تراتيل الذئب

Part 14

بسم الله الرحمن الرحيم
آللهم صل على محمد وآل محمد

#تراتيل_الذئب

#بقلمي_رَيـحانَه_الُمٌوَسِوَي

_____________

{سمر}
(طلعنا من المستشفى واحس روحي ضايعه شنو اسوي ماأعرف فوكاها أيدي مكسوره وأمي واضحه عليها كسرتها وحيرتها، بعدنا ب باب المستشفى وذياب كال نروح وياهم كلامه خلاني انهضم أكثر من ماافرح يعني الغريب حن عليه وماهنت علي وعمي سلمني للذيابه بأيده وبايعني وقابظ حقي)

(الأمر حيل صعب عليه نروح نعيش يمهم بس بنفس الوقت ماعدنا حل ثاني البيت مانكدر نبقى بي ومااكدر اشتغل ونأجر غيره وأمي هم صحتها على كدها من فتح الموضوع ذياب رفضت بعدين لح بالموضوع باوعت ل امي تباوعلي بحيره كسرتها مردت قلبي خلتني أوافق نروح وياهم)

(جنت حيل مامرتاحه خصوصاً همه حياتهم تختلف عن حياتنا وصلنا لبيتهم وماشاءالله قصر مو بيت شنو اكول مااوصف جماله وفخامته الاثاث من الطراز الخليجي دخلنا البيت وشفنه أهلهم استقبلونا أحسن استقبال كأنما يعرفونا من زمان وتصرفوا ويانا كأنما احنه عايشين وياهم مو ضيوف)

(انطونا غرف ثنين بس عيب وبنفس الوقت إني متعوده أنام بنفس الغرفه ويه امي،، جابتلنا مروه ملابس ووجها البشوش وكلامها الحلو يشيل الهم من القلب، قبل حتى ماتبدل جابتلنياهم راحت مروه وره شويه اندكت باب الغرفه لبست حجابي وفتحت الباب شفت اخت ذياب الكبيره)

فاطمه بأبتسامه؛ مساء الخير

سمر؛ مساء النور تفضلي

(دخلت يمنه وهي مبتسمه سلمت على أمي وحجت بأبتسامه تشبه ابتسامة مروه)

فاطمه؛ حبايبي اني جيت اترخص منكم والله حبيت اكُعد وياكُم واتعرف عليكم بس اجه زوجي

ام سمر؛ على راحتج يمه بالسلامه

سمر؛ مرخوصه علويه براحتج

(ترخصت وسلمت وطلعت،، مددت يم أمي جانت الدنيا المغرب من التعب والم جسمي من الضرب ماحسيت على نفسي اله وأني نايمه،، كعدت الساعه ب2بالليل باوعت أمي نايمه وايدي توجعني وريكي يابس عندي علاج انطونيا بالمستشفى بس ماعندي مي واستحي اطلع)

(الم أيدي قوي آخر شي قررت اطلع أكيد هسه الكل نايم طلعت أمشي على أطراف أصابعي بعد مالبست حجاب دخلت للمطبخ الضوه مسدود شفت كدامي المغسله قررت اشرب من الحنفيه ألمهم اصير زينه أخذت كلاص ورحت أريد اشرب بس الصوت السمعته خله الكلاص يوكع من أيدي ويتكسر)

~~~~~~~~~~

{ليلى}

(كملنا غده ورحت أريد أنام تعبانه هواي الدنيا المغرب بس مكدرت انتظر الليل يالله انام نمت وره شويه فزيت على صوت الجهاز يتصل شفت المتصل مروه باوعت الساعه ب7 مصار هواي من نمت خفت صاير شي لسمر فتحت خط وحجيت بقلق)