အခန်းတံခါးကို နောက်ကျောမှီပြီး ကျကျနန ထိုင်နေတဲ့ ကိုကို့ကြောင့် မက်သရူး ဘာလုပ်ရမှန်း မသိ။
CCTV camera ကြောင့် ဖုန်းထဲမှာ ပေါ်နေတဲ့ ကိုကို့ပုံရိပ်ကို ကြည့်ရင်း သက်ပျင်း ချမိတာက အခါခါပင်။ ကိုကို ထိုင်နေတဲ့ တံခါးတစ်ဖက်မှာ မက်သရူးလည်း ကိုကိုလိုတံခါးကို ကျောမှီပြီး ထိုင်လိုက်တယ်။
အချင်းချင်း တစ်ယောက်ကို တစ်ယောက် နာကျင်စေတဲ့ ဆက်ဆံရေးမှာ ကိုကို့အတွက် ဘာများ ဖက်တွယ်စရာ ကျန်နေသေးလို့လဲ ကိုကိုရယ်။ ဖုန်းစခရင်မှာ ပေါ်နေတဲ့ ကိုကို့ပုံလေးကို လက်နဲ့ထိလိုက်တော့ မျက်ရည်တွေက ပေါက်ခနဲ။ သတိရတယ် လွမ်းတယ်ဆိုတိုင်း အတူတူရှိနေရဖို့ လုံလောက်တဲ့ အကြောင်းပြချက်မှ မဟုတ်တာ။
ဘယ်လိုပဲဖြစ်ဖြစ် ဝေးရမယ့် အခြေအနေမှာ ကျွန်တော်တို့ ဆုံးဖြတ်ချက်ခိုင်ခိုင်နဲ့ပဲ ဝေးကြရအောင်လား ကိုကိုရယ်။
🌹🌹🌹🌹🌹🌹🌹🌹🌹🌹🌹🌹🌹🌹
Time Travel မလုပ်ခင် ဆော့မက်သရူးနေ့ရက်များ။
သို့မဟုတ် အခန်း-၁ အပြိုင်
လမ်းခွဲစကားပြောခဲ့တာလည်း ကိုယ်ပဲ။ တကယ်တမ်းနာကျင်ရတာကလည်း ကိုယ်ပင်။
ကိုကို့ဘက်က စိတ်ပူရသမျှကို မက်သရူးကတော့ ချုပ်ချယ်တယ်လို့ပဲ မြင်ခဲ့တာတွေအကုန်လုံးက ဝေးသွားမှ နောင်တတွေအဖြစ် အသွင်ပြောင်းလာလိမ့်မယ်လို့ မက်သရူးမှ မထင်ခဲ့တာ။
တကယ်တော့ သူနဲ့ ကိုကိုက မတူတာတွေ တောင်ပုံယာပုံပင်။ မက်သရူးက မိုးရေမိခံရတာကို ကြိုက်တယ်။ ကိုကိုက မိုးစိုတာကို နည်းနည်းမှ မကြိုက်။ သူကိုယ်တိုင်လည်း မကြိုက်သလို မက်သရူးမိုးရေဆိုထားရင်လည်း ဆူတော့တာမရပ်။
"မိုးရေထဲမှာ နေရတာ သဘောကျရအောင် မက်သရူးက ကစားရတာကိုပျော်တဲ့ ကလေးအရွယ်လား"
ဆိုပြီး မိုးရေမိတာနဲ့ တဗြစ်တောက်တောက်။
ပြီးတော့ မက်သရူးက ရေချိုးပြီးရင် ခေါင်းကို အစိုအတိုင်းနေရတာ သဘောကျတယ်။ တဘက်သုတ်ရတာ dryer မှုတ်ရတာကို ပျင်းတာလဲ ပါတာပေါ့။
