عدت الجزء الاول بعد التعديل
#صبراً_ياقلبي
بقلم #روز_الفياض
ج١
.
.
.
ساخبرك سراً . . لا نهاية لك داخلي 💙
ولستُ أرى قلبَي لغيرِك َ يصلُح❤️
.
.
.
طالبه كلية هندسة مدني مرحله ثالثه سماني والدي (ذهب )لان من جنت طفلة جنت حيل شگرا .. كل اللي يعرفوني يشوفوني حلوه رغم اني اشوف نفسي عاديه جدا والحمدلله علاقتي طيبه مع الكل سواء الاقارب او زملائي وزميلاتي بالكليه والحمدلله اخلاقي محط اعجاب الطلاب والاساتذه اني الوحيده لاهلي ماعندي اخوان او خوات .
في يوم من الايام جيرانه حجت ويه ماما بموضوع خطوبه لناس من طرفهم المهم ماما موافقت رفضت الموضوع وكلتلها ذهب بعدها زغيره واحنه نريدها تكمل دراستها بس المره لحت هوايه على ماما كلتلها الولد هم مهندس بس متعين بشركه اهلية وراتبه زين وعنده مشتمل وسياره وحلو كولش وكشخه وهو جيران اهلها وحيل خوش ناس وراح يخليها تكمل فماما كلتلها الله كريم اني ابلغ ابوها واذا اكو نصيب ذيج الساعه نحجي.
ماما بلغت ابوي بموضوع جارتنه وهو مجاوبها ..
ابويه جان يتمنى ابقى بدون زواج حتى مينحرمون مني واذا اتزوجت اتزوج واسكن وياهم المهم ظلت جارتنه تلح واجت بنفسها وحجت ويه ابوي وكلتله متلكه مثل هيج ولد لبنتك وراح تشكرني بعدين لان بنتك راح تكون مدلله وعد ناس يحترموها ويحسبوها بنتهم مو جنتهم وانت شنو تريد اكثر من انو تشوفها مرتاحه ..
سكت وبعدين كللها:
اوكي خل يتفضلون يجون والله كريم
وفعلا اجت ماما كلتلي :
تره ابوج وافق انو يجون الناس وتشوفيهم ويشوفونج وانتي كيفج بعد احنه منجبرج خاف باجر عكبة تكولين اهلي جبروني انت شوفيه وقرري .
فاني بالنسبه الي جان الموضوع جدا جدا محرج لان اني بطبعي جدا جدا خجولة ..
اتصلوا اهل الولد حتى يجون يشوفوني وماما اصرت يجون يوم جمعه حتى اني ماعندي دوام واكدر اجهز نفسي وعندي وقت ادرس لان اني مستوايه زين والحمدلله واجه يوم الجمعه وجهزنه كل شي اني وماما ولبست تنوره قصيره اوف وايت وقميص سمائي وبي طوبات لون ازرق وفتحت شعري وشعري ناعم واشقر شقار خفيف وخليت مكياج جدا خفيف واجو الجماعه عالموعد وطلعت سلمت عليهم وقدمتلهم الضيافه وجانت ام الولد جايه واخته ومرت اخوه المهم حسيتهم انعجبوا بيه وامه كعدت بصفي واحسها سوتلي سكان ( تصوير ) من فوك ليجوه ومبطلت مدح بجمال واخلاق ابنها وكالت اسمه ( سراج ) واكبر مني ( ب5 ) سنوات ويشتغل بشركه مال صديقه المهم خلص اليوم وكالوا راح يتصلون بماما حتى يجي الولد اشوفه ويشوفني .
وثاني يوم رحت للدوام وحجيت لصديقتي المقربه فاطمه بس محجيت شي للشله ساره وحنين وزينب واسراء ونور المهم صديقتي شجعتني وكالت
فاطمه:اي شكو بيها لج يجوز يطلع خوش ولد ونخلص منج .
ذهب:ايا قليلة الادب تردين تخلصين مني !
فاطمه:يمعوده مو ملينه يوميه واحد جاي وتطلعين بي الف عيب بعدين اني هم اريد اتزوج بلكي خطيبج يطلع عنده اخ يستاهل 😆.
ذهب:اي والله اني هم مليت من الاحراج كل يوم افشل واحد بس ماادري ليش ممرتاحه للموضوع😕
فاطمه:هو انتي منو ارتاحيتيله اشو كلهم نفس العذر😡
ذهب:تدرين فطوم اني مااعرف اعبر عن مشاعري واخجل حيل افكر بهيج اشياء حتى بيني وبين نفسي.
فاطمه:ادري ادري اشك انتي عندج مشاعر 😑
ذهب:شدعوه مو لهدرجه شايفتني ماعندي احساس.
فاطمه:لعد اكو وحده لاتعجبها العلاقات ولايعجبها انو يكون عدها معجبين ولا يعبجها تنخطب ولايعجبها العجب هاي شتسميها بالله😒؟
ذهب:لج اكولج اخجل مو بيدي بعدين مااحب هالسوالف مال العلاقات والحب والغرام مااكدر ضميري يأنبني بابا خطيه والمعجبين خليهم الج ..
فاطمه:لايمعوده شسوي بيهم خل افتك من اللي عندي صدك نسيت اكولج البارحه استاذ حازم سألني عنج😁
ذهب:عابت على شنو تضحكين مو كتلج لاتلكينه وجه ومن يسالج عني كوليله مااعرف شي عنها غير لزكه هذا.
فاطمه:اي والله لزكه المصيبه ماعنده احساس ميكول دا احرجها بوكفتي وياها يالله يمعوده انخطبي وفكينه من هاللزكه.
