!
شهد ضحكت بدلع : ايه يرضيني عشان اعرف انك ماتشوف احد غيري
واكان ببسمه سحبها له : لا يا شيخه بعد هذه كله وبناظر احد غيرك !!!
شهد ابتسمت وهي تمسح على صدره وتناظره ببسمه وغمازاتها واضحه : يابعد عمري انا عض راكان شفايفه وهو يبوس في خدودها ودفعته شهد يوم حست انه بيهون عن الطلعه : ستووووب طلعه بنطلع فاهم !
زفر راكان : خلينا نرتاح وبكره بتكون سفرتنا !
شهد : لاااا تكفى نفسي بقهوه !
راكان تنهد وابتسم : الشكوى لله مقدر اقول لا اجهزي
شهد ابتسمت باتساع وهي تسرع تربط شعرها وتلبس عبايتها ونقابها وتجهز شنطة اليد حقتها وبعد خمس دقايق طلعو من الفندق متجهين لكوفي شهد مدمنه قهوتهم طول الطريق كانت شهد تسولف على راكان اللي يضحك ويبتسم على سواليفها وهم طايرن ببعض ..
.
" بيت ابو خالد "
روان تتقهوى مع مروان وابوها وهي لابسه قميص قطني فضفاض ورافعه شعرها لفوق وجهها واضح عليه انها توها صاحيه ابو خالد : كيف العرس عندكم ياروان
روان ابتسمت : يهبل يا يبه يا اني ردحت ردحت لين قلت امين
ضحك ابو خالد : عاشتي وانا ابوك
مروان : لا يكون فجعتي الضيوف !
روان بتكشيره : لا يا شيخ ! اقول اص عز الله رقصت وحمست الكل حتى المطربه تحمست معي مروان : عاد زينا حنا رقصنا سامري لين قلتا امين
روان بحماس : يا حسوفي ليتني معكم !
ابو خالد ضحك : منتي بصاحيه ارقصيه عند امك
روان : عز الله برقصه عندك مو ابوي ؟
ابو خالد مسك اذنها بمزح : ياويلي من لسانك الطويل هذه !!!
مروان : اتركه علي اقصه بحركه وحده
روان : تخسي !
وبدت هوشتهم اللي ابتلش فيها ابو خالد ..
" بيت محمد ابو هيفاء "
كانو البنات جالسين مع امهم وهم يسولفون عن العرس وانهم انبسطو
ويمدحون طلة ترف وشهد وكيف كانو مثل الاميرات بطلتهم الفاتنه ..
هنوف : بسم الله عليهم كانو يهبلون
هيفاء وهي تاكل من الحلا : اي والله
مرام : منجد توقعت يحوسون لان عروستين بس ماشاءالله كان كل شي ماشي تمام  هنوف : اي لانهم متفقين من قبل بكل شي بس حسافه ريم ما جات
هيفاء بحزن : عاد لا تذكريني كنت حزنانه انها مو حاضره
مرام : كيف وضعها ؟
هيفاء: زين بس تقول انو لازم تراجع عند الدكتور سته شهور وهكذا عشان تكمل علاجها بس الحمدالله ترا حالتها ممتازه افضل يعني من كثير اشخاص معهم مرض تضخم القلب لان عمرها صغير يعني بنيتها الجسديه تستجيب للعلاج بسرعه
مرام : الحمدالله اجل
دخل محمد وهو يتربع قدامهم وتصب له هنوف قهوه وهو مبتسم على غير عاده واضح من ملامح انه فيه كلام بيقوله بس مو عارف كيف يقوله
مرام ناظرته : وش عندك يا محمد واضح عندك كلام
محمد ابتسم واخذ فنجال القهوه من هنوف وهو يرتشف منه بروقان : اي بالله عندي كلام يسر الخاطر
مرام باستغراب: خير اللهم اجعله خير انطق وش فيه ؟
محمد ابتسم وناظر لهنوف وهيفاء : والله اليومين ذي بيجون خطابه للبنات عاد اللي بيكون من نصييها هي سعيدة الحظ
هيفاء وهنوف ناظرو لبعض بصدمه ومرام بفضول : منهم نعرفهم ؟؟
محمد ببسمه : ايه ايه ناس معروفين والنعم فيهم واللي خاطب رجال عليه الكلام
مرام وهي تمد فنجالها لهنوف عشان تصب : الله الله ومن ذا
محمد بفرحه واضحه من نبرته : الضابط بدر ولد مرزوق جاركم
هنوف اللي كانت تصب لامها القهوه ومن الصدمه احرقت كف يدها وهي تنتفض بالم : اااه
مرام ومحمد وهيفاء بفجعه : بسم الله
مرام بعصبيه : وشفيك انتي ما تشوفين !!
محمد : لا حول ولا قوة الا بالله
هنوف ركضت تغسل يدها وهي تكبح جموح غضبها وهي تسرع لغرفتها وهيفاء اللي لحقتها وهي خايفه على اختها ودخلت هنوف غرفتها واول شي سوته هي اتصلت على رقم بدر وتنتظر رده ودخلت هيفاء وهي تقفل الباب وبهمس : وش بتسوين ؟؟؟
هنوف بغضب: بذبحه ولد الكلب !
رد بدر : يا هلا ومرحبا
هنوف بغضب : لا هلا ولا مرحبا يا كلب تتوقع يوم جيت لابوي تكلمه عساس بقبل فيك !!!!! بدر بابتسامة لعوبه : اوه وصلك الكلام ؟
هنوف وهي تشد شعرها بغضب خلاص وصل الغضب حده عندها وهيفاء اللي بتموت من الخوف من كلام هنوف : وصلني يا قذر والفكره اللي ببالك ذي انساها ماني قابلتك وابوي مراح يجبرني فاهممممم لا تحط نفسك بموقف غبي عشان بس توصل لي انا صعبه يا ولد مرزوق !!
بدر بابتسامة هاديه : ابدا منتي بصعبه دام ابوك ابتهج وجهه اول ما كلمته وانتي منجدك متوقعه ابوك يرفض طلبي انا يا الضابط بدر عشان رضاك ؟
هيفاء تحاول تهدي هنوف بالاشاره بس هنوف كانت واصله لاقصو حد من الغضب : اسمع يا ولد التبن ما هميتني لا انت ولا منصبك وروح نام واحلم لانك مستحيل تمس مني اظفر وقفلت بوجهه وهي ترمي جوالها بعصبيه وهيفاء تمد لخا مويه عشان تهدى عند بدر اللي ابتسم بخبث: والله مراح اوقف عند لمس اظفرك يا بنت محمد والايام بيننا !
هيفاء بغيض : مو منجده ذا يباله من يربيه !!
هنوف : والله العظيم لولا سمعة ابوي كان امداني ذبحته ولا دريت عنه الكلب
هيفاء تنهدت : طنشيه ابوي مستحيل يجبرك وتعرفينه !
هنوف : ادرييي اعرررف بس ثقته قهرتنيييي !
هيفاء: معليك منه واذا جاء وقت الجد امي بتتصرف مع ابوي
هنوف تنهدت : هذه اللي مطمني امي اكيد بتوقف معي
هيفاء ابتسمت : ايه ازهليها
.
اتصلت ريم واخبرت الكل انهم بكره بيروحون والكل كان على قدم وساق يجهزون اغراضهم واللي ناقصهم حتى عزمو مرام تجي  و وافقت
اليوم التالي كان منزل الجد سعود وعياله يعن بالضجيج كان الكل مسرع عشان يبون يخلصون بسرعه ولا يتاخرون على الموعد اللي محدده الجد سعود
عند ماهر اللي اخذ عمه صالح وزوجته ومرو راكان وشهد اخذوهم عشان بيوصلونهم للمطار وبنفس الوقت يودعونهم وخالد اتجهه لنواف وترف
وريان ومروان وماجد بياخذون الكل للشاليه
بعد ما ركب راكان بالامام وعمه صالح بالخلف عشان يبي يجلس جنب بنته وكان هو ومها كل واحد يتبادل شهد بالاحضان اللي كاتمه بكيتها اول مره بتبعد عن امها وابوها !
راكان بمزح : يا عمه انتي وعمي لا تاكلونها علي !!
ماهر كتم ضحكته وصالح بقهقه : لا تحدني اخذها وتروح لشهر العسل لحالك !
ضحكت شهد وامها من رد والدها
ضحك راكان : لا عاد ذي فيها علوم !
صالح : اقول اص اسجد سجود شكر لانك ماخذ قطعه من قلبي معك !
شهد بهمس لوالدها : معليك النص الثاني موجود وهي تاشر على امها ضحك صالح وهو يحضنها ومها اللي تبتسم
وقفو امام المطار ونزلو وحضن ماهر راكان : الله يوفقك
راكان ببسمه بادله : وياك وركب بعدها ماهر لسيارته وصالح ومها يودعون شهد اللي حبت روسهم وبعدها دخلو متجهين شهد وراكان لرحلتهم
ودخلت مها وهي تبكي بحزن وصالح يهديها وماهر يسوق متجهه للشاليه
.
عند خالد ونواف وترف بالسياره كانو يسولفون
وترف فتحت سنابات البنات اللي كانو يصورون بعض واضح رايحين لمكان
ترف بفضول : خالد بتروحون مكان ؟؟؟
خالد : اايه بنروح للشاليه حق جدي
ترف : حسافه جاء بوقت غلط !!!
نواف بصدمه : حسافه !!! لا مو منجدك ترانا طالعين خارج المملكه بنستانس اكثر منهم
ترف : بس مافي مثل جلسة البنات
ضحك خالد : اجل خليه يسافر لحاله واخذك لهم
نواف صفق يد خالد اللي يضحك وترف كذلك : لا ما يطاوعني قلبي
نواف ابتسم وهم يمسك قلبه : اهخ يا قلبي
خالد صفق كتف نواف : ولد ساكت لك عشان ترف !
نواف : وشفيك ترا اختك زوجتي !
خالد عض شفايفه بغيض: نوووواااف !!!
نواف ضحك بقوه : يالبيه من اليوم ورايح بيصير ضغطك مرفوع
ترف : انت واياه وقفو محارش لبعض !!
خالد : انزلو بس وصلنا ونزلو وهو يودعهم وبعدها اتجهو لرحلتهم
ومشى خالد للشاليه
.
مع مروان كان روان وام خالد وام ماهر ويارا وابو ماهر اللي جاء وهو يسند ريم اللي تتحلطم وركبها بشويش وروان ابتسمت لريم وهي تحضنها : يالبييه اشتقت لك
ابو ماهر : لا انتي ناوية بنتي ! وش بلاك ذا سلام بغيتي تجلسين عليها !!
روان بصدمه : الله الله من الشخصنه ياعم كله حضن وشهو اجلس عليها بسم الله على نظرك
ابو ماهر زفر : اقول بس يا ام ماهر انتبهي للريم من ذي المفجوعه !
روان شهقت بصدمه : مفجوعه !
ضحكت ريم : خلاص ييه روح مافيني الا العافيه
مروان كان ميت ضحك من ذبات عمه اللي خلى روان تنجلط وقفل الباب ومشى تارك روان مغبونه : انت اسكت ترا ما رديت الا عشانه عمي !
ام خالد : جاك اللي تستاهلينه البنت تعبانه بشويش عليها !!!
روان : زين زين فهمت
ام ماهر بابتسامة وهي تحضن روان بحنان : معليك منهم سوي اللي تبينه بس بالهداوه !
روان : خاله !
ضحكت ام ماهر وضحك كل اللي بالسياره عليها
ومشى مروان وخلفه سيارة ريان وفيها ام نواف وراما ونوف وعيالها وماجد بسيارته ومعه امه ورهف و ولده سعود وابو خالد يسوق ومعه ابوه وباقي اخوانه
والكل حرك للشاليه
وكان كل ذا تحت انظار دانه اللي راقبتهم من اول ما بدو يجهزون سياراتهم
وركضت لعند امها الجالسه بالصاله وبدر : ماما ماشاءالله جيرانا رايحين شكلهم رايحين للاستراحه حقتهم او شاليه عشان الاجواء الحين صيف
ام حاتم : ماشاءالله يتهنون يارب
دانه : اقولك من الحين اذا عزموني بروح !!!
ام حاتم : اذا عزمو الناس امكن رايحين طلعه عائليه مايبون احد
دانه بعبوس : وش يعرفك !
ام حاتم : انا قلت امكن !
دانه تنهدت : اوووف يارب يعزموننييي وربي طفششش والبنات جوهم يجننن
ام حاتم باستغراب : ماشاءالله الاهتمام ذا ما شفته من زمان لمن كانت نوف تدرس معك ماكنتي معها مثل الحين وش السر !
دانه وهي تتذكر ريان وملامحه الوسيمه وابتسمت : ما كنت امون عليها ولا اعرف شخصيتها مثل الحين !
بدر كان يستمع لكلام اخته وهو لاول مره يتمنى انهم يعزمونها عشان يوصلها ويعرف منها اذا فيه هنوف او لا
.
المغرب والكل كان بالشاليه والبنات يجهزون سفرة القهوه والشاهي وبدو يرتبون الحلا والمالح والصحون وينسقون وكل ما حطو شي غيم وغيث وسعود وريفان خربو عليهم والجده منيره مستانسه عليهم وتحمي عنهم اذا جو يشيلونهم
ريم الوحيده اللي جالسه وحاطين لها تكايه وتصور البنات وحوستهم مع الاطفال وميته ضحك
نوف اسرعت تمسك غيم قبل لا تخرب الشيز كيك وهي تتحلطم : ياويلي ذول وش يمسكهم !!!! وشهقت وهي تشوف غيث اللي خرمش عين ريفان وبكت واسرعت ام نواف تهديها وراما تشيل غيث
روان مسكت راسها : يا راسي بينفجرررررر جاين نستانس ولا نسمع لحون بكاء احباب الله !!!
ريم ضحكت وهي تكح وام ماهر تسكتها عشان لا تتعب
رهف شالة سعود وهي تتجه للباب بعد ما كلمت ماجد يجي ياخذه وفتحت الباب وكان قدامها وهي تمده له : امسك تكفى تعبني !!
ماجد شاله وهو يبوس خده : وش سوا ؟
رهف : قول وش ما سوى الله يحفظه هو وعيال نوف وريفان عصابه هذه وهم صغار وش خلو لكبرو
ضحك ماجد : خلاص ارتاحي بيكون تحت نظري
رهف ابتسمت : يا بعد روحي انا وقفلت الباب واخذ ماجد سعود لعند ابوه واخوانه والعيال
عند البنات راما كانت تنوم غيث ونوف تنوم غيم واول ما غفى غيث وتلحقه غيم وغطوهم وهنا ما بقى الا ريفان اللي تلعب بس كان الوضع هادي بعد ما نامو عيال نوف وبدت روان تشغل السماعه على اغاني وتصور هي والبنات
وبعدها جلسو يتقهون ودخلت مرام ومعها بناتها والكل قام يرحب فيهم
هنوف وهي جالسه جنب ريم وتسال عن حالها : وربي لك وحشه يا قلبي
ريم ابتسمت : ياحياتي
هيفاء وهي تتقهوى : عاد كنت بقول يا ريموه فزي سوي قهوتك
ريم ناظرت لامها اللي كانت تخزها بحده وضحكت وهي تاشر عليها : وصلت نظرات التهديد
الكل : هههههههههههههههههههههه
وقف معاذ سيارته امام باب الشاليه ونزلت الجازي تفتح لريما الباب وتساعدها بالاغراض ونزلت ريما وكذلك معاذ اللي لابس بنطلون وتي شيرت
ودخلت ريما وهي رافعه عبايتها : يهببب لا يكون خلصتو القهوه عليييي !!!!
الكل ضحك عليها ونطقت الجده منيره : لا أله الا الله الناس تسلم اذا دخلت
ريما : السلام عليكم جميعًا وحبت راس امها وفسخت عبايتها وجلست لان العهد بينهم قريب وكذلك الجازي اللي حت الحلا على سفرة القهوه والشاهي وجلست
ريما وهي ترسل بوسات لريم : كيف حالك ؟؟؟
ريم ببسمه : بخير الحمدالله
يارا بابتسامة : يوه عاد ريموه بذات لا تسالين عليها ابوي شايلها شيل
ريما بدهشه : راشدوه ماغير !!!
ابتسمت ريم : الله يحفظه مو خلي علي شي
الجده منيره صفقة ريما على راسها : انطقي اسم اخوك زين ياللي ماتستحين على وجهك !!
ريما بتكشيره : عاد انتي يا يمه ماتدانين على بكرك شي !
يارا : صادقه جدتي الا ابوي خط احمر
ريما : اسكتي انتي لا احط الخط الاحمر بورعك الجاي
يارا بضحك وهي ترمي عليها قاروره فاضيه ابتسمت ريما
الجازي لريم : بشريني عنك ان شاء الله زينه تاخذين
ريم : اللهم لك الحمد بعد اسبوع عندي موعد بالمستشفى
الجازي : الحمدالله اهم شي انك بخير الباقي يهون
ريم : اي والله
روان وهي تلعب مع راما على ايباد ريم : ماشاءالله يهبل الايباد
راما : ذا الاصدار الجديد صح يا ريم ؟؟؟
ريم : اييه الجيل العاشر افضل شي
روان : يابنت المحظوظه
ضحكت ريم : حبيبتي ماتهنيت فيه على طول تعبت
روان : شوفي ذي رساله ربانيه يعني اخذه
ريم : لا يا شيخه دزي بس
ضحكت روان : امزح معك
راما : بنات اعزم دانه ؟؟؟
ريم : عادي اول يوم خليها تجي
روان : يب مو مشكله بالعكس عسل
راما ابتسمت : تمامممم وقامت تتصل على دانه اللي جالسه جنب امها وهي تتفرج على التلفزيون وردت على طول ردت : هلا
راما : سلام كيفك
دانه : وعليكم السلام بخير الحمدالله وانتي
راما : اللهم لك الحمد بخير فاضيه عندك شي ؟؟
دانه انتفضت تعدل جلستها وهي تفتح سبيكر لامها :ايه فاضيه ماعندي ولا شي ليه ؟ راما : اجل حياك الله عندنا بشاليه انتي والوالده مجتمعين وناقصنا شوفتك
دانه ترقص بصمت وهي مبسوطه وامها كاتمه ضحكتها من حركات بنتها وردت دانه : الله يبقيك ياعيني بكلم ماما وارد لك
راما : اوكيه ياروحي انتظر رسالتك
دانه : ان شاء الله وقفلت وهي تقفز : سمعتيييي
ام حاتم وهي تحشي الكوسه : سمعت بس ماني رايحه
دانه : مااااماااااا
ام حاتم : ياربي فجرتي راسي
دانه : تكفين تكفين خليني اروح طفشانه وربي اموت من القهر لو ما رحت !!
ام حاتم : اعوذ بالله فال الله ولا فالك وش بلاك مطيوره
دانه : ابي اروح سمعتي البنت عزمتنا !
ام حاتم : انا مقدر اروح واعده ابوك بسوي له العشاء بس اذا تبين انتي روحي
دانه ابتسمت بفرحه وهي تبوس خدود امها : يالبييييه افضل ام وربيييي وركضت لغرفتها تاركه امها تضحك عليها
واسرعت دانه تفتح دولابها وتاخذ فستان عاري الاكتاف بس خيط ينربط خلف رقبتها وهو ماسك عليها ولونه سماوي فاتح واسرعت تلبسه وتشتغل على نفسها بالميك اب وتجهز اغراضها اللي تحتاجها
.
"عند الشباب "
كانو جالسين مع الكبار ويسولفون
مروان وهو يرفع سعود لفوق ويمسكه وماجد يهاوشه : يابزر لا تطرح ورعي
مروان : لا معليك وهو يحضن سعود اللي كان يضحك على حركه مروان
ريان : بسم الله عليه وش توكله يا ماجد ؟
ماجد : هاها تنكت انت ووجهك !
ريان بقهقه : ياخي اسال لا اكثر
ماجد : حليب بقر وش يعني ليه تحبسه مثل بنتك ام خدود
ريان بمزح : عن الغلط !
خالد : اي والله عن الغلط بنت ريان حاجزها لولدي
ريان بضحك : خله يجي وبعدها يصير خير
خالد : هاهاها
ماهر بابتسامة : استنو بتبدا الحرب اذا جات بنت ريما
مروان : ليه ريما بتجيب بنت ؟؟؟
معاذ بابتسامة : اايييه
خالد : لا ما اصدق ريما صغيره !
مروان : هههههههههههههه الله يعينك ضربتين على الراس توجع
الجد سعود : شكلك تبي الضربه يا مروان ولا ؟؟؟
مروان جلس وحط سعود بحضنه : لا الله يطول بعمرك
معاذ ابتسم باتساع : جاك الرد الزين من اطيب الرجال
.
" بيت سيف "
كانت طيف جالسه بصاله وهي تتفرج على التلفزيون وهتان منسدح على فخذها وهي تلعب بشعره وهو يتفرج على ايباده ودخل سيف وجلس وهو يفرك راسه بالم طيف انتبهت له : وشفيك ؟
سيف : راسي يوجعني
طيف : سلامتك ما اخذت دواء ؟؟؟
سيف ضيق عينه وهو ينطق بنبره فيها من الغيرة : اخذت ولا سوت شي ماودك تسوين لي مساج لراسي ولا عشان انا مو هتان ؟؟؟
طيف انصدمت : لا مو كذا بس سيف بحده : هتان اصعد لغرفتك
هتان عدل جلسته : ليه بابا ؟
سيف بنفس الحده : ماسمعت وش قلت ؟؟
زعل هتان وهو ياخذ جهازه ويصعد لغرفته بصمت طيف بدفاع : وشفيك على الولد ماسوى شي عشان تكلمه بذي الطريقه !!!
سيف رفع حاجبه : بتعلميني الحين كيف اتعامل مع ولدي ؟
طيف : لا ما قصدي كذا بس ماله داعي ذا الاسلوب الجاف !
سيف : انا ابصر بولدي
طيف تنهدت وهي توقف تلبس شبشبها بتروح تراضي هتان وتتفاجئ بسحب سيف لها وطاحت بحضنه ولف يدينه حولين خصرها وناظرها بحده : انتي متزوجتني ولا متزوجة هتان !!
طيف بصدمه فتحت فمها : سيف !
سيف رفع احد حاجبيه بحده : مو ملاحظه اهتمامك فيه اكثر مني انا يا زوجك ؟
طيف بتوتر جات بتقوم بس كانت يدين سيف مثل الحديد موضوعه حول خصرها ومثبتها : ما صرفت هتان عشان تلحقينه ابيك تسوني لي مساج لراسي
طيف بلعت ريقها ورفعت يدينها تمسد راسه وهو ارخى راسه للخلف وغمض عيونه وهي تحرك انمالها على جبينه وداخل شعره وهي تتأمل ملامحه الحاده ماقد شافته يضحك بخفة دم مثل ماهي متعوده على اخوانها وعيال اخوانها تحس ماتعرف تتصوف معه ولا مع مزاجه المتقلب وفجاة طلعت منه تنهيدة يوم ضغطت على فروة شعره وطاحت نظراتها على شفايفه اللي مزينها شنبه وفتح عيونه وهو يتفحصها وانتبهت انه فتح عيونه وهي ترفع نظرها لراسه وكانت يدينها ترتجف من الاحراج من نظراته الثاقبه اكثر شي يوترها هي نظرته الطويله وكانه يقرآ مابداخلها وانصدمت من حضنه لها وهو يستنشق عبيرها جاهل منها تتجمد ونطق بنبره هاديه: انشهد انك فارقة الوصوف يا ست البنات !
طيف احتقن وجهها بالاحمر من الخجل ما توقعت كلامه وتوترت ورفع راسه لها وهو يبتسم بخفه وهو يمسح على خدها : يازين الخدود وراعيتها
ضحكت طيف وبعدها لفت وجهها بخجل من نظراته وابتسم بخفه وهو يلفها له : يالبى المبسم وراعيته طيف بخجل : سيف خلاص بقوم اسوي العشاء
سيف ببسمه : استرحي بس يوصلك احلى عشاء
ابتسمت : ياليتك تبقى كذا مبتسم الوجهه
سيف بحده : ليه وشفيني ؟
طيف بتوتر : ولا شي ضحك بقوه على خوفها وابتسمت طيف بصدمه وهي فاتحه فمها من ضحكته واخيرا تحقق اللي ببالها وهي تشوفه يضحك كذا : بسم الله عليك تهبل اذا ضحكت ليه التكشيره الدايمه ؟
سيف ابتسم وقرب من اذنها يهمس : عشان الهيبه لا تروح
طيف ابتسمت وخبطت اكتافه العريضه : ماشاءالله مع الرزه ذي صدقني مهي ضايعه ابتسم سيف وهو يسحبها له بقبله ..
-
عند دانه اللي كانت لابسه عبايتها المطرزه بشغل فخم ورايق وشايله بيدها شنطتها : ماما بدر برا بمشي معه
ام حاتم : طيب واعتذري لهم اني عندي اشغال
دانه : طيب لا تشيلين هم ومشت طالعه لبدر اللي لابس ثوب وكاب وركبت دانه : ابي امر اخذ باسكن اخذ سطل ايسكريم
بدر : طيب وشغل سيارته ومشى
عند الشباب كانو مسؤلين عن العشاء لانهم مسوينه شوي دجاج ولحم والمتولينه ماهر وريان كان ريان رافع ثوبه على خصره وعاصب راسه بعمامه رماديه وماهر زيه رابط ثوبه على خصره لكن مو حاط شي على راسه
خالد : هاه ما خلص اذوق ؟
ماهر : باقي الدجاج اللحم يباله شويات ويخلص
ريان وهو يهف على الشوايه بقطعة كرتون : ماودك تطس عنا لانك ابلشتنا !!
خالد : شدعوه كله سوال اهخ بس على العشير اللي راح وتركني عندكم
ماهر ضحك : انت محزن عليه وهو متغرق بالعسل في طرابزون
خالد بتكشيره : والله لو ماعندي دوام كان لحقته
ريان ضحك : مهبول انت معرس وش تبي فيه اعتقه بس شهر وبعدها انشبو لبعض خالد : اول ما يجي لبيته بسنتر عنده
ماهر وريان ضحكو عليه
جاء ماجد لهم : وش تضحكون عليه
خالد : معليكم منهم ذول ماينشرهه عليهم
ماهر : كاني اعطيتك وجهه ؟
خالد ابتسم وغمز : امون ولا ؟؟؟
ماهر : عشان خاطر اللي خابرها ولا صفقتك
ضحك خالد : مافي تفاهم على طول صفق
ماجد : هات هات بس يا ريان انت تعبت وانت تهف روح استريح عن دخان الشوي
ريان : بشم لي هواء برا واجي وطلع وكان ماهر يراقبه وتنهد : لو انك مخليه دخان الشوايه ولا دخان السيجاره
ماجد بصدمه : يدخن ؟؟
ماهر : من توفت المرحومه
خالد تنهد : ما اخبره طب فمه !
ماهر : ريان كتوم بشكل مرعب كم مره احول فيه يفضفض لي بس ولا حياة لمن تنادي ؛ خالد:  ما فضفض لاخوانه يعني انسى انك تسمع منه كلمه
ماجد تنهد : من يوم يومه وهو كتوم ومنغلق على نفسه من العزبه للبيت ومن البيت للعزبه
عند ريان اللي بزاويه بعيد عن الشاليه بس قريب من الباب من جهه ظلام مافيها ضوء وجلس فوق بلوكه وطلع الدخان وهو يشعل له وحده ويسحب سمها وينفثه بهدوء وهو الافكار تراوده تنهد بخفه وهو يرفع نظره للسياره اللي وقفت امام بوابة الحريم ونزلت منها دانه نهي تضحك : بدر يلعن شكلك وشذي الثقه !
بدر نزل وهو يساعدها بالبوكس حق الايسكريم : حبيبتي انا بدر مو حي الله
دانه : الله يستر بس من ثقتك ذي احس بتوديك بداهيه !
بدر بابتسامة : اقول ادخلي وانتي ساكته يادلوعة البابا
ضحكت دانه وهي تكش عليه وتطق الباب وصعد بدر سيارته ومشى ودانه كانت تطق الباب بس مافي مجيب لان صوت الاغاني طاغي على طقها تالمت من بوكس الايسكريم الثقيل وهي تنزله تحت انظار ريان الثاقبه وهو يراقبها بهدوء وهي تتصل براما اللي كانت مشغوله مع ريفان ومو يم جوالها
دانه بدت تدق اكثر بس مافي رد وبدا يدب الرعب بقلبها من صوت الكلاب والظلام مافي الا الاناره اللي عند الباب ام الشارع كان دامس الظلام
قام ريان وهو يتقدم لها ولفت بسرعه وهي تصارخ : مااامااااا !!!!
ريان بسخريه : ماما ؟!
دانه ارتجفت يوم شافة هيئة ريان ونزلت نظرها بخوف وهي تطق الباب : مراح يفتحون الباب لانهم مشغلين السماعه بس حاولي ولف واعطاها ظهره ومشى بس قاطعته تناديه باسمه ! دانه : ريان !
ريان رفع حاجبه وببرود : وشتبين ! يا بنت الناس
دانه : لا تخليني لحالي اجلس لين يفتحون الباب
ريان رفع السيجاره يسحب سمها وينفثها : طيب
دانه ابتسمت وهي تتنهد براحه ورفعت جوالها بعد ما رن برقم راما وردت بسرعه : راما الله يهديك وينك اطق الباب محد يسمعني
راما شهقت بصدمه : ياويلي اسفه كنت منشغله بريفان الحين افتح
دانه : بسرعه بالله وقفلت راما وهي تعطي امها ريفان عشان بتفتح الباب
دانه ناظرت لظهر ريان : لعد تدخن لانه مضر !
ريان لف راسه وهو يناظرها بطرف عينه : شي مالك به لا تتدخلين فيه واول ما سمع الباب ينفتح وهو يمشي تاركها مصدومه من اسلوبه الجلف !!!
اخذت اغراضها ودخلت واعتذرت راما لها وبدت دانه تفسخ عبايتها وتتضبط واعطت راما البوكس حق الايسكريم ودخلت تسلم وهنا انصدمت هنوف من اللي تشوفه وراها وراها !
وبعد القهوه والشاهي بدو البنات يشيلون السفره عشان يفرشون سفرة الاكل لان الشباب يجهزون العشاء
وفعلا كان ماهر وريان وماجد يوزعون العشاء بالصحون ومروان وخالد يمدون عند جدهم سعود وعمانهم الكبار وعشاء الحريم ماجد وماهر اخذوه لهم
والبنات اللي كانت توزع العصير واللي تبعد الاطفال عن السفره واللي ترتب الصحون والملاعق واللي تاخذ العشاء وتحطه على السفره
وبدا الكل يتعشى وبعد ما انتهو قررو البنات يسبحون والجده منيره وام ماهر وام خالد ومها يسولفون وريم جالسه معهم لان ممنوع تسبح كانت ذي اوامر ماهر والجازي معها لان مامعها ملابس وبالاصل ماتبي
وكانت دانه توزع على البنات ايسكريم وهم ياكلون ومتكين بالمسبح
الا هنوف اللي رفضت تاكل وما اصرت دانه ام نواف نادت واما وهي تعطيها ريفان : انتبهي لها انا بنسدح شويه اريح خلي عينك عليها
راما : طيب ارتاحي ولا تشيلين همها
ودخلت ام نواف وراما اخذت ريفان وهي تلاعبها وجلست على الكراسي اللي عند المسبح جنب دانه اللي ما سبحت عشان ماتبي تغرق ملابسها ولا تبي تخرب شكلها وكانت نوف وهنوف وهيفاء وروان ويارا وريما ورهف بس اللي يسبحون روان تكت على حافة المسبح : دنو تعرفين تسبحين ؟
دانه ابتسمت : اكيييد واعرف اغوص بعد لان بدر دربني بعد ما فجرت راسه
هنوف بهمس وهي تسبح : جعلك تغرقين انتي وهو
هيفاء رشتها بالمويه وبهمس : وهي وشدخلها بتصرفات اخوها !
هنوف بحده : مو اخته ! والدم الفاسد اللي يجري بعروقه يجري بعروقها ومشت تكمل سباحه تاركه هيفاء تتنهد بقلة حيله
عند الشباب كانو جالسين يتابعون مسلسل لان الجد سعود وعياله نامو وماجد اللي دخل يتسدح بغرفته مابقى الا هم ومعاذ وجالسين على براد شاهي ومستانسين
ماهر رسل للجازي :( وينك ودي اقابلك ؟)
الجازي فتحت جوالها وشافت رسالته وابتسمت وهي ترد :( عند ريم اسولف عليها ومايمدي والله لان الكل موجود )
ماهر ابتسم بخفه وكتب :( كيف اصير ريم ؟)
ضحكت الجازي وتداركت الوضع وهي تنحنح وترد :(ياقلبي ضحكت لان لو درت عنك ريم بتسوينا كبسه )
ماهر كتم بسمته :( انشهد بتشوينا شوي )
ريم رفعت حاجبها بخبث : وش المضحك اللي قاله ؟ اعرف اخوي جامد
الجازي ابتسمت : اهخ ضحكني الله يسعده
ريم : امين جعله دايمه الضحكه
ريم صورت الجازي اللي تسولف لها ورسلتها لماهر وفتح الرساله وفز وهو يضحك ويتصل
خالد : ماشاءالله مين اللي تكلمه خلى البسمه توصل لاذنك
ماهر بقهقه : معاذ شوف شغلك
معاذ عدل جلسته : لك شي عنده يا خلودي ؟
خالد عض شفايفه بغيض : بالله لا تدلعني كذا لاني اكرهه ماعلي !!!
معاذ بضحك : اجل لقيت نقطة ضعفك
ريان ارتشف من فنجال الشاهي وهو يضحك : غبي فضح نفسه بنفسه
مروان : هذه هو توائم نواف الغبي !
خالد يتلفت يدور شي يصفقه فيه واخذ التكايه يرميها عليه : معليه هين اوريك الغبي لا جاء نواف ان ما صفقناك !
الشباب : ههههههههههههههههه
ريم ردت : ليه الازعاج ؟
ماهر : ريم حبيبة اخوها ممكن
ريم : لا مايمديني جدتي وامي والكل موجود مقدر اطلعها لك
ماهر زفر : ريم صرفيهم باي شي !
ريم : امي ما خلتني اتحرك خطوه كيف بصرفهم !!
ماهر بغبنه : يعني ذا انتقام عشاني مانعك ماتسبحين ؟؟؟
ريم ابتسمت بانتصار : زين فهمتها وهي طايره !
ماهر : زين زين اوريك وقفل وضحكت ريم وهي تقول للجازي اللي قاله وضحكو مع بعض
عند البنات طلعو من المسبح ما بقى الا راما ودانه الجالسين على الكراسي اللي امام المسبح دانه قامت وهي تروح للمسبح من الجهه الثانيه عشان تصور وراما اللي وخرت الكرسي عن المسبح شويه وجلست عليه ريفان : ريفو اححح لا تجيبن هنا طيب حبيبي وهي تنبهها كانت بتجيب جوالها المرمي عند الفرشه حقت الجلسه ولفت ظهرها راما وهي تسرع عشان بتاخذه بس انفجعت من صوت ارتطام شي بالماء والتفت بسرعه وخوف وهي تصارخ وهي تشوف ريفان مرميه بالمسبح : لااااااااااااااااااا رييييفااااانننننن
فز ريان على اسم بنته وهو يركض عند باب الحريم راما تبكي وتصارخ عند المسبح وخايفه تنزل وتغرق وهي ما انقذت ريفان الكل فز مفجوعين وبدت اصوات البكاء وهنا تجمدت دانه وهي تشوف تخبط الطفله ذات الست شهور بالمسبح واسرعت تقفز بالمسبح وهنا ريان عيا يطمن والشباب اللي فازين معه ويهدونه بس عيا يصبر وهو يرفس الباب برجله ويصارخ : ططططرررريييييقققق الحريم اسرعو يدخلون وقامت ام نواف تسال عن الصراخ بفجعه وعلموها وهي تصارخ باسم حفيدتها بخوف وام خالد وام ماهر يمسكون فيها يهدونها والجده منيره ماسكه راسها بخوف
دانه اسرعت تسبح لريفان وهي تمسكها بسرعه وتطلعها من عنق المسبح وشهقت الطفله وهي تبكي بخوف وفجعه حضنتها دانه اللي ترتجف وراما اللي تبكي بفجعه ونوف ماسكه عيالها وهي تبكي بخوف ماقدرت تتحرك من رجفت جسمها دخل ريان يركض وهو يشوف بنته الغارقه وصوت بكائها وطلعت دانه اللي حاضنتها ودفع ريان راما بقوه وهو ياخذ بنته من بين يدين دانه بقوه وهو يحضنها ودانه اللي متجمده من غضب ريان ودخوله عليهم بهذه الطريقه العنيفه طبعا هو ما فكر باللي موجودين كثر ما فكر ببنته قطعه من روحه شافها مرميه بالمسبح وهو يهدي ببنته ويتفحصها وطلعت ام نواف ومعها شرشف وهي تغطي دانه الخايفه وكانت رجفة جسمها واضحه ودخلتها بداخل الوحده واسرعت دانه ترتكي باقرب حضن وحده من البنات وهي تبكي بخوف وفجعه وكان جسمها ينتفض بشكل مخيف والصدمه كان حضن هنوف اللي منصدمه وهي تسمع بكائها ورجفة جسمها وروان راحت ركض تجيب مويه لها واضطرت هنوف تبادلها وهي تطبطب على ظهر دانه وتمسح عليها : خلاص هدي صار اللي صار
بالخارج كانو الشباب عند الباب يسمعون صراخ ريان على راما : انتي مريضه تروحين وتخلين طفله غريره لحالها !!!!
راما ببكاء وهي ميته ندم : والله اسفه قسم بالله مادريت ان ذا بيصير
ريان مسك يد راما بغضب معميه : اسفك ذا وين اوديه لو صار ببنتي شي هااااااه ام نوف : ريااان خلاص لعد ترفع صوتك على اختك
ريان بغضب وخلاص وصلت معه انه مايشوف قدامه : صفي معها انتي بعد ناسيه اني مامنك عليها !!!! ولا منتي قد الامانه لا انتي ولا ذي الكلبه ! ولا مو مهتمه عشان امها ميته وماعندها شخص يداريها مثل عيونه !!!!
ماهر بصراخ : ريااااان ولددددد امش !!!
ام نواف بغضب : وش قلت الادب ذي تراني امك بعد ذا التعب كله تجي ترفع صوتك علي وتكلمي بذا الاسلوب عشان غلطه !!!!
ريان بصراخ جنوني : وذي الغلطه كانت بتدفعها بنتييييي !!!!! وارتفع بكاء ريفان الصغيره وراما
وصد ماهر وهو يدخل بعد مارفع صوته : طريق ودخل وهو منزل راسه وحسب ريان اللي مستمر صراخه وام نواف اللي تستغفر ماودها تدعي عليه ويروح بداهيه بسبب دعوتها وراما اللي دخلت للبنات وهي منهاره بكاء وحضنتها روان وهي تهديها وتسحبها لغرفة النوم
دانه اللي سمعت كل حرف قاله ريان وانصدمت منه ومن كلامه واسلوبه
طلع ماهر ريان اللي كان صار على اسنانه وهو حاضن بنته وخالد اتجهه له : ريان عطني اايها اشوفها !
ريان : مابي احد يلحقني وطلع لسيارته ودخلها ومسك مروان راسه : ذا مو ريان ! ماهر زفر بقوه : اللي مر فيه مو قليل !
معاذ : الورعه لا يكون فيها شي ؟
ماهر : بروح له لحد يجي واتجهه له واول مادخل لقى ريان اللي حاضن ريفان مبتله مويه وكان يجففها بمنشفته وبدت تهدى ماهر بهدوء: فيها شي ؟
ريان ساكت كانت غصته خانقته فهم عليه ماهر وتنهد : ريان طلع اللي بداخلك ترا مايصير اللي تسويه شفت كيف قبل شويه انفجرت على امك ! امك اللي تعبت عليك وتعبت على بنتك واخر جزاه تجي وترفع صوتك وتسمعها كم كلمه قدام الكل !
ريان كانت رجله تهتز وحضن بنته وانهار بكاء مسح ماهر على جبينه بحزن مايدري وش يسوي هو عارف بان ريان تحمل اشياء كثيره اولها زواجه من زوجته بدون رضاه ولا رضى العائله وبعد ماتعلق فيها جابت له بنت وتوفت وتركته يربيها لحاله ويشيل هم مسوؤليتها تحمل شي فوق طاقته هذه وكله بعمو صغير اللي بعمره قاعدين يتهنون بشبابهم وهو وصل لحالة ان تفكيره يكون اكبر من عمره باضعاف ! كانت ريفان تلعب بشعر والدها ومسح ماهر على كتف ريان : هونها وتهون احمد ربك انها بصحه وعافيه وارجع لامك اعتذر منها لان اللي سويته غلط لا تخليها تنام زعلانه منك !
ريان اخذ منديل يمسح دموعه منها وينحنح وهو يبوس في بنته
ماهر : بخرج وحاول انك تهدى وتريح لك شويه ونزل ماهر تارك ريان اللي يتفحص ريفان باهتمام وخوف وهو يدور فيها ادنى ضرر بس الحمدالله ما كان فيها شي غير انها انفجعت وجرفته ذاكرته على ريفان اللي كانت بين يدين ! دانه ! اي هو متاكد انها دانه عيونه وذاكرته ماتخطي يعني لولا الله وثم هي بنت كانت بخبر كان تنهد ورجع راسه لورا وهو يهز بريفان اللي بدا النوم يسيطر عليها من التعب ..
عند ام نواف اللي ارتفع الضغط عندها وهيفاء كانت تقيس لها ونوف تهدي بامها وام خالد وام ماهر ومها يحاولون يبررون فعلة ريان
ريم اللي الجازي غطتها ودخلت اول ما دخل ريان واكلت فجعه وتعبت وهي تحس بوخز بقلبها وقالت ليارا اللي جابت لها ادويتها واعطتها ام ماهر لاحظتهم واسرعت لهم : وشفيكم !!!
يارا بخوف : ريم خافت وحست بوخز بقلبها
ام ماهر بخوف : وشهوووو فيك شي تكلمي
ريم بهدوء: لا مافيني شي بس انفجعت من اللي صار
جلست ام ماهر وهي تحضنها وتسمي عليها
ام نواف اللي ماسكه راسها ونطقت بنبرة متعبه : وين راما ؟
نوف : مع روان تهدي فيها
ام نواف تنهدت : لحول ولا قوة الا بالله
ام خالد : استهدي بالله وريان صدقيني عشان بنته ولا مايرفع صوته عليك !
تنهدت ام نواف : ادري واعرف فيه وبحالته
مها : اللي صار مكتوب مهما حاولنا نجيب اسباب السبب الاساسي بيكون مكتوب عند الله
الجده منيره : اي هدوء ودورو ذا الغرير وين اخذ الورعه
ريما جلست بتعب : لا عاده الله من مسبح
نوف : قسم بالله انا ركبي ترجف ألى الان
ام خالد : والله ماقصرت دانه يعني لولا الله وثم هي ما ندري وش صار !
ام نواف تنهدت : هي وينها ! لاني شفتها ترجف رجف مب صاحي
الجازي : مع الهنوف
عند الهنوف اللي كانت دانه حاضنتها وجالسين على الكنبه وهنوف اللي ماتعرف بذي الحالات وش السواه غير انها تمسح على ظهرها وابتعدت دانه وهي تمسح دموعها بعد ما حست براحه : انا اسفه يا هنوف ماكنت اقصد اضايقك و قاطعتها : لا عادي بس اهم شي تهدين تبين ملابس عشان تغيرين ؟
دانه : ياليت
هنوف : تعالي معي واخذتها لاحد الغرف وهي تفتح شنطتها هنوف وتطلع بنطلون ابيض ومعه توب وقميص ابيض : اخذ راحتك بكون برا وطلعت وجلست دانه وهي تتنهد بقوه تحس بضيقه من اللي صار وقامت تغير ملابسها الغرقانه وطلعت هنوف عند الجميع وسالت مرام : وينها دانه ؟
هنوف : مابغت تهدى ويوم شفت ملابسها غرقانه اعطيتها ملابس تغير
ام نواف : زين ما سويتي يا بنتي ابتسمت هنوف بخفه وجلست
عند روان وراما اللي مانت منهاره وما جفت دموع عينها وروان اللي متعرف تواسي : يابنت الحلال هدي صار اللي صار ودموعك مراح تنفعك الحين ويوم هاوشك اخوك بس عشان لحظة غضب وخوف وطبيعي جدا لانه شاف بعنيه بنته غرقانه وش تتوقعين يسوي ياخذك بالاحضان !!
راما ببكاء : الحيم انتي جايه تواسيني ولا تزيديني علي !
روان تنهدت : جايه اقولك امسحي دموعك واتصلي عليه اسالي عن البنت
راما : مراح يرد علي لو اموت اعرفه ريان
روان تنهدت : بتمسحين دموعك ولا مسحتها لك ! وش تقولين عن المسكينه دانه جتنا منهاره لانها طبت المسبح وانقذتها والصراحه لو ما كانت موجوده ماندري وش صار
تنهدت راما ومسحت دموعها : ريان خوفني وخوف المسكينه بصراخه
روان : اسفه بس يصارخ مثل القرد !
راما ضحكت غصب وهي تضرب رجل روان اللي ابتسمت : ايه كذا ابتسمي وامشي نروح عندهم امكن جاء خبر عن ريانوه القرد وبنته وطلعو فعلا لعندهم
عند دانه اللي غلست لبس ملابسها وجففت شعرها الغرقان وهي تشوف مكياجها سايح واسرعت تاخذ مناديل مبلله من فوق التسريحه وهي تمسح كل شي على وجهها
عند ريان اللي غطى بنته ببطانيه عنده لها ونزل من السياره بعد ما هدء وحس ارتاح من البكاء اللي طلعه ودخل وكانو الشباب قدامه واسرعو له يتطمنون على ريفان النايمه : بشويش !
خالد بهدوء: غلط تنام البنت بملابس غرقانه !
ريان : ماهر كلمهم يجيبون شنطتها
ماهر تنهد : ياولد اعطاه خالتي امي نواف خلها هي تلبسها وش يعرفك انت
ريان بحده : ماهر !
ماهر تنهد واتصل بامه يقولها يجيبون شنطة الطفله وفعلا اسرعت يارا تاخذها لماهر واعطتها اياه واخذها واتجهه للمجلس اللي دخله ريان وباقي الشباب راحو للجلسه الخارجيه وحط ماهر الشنطه عند ريان : بتفهمني الحين انك بتغير لها الحفاظه وتلبسها وانت ماتعرف !
ريان : اتعلم وفتح شنطتها وهو يطلع حفاظه وملابس داخليه وملابس ثقيله لها
وماهر اللي تنهد وهو تاركه يسوي اللي يبي يسويه وبدا ريان يغير لريفان النايمه بكل هدوء وبين كل دقيقه والثانيه كانت تطلع منها شهقة من اثار البكاء
.
ام نواف : ذا الولد مدري طالع على من !
ام ماهر : ادعيله بالهدايه
ام نواف بحزن : الله يهديه ويرح قلبه
راما جالسه جنب روان وكانت عيونها متورمه من البكاء وجلست جنبها نوف ومسحت على ظهرها وتنهدت راما بهدوء
وطلعت لهم دانه اللي كانت مغيره ملابسها لبنطلون ابيض وتوب اسود وعليه قميص شفاف ابيض وشعرها مفتوح وجهها خالي من المكياج وكانت خدودها وانفها مورده من البكاء وعيونها متورمه من البكاء
نوف فزت : تفضلي اجلسي يا دنو وجلست دانه بهدوء وهمست يارا لهنوف : ماشاءالله جميله حتى بدون اي مكياج واحس اجمل
هنوف همهمت وهي تناظر دانه اللي تشبهه بدر بالملامح ولكن هي ملامحها ناعمه عكسه هو حاده وخبيثه لعنته بداخلها وهي تشيح بنظرها عن دانه وهي تنشغل بهاتفها ام نواف : مشكوره يابنتي ماقصرت عز الله فعلتك ترفع الراس لولا الله وثم انتي ماندري وبنسوي !
دانه بلعت ريقها : ولو يا خاله فعلتي زي اي فعله طبيعيه واللي صار مكتوب ومقدر بس كيفها ريفان الحين ؟
تنهدت ام نواف : عند ابوها وقالو انها بخير والحين نايمه
دانه : الحمدالله
ام خالد اللي جالسه جنب ام نواف وهي تهمس لها : اصملي عليها !
ناظرتها ام نواف ورجعت نظراتها لدانه اللي كانت رجفة يدينها ما هونت
عند ريان اللي مسدح ريفان بعد ما غير لها حفظتها ولبسها ملابسها ولف عليها البطانيه ويمسح على راسها وهو يتاملها بهدوء وكانت صورة وحده متعلقه بفكره وكانت دانه وهي ترتجف وغارقه بالمياه وبين يدينها طفلته تنهد : صادقه امي يوم قالت يبالك حرمه تداريك وتهتم فيك وببنتك مسح على وجهه بتعب من الجهد النفسي اللي تعرض له اليوم بسبب خطأً وتذكر بكاء راما ورجفتها وهو مادم على الصراحه عليها وعلى والدته الان بعد ما راء ان ابنته بخير تاكد بانه غضبه كان عباره عن "خوف " كان خايف يفقدها زي ما فقد والدتها !
دخل عليه خالد وهو يجلس جنبه ويتامل ريفان وابتسم : الحمدالله انها بصحه وسلامه ريان بهدوء: اي والله اليوم اكلت اقوى فجعة مرت علي بحياتي !
خالد بهدوء: هل شعور الابوه قوي ؟
ريان ابتسم وهو يتامل برائة ملامح طفلته : اكثر من ما تتصور شي تحس انك عاجز قدامه يعني حياتك ومماتك وفرحتك وتعاستك متعلقه فيه
خالد مسح على راسها وابتسم : الله يخليها لك وتشوفها عروس
ريان ابتسم : اللهم امين وعقبالك ابتسم خالد
رن جوال ريان وتجاهله وكان باسم ( اختي ريمو )
خالد : رد عليها
ريان : مابغى وهو يصمت جواله تنهد خالد : ترا حتى هي انفجعت وتذكر انها اختك يرضيك تنام زعلانه !
ريان : اليوم بذات ابي انام بدون ازعاج احد تكفى يا خالد
خالد تنهد : زي ماتحب بجيب فراشك
ريان : ياليت قام خالد تارك ريان اللي يهوجس باللي صار الليله كانت من افجع الليالي عليه ! بعد عشر دقايق دخل عليه خالد بفراشه وفراش زياد : لمن الثاني ؟ خالد بابتسامة : فراشي الصراحه ودي اصحى على وجهه الكتكوته ذي
ريان ابتسم : افرشه بالله خالد : طيب وبعدها ريان حط ريفان جنبه وانسدح ولحفها زين وخالد جنبه متكي يراقبها : الحين اذا قامت وش بتسوي ؟
ريان : اذا قامت يحلها الف حلال
"عند الحريم "
دانه قامت على رساله بدر اللي يقولها انه برا روان : وين رايحه ؟
دانه : اخوي جاء بمشي
ام نواف قامت معها : استودعتك الله يا بنتي واعذرينا اليوم انفجعتي
دانه ببسمه هاديه : يا قلبي يا خاله استودعتك الله وقامت تلبس عبايتها واخذت ملابسها المبلله بكيس واخذت شنطتها وطلعت وركبت مع بدر
: هاه لقيتي هنوفي المتوحشه !
دانه بهدوء: ايه
بدر قوس حواجبه باستغراب من نبرتها الهاديه وهو يعرفها مستحيل تكون هاديه بذات اذا حات من عزيمه لازم تقوله اللي صار ماتسكت : وشفيك ؟
دانه بهدوء: مافيني شي
بدر : والكيس اللي معك وش فيه
دانه : ملابس غرقانه
بدر : وشهو !! تكلمي احد سوا لك شي ؟
دانه بتعب : بدر اوعدك بكره اقولك كل شي بس خلني ارجع انام تعبانه
بدر : وتخليني بقلقي انتظرك تقومين تقولين لي !
دانه تنهدت : اتصل على هنوف تقولك سكت بدر ماكثر كلام يوم حس بنبرتها المتعبه ناظرة دانه للشارع تتامله بهدوء اللي صار اليوم معها مو قليل !
————————————-
قراءه ممتعه ✨