اَهنِي بِك حَياتِي يَا رُوح اَلعُمر

-7-

بعد مرور ساعات من الاخذ والعطاء وكان الكل ملاحظ نظرات نايف لـ ساجي الي مليانه غضب ,نطق وهاج بهمس لـ جسار:متى يخلصون مانبي ننفضح قدامهم!
شد جسار على فخذ وهاج ونطق بنفس الهمس:والله حتى انا ودي تقضي الليله على خير لان عمي مو ناوي خير وساجي مستحيل يسكت له
وهاج:هذا اذا طلع من هنا سليم !!
التفت الكل من نطق متعب :سبب زيارتنا يـ ناهل معروف واظن قد وصلك خبر اننا تعنينا لأجل نخطب بنتك الكبيره لولدي عذبي
ابتسم ناهل ونطق بهدوء:والله لنا الشرف يبو عزام لكن اخذ بشور بنتي وان شاءالله نرد لكم خبر!
ابتسم متعب:خذوا راحتكم يبو جسار
عند سراج الي كان بعالم موازي يوثق كل شي لـ رُوح ويضحك على ردودها وحماسها معه اما عذبي الي كانت الدنيا مو واسعته من الفرحه واخيراً خطبها ! بعد المعاناه الي سببته له واخيراً, نطق وهاج بهمس:بسجد سجود شكر واخيراً خلصوا الهدره!
جسار:جدي اشغلنا يحكي لهم عن شبابه وكان محد كان بالعشرين الا هو!
وهاج:انت طالع ساجي كيف ساحب على عمي ونظراته
رفع جسار نظره لـ ساجي الي فعلاً كان اخر همه نايف وقاعد يحرك بيالة الشاهي ويهوجس وكانه مو معهم ابد,
رجع يلتفت لـ عمه الي كان عكس ساجي تماماً كان يناظره بنظرات حقد وغضب كبير وكان وده يقوم يذبحه كان برود ساجي وعدم اهتمامه له وتجاهله يحرقه ويقتله كيف قدر يتجاهله قدام كل هالرجال وكانه ولا شي , نطق جسار بهمس:ورانا اليوم ملاحقه وتثبيت خلك جاهز!
ضحك وهاج بـ اسف:ساجي مايتعب ويبهذلنا وذاك قول بدون فعل !
جسار:كم مره قد هبدني وانا اهديه
وهاج:حسبي الله بس كيف رجع من الرياض ؟
التفت عليه جسار ونطق:انت غبي لا صدق تاكدت انك غبي اكيد رجع بطياره!
وهاج؛يالليل محد يسولف معك ثلاثيني
جسار:على الاقل ماني غبي! شلون بتصير مهندس
وهاج:ترا بنخسر بعض؟
جسار:والله انه عيد كان خسرنا بعض
التفت عليهم سطام ونطق:انتوا وراكم تتكلمون بشويش؟
جسار:اسرار عائليه
سطام:الله والاسرار العائليه المخيسه
وهاج:اخوي ترا قاعد يغلط على عايلتنا!
نطق جسار بـ اسف:اخوي والله اسمع يا حسرتي طحت بين اثنين مب صاحين!
ضحك سطام ونطق ناهل :تفضلوا العشى جاهز
وهاج نزل شماغه براحه:واخيراً
دعس جسار على رجله:الناس موجوده!
ضحكوا وهاج وسطام وتنهد جسار بحسره اما ساجي انسحب لـ الخارج تاركهم يروحون يتعشون ما يدري ليش جاء وليش استعجل برحلته لكن الشي الوحيد الي يعرفه ان ود كانت ولا زالت اغلى واحب اخوانه له ومستحيل
مايحضر شي يخصها حتى لو كان مكتوم وتعبان ومو طايق نفسه سند راسه على الجدار يهوجس يكره وجود عمه معه في نفس المكان بعد الي صار بينهم مستحيل يعتبره عم او سند يعتبره غريب حتى الغريب احسن كنه بالنسبه له بعد الحادثه لانه ايقن وقتها ان معدن الانسان مايبان الا في الحزن في الشده ,
,
~ عند الحريم ~
طلعت ود لـ وهاج الي نطق:تخيلي وش صار
بلعت ريقها ود برعب ونطقت:وش صار؟
وهاج:ساجي حضر!
شهقت بصدمه:اسالك بالله!
وهاج:والله بس اسمعي القنبله الاساسيه
ود:تهاوشوا هو وعمي؟؟
وهاج:وين ساجي لا يرا عمي شي تجاهل وجوده ولا سلم عليه
نطقت بصدمه :قدامهم كلهم؟؟
وهاج:قدامهم كلهم ولا كانه موجود
ود:والحين انت ليش جاي تعلمني؟
وهاج:حسيت لازم ابلغكم بالخبر
ود:قصدك تفجعنا؟
ضحك وهاج بعلو صوته:بس بالله مو مفاجاه؟
ود:للامانه مره مبسوطه انه حضر بس يارب مايصير شي
وهاج:معليك الحين العشى وبعدها كم سالفه ويروحون!
ود:يالله يارب مايصير شي
وهاج:ياحلوه ارجعي انبسطي ومعليك دام اخوانك وابوك موجودين!
ارتفعت تقبل خده وتقفل الباب ترجع لـ الحريم الي كان العشى حقهم قبل الرجال بحكم طلب ناهل بتاخير العشى حق الرجال , جلست بجانب وهج تاخذ بيالة شاهي وتنطق بهمس:ساجي حضر
شهقت وهج ونطقت بعلو صوتها:ساجي !
كحت ود من صوت وهج العالي وفزت بيادر من سمعت اسمه:عسى ماشر؟
ود ابتسمت بخفه:لا ولا شي ياعيوني بس سالفه عاديه
ضحكت وهج بوهقه لكن انقذتها نجلاء الي تتغزل بـ ود وبجمالها واخلاقها ونطقت نجود:والله لو رُوح موجوده انبسطت فيكم!
ابتسمت وهج:الجايات اكثر بأذن الله ونتعرف عليها
عذاري:والله ان تحبكم اساساً بسم الله عليكم كلكم تدخلون القلب
ابتسمت جميله بحب :والله هذا من ذوقك
,
نطقت رُوح بـ بتعب:يا بنتي دام عمي يبيك روحي والله عادي ما علي خوف!
إيناس:اخاف عليك
رُوح:والله ما علي خوف من الفاضي الي بيجي يخطفني ؟
ضحكت إيناس:تبين الفكه مني؟
هزت راسها بالنفي تنطق:لا يابنتي بس عمي يبيك واضح مصر
إيناس:ترا والله لو مو ضروري ما اتركك!
رُوح:والله عارفه معذوره اساساً اتوقع رحلتهم الليله !
إيناس:يلا باي حسافه بتفوتني سنابات سراج
ضحكت بخفه:باي معليك انا اعلمك الاحداث!
طلعت إيناس بـ استعجال وقفلت رُوح الباب تطلع لـ الحمام "أعزكم الله" تجهز البانيو وتطلع لغرفتها تختار ترنق شتوي بـ اللون الابيض تنزله على السرير وترجع لـ الحمام تدخل البانيو تسترخي وتريح اعصابها من كل الضغوطات وتريح تفكيرها , بعد مرور ساعه كامله طلعت  بعد ما انتهت من الشاور تتجه لـ التسريحه تبدا بـ عنايتها ثم ترفع تولة المسك تحط على امكان النبض وبعدها فقرتها الاحب لقلبها عطرها المفضل الي كان يميزها عن غيرها وقفت تنثر شعرها وتطلع من غرفتها لـ المكتبه تطلع الكتب الي تحتاجها وترجع لغرفتها وهالمره معها كوب الشاهي , رفعت شعرها تنزل كوبها وتبدا تفتح كتاب كتاب تدور الاشياء الي تبحث عنها وتدون وتكمل شغلها ويصاحبها صوت ابو نوره ,
,
~ قصر جراح~
فضى القصر تماماً من السيارات مابقى الا اهل القصر والكل كان يحمد ربه ان الليله عدت على خير جاهلين ان نايف كان ينتظر فقط ان آل غياث يروحون, وقف بنص المجلس ونطق بحده:يبه حفيدك الي تتباهى فيه ما حشمني قدام الرجاجيل!
رفع ساجي نظره لعمه ونطق:ما تستاهل احد يحشمك!
نطق نايف بحده:شفت يبه مو حاسب حساب لحد
نطق ساجي بسخريه:ان كانك رجال كلمني مو تكلم جدي لكن ذي عادتك تتكلم وتفعل بدون ما تواجهني
التفت نايف يتقدم لـ ساجي لكن صده سطام :يبه ماهو وقتك!
عند ساجي الي ما اعطى اي ردة فعل ينتظر هالليله تخلص وتأفف بملل يسمع كلام نايف:يا جد استاذنك
وقف ساجي يمشي ونطق بهمس:كثير كلام مغير ينابح!
طلع يمشي لسيارته وصد بنظره من شاف الحريم الي واقفين عند سيارة عمه وركب بسرعه يحرك لبيتهم وهو تعب وبشكل كبير مايدري كيف قدر يكمل ولا ينفعل اصابه تبلد لكن واخيراً يقدر يرجع لعزلته,
,
تعالت ضحكاتها من سمعت سياراتهم وهي كانت متاكده بيسوون لها مفاجأه ويرجعون الليله,ركضت لـ الباب تفتحه وصرخت من تقدم يحضنها عمر:بابي !
قبل كتفها ونطق:عيون ابوك!
ضحكت تشد عليه:وحشتيي
عُمر :والله اني فاقد بلد وانتِ مو معي حسبي الله على شغلك
ضحكت :حرام وش ذنب شغلي!
تقدمت نجود تحضنه :حبيبي وحشتيني!
قبلت خدها ونطقت:والله اكثرر
ابتسمت نجود ونطقت:جبنا لك مفاجاه معنا
تعالت ضحكاتها من طلعوا عذبي وهداج وسراج :احلى مفاجاه !
نطقت سراج بثقه:انا راعي الفكره
تقدمت رُوح تحضن عذبي:هذا حسنة المفاجاه
رفع هداج حاجبه:شف شف!
غمزت لهم تنطق:عريس خلوني اعطيه على جوه!
ضحك سراج:تعالي نعلمك وش صار
ابتسمت من جلسوا الثلاثي وطلعوا امها وابوها لغرفتهم تتربع وتصب لهم شاهي :اي وش صار؟؟
سراج؛عندهم ولد دخل في نص الجلسه دخوله غريب!
عذبي :هذا ثاني عياله ساجي بس له هيبه وكاريزما مو طبيعيه
هداج:بس واضح بينه وبين عمه مشاكل
عقدت حجاجها ونطقت:ليش؟
سراج :تعداه ولا سلم عليه
ميلت شفتها تفكر لكن قاطع تفكيرها هداج:ولا جدهم با انه غثني
ضحك سراج بعلو صوته:والله ان جدهم رهيب خل عنك!
ضحك عذبي:حدكم عاد الا اهل زوجتي
صرخت رُوح بتقليد:الا اهل زوجتي يايي!
سراج:غثنا وهم باقي يبون يردون لنا خبر
ضحكت بسخريه:يحرام يحزن!
هداج:المهم جدهم جاز لجدي ومسكوا خط سوالف وابلشنا ماغير يسولف عن شبابه
ضحك سراج؛بس للامانه دخول ذاك نار
هداج:العصبي؟
رُوح :مين؟
سند عذبي راسه ونطق:ساجي ثاني عياله
غمز هداج لسراج ونطق:حافظ شجرة العايله؟
ضحكت رُوح بعلو صوتها :اي عايله ذا حافظ السجل المدني حق كل واحد فيهم
سراج:واذا سالتيه ليش يقول لك الشغل
ضحك هداج بصدمه:دايم يسوقها علي!
رُوح :عليك مو علينا
سراج:مدري كيف دخل عسكريه؟
عذبي :هداج غبي في كل شي الا شغله
رفع هداج حاجبه بـ استغراب:قالك كذا هونتها؟
ضحك سراج؛نقدر نقول!
رفعت يدها تلعب بشعرها ووقفت:يلا دايخه نوم صاحيه من صباح ربي
سحب عذبي يدها يجلسها :من المراجع الي كان عندك
ابتسمت ترجع توقف:في شي يسمونه السريع بين المريض ودكتوره
ضحك عذبي من شافها رايحه لغرفتها ونطق:يلا وانتوا اذلفوا ابي انام بعدين كملوا هرجكم
ضحك هداج؛ربي نجاك من لسان جدتي لكن طحت بـ احفادها
ضحك عذبي بسخريه :احفادها كل واحد كف وينامون عشر ايام
سراج؛بمشيها لبعد عرسك عشان ما تتشوه!
سحب المخده يرميه ويوقف متجه لـ المجلس لمكان فراشه بحكم انهم ببيت عُمر,
-
صرخ بعلو صوته يرمي كل شي حوله:ما عاد صار لي احترام يا نوال؟؟
عضت شفتها نوال برعب من تصرفات نايف ونطقت:اهدا ومعليك فيه تقدر تطلعها من خشمه
نايف: معلي فيه؟ وين اصرفها ذي اقولك هاني وداس على كرامتي قدام الرجال!
سند سطام راسه ونطق:واللي انت سويته قليل يا يبه؟
التفت نايف يناظره بحده:الحين انت تدافع عن الي يهين ابوك!
هز راسه بـ النفي ونطق ببرود:انا لاني معك ولا معه انا مع نفسي لكن تبيها مني الغلط يا يبه منك وغلط ساجي انه يرد عليك بغلط
صرخت بيادر تقطع نقاشهم ونطقت: ساجي ما بعمره غلط!! دايم كان صح لو ما قلت لي ذيك الليله كان انا للحين زوجته !
فز سطام من سمع نبرتها ودموعها الي مو راضيه توقف تقدم يسحبها لحضنه ونطق:بيادر اهدي الموضوع ما يخصك
دفعته بقهر:مايخصني؟؟ دمرتوا قصة حبي!
صرخ نايف بحده:كان قلتي لا لو قلتيها ما صار الي صار لكن انانيتك كانت اقوى من حبك وضميرك
غمضت عيونها تنحي على الارض تبكي وانحنى نايف ينطق:وانتِ الغلط راكبك من راسك لساسك
انحنت نوال تدفعه وتسحب بيادر لحضنها وضحك نايف بسخريه:عرض رائع ابهرتيني زي العاده نوال الحنونه! نوال الي تدمر بين اخوان وتفرق الاحباب نوال الي تطمع فيك وانت حي
رفعت نوال نظرها له ونطقت :افا يـ نايف حب عمرك الي عصيت امك عشانها تقول عنها هالكلام
نايف:اني حمار عصيت امي
ضحك سطام و وقف يسحب مفتاحه:دام بدا عرضكم والفلم الي كل ليله انا استاذن
رفع نايف يده :اهرب زي عادتك!
ضحك بعلو صوته يشغل السياره ويتصل على وهاج الي سرعاً ما رد عليه:ابو ناهل
نطق وهاج بعبط:عيونه
نطق سطام بقرف:خل عيونك لك تخاويني
وهاج:وين وش يضمن لي ما تخطفني
رفع حاجبه ونطق:انت لو يعطوني ياك هديه ومعك فلوس ما اخذتك
وهاج:متاكد؟
ضحك بعلو صوته:على حسب المبلغ
وهاج:وينك عشان اجيك؟
زفر يثبت الجوال ويشغل السياره يحرك ونطق:مكانا المعتاد
وهاج:توصى بالشاهي
ضحك سطام:ابشر بس كيف تبيه
وهاج:شاهي احمر
كان بيرد سطام لكن تعالت ضحكاته من سمع وهاج الي ابتدا يغني :حبيبي شرب شاهي بنعناع
صرخ سطام:تكفى اسكت يعني لا صوت ولا ذوق
وهاج:اغاني الزمن القديم
سطام:اغاني اجل حتى الشيلات خليتها اغاني المشكى على الله
وهاج:ارفع علومك
نطق سطام بعبط:ارفعها بـ الضمه ؟
ضحك من قفل وهاج بوجهه ومد يده لـ المسجل يشغل اغاني يسمعها لحد مايوصل مكانهم,
,
فتح عيونه وهو مقدر ينام اصلاً كان مغمض والافكار تداهمه كان ندمان انه ترك عمه بس تعبه غلبه الضيقه سيطرت عليه كان جسد بلا رُوح بينهم لانه فعلاً مايحس بشي بس قرر يحضر مايدري ليش قرر لكن يحمد ربه انه ربي ستر وما انفضحوا قدام اهل العريس الي جاهل هويتهم لكن رفع جواله يشيك على المواعيد وسرعان ما عبست ملامحه عنده موعدين خلال الاسبوعين الجايه وكل واحد يوم احد مسح على وجهه:القها من نايف ولا من مواعيدها فز من استوعب ان موعده بعد بكره وشتم نفسه انه وافق على هالعلاج,
,
~ بيت ناهل ~
نزلت وهج كعبها ونطقت:يعني انا للامانه مصدومه كيف ساجي مشى الموضوع لعمي
سحبت ود المخده ونطقت:بنام وانتِ توك تفكين الكعب؟
تاففت وهج:شوفي انا وش اقول وانتِ وش تقولين!
ضحكت ود بحسره:اكيد كنتي تدورين العلوم الحمدلله عدت بدون فضايح
وهج:في ذي صادقه ولا كنا تفشلنا قدام الناس
ود:شرايك فيهم؟
ضحكت وهج:واضح رايي حبيبتي ياخذون العقل اساساً انا استغربت يوم عرفت ان عندهم عيال باين عليهم صغار
ود:وعيالهم بـ اعمارنا صدمه بس بصراحه ياخذون العقل
وهج:واضح نفس جو ماما يا حبيبتي
ود:يلا الله يستر انا متاكده ساجي ليصحى بيسوي سالفه
ضحكت وهج بعلو صوتها:لان توه يستوعب
انسدحت ود بتعب ونطقت:الا وين وهاج ؟ دقي عليه
ميلت وهج شفتها:تلقينه مع زوجته
ضحكت ونطقت:بالله دقي عليه مافيني رايي اتطمن!
ابتسمت وهج تاخذ كعبها وتنطق:يالله بدق عليه واخليك تنامين تصبحين على خير !
ابتسمت ود :وانتِ من اهله
طلعت وهج تقفل الباب ونطقت من رد عليها :وينك؟
رفع نظره لـ السماء المليانه نجوم ونطق:في احدى الاراضي
نطقت بتقليد:في احدى الاراضي اجل اقول وينك؟
ضحك ينطق: مع سطام
وهج:اجل تمام بس ابي اتطمن عليك
كان بيرد على كلامها لكن قفلت في وجهه والتفت على سطام:مايعطون الواحد فرصه يتكلم!
ضحك سطام :والله وانا اخوك لو انك عايش ببيتنا هجيت
وهاج:الحال من بعضه
سطام:يالطيب بيتكم هادي بيتنا صراخ بصراخ
وهاج:تفضفض لي وانا محتاج افضفض لحد
ضحك بعلو صوته ونطق:اعطيك نكته؟
وهاج:لا شكراً
سطام؛تدري ليش كرستيانو يحب البرتقال؟
وهاج:عارف التكمله لا تكمل يا تافه
تنهد سطام بـ اسى :عيب عليك ومشاعري
وهاج:محد مهتم لمشاعرك
سطام:ترا اذا تزوجت بتشتاق لي
وهاج :ادعي ليل ونهار ربي يزوجك
رفع الفروه يدفي نفسه ونطق بحسره:خلني بس اتخارج من هالتخصص!
وهاج:مردك بشركة جدي
ضحك سطام :يالله يا رجال السنه الجايه خريج وش هديتي؟
وهاج :يالله اهدي نفسي بعدي انا مهندس لو سمحت
سطام :وش تبون بالهندسة كلكلم يا عيال ناهل دخلتوها ما عاد ود عرفت تدخل قانون
وهاج:ما تخبر ساجي؟
سطام:ساجي مو بس هندسه ساجي لغات وعنده خبره بكثر من مجال ولا تنسى شهاداته وفوق ذا عقله ماشاءالله انا يالله افكر قبل اتكلم
وهاج رفع حاجبه بـ استغراب:طلعت زينا تفكر؟
ضحك سطام ونطق:تحسبني ناقه؟
هز راسه بالنفي ونطق:احسبك؟ لا كنت متاكد
تعالت ضحكاتهم واكملوا حديثهم وحواراتهم وهم ما كانوا يملون من بعض ابد,
,
صباح اليوم الثاني نزلت لـ الصاله الي كانت فعلاً فاضيه لكن سرعان ما اتسع ثغرها من شافتهم من الزجاج مجتمعين بالحديقه الخارجيه سحبت الوشاح حقها تطلع لهم وهي تغني بعلو صوتها:سنتين على الدرب تايه محد من الناس يابه!
تعالت ضحكاتهم من سمعوا صوتها وضحك متعب يغني معها:يرشدني على الي احبه
ركضت تبوس خد متعب وتحضنه يغنون مع بعضهم:وينك يا درب المحبه؟ هل اقفلوك الحبايب!
ضحك عزام بعلو صوته:صوت ابوي و رُوح الروح في احلى من كذا؟
ضحكت ترفع اصبعها:اذكر الله!
ضحك متعب من ضحكتها:وهي صادقه اذكر ربك
هز عذبي راسه بـ اسف:صدقوا ان صوتهم حلو
رُوح :ان ما احترمت نفسك ما بغني في عرسك
عذبي:دام الموضوع كذا كل يوم بقل ادبي!
تعالت ضحكاتهم ونطقت عذبه:اقعدي افطري
رُوح :عاد اليوم مافي شي يعكر مزاجي ! لاول مره احب يوم السبت
تنهد متعب ونطق:حسبي الله على شغلك وشو له تداومين الجمعه
عبست ملامح نجود تنطق:تشوف يا عمي يعذبون بنتي!
ضحك عمر :دام نجود خرجت عن صمتها راح تنفلت على دوامك
ضحك عمر :دام نجود خرجت عن صمتها راح تنفلت على دوامك
ضحكت رُوح : يلا اخر مره احط مواعيد الجمعه
تنحنح عزام ونطق :باقي ابي اسولف معك بعدين وتساعديني
هزت راسها بالموافقه والتفت لـ امها:اي كيف شفتي العروس؟
نجلاء؛والله حلوه تاخذ العقل
نجود:لاول مره عذبي يكون عنده ذوق!
التفت عذبي يناظرهم ونطق:كاني سمعت اسمي؟
هزت رُوح راسها بـ ايه:ماما قالت لاول مره يكون عندك ذوق
صرخت بـ الالم من ضربتها نجود:مو كل شي نقوله
رُوح :انا شدخلني هو اللي سال
عذبي :طول عمري ذويق يـ ام رُوح زوجك الي ماله في الذوق
التفت عمر يناظره ونطقت رُوح :لا يـ حبيبي الا بابي!
ضحك سراج بعلو صوته:الا بابي قالك بنخاف؟
هداج:يمكن نخاف؟
رفع عُمر حاجبه ونطق:وانا ودي اربي الي يحتاج تربيه
عذبي:جيب غير القرده ذي وطبق التربيه على عيالك
سحبت رُوح المخده ترميها عليه:ماغيرك القرد!
سراج:ورع لا تغلط على اختي!
هداج:ترا نهد الدنيا
عذبي:وانا بهد حيلكم هنا شرايكم ؟
هداج:للامانه ماله داعي مو عشان شي عشانك عمي خوفاً عليك
هز سراج راسه بـ ايه:عيب بحقك تطلع من هنا مكسر عشانك
عذبي:لا صدقني ما علي
سراج:لا لا عيب
تنهد متعب بحسره:رايحين لـ ابوكم ماعليكم عتب
ضحك عزام :افا يذا العلم؟
عُمر:اي والله عزام مايستحي
التفت عزام يناظر عُمر:ماصدقت على طول شتمتني؟
عذبي:لاول مره عُمر يكون صادق
عدلت رُوح جلستها رجل على رجل:اولاً عموري مايقول الا الصح ثانياً عُموري دايم صح!
عذبي: القرد بعين بنته غزال
رفعت عذاري حاجبها:حتى الامثال ما فلحت فيها؟
تعالت ضحكاتهم ونطقت رُوح :جده تختصر الموضوع بثواني !
وقف عذبي يسحب مفتاح سيارته:بطلع اخذ قهوه تخاويني ولا يكثر؟
ميلت شفتها لثواني تفكر:ما اقول لا
هداج:جيبوا لي معكم اربعه شاورما
التفت عليه بصدمه:لا اله الا الله اربعه؟
هداج:وش عليك من جيب ابوك؟
عُمر سحب حذيانه يرميها عليه:اذا بنتي قالت شي ما ترد عليها فاهم؟
هداج:يوه الله يعين الي بياخذها عمي بيستقعد له على كل كلمه
عُمر؛اكد ذي روح الروح
التفت ترسل له بوسات ونطق عذبي:اعجلوا علي انتوا وحبكم المخيس
سراج:قالك لا يبدا يومي الا بشرب القهوه؟
هداج:راعي كيف وش عرفك؟
ضحك عُمر :حدك عصير برتقال
عذبي:مايروقني الا V60
ضحكت رُوح ترفع الطرحه على شعرها:ماضنتي بس اذا جاك خفقان ودوخه بسوق بدالك
هداج:يارجال حدك شاهي
التفت تناظره: الا الشاهي خط احمر
سحب عُمر اقرب حذيان يرميها على هداج:كم مره اقولك لا تزعل بنتي
صرخ هداج :يبوي وش حلاوه هي كل ما ضاقت فيك الوسيعه صفقتني؟
سراج نزل الحب ونطق:يعني بحق يا عموري الا اخوي
هداج:سراج اضربه بالحذيان
سحب سراج الحذيان يرميها بعيد عن عمر :رميتها بعيد عشان سلامتي وثاني شي الا هداج خط احمر , تعالت ضحكاتهم من التفت لـ هداج:وين ضربك؟
اشر هداج على كتفه وقرب يبي يبوس كتفه وصرخ بـ الم من لكمة هداج:استح على وجهك
ضحك بـ الم:كنت بتفل عليك يـ المخيس!
في السياره التفت يناظرها:روري
رفعت نظرها له ونطقت:وش عندك؟
ابتسم بخفه:افا كم عندي رُوح اكيد لازم ادلعك!
رُوح ؛اي اي معليك اقول وش تبي بس؟
عذبي:تقدرين تجيبين لي رقم ود
شهقت تنطق:استغفرالله تبيني اكون جزء في هذا الشي لا يعني لا تزوجها وخذ رقمها انا مالي شغل
عذبي:اجل ادفعي قهوتك
رفعت حاجبها:شين وقوي عين
عذبي:وش ترا بتصير زوجتي
رُوح :مدري احس ما ابي اساعدك احسك نذل
التفت يناظرها بصدمه:انتِ احد مطيح شي على راسك؟
ضحكت تهز راسها بالنفي :مجرد احساس
عذبي:طيب بتصير زوجتي فكري فيها ؟
رُوح:شايفني ايش جيبه بطريقتك انا لا تدخلني في مواضيعك!
,
~ بيت ناهل تحديداً غرفة ود~
ابتسمت من دق الباب :مين؟
ضحك يفتح الباب ونطق:ما عاد صرتي تعرفين من يدق الباب
ضحكت بعلو صوتها:طبعاً الانسان المحترم بذا البيت بابا الحلو
تقدم يقبل جبينها ويجلس امامها:اي وكيف عزيمة امس؟
ود:حلوه والله
ناهل:والله والنعم فيهم امس كاني اعرفهم من سنين
ود:مره عسولين حتى كلامهم عسل
ناهل:رجال ماشاءالله واخوك ما قصر دخل دخول غير متوقع
ضحكت ود:متى امداه؟
ناهل:خلص جلسته الصبح ومشى
ود:صراحه انصدمت ماتوقعت يجي ابداً!
ناهل:وهو وعمك فضحونا شوي
ود:بابا عاد من يلوم ساجي
ناهل:محد يلومه بس مو قدام الناس؟
ميلت شفتها تستمع لسوالف ابوها لحد ما نطق:والله عذبي ماشاءالله عليه رجال والكل يشهد له
بلعت ريقها لانها عارفه ابوها وش بيقول و وش بيكلمها فيه وعارفه ان كل هالسوالف عشان يفاتحها بـ الموضوع لان هذا طبعه شدت على قبضة يدها من نطق:انتِ عارفه يـ نور عيني وفرحتي ان كل مايجيك شخص ترفضينه واحترم رغبتك وعارفه سبب زيارة آل غياث امس لوش وانا طول وقت رفضك عارف ليش ترفضين لكن هالمره نختلف عذبي شهادتي فيه مجروحه وانتِ عارفه وهالمره استخيري وخذي وقتك وردي لي الخبر كان سبب رفضك هو  ساجي لكن بتقعدين كذا لمتى؟ بتوقفين حياتك؟ فكري زين واستخيري وماراح يصير الا الي يرضيك وساجي بأذن الله مايجي عرسك الا وهو زي قبل واحسن واعرفي ان مستحيل اجبرك على شي الي تبينه بيصير والي تامرين فيه هو الي بيمشي يـ ودادي , ضحك من لمح لمعة عيونها ونطق موج عيونك ما يوفر؟
وقفت تتقدم نحوه وترتمي لحضنه شد عليها من دمعت :لو اني داري بتبكين ما قلت كلام حلو!
شدت عليه وسندت راسها على صدره مجرد التفكير انها بتترك هالرجل العظيم بكل صفاته و تتزوج وتكون عائله يخليها تنهار,
-
~ مكتب عزام~
دخلت تنزل شنطتها وتنزل الطرحه على اكتافها تحرر شعرها وابتسمت من نطق:والله تو ما نور المكتب بقدوم رُوحي
رُوح :بنورك
عزام:مجهز لنا شاهي لان ورانا نقاش طويل
ابتسمت بخفه :دامه مع عزام راضيه ومستعده اخوضه !
ضحك يمد لها كوب الشاي ونطق:كيف كانت اول جلسه ؟
رُوح :غريبه
رفع حاحبه ينطق بـ استغراب:شلون غريبه؟
نزلت كوبها ونطقت: كمية غرابه لكن قرر يستمر بالعلاج
ضحك بعلو صوته:يعني مافي مجال اعرف وش صار؟
رُوح :مقدر اطلع اسرار المريض المعذره
عزام:ولو ناهل سال
رُوح :بقوله نفس الكلام هم يبي ولده يصير بخير صح ؟ طيب انا بحاول لين يرجع زي مكان وبعدها محد له علاقه بالكلام الي يقوله بالجلسات
عزام:والله انه رجال وعليه عقل يوزن بلد شركة ابوه حق عقارات واراضي ومن هالكلام كان يديرها وهو بعمر الثلاثه والعشرين
رُوح :مهندس هو؟
عزام:مهندس و رجل اعمال وله اكثر من مشروع خاص فيه ويتكلم اكثر من لغه
كانت تسمع كلام عمها لان هالشي بيساعدها وكثير انها تنهي الجلسات بدري وما تتعب معه لانها اذا فهمت شخصيته بتحل كل شي , نطقت بـ انبهار:شخصيه غريبه مليانه مفاجات
ابتسم عزام:دام انتِ الي ماسكه حالته ما بيصير له الا كل خير
رُوح :ان شاءالله
عزام:وش تبين بس؟ لانك بقبولك لحالته رديتي لي جميل لـ ناهل!
ميلت شفتها تفكر ورفعت الكوب:تعطيني هالكوب هديه
ضحك لانه يعرف ان اكوابه مميزه واشكالها غريبه وهي تعرف وش كثر يتعب على ما يجمعها :طلبتي شي غالي بس تستاهلين
رُوح :ما يغلى علي شي
عزام:بنت عمر هو انا اقدر اقولك لا؟
ضحكت تكمل سوالفها معه على هالموال وكان الضحك سيد هالجلسه الحنونه,
,
رفعت حاجبها بـ استغراب من الرقم الي ارسل لها من جديد يطلب رسمه ميلت شفتها تكتب " وكالعاده اكيد الرسمه متعبه" عقدت حجاجه من ارسل "ما يصعب عليك شي برسلك صورة الرسمه " قعدت لثواني نتنظر لحد ما ارسلها صوره مليانه تفاصيل وصوره غريبه وفيها صورة لـ رجال مو باينه ملامحه لكن تنهدت لانها طفشانه وتحتاج ترسم وما في بالها اي فكره رفعت الجوال تكتب له " بعد اسبوع تقدر تستلمها " قفلت جوالها ترميه وهي مستغربه فعلاً من هالشخص الي فجاه يطلبها رسمه غريبه وصعبه تاخذ منها ساعات طويله , رفعت شعرها وتقدمت تجهز لوحتها واغراضها لاجل تبدا ترين لانها مشتاقه بالحيل لرسم لكن قاطع افكارها دخول ود:وهج!!