عام الحُب 2 (مكتملة)

كمل يا غالي لسة في حواديت كتير

- والله ما عملت حاجة دى كانت خبطة بسيطة
- خبطة بسيطة تكسري فيها رجل الراجل يـَ سديم؟
- أنتَ اللي مردتش تعلمني السواقة أعملك أي؟!
- سديم أمشي مِن وشي
- ليه؟
- أمشي عشان مطلعش عفاريتي عليكي
- طب أهدى بس مش أنتَ حليتها وعوضت الراجل خلاص

هبد أيده على المكتب وقالي:
- لو مِش هتمشي هتضطر أعلقك قدام باب المكتب تتعلمي درسك كويس
- لا وعلىٰ أي سلام

جريت مِن قدامه وأنا قلبي مرعوب، فاكرة لما دخلت القسم والراجل رفع عليا قضية وبطريقتي الرخمة كالعادة عصبت الظابط وكان هيمد أيده عليا لولا زياد جه وهزقه ودفع للراجل المتجبس فلوس وشدني من قفايا ومشينا

أنا من النوع البارد في كلامي واللي ممكن أشلك وأقف أبتسم آه والله، ودى حاجه معصباهم بس دي شخصيتي وأنا مش من النوع اللي أغير شخصيتي عشان حد

ـــــــــــــــــــــــــــــــــــــــــ

- سديم فين يـَ خالتى؟
ماما مسحت أيدها وراحت له وقالت:
- مفيش سلامه عليكم أو أي حاجة داخل دبش كده يا زياد؟! المحروسة بتاعتك فوق يـَ أخويا

كُنت سامعاهم من أول السلم ولما اتحرك نحيتي جريت قبل ما يشوفني دخلت الأوضة حطيت الهاند فري في ودني وعملت نفسي مِش عارفه حاجه
خبط خبطين فقولت:
- أتفضل
- طبعًا وصلك اللي حصل؟
- أي اللي حصل؟!!
بصلي بشك وقالي:
- يعني مها مقالتلكيش حاجه؟
هزيت راسي بلأ
- طب هقولها تاني الراجل اللي كسرتيله رجله مِش موافق علىٰ التعويض وناوي علىٰ شر
بلعت ريقي للمرة اللي مش عارفة كام من الرعب وأنا مش مطمنه، طلع راجل واصل أوي ومش هيسكت بس دى...دى كانت حادثة عادي.

طبعًا بعد تهزيق كبير من زياد وبهدله أتمنعت إني أنزل الجنينة حتىٰ بس أي دا زهقت، أتصلت علىٰ مها وطلبت منها تيجي تقعد معايا شوية
- مهااااا اخلصي يلا
- يووو أستني أقول لزياد
- طاايب

....
- مها أنا زهقت كل دا عشان بس خبطت واحد؟ بعدين مـَ هو زي القرد أهو يـَ دوب كسر في رجليه آه
- يا دوب هممم
- تيجي ننزل
- لا
- عشان خاطري
- لا أنتِ عاوزاه يعلقني
- بالييز يا صاحبي بصي هعزمك على شوارما وبيبسي وهجبلك الآيس كريم اللي أنتِ بتحبيه!!
- اممم موافقة بس لو اتقفشنا هقول إنك أنتِ اللي خلتيني اتدبس فل
- فل

غيرنا هدومنا وخدت الشنطة ونزلنا تحت
- رايحين فين؟
- في وظيفة كُنت مقدمة فيها من زمان يـَ ماما ووافقوا يعملوا انترفيو
- قولي لزياد
- لا مش لازم مها قالتله وبعدين أنا مخصماه يلا عن إذنك

مسكت أيد مها وجريت برا البيت نزلنا اتفسحنا وكلنا وخدنا صور كتير
- ييي مها نسيت التلفون جوا استني هجيبوا
- متتأخريش

لما تبقى عيني بتتخيل كذا شخص واقفين حواليا وأفتح عيني علىٰ بسم الله الرحمن الرحيم شيطان بكرش!!
آه والله زي ما بقولكم كده، كنت مفتحة عين وعين لأ قال أي عاملة نفسي مش صاحية
- براحة علىٰ البنت يـَ ريس
- ما تهدي يـَ أحمد فيه أي هي أول مرة نخط'ف
- يـَ خوفي من دماغك دى

حاولت أفتكر اللي حصل في المطعم آخر حاجة فكراها أن نسيت موبايلي وروحت أجيبه وفجأة حد شد أيدي جامد نحية المطبخ وحط حاجة علىٰ وشي يعني أنا دلوقتي اتخط'فت احييي أنا مخطو'فة يختاااي
فوقت أو عملت إني لسة فايقة وكده وأول كلمه جات علىٰ لساني
- أنا جعانة
- أي البنت اللي داخلة بكرشها دى، يـَ آنسة أنتِ مخطوفة وكمان خاط'فينك من مطعم بعد ما أكلتي أي شايلة اللوز!!

ضحكت وقعدت استربعت وقولتله:
- إكرام المخطو'ف إنك تأكله وأنا وبنوته غلبانه وجعانه وكده حرام أفرض مت!!
الراجل الكبير اللي خطفني هيعمل فيكم أي
- وليه متقوليش أن أنا الراجل الكبير
- تؤ مش عاطي الكارزما بتاعته، اما يبقي أخد ستميت غرز'ة في وشه أو يكون جنتل من اللي بيلبسه البدل ويشربه السيجار وكده

سمعت صوت ضحك من عند الباب بيقول:
- عليكي نور وأدي السيجار أهو يا ستي
- أنتَ مين؟
- أنا ابقى ابن الراجل اللي كسرتيله رجليه
- شكلي مش هخلص من السيرة دى، يـَ أستاذ جات غلط والله هو زياد الكلب اللي معلمنيش السواقة عدل أعمل أي وبعدين مش أنا اعتزرت ليه وعوضته واتراضينا ليييه بتكبروا المواضيع ها ها؟

بصلي من فوق لتحت وجه يمشي وقفته كلمتي المعتادة:
- أنا جعانه
ضحك - أكلوها
تك قرف في تقل دمك وأنتم كلكم بكرش كده، تعالوا شوفوا زياد حبيبي اللي مليان عضلات اللهم بارك من غير قَر ولا حسد دقي علىٰ الخشب يا بنتي

أنا عارفة أن العصابات دى لما بتخطف بيحيبو أكل حلو كده يتاكل بس الحمدلله وقعت في عصابة بخيلة جابولي فول وطعمية هوف
أتمشيت شوية في الأوضة ومن الظاهر عاملين احتياطتهم كويس فتحه شباك واحدة متقفلة بحديد وبغلين واقفين علىٰ الأوضة من برا يـَ مسهل شكلي هستنى زياد، يـَ ترى عايش إزاي من غيري؟!

زمانه فرحان وعامل حفلة دا يبعني ويدي فوقي مروحه بس..، سمعت دوشه جامدة برا وهبد كتشير شكلهم بيعزلوا باين كده احييي أحسن ينسوني
- يا ناس يالي هنا، يا بتاع يا أبو كرش أنتَ

سمعت صوت بوليس برا ودوشه عند الباب وأكيد هو اللي في بالي أول ما فتح الباب كان زياد!!
تلقائي جريت عليه وصرخت
- زيااد بقيت الفارس بتاعي تخيل!
- قدامي يا جلابة المصايب
- شكرًا يا رجولة

ركبنا العربية فقررت أستفزه شوية وأخرجه عن شعوره
- زياد مش المفروض إنك هيرو وانقذتني وكده والمفروض دلوقتي تتقدملي؟!
- المفروض أي؟
- لازم تعرف إني خلاص مدام حبيتك تبقى بتاعي.
دا أي شغل التملك دا لا طبعًا أنا راجل حر
- خلاص هسبلك حريتك وهوافق علىٰ العريس اللي ماما بتقول عل..
- مين دا أن شاء الله قدامي علىٰ امك أما نشوف آخرتها أي

بيغير والله يا جماعة أنا عارفه
- يعني عايز تتجوزها
- قولت أعطف عليها وأكون ليها زوج قبل ما تعنس
صرخت - نعم طب مش موافقه بقا ها...

جماعة هو ليه المُعاملة بالإكراه ها ليه الحاجة متجيش باللين كده وهدوء أعوذ بالله؟
- دلوقتي أنا بقيت حرمك المصون وكده صح!
- أيوة
- خلاص يبقى تعلمني السواقة بقا!!!
- أنا بقول نبيع العربية دى أحسن

هو أنا قولت حاجه غلط؟! هه

#النهاية
#حاجة_خفيفة_كده
#هايدي_إبراهيم
#سديم