"بسم الله الرحمن الرحيم "
•
•
•
عَيناك رَبيعٌ و حديثُك بِلادٌ مُزهِرة.
قدر تركي بمساعدة كم شخص معه بانهم يطلعون سامي من السياره والباقين يحاولون يخمدون النار المشتعله من مكينة السياره تركي كانت يدينه ترتجف واطرافه بسبب سامي الذي مشوهه وجهه من الحادث واول ما اتى الاسعاف اخذوه وركب سيارته تركي يلحقهم وهو يحس بشعور سيئ من شاف سامي
.
عند متعب اللي مسح وجهه بتوتر : وش اسوي الحين ؟؟؟
نوف توترت من توتره : اهدى مافيه الا العافيه تلقاه يعاقبك على حماسك له
متعب مسح على صدره وهو يشعر بالضيقه : مدري احس فيه شي نوف احسني مكتوم نوف خافت واحضنته وه تسمي : بسم الله عليك استهدي بالله واذكر الله مافي شي كل ذي وسوسة الشيطان لا تخليها تتغلب عليك انت اقوى منه
متعب بادلها : اعوذ بالله من الشيطان الرجيم
نوف ابتسمت : العشاء جاهز تعال ناكل ولا تخلي الضيقه تشغل بالك بشي مو صح تنهد متعب ومشى معها يتعشون وافكاره كلها باخوه
.
" بغرفة الجده منيره "
ابتسمت روان : جده ضغطك ممتاز عشاني قسته لك
الجده منيره ضحكت : اقول تعرفين تعطيني عرض اكتافك بنام
ضحكت روان وهي تحب راسها : ابشري نوم الهناء وطلعت وهي تاشر للبنات بحركه اوكيه وضحكت راما وهي تشغل الفلم وكلهم جالسين جنب بعض ومتغطين بالبطانيات
ريم : وقفو دقيقه بقولكم عن شي
وقفت راما الفلم : وشهوووو
ريم بابتسامة خجوله : ابوي قالي اول ما جيت انه رد لمتعب اخو سامي اني موافقه شهد : مبروك ياعيوني
ريم : الله يبارك فيك
هيفاء حضنتها : مبروك والله يوفق بينكم
ريم ابتسمت : امين ياروحي
روان : مبروك لا نهائي
ريم بقهقه : الله يبارك فيك وعقبالك
روان بتكشيره : مابي
ضحكو البنات على تعابير روان
يارا : طيب وماحدو متى الخطبه
ريم : ممكن بكره يجون يخطبون رسمي واحس متحمسه
ضحكت يارا وحضنتها : اهخ ياروح اختك واخيرا بشوفك عروس
ريم غطت وجهها بضحك : احس شعور غريب
شهد بقهقه : تحسين وكان فراشات تدغدغك
ريم : بالضبططط
ضحكت هيفاء : الاخت شهد مجربه الشعور
شهد ضحكت : وحافظته
هنوف : الحين خلونا نتفرج الفلم قبل لا احد يخرب علينا تعدلو البنات وشغلو الفلم وهم مندمجين وبالاكثر ريم اللي ماتدري عن اللي صار وهي تاكل وتشاهد الفلم ..
.
وقف الاسعاف امام المستشفى ونزل تركي بسرعه من سيارته يركض وهو يسمع المسعف يصارخ : اعجلووو توقف قلبه
تركي : وقفووو وصعد بسرعه على السرير حق سامي وهو يحاول ينعشه : ياربيييي بسم الله اسرع يسوي مساج على قلبه وصدح صوت نبضات القلب ونزل تركي واسرعو المسعفين يدخلون سامي للطوارئ وتركي اللي جلس على الارض يحس رجوله مو قادره تشيله كيف يصير كذا وهو قبل ساعه كان يهرج ويسولف ويضحك معه !! كيف بلحظة تغير كل شي !!
سند ظهره على الجدر من بشاعة الحادث وطلع جواله يرن على ماهر اللي رد : يا هلا ورحب
تركي بنبره مرتجفه : مـ .. مـاهر
ماهر كان بغرفته عدل جلسته بسرعه من نبرته : تركي ؟؟ وشفيك ؟؟ صاير فيك شي علمني !!
تركي بلع ريقه وهو يحاول يرتب كلامه : سامي بيموت
ماهر فز : وشهوووو ولد تكلم زين وش قاعد تخبص ؟؟؟
تركي مسك راسه : اقولك شفته جثه صدمته سياره عدمت سيارته بشكل مفجع توقف قلبه وانعشته والحين اخذوه مني مدري وش بسوي
ماهر بفجعه : وينك ايت مستشفى
تركي : مستشفى اللي اشتغل فيه
ماهر : جايك وقفل وهو يسرع يلبس ثوبه وحمد ربه امه وابوه نامو
واسرع لسيارته بس وقفه ندى الشباب عليه لانهم كانو سهرانين بيت الشعر
راكان لحقه : وشفيك مستعجل ؟
ماهر ناظر لراكان وتذكر انه صديقه المقرب مايدري وش يقول : اركب واقولك بعدين
راكان صعد معه بسرعه وماهر شغل السياره ومشى داعس متجاهل محاولات راكان بمعرفته آلى اين ذاهبين كان ماهر يعصر الدركسون بحسره مايدري وش يقول وقف امام المستشفى بعد عشر دقايق من القياده ونزل وراكان يلحقه : ياولد وشفيك تكلم !!!
ماهر لف عليه : سامي مسوي حادث وضعه خطير
راكان بصدمه وفجعه : وشهوووو وش قاعد تفول انت ؟؟؟!!
ماهر : راكان اهدى و قاطعه دفع راكان له : ساميي وشفيه تكلمممم
ماهر مسح على راسه بتوتر من رد فعل راكان : مدري زي زيك كلمني تركي يقول انه سوا حادث وتوقف قلبه وانعشه واخذوه الدكاتره اظن للعمليات
راكان : وشهووو !
ماهر سحبه : اهدى بنسال عنه وقف قدام مشرف الاستقبال : لو سمحت جتكم حاله شخص مسوي حادث ؟؟؟
مشرف الاستقبال : ايه جاء رجل اتوقع بعمر العشرينات
راكان : وش وضعه ؟؟؟
مشرف الاستقبال : ماعندي خبر بس هو الحين بغرفة العمليات بالدور الثاني
راكان ركض وماهر لحقه وقفوه حراس الامن المسؤولين عن عدم دخول اي شخص للقسم الا بتصريح : لو سمحت ممنوع الدخول
راكان دفع يده : وخر عني بشوف خويي
ماهر : راكان اهدى !!!
راكان دفع حارس الامن بانفعال : مراح اهدى ابي اشوفه
حارس الامن : اطلع برا ولا وربي بيصير شي مو زين !
راكان بغضب وانهيار وصراخ : تدري مين انا عشان تتكلم معي بذي الطريقه هاااااه انا النقيب راكان بمباحث لو ماتخليني امر انا اللي والله بسوي لك مصيبه فاااهممممم
ماهر وقف بينهم : امسحها بوجهيي بس لازم ندخل تنهد حارس الامن وفتح لهم ودخلو بسرعه ولقو تركي الواقف عند باب كبير والواضح انها غرفة عمليات
راكان : وينه وين سامي وش فيه !!!
تركي مسح شاربه بتوتر : ادعو له وضعه خطير زميلي المسؤل عنه يقول وضعه خطير وتوهم دخلو اربع اكياس دم وهذه مايبشر بالخير
راكان مسك راسه وجلس وهو يستذكر ذكرياته مع صديقه هل معقوله يتركه ويروح لعند ربه ويخليه لحاله ! لو للانهيارات اصوات لكان صوت انهيار قلب راكان كان المثال عليه كان مسود الوجهه من اللي سمعه وعرفه
ماهر تنهد وهمس لتركي : محد علم متعب ؟
تركي : لا ماعندي رقمه
ماهر تنهد : بروح له اكلمه افضل اخاف يصير شي عليه اذا عرف
تركي : احسن ما تسوي لانهم شويه وبسالون عن معلومات المريض
ماهر : احل انتبهه لراكان خل عينك عليه
تركي : لا توصي حريص
ماهر مشى وهو مستثقل الروحه مايحب يشوف انهيار الاشخاص لانه يعرف خوف الشخص على شحص يحبه ويعرف انه صعب وخايف على ريم اذا عرفت ركب سيارته واتجه لمنزل متعب
.
متعب كان جالس وهو يلعب مع غيم جاته نوف وهي تمد له صحن حلا ابتسم متعب : احلى عادات وتقاليد حلا بعد العشاء ياشيخه احبك
نوف ضحكت وجلست : وانا اموت فيك
متعب ابتسم وجلس جنبها وهو يشوفها تاكل وتبتسم وهي تتامله : اهخ ربي رزقني بعوض ما كنت احلم فيه بحياتي !
نوف ابتسمت وحطت صحن الحلا على الطاوله وهي تسمح لحيته بحنان : وانا ربي رزقني بشخص يحن علي اكثر من ابوي
ابتسم متعب وهو يمسح على راسها : يا بعد روح متعب تدرين انك اعطيتيني هديتين وهم غيم وغيث وقاطع عليه رنة هاتفه ابتسم : اليل من ذا اللي قاطع علي افضل لحظات حياتي ضحكت نوف وكملت تاكل من صحن الحلا ورد متعب : هلا والله بماهر كيفك
ماهر بهدوء: بخير اطلع لي عند الباب ابيك ضروري
متعب استغرب : عسى ماشر ؟
ماهر : تعالي واقولك
متعب : طيب وقفل وقام وهو يحس نفس الضيقه رجعت له : قلت فيه شي
نوف باستغراب : شفيه ؟؟؟
متعب : مدري والله ماهر ولد عمك عند الباب يقول اطلع لي ضروري
نوف عقدة حواجبها باستغراب : اللهم اجعله خير ولحقته وهي تشوفه يلبس ثوبه ويطلع وهي تتسمع من عند الباب اللي قفله متعب بس تقدر تسمع سلامهم وكلامهم متعب ابتسم : با هلا تفضل خلنا نتقهوى
ماهر : ان شاء الله بعدين ومتعب انت انسان مسلم ومؤمن وقاطعه متعب بخوف : ماهر تكلم وشفيك من اليوم احس الضيقه بتكسر ضلوع صدري لا تزيديني
نوف خافت من كلام ماهر وتنهد وهو ينطق محطم قلب متعب : سامي سوا حادث وضعه خطير ولا ندري عنه حتى الدكاتره ما طلعو من عنده لانه بالعمليات متعب حس الارض تدور فيه سنده ماهر : متعببب صلى على النبي وكل امرك لله اللي مابعده احد اخوك محتاجك جنبه مو وقت الضعف وقت انك تكون قوي للصعايب
متعب : بروح له اخذني تكفى ماهر : ابشر ابشر وركبه وركب بسرعه ومشى للمستشفى ركضت نوف بخوف وهي يالله تحبس دموعها وش بتسوي الحين اسرعت تمسك جوالها تتصل براكان ما رد عليها واتصلت على نواف اللي رد : يا ومرحبا بام غيث
نوف ببكاء : نواف تكفى تعال
نواف انفجع وفز واقف : نوف وشفيك !!!
نوف ببكاء ماقدرت تحبس دموعها : تو جانا ماهر ولد عمي راشد يقول لمتعب ان اخوه سامي بالمستشفى وان وضعه خطير ابيك تاخذني لعنده
نواف بصدمه : سامي !! وشهو اخذك عنده الرجال مو يمك خليك بس ببيتك مو عندهم اخت ! خليك عندها
نوف : اجل تكفى انتبه على متعب واي شي جديد تقوله لي
نواف : طيب وقفل
خالد : وشفيه ؟؟؟
نواف : سامي ماغيره مسوي حادث وضعه خطير
خالد ومروان وريان فزو : وشهو !!!
نواف : بتصل بماهر لان مدري وين المستشفى
ريان : اعجل
نواف اسرع يتصل ورد عيه ماهر : بعدين اكلمك
نواف : انتم بايت مستشفى
انصدم ماهر وش عرفه بس ماعنده وقت يسال ورد : ***
نواف : جاينك وقفل ومشى وركب سيارته ومعه خالد وريان ومروان بالمقعد الخلفي وحرك للمستشفى
نزل ماهر ومتعب وهم يتجهون لقسم العمليات ولقو راكان اللي بنفس وضعيته وتركي اللي رايح وجايي مع الممر متعب : مافي احد نسال !!!
تركي : لا باقي الدكاتره داخل وطلعت ممرضه وهي مسرعه وقفها متعب : وش صار لاخوي تكفين طمنيني عليه !!!
الممرضه توترت : كيف دخلتو هنا ممنوع لو سمحتو برا
متعب بصراخ منهار : اااااكلللللمممممككككك اقولك اخوووووييي كيييفه
الممرضه خافت ورجعت لورا وتكلمت بخوف : وضعه خطير وغير مسموح لي اتكلم تركي اشر لها تروح ومشت بسرعه متعب : لااا ترحين علميني اخوي وشفييييه ماهر تكفى هو يبيها باقي ما تهنى انه يخطب اللي يبيه وانهار على ماهر الي حضنه بقوه وراكان نزلت دموعه وهو حاط يدينه على اذانيه مايبي يسمع انهيار متعب يحس قلبه يتقطع
تركي مسج راسه ولف يحاول يحبس دموعه على رويته لصراخ وبكاء وانهيار متعب على اخوه محد يلومه !
متعب ببكاء وهو يهمس لماهر : توه كان يكلمني قبل ساعه مافيه شي وكنت ببشره بالخبر اللي له كم يوم ينتظره وانه ابوك راد علينا بالموافقه هو يحبها ويموت فيها ولو طلبت روحه اعطاه اياه هو باقي صغير والله صغير
ماهر صر على اسنانه من كلام متعب لانه قاعد يقطع له قلب قطع قطع
ماهر : صل على النبي
عند نواف وقف قدام المستشفى ونزل هو والعيال وسالو احد الممرضين وقالهم بقسم العمليات وقفهم الامن زفر نواف وبعدها تكلم حارس الامن : انتم مع النقيب راكان ؟
التفتو عليه بسرعه ورد خالد : ايه وينه ؟؟
حارس الامن : داخل وفتح لهم ودخلو وانصدمو برؤية متعب المنهار بين يدين ماهر وراكان الماسك راسه وجالسه على احد الكراسي وتركي الواقف يناظر متعب بنظرات حزينه اتجه نواف لاخوه وشد على كتفه : باذن الله بيقوم بالسلامه
راكان بهمس : يارب
خالد اتجه لتركي : وش صار ؟
تركي تنهد وبدا يخبره ومعه مروان وريان باللي صار وماهر سند متعب ألى ان جلسه على الكرسي : متعب اسمعني لازم تكون قوي وجاهز لاي شي انت مؤمن بقضى الله وقدره واكيد مراح تعترض اللي ربي كاتبه له انت الحين مابيدك الا الدعاء حنا بعد مابيدنا الا الدعاء والدكاتره بيسوون اللي عليهم وباذن الله مراح نسمع الا الاخبار الزينه
هز راسه متعب والكل عارفين بالكسر اللي هو فيه كانو جالسين ينتظرون خروج احد الدكاتره بس اخبرهم الممرضه بان العملية إلى الان مستمره
.
دخلت نوف ومعها غيث وغيم عيالها وتولين تبتسم : والله منورين البيت العصافير الحلوه وهي تحضن التوائم نوف تنهدت واشرت للعامله تاخذ الاطفال لغرفة الالعاب اللي مسويها سامي لعيال اخوه وجلست مع تولين : وشفيه وجهك مصفر ؟
نوف : مافيني شي بس تعب عادي
تولين ابتسمت : اها قالك متعب ؟؟؟؟
نوف : بشنو؟
تولين بحماس : عمك راشد رد عليه بالموافقه وسامي الخبل مايدري !!!
نوف تجمدت ورجفت يدينها تولين استغربت : وشفيك احسك مو طبيعيه ؟؟؟ لا يكون متهاوشه مع متعب ؟
نوف حست الغصه جرحت حلقها ولا قدرت ترد تولين : وشفيك ؟؟؟؟
نوف مسكت يد تولين : سامي سوا حادث
تولين بصدمه وخوف : هاااااه وش تقولين !!!!
نوف : تولين حبيبتي هدي انا ما ادري اي شي عن الحادث او كيف وضع سامي ولا قدرت ما اقولك وانا اشوفك جالسه تنتظرينه وهو مراح يجي لانه بالمستشفى
تولين : نوووف متى ذا الكلامم منجدك ولا !!!
نوف : ماهر ولد عمي جانا وقالنا عنه وانه الحادث خطير
تولين تساقطت دموعها : لاااا لا لااااا ساميييييي وانهارت بالبكاء ونوف تحضنها بقوه تهدي فيها وهي زيها منهاره بكاء تولين : بروح له تكفين !!!
نوف : مافي احد مايمدينا نروح
تولين : مالي دخل بروح تكفييييين هو ما امداه يفرح بخبر خطبته
نوف انكسر قلبها عليها وعلى كلامها : بشوف واحد من اخواني واسرعت تتصل بنواف : وينك ؟؟؟ نواف : بالمستشفى
نوف : كيف وضع سامي ؟؟
نواف : خطير الواضح لان لهم ساعتين بالعمليات ولا احد طلع يطمنا
نوف : اخته منهاره عندي تبي تروح تجي تاخذنا
نواف : وليه تعلمينها حماره انتي !!!
نوف : هي بتعرف بكل الاحوال اذا الحين او بعدين ولها حق تجي عند اخوها
تنهد نواف : برسل لك ريان
نوف : طيب وقفلت منه : ريان بيجينا اجهزي
تولين صعدت بسرعه لغرفتها تلبس عبايتها
اتجه نواف وهو يهمس لريان : روح جيب اختك نوف واخت متعب
ريان : منجدك اجيبهم هنا !
نواف : اخت متعب تبي تجي ومافي احد يبجيهم جيبهم افضل من يجيبهم تاكسي
ريان : طيب ومشى بسرعه بسيارة نواف متجه لمنزل متعب
.
" بيت سيف "
كانت ترطب يدينها بالكريم وابتسمت وهي تشوف سيف داخل : نام هتان ؟
سيف وقف وراها وهو يمسح على شعرها : بالقوه خليته ينام ما كان راضي
ابتسمت طيف : صاير عنيد الفتره الاخيره بس الصراحه يحق به اجازه لازم يستانس وش رايك نسافر ؟
ابتسم سيف : موافق وباس خدها وابتسمت له بنعومه واتجه للسرير ينسدح وهي مشت لعنده وانسدحت تكى سيف وهو يتاملها وهي مبتسمه بخجل وسحبها لحضنه وقاطعهم دخول هتان : ماما بابا بنام معكم
طيف دفعت عنها سيف : تعال يا حبيبي
سيف بصدمه : مو نمت وش صحاك !!!
هتان ابتسم ببرائه وهو شايل دبدوبه : خفت لحالي
طيف : تعال لعندي يا عيون ماما ابتسم بحماس هتان وركض لها يحضنها وهي تبادله بحنان : وعمري انا احلى من ينام معنا وسدحته جنبهم وزفر سيف بغيض وهو يلحف ولده : تحب تقطع اللحظات الحلوه ؟
طيف : سيييف ! وانسدحت تحضن هتان اللي بادلها وهمس : معصبه عشاني جيت ؟
طيف بابتسامه وبنفس همسه : لا بالعكس انبسطت ابتسم باتساع وباست خده وراسه تحت نظرات سيف الناريه وكتمت ضحكتها على ملامحه المغتاظه
.
" بالمستشفى "
طلع الدكتور وكان وضعه متعب من حالته الواضحه وقفو الشباب ومتعب قدام الدكتور وبنبره مستعجله وبخوف : دكتور طمني على اخوي !!!
الدكتور تنهد بحسره : تونا خلصنا من عمليتين لان كان عنده نزيف داخلي وبصعوبه قدرنا نوقفه وعنده كسور كثيره اسف بس وضعه ما يبشر بالخير
متعب هز راسه والدموع رافضه السقوط : يعني بيعيش ؟
الدكتور شد على كتفه : وضعه سيئ اتمنى تتجهزون لاي شي ومشى بسرعه تارك متعب يجلس من هول اللي سمعه عقله مو مستوعب كلام الدكتور ولا راح يستوعب ان اخوه يروح ويتركه وانهار بكاء ماهر وخالد وتركي يحاولون يهدونه ولكن كان بحالة صعبه وتبكي الحجر مثل وضع راكان اللي كان بحالة صعبه بسبب اللي سمعه صعب عليه يتقبل بان صديق دربه يصير معه كذا
نواف حضن راكان اللي كان محتاج حضن بس يكابر وشد عليه : هشش اهدى ماينفعه الحين الا الدعاء راكان بهمس وبكاء : نواف مقدر اعيش بدونه مقدر
نواف لمعت عيونه بحزن بس شد اخوه له اكثر يهديه ويواسيه
تركي ماتحمل الوضع وطلع من قسم العمليات وهو يمسح دمعته الساقطه ويمشي بالممرات ولمح رامي المرتبك والخائف وملابسه متلطخه باوساخ وكانه اتربه اتجه له وهو يحس قلبه ناغزه من شكله المثير للشك : رامي !
رامي التفت عليه بسرعه وكان يرتجف بخوف : ت.. تـ تـركي؟
تركي رفع حاجبه بشك : وشفيها حالتك ؟
رامي شابك يدينه ببعض وهو يحاول لا يثير الشكوك بس رجفة يده وتلعثم كلامه يوضح بان في امر مريب بوضعه
عند راكان ابتعد عن نواف وهو يمسح دموعه : بروح للحمام
نواف : اجي معك ؟
راكان : لا خلك هنا تنهد نواف وهز راسه وطلع راكان وهو يخرج من قسم العمليات ومسح على راسه وهو يزفر بقوه يحس بالضيقه ماسكه صدره ومشى بالممرات يدور دورة المياة
وعند تركي اللي مسك رامي من ياقة ثوبه : يا كذاب انت ورا حادث سامي ؟؟؟
رامي انتفضت اطرافه بخوف : لااا مو انا
تركي بحده : رامي تكلم افضلك !!!
رامي بخوف ورعشه : ما كنت اتوقع بيصير كذا ماتوقعت الحادث يكون قوي
تركي بغضب هزه : يامريض انت مستوعب انك صادم شخص وهو بين الحياة والموت بسببك !!!
رامي دفع عنه تركي : عشاني محذره وما سمعععع منييي !!
راكان كان واقف خلفهم بالضبط وكل حرف قالوه سمعه وكان مثل وقع الصدمه عليه وصرخ بغضب ناري : يا حيوان يا كلب !!!
تركي التفت بسرعه بصدمه : ر .. اكان ؟؟
راكان ركض ورامي اللي يحس رجوله مهي قادره تشيله من الخوف لكمه راكان بقوه وقع رامي بالارض وجلس فوقه راكان يضرب فيه لكل قوته وتركي يحاول يبعده بس راكان كان جان جنونه : والله لذبحك ياكلب وهو يضرب بكامل قوته تارك رامي غير قادر على الدفاع عن نفسه تركي صرخ : احددد يساعددنيي وهو يسحب راكان من فوق رامي اللي وجهه دامي حرفيا مافي اي معالم لملامحه من الضرب اسرعو الممرضين يشيلون رامي وهم يسارعون باسعافه وراكان اللي يصارخ يبي يكمل عليه باقي ما شبع من ضربه : اترككننننييي والله لذبحه الخسيس الحيوان الله ياخذه ولا تشوفه عيني
تركي ثبته وهو يصارخ : راااكاااننن خلاص ارتاح شوهت وجهه وش تبي بعد !
راكان بغضب : باقي ما ذبحته هذه حرام عليه يعيشششش !!!
تركي مسك راسه وهو يسحب راكان اللي يدينه كلها جروح ومدميه واتجهو لقسم العمليات ودخل راكان بهيئته المخيفه وكانه قاتل من الدماء اللي على ثوبه ويدينه المجرحه فزو الشباب له ونطق نواف بخوف : وشفيه علامك كذا !
راكان بانفعال : حادث سامي مدبر ومسك متعب من اكتافه : ااايه اخوك الحين بين الحياة والموت بسبب الكلب رامي
متعب بصدمه : وشهووو منهو ذا رامي !!!
ماهر انصدم : وش تقول انت !
راكان : رامي الكلب ذا دكتور وتلقاه الحين بغرفة الطوارئ دعست علي وجهه بس باقي ماشفت جثته الكلب وهو معترف بلسانه وهذه هو تركي شاهد
الكل ناظر تركي اللي تنهد : اول ما طلعت من هنا وكنت بتمشى شويات الا اشوف رامي وضعه مو عاجبني حتى ملابسه متربه وكانه طالع من حادث كلمته قال انه مافيه شي بس يوم اصريت وهددته اعترف وقال انه صادم سامي بقصد متعب بحقد : عز الله ذبحته على يدي وجاء بيمشي وقف قدامه ماهر : ارجع يا متعب مراح تمسه بشي راح نقدمه قدام القانون وراح ياخذ عقابه
متعب بغضب :هذه عقابه يموت !!
ماهر : اللي تبيه بيصير بس مو بالغضب خلك عند سامي اخوك وانا بتكلف بالموضوع وانت تعرفني مستحيل اخلي اي مجرم بدون عقاب جزائي
متعب : تكلف بالموضوع عندك ابتسم ماهر بخفه وجاء بيمشي ولحقه راكان ورده يد ماهر : تعرف ترجع !
راكان : بجي معك !
ماهر : مشكور يكفي اللي سويته
راكان زفر واتجه يجلس وهو يهز رجله بحرقه ومشى ماهر ومعه تركي للطوارئ.
.
ركبت نوف وتولين مع ريان والعامله والاطفال واتجهو لمنزل والدها عشان تحط العامله هناك مع الاطفال وفعلا اول ما وصلو نزل ريان يشيل غيم والعامله غيث ودخلو البيت انصدمت ام نواف : عسى ماشر وين اختك ؟؟؟
ريان : رايحه مع اخت متعب للمستشفى لان اخوها سامي سوا حادث وضعه خطير
ام ناف بصدمه : لحول ولا قوه الا بالله ! وش وضعه الحين
ريان : مدري والله بس انا مستعجل انتبهو للورعان ومشى بسرعه وركب وهو يتجهه للمستشفى تحت بكاء تولين ونوف الحزينه على وضع المسكينه وتفكر بحبيها متعب وش وضعه وكيف حالته الحين وعمها باقي نا رجع من سفرته
وبعد عشرين دقيقه وقف ريان امام المستشفى ونزلو نوف وتولين معه وهم يلحقونه واول مادخلو لقسم العمليات انصدم متعب بقدومهم واسرعت تولين تحضنه وهو يبادلها وهي تبكي صدو الشباب بهدوء وهم يسمعون بكاء تولين المحزن ونوف اللي حابسه دموعها على روية كسر زوجها وابتعدت تولين : متعب تكفى طمن قلبي عليه ؟؟
متعب بغصه : خلصو من عمليته بس باقي عمليه ثانيه والحين هم قاعدين يسونها له ومالنا الا الدعاء والانتظار والصبر جلست تولين على الكرسي وهي تبكي بهدوء وناظرت نوف لمتعب اللي عيونه تشكي وتحكي لها باللي هو يحس فيه وحضنها بقوه وكانه يستمد منها الطاقه وهي تمسح على ظهره تخفي دموعها المتساقطه وحزنها عليه وبعد لحظات ابتعد عنها وهو ياشر لها تجلس مع تولين
مروان همس لريان : تخيل رامي الدكتور اللي كان طالب ريم بنت عمي راشد هو سبب اللي سامي فيه
ريان بصدمه : منجدك ؟
مروان : والله الوضع خطير
ريان تنهد وجلس جنب راكان ومروان وهم ينتظرون انتهى عملية سامي واحد يطلع لهم يطمنهم
.
" بيت ام نواف "
اتصلت براما اللي ردت بوسط سواليف البنات وضحكهم : هلا يمه وشفيه ؟؟
ام نواف : تعال بسرعه اختك حطت عيالها ومشت
راما : ليه وين رايحه ؟؟؟
ام نواف : اخوك يقول سامي اخو زوج نوف صار له حادث وضعه خطير مره الله يقومه لهم بالسلامه انصدمت راما وهب ترفع نظرها لريم اللي فاطسه ضحك مع البنات ومندمجه بالسواليف ماتدري عن وضع زوجها المستقبلي الذي بين الحياة والموت بلعت ريقها راما : جايه طيب وقفلت وناظرت لريم انتبهت لها روان ونزغتها : وشفيك ؟
راما همست لها : الحقيني وقامت ولحقتها روان وكانت راما ترتجف بربكه : وشفيك تكلمي نشفتي ريقي!!!
راما بخوف : تخيلي امي تقول نوف جابت عيالها وراحت للمستشفى عشان اخو زوجها سامي مسوي حادث وحياته بخطر هذه اللي فهمته وش بنقول لريم
روان بصدمه : وشهوو
راما : زي ما سمعتي
روان : اجل اسمعي محد يجيب لها طاري ابدا فاهمه ريم تعبانه ولا فيها تتعب زياده
راما هزت راسها بسرعه : اكيد مراح اقول لها
روان : وين بتروحين ؟؟
راما : امي تبيني اساعدها بعيال نوف
روان : تمام اذا سمعتي اي خبر علميني
راما : طيب واسرعت تلبس عبايتها وتطلع ورجعت روان للبنات وهي عيونها معلقه على ريم اللي تضحك : تخيلووووو شكلي اول ما شفتها وانا احضن ابوي الصراحه ماتوقعت جد يجيب لي اللي احلم فيه من زمان
.
عند ماهر ونواف اللي كانو منصدمين من حالة رامي كان مشوهه وقاطعهم دخول ابو رامي : رامييي ياولدي
رامي صحى على صوت والده وفتح عيناه بهدوء وتوتر من رويته لماهر اللي يرمقه بحده وابو رامي يسلم على ولده : الله يكسر يدينه ولد الحرام
قاطعه نواف بحده : الله يسلم يده قصدك يا عم شكلك ماتعرف ولدك وش مهبب ؟؟ ابو رامي التفت عليهم عرف ماهر بس الشخص اللي تكلم منكر شكله : وانت مين عشان تدافع عن شخص مجرم في ولدي
ماهر بحده : ياعم ولدك محاول يقتل شخص
ابو رامي انصدم والتفت على ولده اللي غمض عيونه بندم بس بعد ايش ماينفع الحين ولا شي : هاه !! وش تقول يا ولدي
ماهر : زي ماسمعت ولدك رامي جايي مسرع بشارع فيه اشاره وصدم صدمه متعمدها على باب السايق وتدري منهو السايق ؟؟
ابو رامي اللي يحس الصدمات تتراكم عليه : من ؟؟؟؟
رامي ناظر لرامي بحقد وحده : سامي الرجال اللي جاء وقت خطبة رامي الرسميه واعتراف رامي بلسانه انه متعمد انه يصدمة و وضع سامي الخطير تاكد عليه التهم محاولت قتل متعمد فيها
ابو رامي ناظر لولده : حسبي الله على عدوك كله عشان بنت !!!
رامي نزل نظره بهدوء ونطق ماهر : الحين زملائي جاين ياخذونه وراح يتوقف الين نعرف وضع سامي ولو قدر الله وتوفى بعيد الشر راح يكون حكمه معروف ابو رامي جلس من هول الصدمه وطلع نواف وماهر وصادفهم سلمان ومعه شرطه سلمان : بالداخل ؟؟؟
ماهر : ايه الموضوع عندك يا سلمان
سلمان : ابشر لا تشيل هم ودخل هو وزملائه الشرطه يعتقلون رامي تحت نظرات والده المتحطمه
بعد اربع ساعات كانت تولين حاضنه نوف ومتعب رايح وجايي والخوف ياكل قلبه وماهر وخالد ونواف يحاولون يواسونه وراكان اللي جالس بهمه وضيقته على صديقه وفجاة طلعو الممرضين والدكاتره وهم يسحبون سرير سامي اللي كانو حاطين له حقت الرقبه والابر ملتصقه بجسده وجهه مشوهه لدرجه ان متعب شك انه اخاه ارتجف جسده بانهيار ومسكه خالد يسند هو ونواف وتولين اللي شهقت : ساميييي لااا ساميييي وانهارت بحضن نوف تبكي
الممرضه : لو سمحتو اخرجو من القسم الحين راحه ندخل العنايه ممنوع الدخول الا بعد ساعه
وبالقوه الشباب اقنعو متعب يطلع ونوف خرجت مع تولين ينتظرون
وكانت وجيهم مهمومه ومرت الثواني والدقائق والساعه وبعدها طلع لهم الدكتور وهو مهموم اسرع له متعب : تكفى يا دكتور طمن قلبي
الدكتور تنهد : تعال معي للمكتب ولحقه بسرعه متعب ومعه ماهر وتركي ونواف وخالد وراكان ومروان وريان جلسو عند تولين ونوف وجلس الدكتور واشر لمتعب وجلس وهو يحس قلبه على نار : هاه جلسنا وشفيه قول
الدكتور تنهد وناظر لتركي صديقه ونطق : ادري اللي بقوله صعب بس مجبور اتكلم هنا متعب حس قلبه طاح من الخوف : تكلممممم
الشباب كلهم حسو بشي وكان الكل صامت ينتظرون اللي بيقوله الدكتور اللي نطق بحقيقه صدمتهم : المريض دخل بغيبوبه بسبب ضربه قويه على الرأس ولا ندري هل بيصحى او لا
متعب مسك راسه وبكى بشكل محزن وكانه طفل جاعل من الجميع يتاثرون راكان حبس دموعه وطلع بسرعه وهو اخذ مايكفيه من الحقائق ودخل دورة المياة الفارغه وهو ينهار بالبكاء بشكل محزن حس بالفراغ داخله كيف بيكمل حياته طبيعي بدون رفيق حياته اللي مصيره محد يعلمه الا الله كان كلام الدكتور صادم لهم بشكل غير متوقع اقترب نواف من متعب وهو يساعده بالوقوف : متعب قوم معي واستهدي بالله وبندعي له وباذن الله بيقوم لنا بصحه وسلامه
متعب ببكاء : صرت بدون اخ يا نواف كيف بعيش بدونه هو مو بس اخوي هو مثل ولدي احسه صغير باقي حتى ما فرح باللي بيتزوجها كيف بهدى عض شفايفه نواف وحضنه : انا وماهر وكل العيال اخوانك وسامي باذن الله بيقوم خل عندك حسن ظن بالله
تركي اقترب من صديقه الدكتور: محمد قولي كم مدة الغيبوبه ؟ وهل يمديهم يزورونه
محمد بهمس: تبي الصراحه ؟ ممكن يصحى بمعجزه لان الكسور اللي فيه وضربة الرأس القويه مميته بشكل مفجع ماقدرت اقول كذا قدام اخوه ولكن مستحيل يصحى الا اذا ربي كاتب له عمر جديد وبمعجزه من عند ربي بيصحى اما تدخل الطب مراح يساعده ابدا ويمديه يشوف اخوه متى مايبي بس حده ساعه ساعتين ؛ تركي حس بصدمه وهو يناظر لمتعب وتنهد وهو يلحق الشباب بعد ما ساعدو متعب يمشي وطلعو بوجهه تولين ونوف اسرعت تولين تتكلم : متعب كيف وضع سامي ؟؟؟
متعب صر على اسنانه يكتم عبرته بس ما قدرت وحضنها وهو يهمس : دخل غيبوبه صارخت تولين بانهيار : لااااااااا مستحييييللللل وش قاعد تقوللللل سامي مستحيييلللل يصير فيه كذااااا لاااا هو باقي قالي بنروح نشتري الدبل حقت الزواج ونجهز اموره والله حرررراااااممممم حضنه بقوه وهو مثبتها نوف اسرعت تحضن نواف اللي بادلها بهدوء: هدي لازم تكونين قويه عشان متعب لانه تعبان بما فيه الكفايه يحتاج وقفتك معه الحين
نوف هزت راسها وهي تمسح دموعها واعطاها ريان مويه وبعد ما هدى الجميع سمح الدكتور يدخلون تولين ومتعب واول ما دخلتهم الممرضه كتمت بكائها تولين ومتعب كانت يتامل وضع اخاه المزري كانت قدمه مجبره والاسلاك مشتبكه بجسده وعينه المتورمه ويده المجبره كانت حالته تبكي الحجر
تولين قربت منه وهي تمسح على يده وعيناها تسيل بالدموع المنهمره : ان شاء الله بتصحى عشان نروح نخطب لك ريم وتحقق الحلم اللي تحلم فيه طيب ؟
متعب كانت عيناه تتحدث بدل لسانه تمنى يكون بدال اخاه ولا انه يرى كيف جسده مستلقي كالجثه الهامده حرك عيناه على معالم وجهه الهادئه
.
" بيت الجده منيره "
نامت ريم لانها شربت درائها وفيه نسبة منومه وكانت نائمة بعمق تاملتها روان وناظرت للبنات وهي تهمس : بنات
لفو عليها وعقدة شهد حاجبيها من ملامح روان الغريبه اللي واضح عليها مو على بعضها : وشفيه ؟
روان فركت يدينها : تخيلو سمعت شي يعور القلب
قربو منها البنات بفضول واستغراب ترف : وشفيك انطقي !
روان وهي عينها على ريم : راما قالت لي انو سامي تعرفونه اللي خطب ريم وبكره عساس بيجي يملك رسمي عليها ؟
هنوف : اللي شفناه اليوم وقلتي لها حقك موجود يا ريم ؟
روان : ايه
يارا : طيب وشفيه تكلمي ياروان تنرفزين
روان شدت على يدينها وبهدوء :سوا حادث وضعه خطير
شهقو البنات وسكتتهم روان : هششششش ريم لا يجيها خبر فاهمين وضعها مايسمح انها تعرف بوضع سامي فاهمين لحد يزل قدامها !!!
البنات هزو رؤسهم بطيب
شهد بصدمه واسرعت تقوم مبتعده عن البنات تتصل على راكان وقلبها قلقان عليه رد عليها بنبره هاديه وفيها بحه بسبب بكائه : هلا شهوده
شهد بخوف : ركوني وينك سمعت باللي صار كيف سامي ؟؟؟
راكان بلع غصته : بغيبوبه ولا ندري متى بيصحى عنده كسور بكامل جسمه وضربة بالراس هي اللي بسببها دخل غيبوبه وسوا ثلاث عمليات
شهد شهقت بصدمه وحزن : الله يشفيه ويعافيه ويقومه بالسلامه تعال يا قلبي لازم ترتاح
راكان : بجي بجي بقفل الحين وهو عينه على متعب اللي طلع وكان منكسر بشكل محزن
شهد : طيب وقفلت واتجهت للبنات وهي حابسه دموعها : بنات راكان قالي شي لو سمعته ريم بتنهار
روان : تكلمي وش قالك ؟؟؟
شهد رمشت بسرعه وهي تحاول ماتبكي : قال انه دخل غيبوبه وجسمه كله مكسر وسو له ثلاث عمليات ولا يدرون متى بيصحى منها
شهقات البنات كانت معبره على صدمتهم باللي سمعوه
هيفاء بحزن : الله يشفيه
البنات : امين
يارا بحزن وهي تتامل وجهه ريم النائمه بعمق : ياويلي مدري وش بتسوي لو درت
روان : مراح نعلمها وقولي لماهر يكذب عليها بان سامي عنده شغل بعمله وانه اجل الخطبه ابدا وضع ريم ما يسمح لها تعرف
يارا : اكيد بنكذب ولا نعلمهم
بعد ساعه ذهبت نوف اخوانها وتولين اصرت انها تجلس مع متعب عند اخوهم وافق ودخلت نوف لبيت اهلها وهي تسارع باحضان صغارها
وراكان اللي اتجهه لمنزله واول مادخل لقى شهد اللي سارعت باحتضانه وهو يبادلها بقوه وينهار بحضنها وهي تواسيه بكلامها العذب وجاعله له كل الحريه بان يخرج مابداخله من ضيقه وهم وحزن على صديق دربه وبعد الانهيار نام بحضنها بسبب التعب ..
" اليوم التالي "
ذهبت ام نواف تخطب لريان من ام حاتم اللي اخبرتها بانها سوف تخبره ابنتها وهي من سوف تقرر وافقت ام نواف ورجعت لريان تخبره باللي حدث
واما وضع سامي فهو كما هو بغيبوبته
والبنات راحو لريما وهم ملتزمين بالصمت امام ريم اللي استغربت كلام ماهر عندما اخبرها بان سامي اجل الخطبه بسبب اعماله وافقت وسكتت ولم تقل شي وهي من داخلها تشعر بشعور غريب ولكن تجاهلته وهي تندمج مع حديث البنات الجازي ابتسمت : وربي شوفتكم تسر الخاطر
ترف بابتسامة : يا بعد عمري والله انتي اللي شوفتك تفرح القلب
ريم ضحكت : جوجو انتبهي من الغزل لا اعلم ماهر الغيور ضحكت : لا تكفين
روان بضحك : الرجل الشرقي الغيور
راما ابتسمت : بنات فيه خبر
يارا : وشهو
ريما وهي تشرب قهوه : لا تقولين انك بتعرسين ؟؟؟
روان ضحكت : لا باقي مروان ما فاتح امي وابوي بالموضوع
راما باحراج ضربت روان : ااااااصصص خليني اهرج
روان بقهقه وهي تضرب كفها بكف ريما : اهرجي اهرجي
راما تنهدت بقوه : امي قبل شويه رجعت من عند جارتنا ام حاتم خطبت دانه لريان
ريما بصدمه : اوف اوف اخبار جديد من متى يبي يعرس ؟ مو كان رافض ؟
روان : الصراحه صدمه
ترف : بتجي سلفه جديده الواضح
ضحكت روان : سلفه غنوجه احس مو لايقين لبعض هي دلوعه وهو بدوي وهمه كله نياقه وبعيره اللي مدري وش اسمه
ضحكت راما : والله عاد هو مختارها
يارا : اوووه شكل الشوفه اعجبته
الجازي : دقيقه دانه ذيك البنت اللي انقذت ريفان ن الغرق ؟؟
ريما بضحك : ااايواااه هي شكلها ابهرت السيد ريان ولا ذاك وش اقنعه بالزواج وهو شاطب ذي الفكره
ريم : منجد ريان كان رافض الزواج
راما : امي كانت تصر عليه عشان يكون حياه بعيد عن ضياعه والله هو من بعد لين الله يرحمها مو ريان الاولي
تنهدت ريما : الله يرحمها كان متعلق فيها
ترف : بس دانه للامانه تجننن حلوه ودلوعه احس بطريقتها بتقدر تكسب ريان
راما ابتسمت : اكيددد
الجازي : بروح اجيب عصير واجي
روان بسرعه قامت : اساعدك
الجازي : لا ماتقصرين ارتاحي
روان : الا بجي معك اساعد وهي تقترب منها تهمس : بكلمك بشي بيني وبينك
الجازي ابتسمت : قولي كذا الحقيني اجل ابتسمت روان ولحقتها ودخلو للمطبخ ولفت عليها الجازي : وش عندك ؟
روان بابتسامة: بسالك عن تركي هل هو نسونجي ؟
الجازي انصدمت من كلمتها وفطست ضحك : هههههههههه نسونجي !!
روان سكتتها : هششش اقصد يعني عينه زايغه ؟؟؟
الجازي ضحكت : ياويلي منك ليه تغارين ؟؟؟
روان بحلطمه : الجازي بتهرجين ولا اقفل على الموضوع
الجازي نحنحت وهي تكتم ضحكتها: لا خلاص بتكلم شوفي انا وداني وجابني وكنت اشوفه مثل اخوي وهو كذلك يشوفني مثل اخته بس ماعمري شفته يناظر ببنات او شي
روان بغيض وهي متكيه على طبلون المطبخ : شكله من صار دكتور صار يطبق على الرايحه والجايه واكثر واحد لاعب
ابتسمت بخبث الجازي وسحبتها وهي توقفها قدام الشباك : تشوفين العماره اللي قدامنا ؟؟
روان باستغراب: ايه وشفيها ؟؟
الجازي وهي تهمس لها بخبث : هذه بيت تركي
روان ابتسمت بخبث وحماس وهي تناظر الجازي : والله طلعتي اخبث مني !!
ضحكت الجازي وهي ترتب كاسات العصير : انا بس اساعد العشاق
روان كشرت بغيض : ماني عاشقه !
الجازي : هممم منجد ؟
روان : اااايه !!!
الجازي وهي تاخذ الصحن حق الحلا والمالح المغلفه عليه : امسكي وديه لخالتي ام تركي
روان ناظرتها بصدمه وغمزت لها الجازي بادلتها روان : غطي علي
الجازي : ولا يهمك
روان اسرعت وهي تلبس عبايتها وتلف طرحتها على راسها واخذت الصحون وهي ترمي الطرحه على وجهها وتطلع متجهه للبيت وتحس بتوتر خطوتها جريئه بس فضولها اقوى منها قربت من البيت وهي تطق الباب اكثر من مره وفتحت لها ام تركي باستغراب: يا هلا ؟
روان : هذي انا روان يا خاله جايبه حلا ومالح راسلته الجازي لك
ام تركي بفرحه : يا هلا ادخلي ادخلي
روان ابتسمت ودخلت وهي تمد لها ونادت ام تركي العامله اخذت الصحون وسلمت عليها ام تركي بحراره : كيفك يا بنتي وش اخبارك
روان شالت الطرحه : الحمدالله بخير انتي كيفك بشريني عنك ؟
ام تركي : الحمدالله بخير تعالي لتزم اضيفك شي
روان : لا والله برجع للبنات اعذريني يا خاله
ام تركي باصرار : والله ماتمشين الا بعد ما اضيفك
تورطت روان بس ما كان بيدها الا انها توافق ودخلت معها للصاله وجلست وهي تتامل البيت صحيح صغير بس انيق ومرتب
.
" بيت راكان "
كانت شهد حاطه القهوه لراكان اللي يتقهوى بهدوء ماقدرت تروح مع البنات وتتركه وهو بوضع مايسمح راكان ناظرها : ريم تدري ؟
شهد : لا محد قالها
راكان : احسن لحد يقولها مو هي تعبانه وضعها مايسمح
شهد : اكيد ما نقدر نقولها بسبب تعبها مراح تتحمل
راكان تنهد بحزن : يوم كانت ريم بتروح غرفة العمليات هو كان يلوح لها حلف ماهر وخلفكم محد انتبهه له غيرها هو قالي ويوم كلمني ماهر وقالي عن تصرفات سامي المشكوك فيها ورحت اكلمه اعترف قدامي انه مو بس يحبها هو يعشقها ما خاف مني ولا خاف من رد فعل ماهر كان بيتحدى الكل عشانها وحتى يوم جينا نخطبها رسمي ولقينا الكلب رامي وابوه وصدمته يوم عرف بان فيه غيره جايي ياخذها منه بغى يتجنن لو ما كنت الحق وراه واحاول اهديه كان بيصير مجنون من الحب سامي صادق بكل شي كان نظيف من الداخل والظاهر ما ينافق ماله ومال المشاكل على نياته واذا حب يثبت لك انه فعلا يحبك بدون ما يكون فيه مقابل وسكت راكان وهو يحس بدموعه الدافئه تنزلق من عيناه تعبر عن حزنه الشديد على صديقه حضنته شهد وهي تمسح على شعره وهو واضع وجهه بعنقها يستنشق عبيرها ليشعر بانه على قيد الحياة وكانها تعطيه الامل بالحياه همس بحب : مدري وش كنت بسوي بدونك
شهد شدت عليه بحنان : ياروحي انا جنبك وراح اكون جبنك ان شاء الله طوال مانا عايشه ..
•
" بيت ابو ماهر "
كانت ام ماهر متضايقه باللي قاله ماهر لهم بان سامي بغيبوبه وابو ماهر مصدوم ومتضايق على بنته : لين متى بنخبي عليها !
ماهر تنهد : لين يمر على الموضوع فتره على الاقل ممكن يصحى سامي
ام ماهر تنهدت بحزن : لحول ولا قوة الا بالله توه صغير
ابو ماهر: ومطلق جاء ؟؟؟
ماهر : ايه الصبح وصل جاء باقرب طياره ولو تشوفه يا يبه يحزن انهار على ولده
ابر ماهر تنهد بحزن وهو اكثر واحد يعرف بوجع الولد : اهخ وانا ابوك محد يلومه وجع الولد شين شين يفتك لك القلب تفكيك
تنهد ماهر وسكت
.
عند روان اخذت العصير اللي مدته لها ام تركي : يالله انك تحييها ليت دايم الجازي ترسلك
ضحكت روان بخجل وشربت من كاسة العصير
ام تركي جلست وهي مبتسمه : تدرسين ؟
روان ابتسمت : خلصت من سنه متخرجه
ام تركي : ماشاءالله وش تخصصك
روان : حاسب
ام تركي : ماشاءالله تبارك الله تخصصك حلو
روان ابتسمت : ايه بس ماربي رزقني بالوظيفه ورفعت كاستها تشرب ابتسمت ام تركي باتساع : ان شاء الله ربي بيرزقك بالزوج الصالح شرقت روان وهي تكح اسرعت ام تركي تمد لها مناديل ومويه : بسم الله عليك
روان مسحت فمها وخشمها : ابي الحمام وين ؟
ام تركي : تعالي اوريك واخذتها تدلها على الحمام ورجعت ام تركي تجلس وقفلت الباب روان وهي تمشي على اصابع رجلها وتحاول تدور غرفة تركي فتحه احد البيبان وشافت ديكور الغرفه توحيي بانها لرجل وسارعت بالدخول وهي تتمشى فيها كانت فاضيه مو موجود مع انو سيارته موجوده استغربت وجات بتفتح الباب المقفل توقعت انها غرفة ملابس بس صدمها خروجه ببنطلون رياضي مريح وتيشيرت ابيض ساده ويجفف شعره صارخت وصارخ هو بفجعه وصدمه : لا شكلك جنيه وش جابك هنا !!!
روان رجعت لورا بفجعه : حسبي الله على عدوينك ذي فتحت باب اخط يفتحها طيرت قلبي
تركي : عساس انا اللي ما انفجعت وانا فجاة اشوفك بغرفتي !!!
روان : عاد من زينك انت وغرفتك جبت لخالتي حلا من عند الجازي واصرت الا تضيفني وطلبت اروح الحمام وجيت ادور غرفتك والحين ماشيه وجات بتمشي سحبها له : دايم اترك تروحين بس اليوم غير
روان رفعت حاجبها وهي تناظره من فوق لتحت : وشذي الحركات تحسب نفسك توم كروز بالله لا تحاول تعيدها اوكيه ؟ وحات بتمشي بس كانت يده اقوى منها وهي تشوفه مبتسم ابتسامة مايله ونظراته غريبه وفجاة طاحت عينها على السرير وعلى شكله ونظراته وقربه وشهقت بصدمه : يا قليل الادب تحاول تغتصبني !!!!! والله صرخه وحده اجمع لك الحاره كلها لو تلمسني !!!!
تركي فتح فمه بصدمه من تفكيرها وضحك : لا صدق انك مب صاحيه وشهو اغتصبك !!! الله وعاد تحسبين نفسك انجلينا جولي!! وهو يبتسم باستفزاز رجع لها كلامها ناظرته برفعة حاجب : وش تبي فيني وانت امس كانت عاجبتك هرج المايعه اللي معك وععع ما خلت شي بوجهها ما نفخته كلها على بعضها اصطناعي ! تركي بحده : ابي اعاقبك على سواقتك المعتوهه ! احد عنده عقل يسوق مثل السواقه اللي سقتيها !!!
روان ابتسمت : والله كيفي اسوق زي ما ابي مالك دخل فيني !
تركي ناظر لشفايفها عشان يوترها وقربها منه وهو يهمس قدامها وهي تحس انفاسه تختلط بانفاسها وحست بتدوخ من قربه : رواني المره الجايه مابي اشوفك تسوقين كذا طيب ولا ابيك تضحكين مثل ما ضحكتي بالكوفي عشاني وقتها لا احرق المكان اللي انتي فيه انتبهي صبري له حدود واذا تخطيتيها لا تلومين الا نفسك اوكيه يا حلوه ؟
روان وعينها بعينه هزت راسها بابتسامة : وانت بعد لا تتخطى حدودك مع اشخاص ارخص منهم مافي اوكيه عشان لا اطلع روان المجنونه تمام ؟؟
تركي ابتسم وعينه على ابتسامتها اللي يحس خطفت عقله : تمام يا عين تركي
روان دفعته ومشت تاركته يدوخ من حركاتها ولفت عليه وهي طالعه : مجهزه لك هديه اذا طلعت بتشوفها وطلعت تاركته يفكر وشهي واتجهت روان لام تركي وهي تعتذر بان بطنها يعورها وطلعت وهي تخرج السكينه اللي اخذتها من مطبخ ام تركي وتتجه لسيارة تركي وهي تلتفت يمين ويسار تشوف هل فيه احد يشوفها او لا واسرعت تنحني عند كفر السياره وهي تشقه وتبتسم بحماس وخبث ومرت على الثلاث الكفرات الباقيه وهي تنفض يدينها وتتجه لبيت الجازي وفتحت لها العامله ودخلت وهي البسمة شاقه وجهها
طلع تركي لعند امه : مين كان عندك ؟؟؟
ام تركي ببسمه : روان البنت اللي قلت لك عنها
تركي بتمثيل : وش تبي ؟؟
ام تركي ببسمه : جايبه حلا ومالح راسلته الجازي
تركي : اها انا رايح اليوم عندي مناويه
ام تركي : الله يحميك ابتسم لها وهو يبوس راسها ويدها ويطلع وجاء بيفتح سيارته وانصدم من اللي يشوفه وهو يمسك راسه بصدمه كانت الكفرات متشققه وخطر بباله ( مجهزه لك هديه اذا طلعت بتشوفها ) عصب وهو يهمس : روان روان انا اوريك !!!
.
" بيت ابو حاتم "
كانت دانه بغرفتها وهي تتخيل حياتها بعدين مع ريان هي معجبه فيه بشكل كبير بس محتاره هل هو راح يبادلها نفس الشعور ؟ زفرت من كثر الافكار
وقامت لعند امها ولقتها لحالها تتفرج على التلفزيون اقتربت منها وهي تجلس بجانبها وتفرك يدينها : ماما
ام حاتم : هممم
دانه بهدوء: انا موافقه
ام حاتم بصدمه : وشهو بدري مره ما اخذتي وقتك !!
دانه : اصلا انا من زمان مرتاحه لهم وابتسمت والصراحه انا اموت ببنته ريفان
ام حاتم ابتسمت : يعني متاكده عشان ارد على الحرمه بكره ؟
دانه : ااييه متاكده
ام حاتم ابتسمت وهي تمد يدها لبنتها اللي بادلتها البسمه واقتربت تحضنها بحنان : يا بعد روحي اللي بتعرس وتروح وتتركني
ابتسمت دانه : بجيك دايم مستحيل اغيب عن ذا الوجهه الحلو وهي تبوس بخدود امها اللي تضحك على حركات بنتها الطفوليه ..
•
بعد السهره عند الجازي البنات مشو مع ريم اللي تسوق وحركت ريم تحت انظار ريما لها وضحكها على حركات البنات بالسياره
الجازي : اهخ اجمل يوم بحياتي صدق احبهمممم
ريما ابتسمت : عاد اسبوعين وكم يوم وتصيرين عندهم
ضحكت بخجل الجازي وفطست عليها ريما : اهخ متحمل ذا الفيس
قاطعهم دخول معاذ وهو يتربع وياكل من الورق العنب ومن المعجنات : احلى فقره بعد مايروحون الضيوف البلعه
الجازي : صاير تنافس ريما على الكرش !
معاذ بصدمه وفمهم مليان اكل : هااااااه
ريما ضحكت : الله يعيني عليه
معاذ كشر وهو يبلع الاكل ويرفع التيشيرت حقه : شوف السكس باق الجازي غمضت عيونها : استح على وجهك
معاذ صفقها : عشان معد تسولفين كذا
ريما قهقة : خلاص عاد خجلتها
الجازي : تصدقون بروح انام افضلي
ريما بخبث : هممم تنامين ولا تكلمين مهوري ؟
الجازي بصدمه وخجل : ريماا اعقبي ومشت تاركتها تضحك هي ومعاذ
معاذ ابتسم وهو يحضن ريما : اهخ اشتقت لك
ريما : وخر لو سمحت ترا بعض الاحيان ودي اطرش من ريحتك
معاذ زفر بقوه : وشذي الحمله الشينه
ريما هزت اكتافها وتنهد معاذ وهو يكمل مزحه معها
.
عند ريم دخلت البيت وكان ماهر وامه جالسين ابتسمت : انا جيت
ماهر التفت عليها : بدري شايفه الساعه كم !!!
ريم تنهدت : ياخي كلها سهره يعني طبيعي بتاخر وجلست بعد ما خلعت عبايتها ام ماهر : ايه وكيف كانت سهرتكم
ريم ابتسمت : تجنننن مثل وجهك الحلو وقرصت خد والدتها اللي ضربت يدها بمزح وضحكو ناهر ابتسم لها : كيف ريما مع الحمل
ريم : والله بدا فيها تعب اخر الشهور
ام ماهر : ياقلبي عليها الله يكون معها
ماهر وريم : امين
ريم : وين ابوي ؟
ماهر : رجع ينام
ريم : همممم صح ماهر بكره الموعد حقي توديني ولا اروح
ماهر رفع حاجبه : لا ياشيخه تروحين لحالك عجبتك الشغله
ريم ضحكت : اخدم نفسي يا ابن الحلال افضل من اكلف عليك وانت عندك اشغالك
ماهر بعناد : عشانك اتفضى وش تبين احسن من كذا
ريم ضحكت : ولا شي سلامتك متى نمشي عشان اصحى بدري
ماهر : المغرب عشان يكون الجو قد برد مالي خلق للحر
ريم : تم كم عندي ماهر ايييه صح عندي لك شي
ماهر : وشهو
ريم ابتسمت بخبث : سلام خاص من الجازي
ماهر باحراج وصدمه انه امه متواجده ونحنح : الله يسلمها
ام ماهر ابتسمت وريم وقفت بسرعه تمشي له : وبعد شغله ثاني وصتني عليها
ماهر باستغراب : وشهي ؟
ريم وهو تبوس خده بقوه اكثر من مره : وصتني اعطيك بوسه بالخد
ماهر انحرج من ضحكات والدته اللي ارتفعت وكذلك ريم اللي اسرعت تركض عنه : رومنسيه حيييل
ماهر : بوريك الرومنسيه يا بزر وقام يلاحقها وهي ميته ضحك
ام ماهر بضحك : بشويش على اختك
ماهر وهو يمسك اذن ريم اللي تترجاه يتركها : ماتستحين على وجهك انتي
ريم : اااااه نمزح يا ابن الاوادم ليه تشدها اااه اترك اذني
ام ماهر : ماهر اترك اختك
ماهر زفر وتركها وهي تحك اذنها : وجعوه
ماهر راقص لها حواجبه باستفزاز كشرت : هين هيييين بعدين اقولي لزوجي المستقبلي اللي هو سامي انك تستفزني كذا وصعدت بسرعه لغرفتها خوفًا ان يلحقها هنا بهتت ضحكت ماهر وتنهدت ام ماهر بضيقه : بروح انام تاركه ماهر يجلس بحسره على كلامها مايقدر يصارحها ولو كلفه الامر انه يكذب
.
.
ترف دخلت البيت ولقت نواف قالب البيت فوق تحت نزلت عبايتها بصدمه : نووووواااااففف
نواف طلع من المطبخ وهو لابس مريلة المطبخ وبيده ملعقه الاكل وهو يبتسم : يا هلا ومسهلا نورتي تعشيتي ولا احط لك معي
ترف بصدمه وهي تناظر فيه من فوق لتحت : وش مسوي انت البيت ليه كذا !!
نواف حك راسه : والله شوفي كنت جايب العيال نلعب هنا بلوت
ترف : مراح ارتب اي شي انت خربت انت تنظف وطلعت تاركته يقفل على الاكل ويسرع لها : تروف معليك بجيب لك العامله حقت اهلي ترتب
ترف بغيض : انا قبل لا امشي كنت مخليه البيت يلق من النظافه ارجع القاك مخربه
نواف ابتسم وحاوط خصرها : يلبى المعصب وشدعوه لعيونك اتفق مع عانلة اهلي تجينا كل يوم ترتب وتنظف واعطيها راتب انتي ريحي لي نفسك وباس خدها صعود لشفتيها التي انفرجت بالابتسامة وحاوطة عنقه : ريحتك كشنه تدري ؟ نواف ضحك : ادري باكل واتروش
ترف : وانا بغير ملابسي عمال تتعشى يلاه
نواف : بعدين بتسولفين لي كيف سهرتك
ابتسمت ترف : من عيوني
نواف : يالبى عيونك ياشيخه واسرع لتحت يتعشى ويكلم راما تقول للعامله حقتهم تجي ترتب وفعلا بعد خمس دقايق جات وبدت ترتيب وتنظيف
.
" اليوم التالي "
• المغرب •
كان منزل الجده منيره يعج بضحكات وسواليف البنات كان الجميع مجتمع ريما وطيف وام ماهر وام خالد وام نواف ومها والبنات كلهم الا ريم اللي راحت مع ماهر لموعدها
ام خالد : وليه تخبون عن ريم دام مافي بينهم شي رسمي
ام ماهر : حتى لو مافي هي كانت مرتاحه له وضعها حاليا مايسمح لها
ام نواف : لاحول ولا قوة الا بالله مسكين صغير بالعمر حرام يصير فيه كذا
شهد بقهر : حسبي الله على من كان السبب
رهف : ليه الحادث بقصد ؟
شهد : ايه طلع الشخص الثاني اللي خطب ريم هو السبب
ام خالد : لا أله ألا الله ظلم نفسه
.
نزلت ريم مع ماهر ودخلو المستشفى تحت طقطقتهم على الرايح والجاي بالانتظار طلعت الممرضه : ريم راشد
ريم قامت ومعها ماهر ودخلو وكان دكتور ثاني غير رامي ! انصدمت ريم بس ما اعطت الموضوع اهميه وجلست وزي اي موعد اخر كانت تجيه وبعد الفحص همست ريم لماهر بانها بتروح الحمام وهز لها راسه وطلعت واتجهت لدورة المياه بس قاطعها مرور متعب زوج نوف ومعه فتاة تاكدت انها تولين بس شد انتباها كلام متعب : تولين تجلسين عنده بي نص ساعه وترجعين مع ابوي لانه تعبان انا بجلس عنده واي شي يصير اقولك
تولين بحزن : طيب
ريم نغزها قلبها واستغربت بتكلمون عن من ؟ وقررت تلحقهم وهي تبي تكلم تولين ومرو من قسم مليئ بالغرف بس شبهه خالي من زحمة الناس وقف متعب ودخلت تولين وكان باب الغرفه مفتوحه واقتربت ريم من الغرفه شويه انتبه متعب باستغراب بس شهقت ريم جعلت من مصدوم مين ذي التفت تولين وانصدمت : ريم !!!!!
ريم مسكت صدرها واقتربت اكثر وهي متاكده انه هو تولين مسكت يد ريم : ريم هدي وش جابك هنا
انصدم متعب ومسك راسه هل قالو لها فعلا
طلع ماهر وانصدم من تاخر ريم وجاء بيتصل عليها بس قاطعه اتصال متعب رد : هلا متعب
متعب : ماهر اختك هنا تعبت
ماهر : هاااااه لا يكون شافته ؟؟؟؟؟
متعب : شافته
ماهر قفل المكالمه واسرع يركض وقلبه ياكله على اخته
عند تولين الجالسه مع ريم اللي تبكي وتمسك قلبها وهي تبكي معها بحزن ومتعب صاد مايبي يتوجع اكثر اللي فيه مكفيه جاء ماهر يركض والتفت عليها قامت تولين بسرعه تصد عن ماهر اللي جثى عند اقدامها بخوف : ريم حبيبتي
ريم دفعت يده : تدري وماتقولي !!!
ماهر بهدوء وهو يجلس بجانبها : ماكنت ابيك تدرين انتي تعبانه و قاطعته ببكاء : ما كان لك الحق تكذب علي !
ماهر : بس سامي بالاصل مو خطيبك رسمي
ريم : كان بيصير لو مهو بذا الوضع وبكت بشكل محزن جاعله من تولين تحضن متعب اللي اوجعه اللي قالته ريم حضن ماهر ريم تحت ابعادها له بس ثبتها وهو يهديها وهمست من بين شهقاتها : ا .. ابي ا. اشوفه تكفى
ماهر غمض عيونه اللي قالته صعب عليه بس عشانها يسوي اي شي : ابشري بس هدي انتي
ريم هزت راسها وقامت وهي تدخل همس متعب لتولين تلحقها ودخلت معها تولين تنهد ماهر ومتعب جلس بهدوء
ريم اقتربت من جسد سامي المستلقي كان جسد بلا روح ! كانت تتامل حالته المحزنه همست ريم من بين دموعها : متى صار فيه كذا قولي كل شي تكفين !
تولين نزلت راسها وهي تحبس دموعها : قبل امس صار له حادث وتوقف قلبه بس انعشوه وسوا ثلاث عمليات ودخل بغيبوبه ولا ندري متى بيصحى
ريم نزلت دموعها بحزن وحسره هل هي منحوسه لان فقط وافقت عليه حدث هذا بدات افكار التشائم تراودها وكان هي السبب فقط كان جسد ريم يهتز من البكاء الصامت تولين ابتسمت بحزن ودموعها تسقط : ريم لا تنسين بانه مو بس حبك هو عشقك كان مستعد انه يسوي كل شي بس تصيرين حلاله بس صار اللي صار ريم اسرعت تطلع من الغرفه وهي تشهق بقوه ماهر اسرع لها بخوف : ريييم وشفيك
ريم تحاول تتنفس بقوه متعب فز بصدمه وتولين اللي ترتجف بخوف وبكاء على ريم ماهر ثبتها : ريم تسمعيني تنفسي مع خشمك وطلعي مع فمك يلااااه
استجابت له وهي تطبق كلامه وهدت وهي تحس بالدوخه ويسندها وهمست : اخذني من هنا
ماهر : طيب طيب وشالها بسرعه ومتعب التفت لتولين : وشفيها ؟
تولين : كانت تبكي طبيعي وتسالني عن وضعه واجاوب وفجاة تعبت اصلا هي تعبانه توها مسويه عملية قلب
تنهد متعب : الله يشفيها ودخل لاخوه وهو يرجع لواقعه ولوضع شقيقه المحزن
.
صعد ماهر السياره بعد ما ركب ريم ومشى متجهه للبيت بسرعه وعيونه على ريم اللي تناظر بالشوارع وهي تراجع قلبها ما توقعت انها تحبه ! صح وافقت عليه لانها تعرفه وتعرف انه يحبها بس انها هي تبادله كان صدمه بالنسبه لها تاكدت لمن شافته مستلقي بلا روح بعد ربع ساعه وقف ماهر امام البيت ونزل يساعدها وهي مستنده عليه واتجهت لبيتهم وهي تدخل وكانت تسمع والدها يسال بقلق وماهر يرد عليه اشرت لماهر بانها سوف تدخل غرفتها ماهر بقلق وخوف : ريم خليني اجلس معك
ريم بصوت مبحوح : ماهر بجلس لحالي تكفى
ماهر تنهد وقفلت الباب ورمت عبايتها وهي تتجه لسريرها وتستلقي وهي تشعر بدموعها تغرق وسادتها كان بكائها صامت بشكل مخيف وكان داخلها يبكي اكثر من خارجها اغلقت عينها مستسلمه للظلام ....
__________________________
قراءه ممتعه ✨
اعطوني رايكم بالبارت لاني أقرأ التعليقات وتبسطني حيل تعليقاتكم الجميلة
البارت القادم اخر بارت ايش شعوركم 😔❤️
أنت تقرأ
احتريتك من بين كل البشر وسميتك عشقي وفرحة سنيني
Actionالكاتبه شهد✍🏻 اول روايه لي وان شاء الله تنال اعجابكم 🤍 • اختصار للروايه ؛تتكلم عن حياة الجد سعود وعياله واحفاده ويومياتهم والاحداث والمغامرات اللي تصير معهم •• "" لا استبيح النقل او الاقتباس ""
