عام الحُب 2 (مكتملة)

قضية.. ")

- وبس يـَ فندم بعدين ضربته بالقلم وبالشنطة وبكوعي وصرخت وندهت عليه الناس أتلموا عليه ظبطوه
- اممم طيب يا آنسة أي أقوال تانية؟!
- مدام يا فندم
- نعم!! أنتِ لسة...

سمعنا صوت من عند الباب بيقول
- لسة صغيرة مش كده؟!
وقف ساند علىٰ الباب وبيشمر كمام القميص، بلعت ريقي وسكت
- زياد باشا عاش من شافك يا راجل مش بتيجي ليه؟
- عامل أي يا عز؟ معلش ظروف والله ، المهم أنا عايز الآنسة الصغيرة دى
- مش فاهم
- مراتي..!
الظابط بصلي ورفع حاجب وبص لزياد اللي عينه متشالتش من عليا:
- مراتك.. أحم معلش يـَ فندم مكنتش أعرف، علىٰ العموم القضية مقفولة دا واحد حاول يسرق شنطة الآنس.. قصدي المدام وأتقبض عليه
هز راسه وأبتسم بإبتسامة صفرا للظابط ومسك أيدي ومشينا..

- أتفضلي واقفة عندك ليه
-...
كُنت ساكتة طول الطريق آه أنا أتخانقت معاه وآه سبت البيت ومشيت من غير ما يعرف، بس هو ضاغط عليا جامد بيأذيني بتعامله وتصرفاته دى! مش أوي بس مقفلها
فاكرة لما والدي مات وكان آخر حد فاضلي

- لاحول ولا قوة إلا بالله كان راجل طيب شدي حيلك يا بنتي

الطبطبة هي الشئ الوحيد اللي بلاقيه دلوقتي، آخر خيط ليا في الحياة مات وآخر أمل وفرحة ليا أختفي، أنا عندي 19 سنة لسه هكملهم كمان شهرين أمي اتوفت وهي بتولدني واللي فاضلي كان بابا، بابا كان مريض قلب وقلبه ضعيف جدًا، قبل ما يموت
- أسمعي يـَ سديم رني علىٰ عمك حسن خليه يجيي هو و زياد
سمعت كلامه ورنيت علىٰ عم حسن صاحب بابا من الطفولة إثنين أصحاب ولكن أنا بشوفهم بقول أخوات وأكتر ما بالك بالغريب!!
- حسن الأمانه اللي أمنتهالك دى وصيتي، بنتي هي أمانتي خلي بالك مِنها وخلي زياد يحافظ عليها
- بابا أنتَ بتقول أي!! زياد أي أنتَ أصلًا هتفوق وهتبقي كويس إن شاء الله
- أنتِ لسة صغيرة يـَ بنتي مش هتستحملي البهدلة مِن بعدي، أسمعي الكلام مش عايز حاجه غير راحتك، أنتِ مش هتفهمي عشان صغيرة لسة بس مش هتعرفي تواجهي العالم لوحدك معودتكيش علىٰ كده

ـــــــــــــــــــــــــــــــــــ

دخلت وأنا بنفخ ورميت الشنطة علىٰ الكنبة وقعدت..
قعد قصادي علىٰ الكرسي وربع أيده وبصلي بنظرات جادة:
- طبعًا أنا مش هتكلم في إنك نزلتي من البيت من غير ما تقولي، و عدم تقبُلك لوصية والدك الله يرحمه المفروض العكس!!
المفروض أنا اللي ما أتقبلش دا، ولكن بعتبره زيه والدي بالظبط.
عايز مبرر واحد يخليكي تسيبي البيت؟

وقف وهو بيمسح وشه في أيده وقالي:
- سبتِك براحتِك محبتش أضغط عليكي مبزعقش ولا بتعصب ولا بعمل أي شئ، أنتِ عايشة في أوضة وأنا في أوضة وكان كل واحد عايش لوحده، الحاجة الوحيدة اللي بتجمعنا هي الأكل، أنا غلطت في حاجه إني نفذت وصية والدك وأتقيت ربنا فيكِ؟!!

قلبي وجعني من كلامه وضغطت علىٰ صوباعي كعادتي أتكلمت بتهته في الأول بعدين عدلت كلامي وقولت:
- أنتَ عارف أنا لسة مكملتش ال19 هو ليه بابا تخيل أنه لما يجوزني بالطريقة دي هبقى كويسة!! يجوزني بوصية؟!
أنا كُنت عايزة أكون زي البنات التانية أحب وأتحب وحتىٰ لو جواز صالونات علىٰ الأقل فيه فترة خطوبة أتعرف فيها علىٰ الشخص اللي هكمل معاه عمري، هو العمر بيتكرر مرتين!!
سكت أخدت نفس كبير واتكلمت:
- أنا معرفكش أنا بشوفك صُدف، مرة مع والدك لما نقابلكم وأستأذن وأمشي، ومره لما بابا يعزمكم علىٰ الغدا يـدوب بحضر الأكل وباخد أكلي وأدخل أذاكر أصل كل كلامكم عن الشغل والقضايا وأنا مليش مكان معاكم، فجأة كده اتجوزك؟! هه

إنتهت المحادثة علىٰ لا شئ غير أنه قالي:
- عايزة تنزلي تقوليلي وأنا هنزل معاكِ

ـــــــــــــــــــــــــــــــــــ

والدي كان محامي كبير ووالد زياد نفس الشئ، بس زياد حب يدخل شرطة، زياد عنده 26 سنة يعني الفرق بيني وبينه 7سنين مش كتير عارفة بس أختلفت الأمور عن توقعاتي، شكل القدر بيلعب معايا لعبة سخيفة
- قررتي هتدخلي جامعة أي؟!
بصتله وأنا عيني للفراغ وقولتله:
- كنت عايزة أدخل حقوق بس لأ كده كده الحاجه اللي ببقا نفسي فيها مش بتتحقق أنا هدخل هندسة
بصلي بنظرة حزينة وقام من قدامي

- في فيلم جاي الساعة 10 أنا هستلم التلفزيون
- مستحيل في ماتش الساعة 10 برضو
- بص بقا أنا أصلًا مش بقعد غير في الأوضه ومبطلعش غير علىٰ أفلام توم كروز أو فيلم رعب فـَ اتلحلح كده عشان أنا اللي هتفرج
- اتلحلح!! لا أطلبي بأدب
- مستحيل
- يبقى لا
- بطل رخامة
- تؤ تؤ أطلبي بإحترام وأنا هسيبك

إتعصبت مِنه ومشيت بس ولو ولو روحت شيلت فيشة التلفزيون بس للأسف كان فيه سلكه ظاهرة منه وأيدي كانت هتيجي عليه وهتتكهرب لولا زياد اللي سحب أيدي بسرعة وقالي:
- أنتِ مجنونة، ايي عايزة تموتي وريني كده هاتي
مسك أيدي يبص فيها
- مـ.. متخافش أنا كويسة
- متعمليش الحركات دي تاني أنتِ لو عايزة حاجة شدى الريموت عادي
- يا راجل!!
- آه، ثم أنك بتقولي فيلم أي اللي جاي؟
- فيلم MaMa
- هممم دا رعب دا!
- آه

سكت شوية وقعد على الكنبة وقالي:
- جهزي الفشار يلا
- بجد؟!!
أبتسم - بجد.

- ألحق بص أخدت البنت
- علىٰ فكرة دا رعب المفروض تخافي!!
- بس يـَ زياد دا حزين جدا رعب أي بس.. اعااا قطع راسه قطع راسه
- يـَ بنتي أنا اللي راسي هتتقطع في أيدك

ـــــــــــــــــــــــــــــــــــ

العالم ممكن يبقى حلو بإبتسامة وكوباية شاي بنعناع آه والله
- هو أنتِ ممكن تحبيني في يوم؟
- ممكن ليه لا! الحب مش بالأيد الحب بيجي يخطفك كده من وسط مليون حاجه عشان تفكر في شخص واحد بس
- طب تعرفي أن أنا بحبك وفرحت لما والدك طلب إني اتجوزك في وصيته، هو كده كده كنت هتقدملك بس والدك قدم الموضوع شوية
- يا راجل؟ مش مصدقاك
- مش موضوع تصدقي، موضوع تحسي.
أنتِ محستيش بيا لأنه كان زي إجبار ليكِ والدك جابرك ومش قادرة ترفضي

مسكت كوباية الشاي وأنا بدفي أيدي بيها وقولتله:
- تفتكر مع العِشرة وطول المدة تحب حد
- أفتكر وليه لأ الحب عمره ما كان بالأيد ولا أي؟
- طب تعرف إني حبيتك!! يمكن العشرة والمحبة وتعاملك معايا حركوا حاجة لطيفة في قلبي حاجة أتمنى تفضل للأبد

#هايدي_إبراهيم
#سديم